Iú-in tap-in
Kı̂-āu
1.Tap-siā Sı̂n-ha̍k leng-bó in,
Lâm-lú jı̍p-ha̍k ē chhut-sin;
Siā-hoē bô lâng ē khoàⁿ-khin,
Tè Chú chiâⁿ-chò thian-kok bı̂n.
2.Chhut-ha̍k chiū chò Hok-im-sài,
Pò-iông Kiù-chú hō͘ lâng chai;
Hok-im tio̍h thoân piàn sù-hái,
Chhin-chhiūⁿ Jı̍t-kong chiò tang-sai.
3.Ha̍k-būn chêng-kong ba̍k-thâu khá,
In-ūi ba̍k-chúi chia̍h chin pá;
Chhim-san nâ-lāi khı̀ phah-la̍h,
Kı̀ⁿ-tio̍h chhâi-lông khui chhèng phah.
4.Sèng-keng bô hêng ê chhèng-chí,
Put-sı̂ put-chūn ēng bô lı̄;
Mô͘-kúi khoàⁿ-kı̀ⁿ kiaⁿ siám-pı̄,
Pháiⁿ lâng kàu-boé siang pái sí.
5.Ha̍k-seng o̍h Chú hó bô͘-iūⁿ,
Chı̄n-sim thè Chú chiàu-kò͘ iûⁿ;
Put-sı̂ tha̍k-keng chò to-chhiuⁿ,
Thâi-iâⁿ tùi-te̍k ū pò-siúⁿ.
6.Chı̄n-sim hō͘ Chú chò chhe-ēng,
Keng-êng chhân-hn̂g gâu iā chéng;
Só͘ chhut koé-chí lia̍p-lia̍p tēng,
Thang hō͘ Thiⁿ Pē toā siu-sêng.
7.Sı̂n-ha̍k leng-bó chin ióng-kiāⁿ,
Só͘ chhut jı̂n-bu̍t ū miâ-siaⁿ,
Jı̄-ūi sian-su hó só͘ kiâⁿ,
Kap goán tāi-ke chin saⁿ-thiàⁿ.
8.Jı̄-ūi lóng-chóng ū jı̂n-ài,
Chhut-chāi leng-bó ê só͘ phài;
Chı̍t-miâ moá-jı̄m chı̍t-miâ lâi,
Nn̄g-miâ lóng-sı̄ hó jı̂n-châi.
9.Goān Chú pang-chān gâu chò kang,
Ná chò sim-sı̂n ná oa̍h-tāng;
Tāi-thé, siáu-thé iā khin-sang,
Tı̄ tē tı̄ thiⁿ miâ chin phang.
10.Phí-jı̂n sı̍t-chāi tng bē-khí
Káⁿ chò chit siú to̍k-chàu Si;
Lâi kā jı̄-ūi toā chàn-bí,
Pang-chān kàu-hoē toā heng-khí.
(Tâi-oân Kàu-hoē Kong-pò tē 600 koàn, 1935 nı̂ 3 ge̍h)
