11 Iá-thò͘ kap Sı̀-kha-á
Iá-thò͘ tiāⁿ-tiāⁿ hō͘ kı̂-tha ê iá-siù pek-sat kàu cháu bô-lō͘, m̄-chai beh bih tùi tó-ūi khı̀. Kı̀ⁿ-nā khoàⁿ-tio̍h jı̄m-hô chı̍t-chiah ê tōng-bu̍t chiap-kı̄n, in chiū ē koáⁿ-kín liu-soan.
Ū chı̍t-jı̍t, in khoàⁿ-tio̍h chı̍t-tı̄n iá-bé cháu kàu chin chheⁿ-kông. Chit-khoán chêng-kéng hō͘ iá-thò͘ chin tio̍h-kiaⁿ. In choân-pō͘ cháu tùi hū-kı̄n ê ô͘ khı̀, siūⁿ beh chò-tı̄n thiàu-ô͘ chū-sat, kam-goān sí iā bô-ài koh koè chit-khoán kiaⁿ-hiâⁿ ê seng-oa̍h. Ô͘-piⁿ ū chı̍t-tı̄n sı̀-kha-á khoàⁿ-tio̍h iá-thò͘ cháu oá--lâi, soà kiaⁿ kàu lóng-chóng thiàu lo̍h-khı̀ chúi--nı̍h.
Ū chı̍t-chiah iá-thò͘ khoàⁿ--tio̍h, kóng, “Sū-sı̍t-siōng, tāi-chı̀ pēng bô giâm-tiōng kàu su-iàu thiàu-chúi chū-sat.”
Chóng ū lâng chōng-hóng pí lán koh-khah bái.
12. Ke-kak-á kap Chin-chu
Chò-sit-lâng ê mn̂g-kháu-tiâⁿ, chı̍t-chiah ke-kak-á giâ-thâu tián-sı̍t, tı̄ chı̍t-tı̄n ke-noâ-á--nı̍h kiâⁿ koè-lâi, se̍h koè-khı̀, chin iāng-khı̀ ê khoán-sit.
I hiông-hiông hoat-hiān chhek-á-tui--nı̍h ū mı̍h-kiāⁿ teh siám-sih. I hoāⁿ-hí kàu toā-siaⁿ hoah, “Lín tāi-ke kín lâi khoàⁿ ô͘ ! Goá chhoē-tio̍h pó-poè lah!” Chiū iōng chiam-chiam ê chhùi chin chhut-la̍t kā hit-lia̍p kim-sih-sih ê mı̍h-kiāⁿ thóng --chhut--lâi. Goân-lâi sı̄ chú-lâng phah-bô-khı̀ chin-kú ê chin-chu. Ke-kak-á chin sit-bōng kóng, “Lí sı̄ chú-lâng ê pó-poè; m̄-kú, goá jı̄n-ûi chı̍t-lia̍p chhek-á pí lí koh-khah pó-kùi.”
Tin-kùi ê mı̍h-kiāⁿ kan-ta tùi su-iàu ê lâng chiah ū lō͘-iōng.
13. Iá-lông kap Iûⁿ-á-kiáⁿ
Kó͘-chá kó͘-chá, chı̍t-chiah toā iá-lông tı̄ koâⁿ-thiⁿ khùn chı̍t toā chhéⁿ, tú khí--lâi, pak-tó͘ chin-iau. Iá-lông tùi soaⁿ-téng khoàⁿ--lo̍h--khı̀, khoàⁿ-tio̍h chı̍t-chiah iû-á kiáⁿ tı̄ khe-piⁿ teh lim-chúi. I chin hoaⁿ-hí, siūⁿ beh kā lia̍h lâi chia̍h. Iū-koh kiaⁿ lâng kóng i kiông khi jio̍k, chiū koáⁿ-kín chhoē lí-iû.
“Oé! oé! khó-ò͘ⁿ ê iûⁿ-á-kiáⁿ! Lí ná-ē kā goá beh lim ê chúi lā kiaⁿ-lâng?”
“Goá bô-goá bô-m̄-sı̄ goá. Lí tı̄ soaⁿ-téng, goá tı̄ soaⁿ-kha, goá ná-ē kā lí beh lim ê chúi lā kiaⁿ-lâng?”
“Koh ū, kū-nı̂ lí iōng pháiⁿ-oē kā goá mē, goá iáu-boē kap lí lí-lūn!” Iá-lông ná kóng ná tùi soaⁿ-téng chông--lo̍h--lâi.
“Oan-óng! Oan-óng! M̄-sı̄ goá, goá chiah chhut-sı̀ la̍k goe̍h-jı̍t nā-tiāⁿ.”
“Án-ne it-tēng sı̄ lín lāu-pē, lí ài thè i chia̍h-choē.” Iá-lông kóng soah, khui-chhùi chiū kā chia̍h--lo̍h--khı̀.
Ài! Ái! Ngē beh kā lâng tēng-choē, bián kiaⁿ ē chhoē bô lí-iû lah!
14. Káu kap Chúi-iáⁿ
Chı̍t-chiah káu-á khioh-tio̍h chı̍t-tè bah, toā-tè koh pûi-nńg, chin hó-chia̍h ê khoán-sit, beh kā tńg-khı̀ ún-sim-á gè. lâi-kàu chı̍t-chō chhâ-kiô téng, khoàⁿ-kı̀ⁿ chúi--nı̍h ū lēng-goā chı̍t chiah káu, chhùi-lāi mā kā chı̍t-tè toā pûi-bah, khoàⁿ--khí--lâi iáu-koh khah hó-chia̍h! Chı̍t-sı̂ tham-sim siūⁿ beh kā chhiúⁿ, ba̍k-chiu kā gı̂n, khui chhùi kā pūi, chiùi-lāi ê bah soà lak-lo̍h chúi.
Ài! Chò-lâng m̄-thang siuⁿ tham-sim, chiah bē “siáu-tham nǹg ke-lang, siang-thâu khang.”
15. Sai ê Chú-tiuⁿ
Ū chı̍t-jı̍t, sai, hô͘-lı̂, chhâ-lông kap iá-lông chò-tı̄n khı̀ phah-la̍h. In tı̄ chháu-iûⁿ téng-bı̄n cháu-chông kui-jı̍t, chiah lia̍h-tio̍h chı̍t-chiah lo̍k-á. In kā lo̍k-á thâi--sí liáu-āu, būn-toê tio̍h lâi lah. Chit chiah lo̍k-á ài án-choáⁿ pun chiah ē kong-pêⁿ?
Sai toā-siaⁿ hoah kóng, i beh tı̍h choân-pō͘ ê sı̀-hūn-chi-it. In chiū kā hit-chiah lo̍k-á thiah chò sı̀-tè. Sai kiâⁿ-koè-khı̀ khiā tı̄ lo̍k-á-bah thâu-chêng beh chò chhâi-phoàⁿ.
I kóng, “Tē-it-ê sı̀-hūn-chi-it ài sàng hō͘ Pah-siù-chi-ông; tē-jı̄-ê sı̀-hūn-chi-it ài hō͘ chò chhâi-phoàⁿ--ê; tē-saⁿ-tè sı̄ goá ê, in-ūi goá chham-ka chit-pái ê phah-la̍h; boé-á chit-tè, goá siūⁿ beh khoàⁿ lín sím-mı̍h lâng káⁿ kā the̍h khı̀ chia̍h!”
“Hn̍gh!” hô͘-lı̂ chin put-boán kiâⁿ lı̄-khui. Ná kiâⁿ ná se̍h-se̍h-liām, “Goán goān-ı̀ kap lí chò-tı̄n phah-piàⁿ, m̄-kú lí bô èng-kai ka-kı̄ hiáng-siū sêng-kó.”
16. Lông kap Ho̍h
Chı̍t-chiah lông teh hiáng-siū i ê la̍h-mı̍h. Bô tiuⁿ-tı̂, chı̍t-ki kut-thâu khê tı̄ nâ-âu-kńg--nı̍h, thun bē lo̍h--khı̀, mā kha̍k bē chhut--lâi. I kám-kak nâ-âu chin thiàⁿ, chin thòng-khó͘. Tı̄ hia chông-lâi chông-khı̀, ná chông ná ai. I sı̀-koè khı̀ thó kiù-peng. I kóng nā ū lâng ē-tit-thang kā hit-ki kut-thâu the̍h--chhut--lâi, m̄-koán sím-mı̍h tiâu-kiāⁿ, i lóng goān-ı̀ tap-èng.
Chı̍t-chiah ho̍h kóng beh chhı̀ khoàⁿ māi. I kiò lông tó--lo̍h--khı̀, kā chhùi khui hō͘ toā-toā-ê. Ho̍h kā tn̂g-tn̂g ê chiam-chhùi-kóng kap ām-kún chhun-jı̍p-khı̀ lông ê nâ-âu-kńg--nı̍h, kā hit ki kut-thâu ngeh--chhut--lâi. Ho̍h tùi lông kóng, “Kiám ū-iáⁿ kóng goá beh ài-tı̍h sím-mı̍h mı̍h-kiāⁿ lóng ē-sái--tit?”
Lông gê-á giàng-giàng, iōng im-tı̂m ê siaⁿ kóng, “Lí ài ti-chiok ah lah! Lí kā lí ê thâu khǹg jı̍p-khı̀ lông ê chhùi lāi, ē-tàng pêng-an kiu--chhut--lâi, án-ni kiám bô kàu hó-ūn? Chit-khoán pò-tap kiám bô-kàu gia̍h?”
Ah-pà ê lâng sı̄ bô khó-lêng ē kám-un--ê.
17. Cha-po͘-lâng kap I ê Nn̄g-ê-bó͘
Kó͘-chá sı̂-tāi, cha-po͘-lâng ē-sái ū kúi-nā-ê bó͘. Chı̍t-ê tiong-liân-lâng ū chı̍t-ê lāu-bó͘ kap chı̍t-ê siàu-liân-bó͘; nn̄g-ê bó͘ lóng kap i chiok hó, mā lóng hi-bāng tit-tio̍h ang-sài ê thiàⁿ-sioh.
Tng chit-ê cha-po͘-lâng thâu-mo͘ chiām-chiām piàn phú-sek ê sı̂, siàu-liân-bó͘ chin bô hoaⁿ-hí, in-ūi i bô-ài i ê ang-sài khoàⁿ--khí--lâi siuⁿ lāu. Só͘-í múi-àm i lóng lı̄-iōng kā ang-sài loa̍h thâu-mo͘ ê sı̂, kā pe̍h-thâu-mo͘ bán--khí--lâi. M̄-kú khah lāu ê bó͘ chin hoaⁿ-hí khoàⁿ-tio̍h i ê ang-sài thâu-mo͘ chiām-chiām piàn phú-sek, in-ūi i bô ài hō͘ lâng lia̍h-chò sı̄ ang-sài ê lāu-bú. Só͘-í i múi chá-khí lóng lı̄-iōng chéng-lí ang-sài thâu-mo͘ ê sı̂-chūn, chı̄n-liōng kā chē-chē ê o͘-thâu-mo͘ chhoah--khí--lâi. Kiat-kó, chit-ê cha-po͘-lâng bô joā-kú chiū bô poàⁿ ki thâu-mo͘ lah, chı̍t-lia̍p thâu-khak kim-sih-sih, chhiūⁿ tiān-hoé kiû-á!
Ū-tit, chiū ū-sit.
18. Ni-bú kap Iá-lông
“Tiām--khı̀,” chı̍t-ê Ni-bú kā chē tı̄ i ê kha-thâu-u ê gín-á án-ne kóng. “Lí nā koh háu, goá chiū kā lí tàn hō͘ iá-lông chia̍h!”
Chin tú-hó, ū chı̍t-chiah iá-lông tùi thang-á-kha kiâⁿ--koè. I thiaⁿ-tio̍h chiah-ê oē, chiū bih tiàm hia tán. “Goá kin-á-jı̍t ê ūn-khı̀ chin hó!” I án-ne siūⁿ, “Bô-joā-kú hit-ê gín-á it-tēng ē koh khàu, án-ne goá chiū ū gín-á bah thang chiah lah! Goá í-keng chin kú bô chia̍h-tio̍h chiah-nı̍h hó-liāu--ê lah!”
I chiū tiām-tiām tı̄ hia tán, koh-tán, tı̍t-tı̍t-tán, kho̍k-kho̍k-á tán. Tán kàu gín-á koh khai-sí khàu, iá-lông chiū oá-lâi thang-á-kháu, lia̍h Ni-bú kim-kim khoàⁿ, boé-liu it-tı̍t iô. Siūⁿ-bē-kàu Ni-bú soah kā thang-á-mn̂g kuiⁿ--khí--lâi, cháu khı̀ thó kiù-peng. Chhù-lāi ê káu-á lóng chông-chhut-lâi kong-kek iá-lông.
“Ouh!” iá-lông ná cháu ná kóng, “Jı̂n-lūi ê oē sı̄ bē-tit-thang siong-sı̀n--ê.”
19. Ku kap Lāi-hio̍h
Ū chı̍t-chiah ku chiok siūⁿ beh oāⁿ chı̍t-ê toà ê só͘-chāi, chiū iau-kiû lāi-hio̍h chhoā i khı̀ chhoē sin-chhù. Ku tap-èng sū-āu beh hó-hó-á pò-tap--i. Lāi-hio̍h chiū iōng kha-jiáu kā ku lia̍h-tiâu leh, poe chiūⁿ thiⁿ sı̀-kè khı̀ chhoē.
Tı̄ lō͘--nı̍h, in tn̄g-tio̍h chı̍t-chiah o͘-a, o͘-a kā lāi-hio̍h kóng, “Ku-bah chin hó-chia̍h neh.” “M̄-kú,” lāi-hio̍h ı̀n kóng, “ku-khak hiah-tēng beh án-choáⁿ chia̍h?” “Giâm-chio̍h lāi koh tēng, ē-tàng kā ku-khak lòng hō͘ phoà.” Lāi-hio̍h tit-tio̍h chit-ê àm-sı̄, chiū kā ku tùi poàⁿ khong-tiong tàn--lo̍h--khı̀. Ku-khak lòng-tio̍h giâm-chio̍h chiaⁿ-sı̍t phoà--khı̀. Lāi-hio̍h kap o͘-a nn̄g-ê chiū ún-sim-á chia̍h chı̍t-tǹg phong-phài ê ku-bah-chhan.
Choa̍t-tùi m̄-thang o͘-pe̍h siong-sı̀n pa̍t-lâng, sûi-piān ǹg-bāng lâng pang-chān.
20. Nn̄g-chiah Chı̂m-á
Ū chı̍t-jı̍t, thiⁿ-khı̀ chin-hó. Nn̄g-chiah chı̂m-á chhut-mn̂g beh khı̀ hái-piⁿ ê soa-po͘ thit-thô.
“Án kiáⁿ--ê, ” lāu-bú kóng, “Lí án-ne kiâⁿ-lō͘ bó hó-khoàⁿ. Kiâⁿ-lō͘ tio̍h-ài tı̍t-tı̍t kiâⁿ, m̄-thang kiâⁿ thán-hoâiⁿ. ”
”Án-niâⁿ, pài-thok lí seng kiâⁿ hō͘ goá khoàⁿ, sūn-soà kā goá kà.” Chı̂m-á-kiáⁿ án-ne kóng, “lí nā chò ē-kàu, goá chiū toè lí chò.”
Chò hó bô͘-iūⁿ sı̄ siōng-hó ê kàu-io̍k.
