1. Goá siá hun-in ê būn-tê,
Kàu-hoē put-chí toā koan-hē,
Hi-bōng bo̍k-su á hiaⁿ-ché,
Ūi-tio̍h chit chân tàu thê-hê.
2. Kàu-hoē chò chhin mn̂g khah e̍h,
Tı̀-kàu bun-in toā lân-tê,
Beh chhoā m̄-chai tó chı̍t tè,
Beh kè m̄-chai tó chı̍t ê.
3. Hái-kháu kàu-hoē bô iàu-kín,
In-ūi liân-lo̍k ū khah kı̄n,
Lāi-soaⁿ kàu-hoē chin khó-lı̂n,
Chhoē bô ū lâng thang sio thı̄n.
4. Pún-hoē chhin-chhiūⁿ chhài-koe-tı̂n,
Khan kàu ba̍t-ba̍t to sı̄ chhin,
Beh chò hoē-iú chin iàu-kín,
Khó-sioh bô lâng lâi kóng chhin.
5. Chhin-chiâⁿ ūi-tio̍h bô lâng pò,
Ko͘-put jı̄-chiong bô nāi hô,
Hoē-goā put-sı̂ lâi teh chò,
Kè hō͘ hoē-goā khah iâⁿ bô.
6. Ū ê lú-chú to chin hó,
Khó-sioh bô lâng beh lâi pò,
Nı̂-hoè ná chē ná hoân-ló,
Pē-bó ê sim toā chiau-cho.
7. Hiān-sı̂ lú-chú sı̄ chin-chē,
Thiaⁿ kóng ta̍k ūi to khah ke,
Lán bô siat-hoat tı̄ chit ê,
Chò chhut hoē-goā toā būn-tê.
8. Ūi-tio̍h chò chhut kàu-hoē goā,
Hit ê būn-tê sı̄ chin toā,
Chong-kàu bô siāng pháiⁿ seng-oa̍h,
Sı̀n sim chiām-chiām chiū pàng soah.
9. Ū ê sè-sio̍k chhoā jı̍p-lâi,
Hit ê kiat-kio̍k lán lóng chai,
Bô beh tâng-sim lâi lé-pài,
Kàu boé kiat-kio̍k lóng bô lâi.
10. Kàu-hoē ki-koan chin-chē hāng,
Bo̍k-tek ài kàu-hoē oa̍h-tāng,
Hun-in nā bô tàu saⁿ-kāng,
Kàu-hoē bē heng tùi chit hāng.
11. Ū ê sı̀n-sim chin khiā-chāi,
Kian-sim beh chò kàu-hoē-lāi,
M̄-kú bô lâng lâi siāu-kài,
Beh chò hoē-lāi tùi tá lâi.
12. Hi-bōng tong-kio̍k chèng Bo̍k-su,
Ūi-tio̍h chit chân lâi khó-lū,
Hun-in siat-hoat ē sūn-sū,
Kàu-hoē chı̍t hāng ê kip-bū.
(Tâi-oân Kàu-hoē Kong-pò, Tē 733 kı̂, 1950 nı̂ 1 goe̍h)
