21. Chhēng Sai-phoê ê Lı̂-á
Chı̍t-chiah lı̂-á khoàⁿ-tio̍h chı̍t-niá sai-phoê. He si phah-la̍h ê lâng nê tı̄ goā-kháu beh pha̍k hō͘ ta--ê. Chit-chiah lı̂-á kā hiahN khí-lâi chhēng. Toā-pān toā-pān kiâⁿ tńg-khı̀ i toà ê chng--nı̍h. Kiâⁿ kàu-ūi ê sı̂, chng--nı̍h ê lâng kap cheng-seⁿ lia̍h-chún i sı̄ chin-chiàⁿ ê sai, longkiáⁿ kàu phı̍h-phı̍h-chhoah, siám kàu bô khoàⁿ kı̀ⁿ iáⁿ. I kám-kak chin iāng, chin hong-sı̂n. Chı̍t hoaⁿ-hí, chiū khui-chhùi kiò chhut-siaⁿ.
Chit-sı̂, tāi-ke chiah hoat-hiān goân-lâi sı̄ i. Chú-lâng khí-mo͘ bái, chiū giâ kùn-á kā kòng. Chı̍t-chiah hô͘-lı̂ oá-khı̀ i ê sin-piⁿ kā kóng, “Thiaⁿ lí ê siaⁿ chiū chai-iáⁿ lí sı̄ sím-mı̍h lâng.”
Súi-saⁿ ē-tit-thang jia lâng ê ba̍k, m̄-kú giân-gí ē sia̍p-lāu gōng-lâng ê chin bı̄n-bo̍k.
22. Lí-hêng ê Lâng kap Hı̂m
Nn̄g-ê lâng chò-hoé khı̀ lí-hêng, kiâⁿ-koè chhiū-nâ ê sı̂-chūn, chı̍t-chiah hı̂m hiông-hiông chông--chhut--lâi. Kiâⁿ tı̄ thâu-chêng hit-ê sûi peh chiūⁿ chhiū-á, kā ka-kı̄ chhàng tiàm chhiu-oe--nı̍h. Lēng-goā hit-ê bē-hù thang siám-pı̄, chiū kui-sin-lâng phiaⁿ-lo̍h-khı̀ phak tı̄ thô͘-kha.
Hı̂m chongl5ai kàu i sin-piⁿ, àⁿ lo̍h-khı̀ kā phı̄ⁿ-phı̄ⁿ leh, kan-ta iô-thâu, “Hô͘ⁿ” chı̍t-siaⁿ, chiū lı̄-khui.
Chhiū-téng hit-ê lo̍h--lâi, kiâⁿ oá i ê tông-phoāⁿ, chhiò-chhiò-á kā mn̄g-kóng, “Hit-chiah Hı̂m--sian--siⁿ tàu-té tùi lí kóng sím-mı̍h?”
“I kā goá kóng, tı̄ gûi-hiám ê sı̂, chò i liu-soan ê pêng-iú, choa̍t-tùi m̄-thang koh kap i kau-poê.”
23.Sai, Hô͘-lı̂, kap Pa̍t-ê Iá-siù
Ū chı̍t-kang, Sai kóng i pēⁿ kàu teh-beh sí lah, kiò só͘-ū ê tōng-bu̍t lóng lâi thiaⁿ i ê kau-tài.
Soaⁿ-iûⁿ lâi-kàu Sai ê tōng-kháu, khiā tiàm-hia, thiaⁿ i kóng chı̍t-khùn. Mı̂-iûⁿ mā lâi tı̄ hia, iáu-boē lı̄-khui. Koh ū chı̍t-chiah gû-á-kiáⁿ mā lâi lah. Tāi-ke lóng beh lâi thiaⁿ tāi-ông ê kau-tài.
Bô-joā-kú, Sai ū khah hó lah. I chhut-lâi kàu tōng-kháu, khoàⁿ-tio̍h Hô͘-lı̂ tı̄ goā-kháu teh tán-hāu. “Lí ná-ē bô jı̍p-lâi khoàⁿ--goá?” Sai mn̄g Hô͘-lı̂.
“Tāi-ông ah, chhiáⁿ lí liōng-kái. ” Hô͘-lı̂ kóng, “Goá khoàⁿ-tio̍h chē-chē tōng-bu̍t ê kha-jiah, kan-ta ū jı̍p--khı̀--ê, bô chhut--lâi--ê. Tı̄ jı̍p--khı̀ ê tōng-bu̍t iáu-boē chhut--lâi chı̀n-chêng, goá iáu-sı̄ lâu tiàm goā-kháu khah thò-tòng.”
Beh tiòng-kè khah kín, beh thoat-sin khah oh.
24. Lı̂-á ê Thâu-náu
Sai chham Hô͘-lı̂ tâng-chê beh khı̀ phah-la̍h. Hô͘-lı̂ siàn-tōng Sai, kiò-lâng khı̀ chio Lı̂-á chò-tı̄n khı̀. Lı̂-á thiaⁿ-kóng Tāi-ông beh kap i kau-poê, chin hoaⁿ-hí, sûi khı̀.
M̄-kú tán i kàu-ūi ê sı̂, Sai sûi kā Lı̂-á khian--sí, tùi Hô͘-lı̂ kóng, “Che chiū-sı̄ lán ê àm-tǹg. Lí seng kò͘ leh, goá khı̀ khùn--chı̍t--chhéⁿ. Lí nā káⁿ tāng goá ê Lı̂-á, lí chiū kai-sí.”
Sai kiâⁿ-cháu, chhun Hô͘-lı̂ tı̄ hia tán; tán chin-kú bô khoàⁿ-kı̀ⁿ Sai tńg--lâi, Hô͘-lı̂ chiū thau-thau-á kā Lı̂-á ê thâu-náu chia̍h-tiāu.
Sai tǹg--lâi ê sı̂, khoàⁿ Lı̂-á ê thâu-náu bô--khı̀, toā siaⁿ mn̄g Hô͘-lı̂ kóng, “lı̂-á ê thâu-náu tó-ūi khı̀?” “Thâu-náu? Tāi-ông ah! I pún-lâi chiū bô thâu-náu lah! Nā ū, i chiū bē lo̍h tı̄ lí ê hām-chéⁿ lo͘h.”
“Khiáu, Hô͘-lı̂ chit-kù-oē ı̀n liáu chin súi-khùi!”
25. Lāi-hio̍h Kap Chı̀ⁿ
Ū chı̍t-chiah Lāi-hio̍h tı̄ thiⁿ-téng poe, hiông-hiông thiaⁿ-tio̍h Chı̀ⁿ-siaⁿ “siú”--chı̍t--ē, i chai-iáⁿ ka-kı̄ í-keng hō͘ Chı̀ⁿ siā--tio̍h, siū tāng-siong, teh-beh sí lah.
I ê siang-sı̍t phia̍t leh, phia̍t leh, bān-bān-á tūi-lo̍h thô͘-kha, khang-chhùi ê hoeh chhop8-chhop8-tih. I àⁿ-thâu khoàⁿ hit-ki siā-tio̍h i ê Chı̀ⁿ, siūⁿ bē kàu Chı̀ⁿ-boé pa̍k--ê kèng-jiân sı̄ i ka-kı̄ ê ú-mô͘.
“Aih-iah!” i ai chı̍t-siaⁿ, chiū án-ne sí--khı̀.
Tùi-chhiú iōng lâi phah--lán ê bú-khı̀, tiāⁿ-tiāⁿ sı̄ lán ka-kı̄ sàng hō͘--i ê.
26. Bē Gû-leng ê Cha-bó͘ Gín-á
Patty sı̄ bē gû-leng ê châ-bó͘-gín-á, i thâu-khak téng giâ chı̍t-tháng gû-leng beh khı̀ chhı̄-á. I ná kiâⁿ ná àn-sǹg bē gû-leng ê chı̂ⁿ beh án-choáⁿ iōng.
“Goá beh kā Brown bé koá ke-á,” i kóng, “in ē ta̍k-kang seⁿ ke-nn̄g; goá beh kā nn̄g bē hō͘ Parson in bó͘. Bē ke-nn̄g ê chı̂ⁿ, goá beh the̍h-lâi bé chı̍t-su sin saⁿ kap chı̍t-téng súi bō-á. Goá nā chng hō͘ sui-súi khı̀ chhı̄-tiûⁿ, hiah-ê siàu-liân-ke choa̍t-tùi lóng ē sio-cheⁿ beh lâi chhoē goá khai-káng! Polly Shaw tiāⁿ-tio̍h ē khoàⁿ-kàu ba̍k-khang chhiah. He sı̄ in-tau ê tāi-chı̀, goá chiah bô teh kiaⁿ--i. Goá chiū kā khoàⁿ--chı̍t--ē, thâu-khak oa̍t tùi piⁿ--á khı̀.”
I ná kóng ná oa̍t-thâu, tháng-á soà lak--lo̍h--khı̀, gû-leng chhia-tó liáu-liáu.
I chí-hó tńg-khı̀ chhù, kā a-bú kóng gû-leng chhia-tó ê in-toaⁿ.
“Ah, gōng gín-á,” a-bú ná kā an-ùi, ná kā thiah-bêng, “Ke-á-kiáⁿ iáu-boē pū--chhut--lâi chı̀n-chêng, bē-tàng àn-sǹg--tit.”
27. Niau-á Sin-niû
Ū-chı̍t-kang, thiⁿ-sı̂n teh sio-chèⁿ, kóng tōng-bu̍t ê pún-sèng kiám ū khó-lêng ē kái-piàn.
Jupiter kóng, “Ē!” M̄-kú, Venus kóng, “Bē!”
Só͘-í, in koat-tēng beh chhı̀-giām--chı̍t--ē. Jupiter kā chı̍t-chiah Niau-á piàn-chò chı̍t-ê cha-bó͘-gín-á, an-pâi i khı̀ kap chı̍t-ê siàu-liân-ke kiat-hun.
Kiat-hun-sek chin sēng-tāi, tai-ke lóng chin hoaⁿ-hí, sin-niû ê piáu-hiān mā hō͘ tāi-ke chiok o-ló. Tāi-ke chò-tı̄n chia̍h chheⁿ-chhau ê sı̂, Jupiter kā Venus kóng, “Lí khoàⁿ, sin-niû piáu-hiān liáu chiâⁿ hó. Siáⁿ-lâng ē chai i châ-hng iáu-sı̄ chı̍t-chiah Niau-á? I-ê pún-sèng tiāⁿ-tio̍h í-keng kái lah! Kiám m̄-sı̄ leh?”
“Tán--chı̍t--ē,” Venus ı̀n chı̍t-siaⁿ, chiū piàn chı̍t-chiah niáu-chhí--chhut--lai, pàng jı̍p-khı̀ chhù-lāi. Sin-niû chı̍t-khoàⁿ-tio̍h niáu-chhí, chiū tùi í-á-téng thiàu--khí--lâi, chông-tùi niáu-chhí khı̀.
“Ah, lí khoàⁿ,” Venus kóng, “Goá kóng liáu bô m̄-tio̍h, tōng-bu̍t ê pún-sèng bô khó-lêng ē kái-piàn!”
28. Bé-á kap Lı̂-á
Bé-á kap Lı̂-á tâng-chê toè chú-lâng chhut-mn̂g. Bé-á chhēng-chhah chin súi, iân-lō͘ kiâⁿ iân-lō͘ thiàu-lāng, sim-chêng chin khin-sang. Lı̂-á phāiⁿ tāng-mı̍h chin chia̍h-la̍t, iân-lō͘ kiâⁿ, iân-lō͘ phı̄ⁿ-phēⁿ chhoán, sim-chêng chin ut-chut.
Lı̂-á thó͘ chı̍t-ê toā-khùi, án-ne kā Bé-á kóng, “Goá nā-sı̄ lí chiū hó lah! Kui-kang chia̍h-pá-pá, êng-sian-sian, koh thang chhēng kàu súi-tang-tang.”
Tē-jı̄-kang, ū chı̍t-tiûⁿ toā chiàn-ia̍h. Siōng boé-pái chhut-chiàn ê sı̂, Bé-á tio̍h tāng-siong, tó tı̄ lō͘-piⁿ, teh-beh sí lah. Lı̂-á kiâⁿ tùi hia koè, khoàⁿ-tio̍h Bé-á kan-ta chun chı̍t-tiám-á khùi-si-á, kám-kak i chin khó-liân.
“Goá chhò lah,” Lı̂-á kóng, “Iáu-sı̄ pêng-hoân khah an-choân!”
29. Pûn kó͘-chhoe--ê
Chı̍t-ê kun-tūi ê kó͘-chhoe-chhiú tı̄ chiàn-tiûⁿ ê chiân-soàⁿ hō͘ te̍k-jı̂n lia̍h--khı̀.
Te̍k-jı̂n beh kā chhú-sí, i kā kiû-chêng, “Goá pēng bô chah bú-khı̀ kap lín chok-chiàn, kan-ta pûn kó͘-chhoe niâ, sı̄ án-choáⁿ beh kā goá thâi--sí?”
“Lí sui-jiân bô chhin-sin chok-chiàn,” te̍k-jı̂n ı̀n kóng, “m̄-kú, lí kó͘-chhui koh niá -chhoā lín ê kun-tūi kap goán chok-chiàn.”
Chhut-chhùi bē-su chhut-chhiú.
30. Siáu-thiú-á kap Chng-kha-lâng
Chng-kha nāu-jia̍t ê sı̂, ū chı̍t-ê siáu-thiú-á teh piáu-ián bô͘-hóng ta̍k-chióng tōng-bu̍t ê kiò-siaⁿ, ta̍k-ê lóng khoàⁿ-kàu chhiò-ha-ha. Siōng lō͘-boé, i koh o̍h ti-á ki-ki kiò, o̍h kàu chiok sêng. Khoàⁿ nāu-jia̍t ê lâng lóng siūⁿ-kóng i sin-khu tiāⁿ-tio̍h ū chhàng chı̍t-chiah ti-á.
M̄-kú, ū chı̍t-ê goā-chng-lâng khiā tı̄ piⁿ--á kóng, “He ná-sı̄ ti-á ê kiò-siaⁿ! Chı̍t-tiám-á tio̍h bô sêng. Bı̂n-á-chài goá chiah hō͘ lín thiaⁿ khoàⁿ ti-á ê kiò-siaⁿ sı̄ seⁿ-chò siáⁿ-khoán.”
Keh-tńg-kang, hit-ê lâng chiâⁿ-sı̍t peh-chiūⁿ bú-tâi, thâu-khak lê-lê, o̍h ti-á ki-ki-kiò, kiò bô thêng koh chin chhò-hı̄ⁿ. Koan-chiòng thiaⁿ liáu chin sit-bōng, lóng kā mē, koh kā tı̀m chio̍h-thâu-á kiò i tiām--khı̀.
“Lín chiah-ê giàn-thâu--ê!” i khui-chhùi toā-siaⁿ jiáng, “Lí tàu-té sı̄ bat siáⁿ!”. I ná jiáng ná kā chhàng tı̄ hiû-á lāi ê ti-á-kiáⁿ lia̍h--chhut--lâi, chhiú kā ti-hı̄ⁿ-á khiú tiâu-tiâu. Goân-lâi sı̄ chiàⁿ-káng ê ti-á teh ki-ki-kiò.
Ké--ê thong-lâng o-ló, chin--ê lâng soah hiâm chhàu--chho.
