1901 nı̂ 1 goe̍h 21 jı̍t, Bí-kok Kài-la̍p-su siâⁿ chhut-hiān chı̍t ê kó͘-koài ê lāu hū-jı̂n-lâng, i ê chhiú the̍h chı̍t ki lāi ê pó͘-thâu, chhùi gı̂m: “Goá choè Ki-tok peng-teng, tio̍h hó-táⁿ chı̀n-chêng.” Lí oē thó-iàm chit ê hū-jı̂n-lâng mah? Goá kā lí kóng, i sı̄ Bí-kok le̍k-sú siōng chı̍t-ūi chhut-miâ ê hū-jı̂n-lâng!
I kiâⁿ kàu chı̍t keng chiú-tiàm ê mn̂g-kháu, kia̍h khí i hit ki lāi ê pó͘-thâu, toā siaⁿ soan-pò͘ kóng:“Goá beh chiong lín chia ê chiú-kúi kiù chhut tē-ge̍k ê mn̂g! Che sı̄ Siōng-tè ê bēng-lēng!” Jiân-āu i chiū chông jı̍p-khı̀, --- Lí siūⁿ ū sím-mı̍h lâng káⁿ tí-tng chit ê hū-jı̂n-lâng á-bô? Goá pò lí chai, in lóng liu tùi āu-piah mn̂g tô-cháu!
Chit-keng chiú-tiàm ê thâu-ke bih tiàm toh-kha, chhin-chhiūⁿ é-káu hō͘ phang tèng--tio̍h. Hit ê hū-jı̂n-lâng chiong tiàm-lāi ê po-lê-tû, thang-á-mn̂g chiú-kan, chiú-poe, ēng i hit ki lāi ê pó͘-thâu loān-phoà, loān-lòng, tı̄ kúi hun cheng āu í-keng húi-hoāi kàu put-khó siu-sı̍p, chhin-chhiūⁿ hō͘ hong-thai sàu koè chı̍t-iūⁿ! Sı̍t-chāi chin chhin-chhiūⁿ! Ná-sùn chit-ūi chí-bē só͘ kàu ê só͘-chāi, chhin-chhiūⁿ sió-hêng ê hong-thai lı̂m-kàu chı̍t-iūⁿ!
Liâm-piⁿ chit-ūi hū-jı̂n-lâng ê miâ-siaⁿ siū thoân-piàn choân sè-kài. Ta̍k-kok ê pò-choá lóng saⁿ-chiⁿ chhut i ê siau-sit, ū-ê chheng-chàn i sı̄ “Hoán-tùi lim chiú ê léng-siù,” ū-ê chheng i choè “Kı̀m chiú ê sian-hong.”
I ê só͘ choè kek-tōng chin-choē lâng kap i piáu tông-chêng, kiat-kó tı̄ 17 nı̂ āu, Bí-kok chèng-hú iā pan-pò͘ kı̀m-chiú-lēng!
Cháiⁿ-iūⁿ Ná-sùn chit-ūi chí-bē beh kap chiú choè tùi-thâu? Tong-jiân i ū chhiong-hun ê lí-iû. I ê ka-têng ūi-tio̍h chiú lâi phò-sán. I ê tiōng-hu ūi-tio̍h lim chiú koè tō͘ lâi sí, sí ê sı̂ m̄-nā bô lâu poàⁿ ê chı̂ⁿ hō͘ i, sı̄m-chı̀ hō͘ i hū-tam iúⁿ-chhı̄ chı̍t ê gín-ná kap ta-ke.
Khí-thâu i pı̂n sı̀n-sim, beh ēng kı̂-tó hō͘ Kài-la̍p-su siâⁿ ê chiú-tiàm lóng koaiⁿ--khí-lâi, só͘-í i chiong chı̍t ê kū hong-khı̂m khǹg tiàm koe-lō͘ piⁿ chiú-tiàm ê mn̂g-kháu, tı̄ hia gı̂m-si kı̂-tó, khó-sioh chit ê hong-hoat siuⁿ bān-tūn, sin ê chiú-tiàm iû-goân teh ke-thiⁿ! I khoàⁿ-kı̀ⁿ ka-kı̄ ê kè-e̍k sit-pāi, tùi án-ni koat-tēng oāⁿ hong-hoat, khai-sí kia̍h pó͘-thâu ēng bú-le̍k nāu chiú tiàm.
I tong-jiân bêng-pe̍k chit khoán ê hêng-tōng sı̄ ûi-poē hoat-lu̍t! M̄-kú i lia̍h choè khui chiú-tiàm kin-pún iā-sı̄ ûi-poē hoat-lu̍t, siōng-chhiáⁿ Kài-la̍p-su siâⁿ tı̄ 20 nı̂ lâi sǹg sı̄ chàn-sêng kı̀m-chiú ê tē-hng!
I bat hō͘ lâng cheng, hō͘ lâng ēng kha chàm, ēng piⁿ sut, ēng thûi-á kòng, sı̄m-chı̀ ū chı̍t pái i ê kut-thâu bat siū kòng tn̄g, chha-put-to hiám sí! Lí siūⁿ i ún-tàng oē chiū án-ni tio̍h-kiaⁿ ---- Chóng-sı̄ m̄-sı̄ án-ni, i éng-oán bô kiaⁿ! I keng-koè liâu-ióng, tı̄ sin-thé hó liáu-āu, iû-goân koh kia̍h-khí pó͘-thâu, kè-sio̍k choè hoán-tùi lim-chiú ê kang. I lia̍h choè chit ê kang sı̄ tı̍t-chiap hōng Siōng-tè ê bēng-lēng!
Ū lâng chú-tiuⁿ tio̍h chiong i lia̍h khı̀ koaiⁿ-kaⁿ, chóng-sı̄ án-ni choè ū sím-mı̍h lō͘-ēng nı̍h? In-ūi i tı̄ kaⁿ-lāi sı̂-siông toā-siaⁿ gı̂m-si kı̂-tó, hō͘ kò͘-kaⁿ ê lâng kám-kak thâu thiàⁿ!
Iā bat ū lâng chiong i toà khı̀ hoat-ı̄ⁿ, tng phoàⁿ-koaⁿ kóng i hoān-tio̍h Kài-la̍p-su siâⁿ tē kúi tiâu hoat-lu̍t ê sı̂, i chiū toā-siaⁿ piān-hō͘ kóng, “Chit ê àn-kiāⁿ m̄ eng-kai chiàu Kài-la̍p-su ê hoat-lu̍t pān-lí, tio̍h ēng chong-kàu ê hoat-lu̍t lâi sím-phoàⁿ.” Tùi án-ni i chiū peh khí-lâi, ēng cha̍p-hun giâm-siok ê thài-tō͘ tha̍k Sèng-keng. Siat-sú phoàⁿ-koaⁿ beh kiò i chē lo̍h-khı̀, i chiū chek-pı̄ phoàⁿ-koaⁿ kóng, “Lí kóng sím-mı̍h? Kiò goá chē lo̍h-khı̀? Goá ê nı̂-hoè ū kàu-gia̍h chu-keh thang choè lí ê lāu-bú!”
Koan-hē chit ūi hoán-tùi lim-chiú ê hū-jı̂n-lâng, i it-seng ê tiong-kan, kı̂-koài ê sū chin choē.
Ū chı̍t pái, i tı̄ koe-lō͘ khoàⁿ-kı̀ⁿ chı̍t ê chia̍h-hun ê lâng, chiū kiâⁿ chı̀n-chêng, tùi hit lâng ê chhùi chiong hun kā chhiúⁿ khí-lâi, soà kiò i tio̍h chai thang kiàn-siàu, in-ūi sin-khu ê hun-bı̄ chhin-chhiūⁿ chhàu-káu hiàn, hō͘ lâng kan-khó͘ phı̄ⁿ.
Koh ū chı̍t pái, khoàⁿ-kı̀ⁿ i tı̄ koe-lō͘ teh chó͘-tòng cha-bó͘ gín-ná m̄-chún in kap ta-po͘-lâng chē siāng chhia. À! Thài kó͘-koài ê lāu a-pô là!
Put-kò i it-seng ê tiong-kan khak-sı̍t iā ū choè chin choē ta̍t-tit khim-poē ê sū, só͘-í i sui-jiân sí liáu, chin choē lâng iáu teh siàu-liām i.
Tı̄ Kài-la̍p-su siâⁿ ū chı̍t tiâu thih-lō͘, kiò choè “Ná-sùn lō͘,” ēng chı̍t ki pó͘-thâu choè kı̀-hō. Che sı̄ hit só͘-chāi ê lâng beh kı̀-liām i chá-sı̂ hoán-tùi lim chiú ê kong-lô.
(Oa̍h-miā ê Bí-niû tē 54 kı̂, 1958 nı̂ 11 ge̍h)
