Ū chı̍t-ê siàu-liân lâng, thâi sí ka-kı̄ ê pē-bú, hō͘ kéng-chhat lia̍h--khı̀, sàng kàu hoat-têng sím-phoàⁿ, siàu-liân lâng kā hoat-koaⁿ kóng: “Hoat-koaⁿ tāi-jı̂n ah, khó-liân--goá, goá sı̄ chı̍t-ê ko͘-jı̂.”
Chı̍t-ê lı̂m-chiong ê Iû-thài-lâng kā só͘-ū ê kiáⁿ kiò oá--lâi, kā in kóng: “Só͘-ū khiàm goá chı̂ⁿ ê lâng ê miâ, goá liām hō͘--lín, chı̍t-ê á chı̍t-ê kı̀ hō͘ hó . . . . .” liām liáu chiū ba̍k-chiu kheh-kheh.
I ê toā-hàn-kiáⁿ chiū mn̄g kóng: “A-pa, ia lán khiàm--lâng-ê leh ?” Lāu-pē sûi-sı̂ ba̍k-chiu tián toā-lúi, tùi bı̂n-chhn̂g pha--khí-lâi toā-siaⁿ jiáng: “Put-siàu-kiáⁿ, lí che put-siàu-kiáⁿ, chhau-hoân hiah choē. Lán khiàm--lâng-ê, lâng ka-kı̄ chū-jiân ē lâi thó lah!”
“Ū-kàu pháiⁿ-ūn, cha-hng goá kā A-lûn chioh 100 kho͘, siūⁿ boē-kàu i chá-khí sí--khı̀ ah. “Án-ni ná ē pháiⁿ-ūn ?” “Tong-jiân sı̄ pháiⁿ-ūn ah. Goá nā chai-iáⁿ i kin-á-jı̍t ē sí, it-tēng ka chioh chı̍t-bān.”
Tı̄ hoé-chhia-téng, N̄g-ê lâng teh kóng oē.
“Lí tùi tó-ūi lâi--ê ?”
“Soah m̄-sı̄ kap lí kāng-khoán, tùi lāu-pē lāu-bú hia lâi--ê.”
Ū chı̍t-ê-lâng khı̀ chhoē lia̍p-pí (sian-siⁿ) thò͘-lō͘ ka-tı̄ só͘ hoān it-chhè ê choē, thau-the̍h, thong-kan, sat-jı̂n, chà-khi, pūn-toāⁿ, put-hàu, poa̍h-kiáu . . . . chha-put-to Sèng-keng só͘ kı̀ só͘-ū ê pháiⁿ-tāi lóng hoān--tio̍h ah. Kóng liáu m̄-nā bô hoán-hoé ê khoán, tian-tò ná-chhiūⁿ chin chhàu-phùi: “Goá hoān tio̍h só͘-ū ê choē, siong-sı̀n choân sè-kài bô lâng chhin-chhiūⁿ goá, bô hit-hō bô hoān--tio̍h ê choē.” lia̍p-pí chiū kóng: “Ná ū-iáⁿ, lí iáu ū chı̍t-hāng bô hoān--tio̍h-ê leh!”
Chit-ê lâng chin put-ho̍k: “Tó chı̍t-hāng ?”
Lia̍p-pí kóng: “Lí iáu-boē chū-sat ah!”
Se-bûn khı̀ chhoē i-seng kiám-cha. I-seng kóng: “Se-bûn-hiaⁿ, lí chin kiān-khong, sió-khoá ū thn̂g-jiō-pı̄ⁿ ê kheng-hiòng nā-tiāⁿ. Goá nā-sı̄ lí, kin-pún boē hoân-ló.”
“Oāⁿ chò sı̄ lí ū thn̂g-jiō-pı̄ⁿ, goá tong-jiân mā-sı̄ boē hoân-ló ah!” Se-bûn án-ni hoê-tap.
Chı̍t-ê hū-jı̂n-lâng khı̀ chhoē lia̍p-pí, kóng i siūⁿ beh lı̄-hun. Tān-sı̄, i ū 9 ê gín-á, iā in hu-hū lóng ài beh poàn-sò͘ ê gín-á. 9 ê beh án-choáⁿ tùi-poàⁿ pun ? Lia̍p-pí chiū kóng: “Án-ni lín koh choè-hoé chı̍t-nı̂, koh siⁿ chı̍t-ê, chiah lâi lı̄-hun lah.”
Chı̍t-nı̂-poàⁿ liáu āu, lia̍p-pí tú tio̍h hit-ê hū-jı̂n-lâng. Lia̍p-pí mn̄g: “Chit-má án-choáⁿ ?”
“Bô hoat-tō͘.”
“M̄-kú goá thiaⁿ kóng lí í-keng siⁿ--ah.”
“Sı̄ ah, m̄-kú, chit-pái siⁿ siang-siⁿ ah.”
Tú-á seng khí-lâi chò liân-tiúⁿ ê A-pek, siūⁿ kóng tı̄ pō͘-hā ê bı̄n-chêng ū pit-iàu kek chı̍t-ê ui-hong lím-lím ê kè-sè.
Ū chı̍t-kang, i tı̄ pān-kong-sek teh khoàⁿ ang-á-chheh, ū lâng lòng mn̂g. A-pek chiū kín kā chheh lok jı̍p-khı̀ thoah-á-té, jiân-āu ké-sian ké-tak gia̍h tiān-oē oá toà hı̄ⁿ-á, chiah toā-siaⁿ hoah: “Jı̍p-lâi!”
Jı̍p--lâi-ê sı̄ chı̍t-ê peng-á, chhiú the̍h kang-chok siuⁿ-á.
