Hō͘ i ê 1 tiuⁿ phoe

 Chhin-ài ê H.P.: 
 Tı̄ goá siá chit-tiuⁿ phoe ê sı̂-chūn, lí eng-kai chá tō tńg khı̀ kàu chhù--ni, kap chhù--ni ê lâng chò-hoé--a! 
 Hit-mı̂, goá tı̄『河濱公園』, tiām-tiām chē tı̄ lí piⁿ--á, it-tı̍t teh khoàⁿ lí ê bı̄n, kàu goá beh khún--a, koh teh『描摩』hit-ē iáⁿ. Āu--lâi, goá khai-sí siūⁿ lí kóng ê oē, siūⁿ lí sı̄ án-choáⁿ hiah-ni kín tō beh kā goá ê chhiú pàng--khui.
 Goá sı̍t-chāi m̄ chai-iáⁿ sı̄ án-choáⁿ, boé--á, koh cháu tńg-khı̀ goân-lâi ê só͘-chāi, lim-1-koá chiú,tó tı̄ thô͘-kha, khoàⁿ thiⁿ téng ê chhiⁿ. Tı̄ chit-ê sı̂-chūn, tang-pêng chhoe lâi 『秋初』ê『晚風』, koh ka siōng thiⁿ-chhiⁿ ê kng, hō͘ goá siūⁿ khí 1-kù oē: 
 “Ióng-iú ài ê lâng bô su-iàu hoân-ló; teh cháu-chhoē ài ê lâng bô sı̂-kan hoân-ló.” 
 Goá teh tui-kiû lí ê ài--a, kám m̄ sı̄ ? 
 Hoān-sè, lí kám-kak goá m̄-sı̄ hit-ê ē-tàng khan lí ê chhiú ê lâng; hoān-sè, lí tō sı̄ hiah-ni-á khut-kiông, beh 1-ē lâng kiâⁿ ka-kı̄ ê lō͘. 
 I don’t mind. Goá kan-taⁿ beh kā lí kóng: bô-lūn lí sı̄ tı̄『豐裕』ê『蘭陽平原』; iah sı̄ tı̄ hoân-hoâ ê Tâi-pak siâⁿ; sı̄m-chí tı̄ Deuchchland (Tek-kok) pêng-chēng ê chng-kha, goá lóng goān-ı̀ tiām-tiām chē tı̄ lí piⁿ--á, khoàⁿ lí ê bı̄n, thiaⁿ lí kóng lí ê khoài-lo̍k kap pi-siong. 
 『編織』hó ê hong-chhoe, pit-su ài ióng-kám khı̀ poe, jı̄m-hô lâng lóng pı̍t-su ài chiok ho̍k. Goá, ē kı̂-thāi hit-kang lâi-kàu. 
 Ē-sái tú-tio̍h lí, goá sı̍t-chāi chin hēng-ūn! 
 Chiok lí sūn-sim! 

(TGB Thong-sı̀n tē 2 kı̂, 1999 nı̂ 11 goe̍h)