Iâ-so͘ kap Nı̂-ko tí-bú
（Tiāu ēng “Guide”, chok-khek-chiá sı̄ M. M. Wells）.
1.Ū chı̍t àm-mı̂ Nı̂-ko-tí-bú,
Choan-kang lâi kàu Iâ-so͘ kùi-hú;
Sêng-jı̄n I sı̄ tùi Siōng-tè lâi,
Ū koân-lêng thang kiù sè-kài;
Iâ-so͘ kóng lâng bô têng-thâu-siⁿ,
Siōng-tè ê kok chiū boē khoàⁿ-kı̀ⁿ.
2.Nı̂-ko-tí-bú boē-oē lí-kái,
Lia̍h choè tio̍h koh jı̍p bú-thai-lāi;
Chú kóng nā tùi Sı̂n lâi siⁿ,
Chiū Siōng-tè kok chiah oē khoàⁿ-kı̀ⁿ;
Ài jı̍p Siōng-tè kok lâi hoaⁿ-hí,
Tio̍h chun-thàn Kiù-chú ê kà-sı̄.
3.Chú sui-bóng phı̀-jū toē chiūⁿ sū,
Iáu-kú ū lâng m̄-chai ı̀-sù;
Só͘-í nā kóng thiⁿ-téng ê tāi,
Chiū koh-khah choē lâng boē-oē chai ;
Mô͘-se kú-khí choâ tı̄ khòng-iá,
Chiū-sı̄ piáu-bêng Chhú ê sı̂n-jiah.
4.Siōng-tè siúⁿ-sù to̍k-siⁿ ê Kiáⁿ,
Kàng-seng choè lâng che sı̄ ū iáⁿ;
Ū sı̀n ê lâng m̄-bián tı̂m-lûn,
Iâ-so͘ beh chín-kiù i lêng-hûn;
Thiⁿ Pē chin thiàⁿ-thàng lán jı̂n-lūi,
Tio̍h chhut toā siaⁿ o-ló pài-kūi.
(Tâi-oân Kàu-hoē Kong-pò tē 569 koàn, 1932 nı̂ 8 ge̍h)
