“Sun Tiong-san m̄-si lán ê kok-hū!”
Goá tı̄ chàu-kha án-ni tiông-ho̍k,
Gín-á-sı̂ pē-bú tùi goá ê hó͘-tēng,
Kap in pı̂ⁿ-pı̂ⁿ kian-koat.
Lí chhiú the̍h khò-pún, cháu-lâi mn̄g goá:
“Á-bô, lán ê kok-hū sı̄ siáⁿ lâng?“
“Tâi-oân iáu bô kok,
Ná oē ū kok-hū?”
Tiáⁿ-lāi ê thng teh kún, chúi-ian chhèng-chhut.
Lí kim-kim siòng goá, bô chhut poàⁿ-siaⁿ,
Ou pe̍h hun-bêng ê ba̍k-chiu,
kiám khoàⁿ oē chheng
Tà bông-bū ê le̍k-sú?
Goá ná-chhiūⁿ khoàⁿ-tio̍h,
Kúi-nı̂-āu
Chı̍t-ê bı̄n-sek chhiⁿ-sún, sin-hêng siau-sán ê siàu-liân-ke,
Thún-ká tı̄ le̍k-sú ê loān-liû,
Chhoē bô pha-tiāⁿ ê hong-hiòng.
Bô huih-sek ê chheng-chhun-kı̂,
Kap goá ê chhin-chhiūⁿ.
Nn̄g-tāi lóng tha̍k kāng-pún
Pe̍h-chha̍t ê sı̍t-bı̂n-toē le̍k-sú.
Che lóng in-ūi
Boē-hù khí chı̍t-ê kok,
Ngiâ-chih sin ê sè-tāi chhut-sı̀.
Boē-hù têng-thâu siá chı̍t-phō͘ le̍k-sú,
Chiâⁿ-choè lín khak-lı̍p chū-ngó͘ ê kun-kù.
Kap goá ê pē-bú sio-siāng,
Tùi āu-tāi ū chhim-chhim ê khui-khiàm,
Chı̍t-tāi chı̍t-tāi,
Kiám tio̍h koh kià-bāng chiong-lâi?
Tı̄-sı̂ chiah thang thè lín khí chı̍t-ê kok?
Chı̍t-ê boē koh bê-he̍k ê jı̄m-tông
Thè lín siá chı̍t-phō͘ sin ê le̍k-sú,
M̄-bián koh tò-péng-tha̍k ê kı̀-lio̍k?
Koh hō͘ lín chı̍t-ê kok-hū,
Chin-chiàⁿ hiàn-sin tı̄ kiàn-kok kang-thêng,
Oē kham-tit choè sè-tāi kiàn-chèng,
Tâi-oân-lâng cheng-sı̂n ê kng-teng?
(Tâi-bûn Bóng-pò tē 62 kı̂, 2001 nı̂ 11 goe̍h)
