Goá kap Tiuⁿ Ki-choân Sian-siⁿ tı̄ chit pái ê hioh-joa̍h-tiong, chiū-sı̄ tı̄ 7 ge̍h 30 hō ū tùi Tām-súi chhut-hoat khı̀ Tang-pō͘. Taⁿ hit-tiâu lō͘-kèng ū keng-kè Gı̂-lân, Lô-tong ia̍h tùi So͘-ò chē-chûn chiah khı̀ Hoe-liân-káng. Chhoe-sı̀ ê lé-pài-jı̍t ū tı̄ Hoe-liân-káng pài-tn̂g kap hia ê hiaⁿ-chí saⁿ-kap siú lé-pài, ia̍h goá ū siū Lí Thoân-tō pài-thok choè chú-lí, koh hit ē-po͘ goán ia̍h ū koh kap Lí Thoân-tō, Tām Chip-sū kap Niû A-phiau kun (i hiān-sı̂ sı̄ tı̄ Tang Tâi-oân ê Sin-bûn-siā teh choè kı̀-chiá), gō͘ lâng choè-tı̄n khı̀ sin-siat ê Ka-lí-oan Káng-gı̄-só͘ choè lé-pài, tāi-ke put-chí jia̍t-sim, choè lé-pài choê-chéng.
Tı̄ chhoe-saⁿ (pài-la̍k) ū khı̀ thàm kúi-nā ke ê hiaⁿ-tı̄, ia̍h ū khı̀ thàm chı̍t-ūi ê I-seng, chiū-sı̄ Lâm-pō͘ Lı̂m Iàn-sı̂n Bo̍k-su tē-jı̄ lēng-lông Lı̂m An-seng Sian-siⁿ, i khı̀ hia khai-gia̍p khiok iáu-bô joā-kú, m̄-kú chiàu thiaⁿ sêng-chek khó-kiong. Koh chı̍t-ūi sı̄ tùi Toā-tiū-tiâⁿ poaⁿ-khı̀ ê Keh Hô-tâng-hiaⁿ, in sı̄ khı̀ tı̄-hia teh choè sū-gia̍p. Ia̍h ū khı̀ thàm tı̄ Tām-súi Tiong-o̍h seng-tô͘ ê hū-heng, tāi-ke put-chí hoaⁿ-hí ēng jı̂n-ài saⁿ khoán-thāi.
Pài-it tùi Hoe-liân-káng khí-sin tāi-seng kàu Hong-tiân ū lo̍h-chhia khı̀ thàm chı̍t-ke sı̀n-chiá, chiū-sı̄ Bâ-û ê hoē-iú Ia̍p Láu-hiaⁿ, in ū poaⁿ-khı̀ hit pêng tiàm put-chí kú, ia̍h ū tit-tio̍h Siōng-chú ê chiok-hok hō͘ in tı̄-hia ū kiàn-tı̀ siong-tong ê ke-gia̍p, ia̍h tùi kàu-hoē put-chí jia̍t-sim. Koh tâng hit ē-po͘ ū kàu Hōng-lı̂m, āu-lâi ū kap So͘ Thoân-tō khı̀ thàm Tiuⁿ Chhit-lông Sian-siⁿ, Phêⁿ Chio̍h-êng Sian-siⁿ, Tiuⁿ Gio̍k-bêng Sian-siⁿ kap kúi-nā ūi ê hiaⁿ-tı̄, koh tı̄ hit àm siū-tio̍h Tiuⁿ Chhit-lông Sian-siⁿ kap Phêⁿ Chio̍h-êng Sian-siⁿ, ia̍h So͘ Thoân-tō in tāi-ke ê hó-ı̀, ūi-tio̍h goán nn̄g ê ū khui lı̂m-sı̂ ê káng-ián-hoē, ki-hoē put-chí hó, tāi-ke tiām-chēng saⁿ-kap káng-kiù Chú ê tō-lí, sı̍t-chāi toā-toā kám-siā Chú ê un. Koh-chài tı̄ Hōng-lı̂m kàu-hoē tı̄ hioh-joa̍h-tiong tùi Sı̂n-ha̍k-hāu ū phài chı̍t-ūi ê ha̍k-seng Gô͘ Chheng-ek kun, i tı̄-hia ta̍k-jı̍t ū kà gín-ná. Chiàu thiaⁿ sêng-chek put-chí hó.
Taⁿ tı̄-hia keh chı̍t-àm ia̍h hit chá-khí ū So͘ Thoân-tō chhoā goán khı̀ Tāi-hô thàm hiah-ê hiaⁿ-tı̄, tı̄-hia ê hoē-iú khah choē sı̄ teh chèng kam-chià ū khah bô êng, tı̄ hit ē-po͘ chiū lo̍h-khı̀ kàu Gio̍k-lí. Tāi-seng kàu lé-pài-tn̂g tú-tio̍h Iûⁿ Thoân-tō ūi-tio̍h sin-siat Káng-gı̄-só͘ ê sū ū khı̀ Kong-po͘ bô tı̄-teh, āu-lâi ū khı̀ thàm chı̍t-ūi ê I-seng sı̄ Chhoà Bêng-him Sian-siⁿ, i tı̄ Kiaⁿ-to͘ chāi-ha̍k ê sı̂ chiū saⁿ kau-poê put-chí kú, só͘-í khoàⁿ-tio̍h chin hoaⁿ-hí, āu-lâi soà hō͘ in lâu tiàm hia. Tı̄-hia ài thàm hoē-iú, chóng-sı̄ tāi-ke put-chí bô êng ê khoán, só͘-í kiat-kio̍k kan-ta thàm chı̍t-poàⁿ-ê ū tio̍h nā-tiāⁿ. Āu-lâi ū koh khı̀ Kong-po͘ chiū-sı̄ Tân Ōng Bo̍k-su só͘ tiàm ê kàu-hoē, tı̄-hia keh chı̍t-àm, ia̍h ū khı̀ thàm kúi-nā ke ê kàu-hoē, tāi-ke put-chí chhin-chhiat.
Án-ni chit pái goán ū kàu kúi-nā ūi ê kàu-hoē, chóng-sı̄ iáu kúi-nā ūi boē tit khı̀ chin ûi-hām, in-ūi ū só͘-chāi sı̄ ū khoe-lâu ê chó͘-tòng só͘-tı̀. Koh ūi-tio̍h hong-thai ê in-toaⁿ soah boē-tit thang kàu Tâi-tang, lâi tùi hia chē chûn tùi Ko-hiông hia tńg-lâi. Āu-lâi koh tùi Hoe-liân-káng tńg-lâi ê sı̂, soah hō͘ hong-thai ke koaiⁿ sı̀-gō͘-jı̍t kú, kàu 13 hō chá-khí chiah ū koh khoàⁿ-kı̀ⁿ chûn-chiah jı̍p-káng. Só͘-í goán tı̄ siâng-jı̍t ū tah-chûn tńg-lâi, kàu-chhù tú-á poàⁿ-mı̂.
Taⁿ chit-pái goán nn̄g lâng kàu ta̍k só͘-chāi ū siū-tio̍h choē-choē tâng sio̍k Chú ê hiaⁿ-tı̄ kap hó pêng-iú ê hō͘-thāi, só͘-í ài tı̄-chia toā-toā kā tāi-ke seh-siā.
Koh-chài ū lâng tùi goá teh mn̄g khoàⁿ lūn Tang-pō͘ ê thoân tō-lí ê sū-gia̍p sím-mı̍h khoán, só͘-í tı̄-chia ài kóng tām-po̍h goá kò-jı̂n ê kiàn-kái hō͘ tāi-ke choè chham-khó.
Lūn Tang-pō͘ chóng-kóng sı̄ iáu sio̍k tı̄ toē-khòng jı̂n-hi ê khoán, nā sı̄ lūn chéng-tùn ū só͘-chāi chhin-chhiūⁿ Hoe-liân-káng ê koe-lō͘ sı̄ chin khoah, chū-tōng-chhia chū-iû chū-chāi thang óng-lâi sı̍t-chāi bô khah su lán chit pêng. Nā-sı̄ lūn thoân tō-lí goá khoàⁿ chin hó ki-hoē, khó-sioh tı̄ hit-pêng thoân tō-lí ê lâng bô kúi-ê, só͘-í ta̍k lâng tio̍h kiam Káng-gı̄-só͘, lūn hit pêng ê káng-gı̄-só͘ ū ê kap pài-tn̂g saⁿ-lı̄ put-chí hn̄g, ū só͘-chāi ū khoe-lâu ê koan-hē, só͘-í nā lo̍h toā-hō͘ chiū boē-tit kè, nā-sı̄ lūn kiam-chit tian-tò lán chit pêng khah bô iàu-kín, in-ūi óng-lâi ê ki-koan chin lı̄-piān. Nā-sı̄ hit pêng ū khah choē lâng thang khı̀ thoân tō-lí sı̄ tē-it hó. In-ūi bô lūn thó͘-toē ê keng-êng ia̍h sı̄ siâng-khoán, nā jú pháiⁿ khai-khún ê só͘-chāi tio̍h ēng jú choē lâng. Só͘-í khai-khún Thian-kok ia̍h sı̄ án-ni. Hit khoán kau-thong bô lı̄-piān ê só͘-chāi khah bo̍h-tit saⁿ-kiam, chiū ǹg-bāng só͘ choè ê kang khah ū hó kiat-kó, in-ūi hō͘ thoân tō-lí ê lâng khah oē choan-sim koh ū ki-hoē thang pı̄-pān sim. Koh goá ǹg-bāng chiong-lâi ū ná choē-lâng hoaⁿ-hí khı̀ hia thoè Chú thoân-pò I ê hok-im sı̄ sim só͘ goān.
(Tâi-oân Kàu-hoē-pò tē 535 koàn,1929 nı̂ 10 ge̍h)
