Ia̍p Chùn ê Sió-toān

Ia̍p Chùn chhut-sı̀ tı̄ chú-āu 1867 nı̂. Tı̄ soè-hàn ê sı̂ pē-bú sàn-hiong, ū tha̍k tām-po̍h Hàn-o̍h nā-tiāⁿ, chiū hō͘ lâng chhiàⁿ choè sin-lô. I ê tē sı̀ hiaⁿ tāi-seng tit-tio̍h tō-lí, i chiū chı̄n la̍t chó͘-tòng, chóng-sı̄ bô kú i ê tē sı̀ hiaⁿ ū khı̀ Tām-súi jı̍p Sı̂n-ha̍k-hāu. Āu-lâi in lāu-bú ū phoà-pı̄ⁿ khı̀ Tām-súi chhē i-seng. Ia̍p Chùn chiū khı̀ chiàu-kò͘, tùi án-ni chiū tit-tio̍h tō-lí. Tùi 16 hè khí chiū khı̀ kun-sûi Lē Bo̍k-su, 17 hè nı̂-bé chiū jı̍p Sı̂n-ha̍k, 21 hè chiū chhut-lâi Chúi-tńg-kha choè Thoân-tō. Hit-sı̂ i ū chı̄n la̍t kó͘-bú kàu-hoē kap kó͘-bú khí sin pài-tn̂g. Tùi án-ni kàu-hoē chiū chiām-chiām heng-khí. Tùi Tè-kok léng Tâi ê sı̂, i ū pı̄-pān poaⁿ khı̀ Tām-súi pài-tn̂g. Āu-lâi ū beh kā i choán-jı̄m, in-ūi ū kúi-nā hāng ê chó͘-tòng, chiū sı̂-chit hioh kang, iû-goân koh tiàm Chúi-tńg-kha choè seng-lí kap choè i-seng. Taⁿ hioh kang liáu-āu ū thang pang-chān kàu-hoē ê só͘-chāi, i chin hoaⁿ-hí choè, iā chhut-la̍t toê-iân choè kàu-hoē ê bô͘-iūⁿ. Put-hēng tı̄ kū-nı̂ bé ū phoà-pı̄ⁿ jı̍p Má-kai i-ı̄ⁿ; tāi-seng tit-tio̍h i-seng chı̄n la̍t i-tı̄, pı̄ⁿ chiām-chiām khah hó. In-ūi seng-lí kap lâng tn̂g-té ê sū siūⁿ tio̍h ko͘-put-chiong chhut ı̄ⁿ tò-tńg lâi, pı̄ⁿ-sè koh tú-tio̍h ná siong-tiōng. Kàu pún nı̂ 2 ge̍h 7 hō koh jı̍p ı̄ⁿ, chóng-sı̄ khó-sioh chia̍h io̍h bô hāu, tı̄ 2 ge̍h 18 hō hō͘ chú kéng-tiàu lı̄-khui sè-kan,kè jı̍t soà tı̄ hia bâi-chòng. Ū tit-tio̍h kúi-nā ūi se-kok kap pún-toē Bo̍k-su,Thoân-tō-su, Sı̂n-ha̍k-hāu ê ha̍k-seng kap Toā-tiū-tiâⁿ, Báng-kah, Chúi-tńg-kha ê kàu-hoē lâi sàng-chòng, tı̀-ı̀ ài siá kúi-jı̄ kā lia̍t-ūi seh-siā. Taⁿ kàu-hoē ū sit-lo̍h chı̍t ê jia̍t-sim ê hoē-iú, i ê bó͘-kiáⁿ ū sit-lo̍h chı̍t ê thâu-chàng, kiám m̄ siong-pi mah? (Tâi-lâm Kàu-hoē-pò tē 373 koàn，1916 nı̂ 4 goe̍h)