Ha̍k-hāu-piⁿ ê KTV
It-tı̍t leh oāⁿ-miâ
“Lâi-tiān” “Iû-ka-lı̄”
Piàn-chò “kim-ka-lı̄”
Sı̍t-chāi sông kah beh sí
Ha̍k-hāu-piⁿ ê KTV
Kū-nı̂ hoé-sio koè saⁿ-piàn
Iû-goân sio boē sí
Tō-hēng lú ko-chhim
Khan-páng piàⁿ-chò saⁿ-ūi-it-thé
Toā-toā jı̄ ê kóng-kò
Phoāⁿ-chhiòⁿ ū “séng-kàn-lá-mé”
Lú-jı̂n hoe
Sù-kùi-hông
Sè-goā-thô-goân
Miâ-jı̄ lām-lām chò chı̍t-tui
Hō͘ lâng khoàⁿ kah ba̍k-chiu hoe
Lí kóng i song kah beh sí
Phian-phian seng-lí it-tı̍t chò--lo̍h-khı̀
Poàⁿ-mı̂ nn̄g saⁿ tiám
Iáu-ū eng-hiông hó-hàn chı̍t-tui
Tı̄ lāi-té leh toā-siaⁿ kaiⁿ
Kaiⁿ kah m̄-kam lı̄-khui
Lí-tióⁿ-peh--á
Kóng i tē-ūi sioⁿ sió
Bô lêng-le̍k kiám-kí
Būn-chèng eng-hiông-táⁿ ê gı̄-oân
Tòng-soán liáu-āu m̄-chai cháu khı̀ tó-ūi
Chèng-gı̄ tàu-sū ê toā-phàu
Kóng jı̂n-bı̂n nā m̄ kiaⁿ-sí
I chiah ū hoat-tō͘ chhù-lí
Ū lâng kóng KTV lú-choē
Tāi-piáu Tâi-oân keng-chè khí-poe
Siau-hùi-phín chı̀n-jı̍p sin sı̂-tāi
Kong-chú “lá-mé”
Ta̍k-ke nā ū-chı̂ⁿ
Lóng ē-sái bé lâi khai
Ū lâng kóng
Lí mài toā-kiaⁿ-sió-koài
Ha̍k-hāu-piⁿ ê KTV
Chham lí ū siáⁿ-tāi
Àm-sı̂ chò seng-lí
Tùi ha̍k-hāu bô hông-hāi
Ha̍k-hāu-piⁿ ū KTV
M̄-chai tang-sı̂ beh koh hoé-sio
Jı̍t-sı̂ ê kàu-sek lāi
Gín-á chiàu-siông tha̍k-chheh
Àm-sı̂ nā kàu
Lú ha̍k-seng pı̀ⁿ kong-chú
Táⁿ-pān iau-kiau hó chē-tâi
Thé-hoē lán siā-hoē ê jı̂n-ài
Ha̍k-hāu-piⁿ ê KTV
M̄-chai tang-sı̂ beh koh hoé-sio
Jı̍t-sı̂ ê kàu-sek lāi
Gín-á leh siōng-khò
Hāu-tióⁿ kàu-su
Toā-siaⁿ toā-siaⁿ
Chiàu-siông leh kóng
Sèⁿ-miā ê chun-giâm hâm sı̂n-sèng
Bí-kok ê Boston
Jı̍t-pún ê Kiaⁿ-to͘
Phok-sū chhı̄-tióⁿ khı̀ khó-chhat
Ha̍k-chiá gē-su̍t-ka
Chhá kah chiok lāu-jia̍t
Kóng beh kiàn-lı̍p
Kàu-io̍k ê mô͘-hoān to͘-chhı̄
Kóng beh khí-chō bûn-hoà ê siâⁿ
Ha̍k-hāu-piⁿ ê KTV
M̄-chai tang-sı̂ beh koh hoé-sio
Toā-koaⁿ gı̄-oân lı̍p-úi
M̄-chai tang-sı̂ beh koh
Be̍h koh lâu ba̍k-sái
Chiōⁿ tiān-sı̄
Kóng in ê lí-sióng
Piáu-ián in ê chû-pi
