Ū chı̍t jı̍t Chhùi, Ba̍k-chiu, Phı̄ⁿ, Hı̄-á, Chhiú, Kha tāi-ke teh chham-siông. Chhùi chiū kóng, Lán tāi-ke tùi chhut-sı̀ kàu taⁿ, ta̍k jı̍t lóng sı̄ hō͘ Pak-tó͘ teh chhe-ēng. I nā iau ê sı̂ lán tāi-ke chiū kan-khó͘ : kiò Hı̄-á tio̍h thiaⁿ khoàⁿ ū sím-mı̍h hó mı̍h teh bē; kiò Ba̍k-chiu tio̍h khoàⁿ ū sím-mı̍h hó mı̍h thang bé, kiò phı̄ⁿ tio̍h phı̄ⁿ hó bı̄; kiò Kha tio̍h kiâⁿ khı̀ bé; kiò Chhiú tio̍h khı̀ the̍h. Thiⁿ-kng kàu àm bô chı̍t sı̂ thang hioh-khùn, lóng sı̄ chò i ê tāi-chı̀, i put-sı̂ lóng tiàm tı̄ lāi-bı̄n, lóng bô chhòng sím-mı̍h hoè. Lán chı̍t jı̍t kàu àm kan-kan khó͘-khó͘. Che iā sı̄ bô iàu-kín, nā-sı̄ i bô chı̍t siaⁿ chı̍t kù kā lán kiò ló͘-la̍t. Lán tāi-ke hō͘ i khoàⁿ bô ba̍k-tē, sı̍t-chāi lán chin gōng. Taⁿ lán tāi-ke tio̍h hoē-chê, hioh-khùn kúi-jı̍t, bô hō͘ i chhe-ēng, khoàⁿ i cháiⁿ-iūⁿ ?
Hit sı̂ Ba̍k-chiu, Phı̄ⁿ, Hı̄-á, Kha,Chhiú kóng, Chhùi-hiaⁿ lí kóng án-ni sı̍t-chāi chin ū chêng-lí, goán ta̍k jı̍t thè i tio̍h-boâ-kàu beh sí, lí ta̍k jı̍t tio̍h thè i pō͘-mı̍h iā sı̄ kan-khó͘. Kó-jiân tāi-ke hioh-khùn kúi-nā-jı̍t, hit-sı̂ pak-tó͘ bô mı̍h thang chia̍h kàu-pá, ba̍k-chiu soà bē oē khoàⁿ, hı̄-khang soà bē thiaⁿ-kı̀ⁿ, chhùi iā ta, chhiú iā sng, kha iā nńg, tāi-ke chiū hoán-hoé kóng: “Sı̍t-chāi pak-tó͘ sı̄ teh tı̀-ı̀n lán, lán bô thoè pak-tó͘ tio̍h-boâ sı̍t-chāi chin m̄-tio̍h, tùi taⁿ í-āu lán tāi-ke tio̍h chı̄n-sim chı̄n-le̍k hō͘ pak-tó͘ bô iau, lán tāi-ke chiū oē ū sı̀ⁿ-miā.”
Sū, lông, kong, siong chit sı̀ ê hiaⁿ-tı̄-á, hiān-sı̂ Sū ê miā-ūn chò tē-it pháiⁿ. Goân-pún lâng kiò sian-siⁿ, kin-ná-jı̍t jı̍t-sı̍t lân-tō͘ chin peh-peⁿ. Kó͘-chá ê Sèng-jı̂n kóng, Bû kun-chú bo̍k-tı̄ iá-jı̂n, bû iá-jı̂n bo̍k-ióng kun-chú. Chiū-sı̄ kóng, Bô kun-chú ê lâng chiū peh-sı̀ⁿ bô thâu-chàng, bô choh chhân ê lâng chiū kun-chú bô lâng,bô thang ióng-chhı̄.
Hiān-sı̂ koaⁿ-ke, kàu-io̍k ke, chong-kàu ke chò tē-it khùn-lân--ê, nā-sı̄ chèng-hú hit hong-bı̄n khiok siông-siông teh ka-seng kip-hōng, choè tē-it khùn-lān chiá chiū-sı̄ chong-kàu ke.
Kū-nı̂ lán ê thoân-tō sian-siⁿ m̄-chai sı̂ kúi-ê khı̀ ? Kin-nı̂ m̄ chai beh koh sı̂ kúi-ê ? Nā khah chē lâng sı̂-chit lán ê Kàu-hoē chiong-lâi àn-choáⁿ ? Chhiáⁿ lia̍t-ūi hiaⁿ-ché siūⁿ khoàⁿ teh. Sū sı̄ lán ê toā-hiaⁿ, lán lông, kong, siong, chit saⁿ ê hiaⁿ-tı̄-á nā m̄ lâi pang-chō͘, kiaⁿ-liáu-bô kú Sū ē choa̍t-hō͘. Ka iōng tióng-chú, kok iōng tāi-sı̂n. Mn̂g nā phoà, káu ē nǹg jı̍p-lâi.
(Tâi-lâm-kàu-hoē-pò tē 418 koàn, 1920 nı̂ 1 goe̍h)
