Iâ-so͘ Siū-chhı̀
（Tiāu ēng “Save by grace,” chok- khek-chiá Geo, c Stebbins.）
1.Sèng Sı̂n chhoā Iâ-so͘ kàu khòng-iá,
Tı̄-hia sı̀-cha̍p mı̂-jı̍t kı̀m-chia̍h;
Mô͘-kúi lâi chhı̀ Siōng-tè Sèng-kiáⁿ,
Kiò I ēng chio̍h-thâu pı̀ⁿ choè piáⁿ;
Iâ-so͘ ı̀n kóng, lâng ê oa̍h-miā,
M̄-nā oá-khò chit khoán ê piáⁿ;
Chí-khò Siōng-tè só͘ chhut ê Oē,
Siōng-tè í-goā bô lâng oē choè.
2.Tē-jı̄ pái, Mô͘-kúi koh chı̀n-chêng,
Chhoā Chú kàu Sèng-siâⁿ ê tiān-téng;
Kóng I nā-sı̄ Siōng-tè ê Kiáⁿ,
Tùi tiān-téng tiô-lo̍h iā bián-kiaⁿ;
Iâ-so͘ ı̀n kóng, bo̍h-tit chhı̀ Chú,
In-ūi Sèng-keng ū kı̀ chı̍t kù;
Mô͘-kúi ū sı̂ oē ín Sèng-keng,
Chú ín-khí pa̍t-chat lâi tek-sèng.
3.Tē-saⁿ pái, Mô͘-kúi hián chhiú-toāⁿ,
Chhoā Iâ-so͘ kàu ke̍k-koân ê soaⁿ;
Ēng ta̍k kok êng-hoâ lâi ín-iú,
Kóng nā pài goá chiū kau Lí chhiú;
Iâ-so͘ ı̀n kóng, Sat-tàn thè-khı̀,
Lūn Chú Siōng-tè lí tio̍h pài I;
Mô͘-kúi iú-he̍k lóng bô sêng-kong,
Jiân-āu thiⁿ-sài chiū lâi kèng-hōng.
4.Siōng-tè ê Kiáⁿ Iâ-so͘ Ki-tok,
Mô͘-kúi chin ài I hoān choē-ok;
Hô-hòng sı̀n ê lâng tı̄ kim-sè,
Eng-kai thê-hông in ê khúi-kè;
Iâ-so͘ í-keng khah-iâⁿ Mô͘-kúi,
Lán oá-khò I chiū bián kiaⁿ-ùi;
Tāi-ke nā kı̀-tit chit chân sū,
Kap Mô͘-kúi kau-chiàn chiū bián-su.
(Tâi-oân Kàu-hoē Kong-pò tē 571 koàn, 1932 nı̂ 10 ge̍h)
