Soaⁿ-téng bat khoàⁿ jı̍t-chhut,
Lō͘-pı̄ⁿ bat kı̀ⁿ sı̂n-pu̍t,
Iú-ê-à! Ài kóng chhiò,
Goán-kong khùn phoà saⁿ-niá chhio̍h,
Chia̍h kàu chhùi-chhiu pe̍h,
Mā m̄-bat thiaⁿ lâng kóng,
Han-chı̂ ū kut!
Keng-chio beh chia̍h phoê tio̍h lut.
Kam-chià beh siah to tio̍h phut,
Iú-ê-à! ài kóng chhiò,
M̄ bat chē-chûn mā kiâⁿ koè kiô,
Se̍h phiàn thiⁿ-kha-ē,
Mā m̄-bat thiaⁿ lâng kóng,
Han-chı̂ ū kut!
Ū-iáⁿ,
Seng-chi-goân, bēng-chi-lu̍t,
Han-chı̂ pún bô kut,
Nāi-hô,
Kiông-koân-chiá, lōng koân-su̍t,
Pek goán han-chı̂ lâi seⁿ kut,
Kun put kiàn bı̂n-chú tàu-sū chāi hoat têng,
Kun put kiàn Lâm-iông sià sin tiám bêng-teng,
Iú-ê-à! han-chı̂ m̄-nā ū kut,
Pō͘ tio̍h koh chin tēng!
(Gân Sı̀n-seng Tâi-gí Bûn-ha̍k soán, 2002 nı̂ Chin-pêng Khı̀-gia̍p Chhut-pán)
