In Gı̄ lióng-choân
Sio̍k tı̄ Hi-lia̍p kok ū chı̍t-ê sió pang-kok, miâ-chò Lô-kiat; só͘-chāi khah- phiah, kı̄n-oá soaⁿ-kha. Kok-lāi ı̂m-loān ê hong-sio̍k chin sēng, Kok-ông put-chí thòng-hı̄n--in; chiū siat giâm-kín ê kı̀m-lēng, lâi thong-ti hiah-ê peh-sèⁿ kóng, nā-ū lâng hoān-tio̍h ı̂m-loān ê choē beh phah in nn̄g-lúi ba̍k-chiu, bô beh sià--i. Kok-ông ū chı̍t-ê Thài-chú, bı̄n-māu sı̀-pan, hō͘-tiōng, seng-sêng put- sio̍k; lâng lóng ǹg-bāng i ē sêng tāi-khı̀ lâi chiap-ūi. Tı̄ chı̍t-jı̍t Thài-chú hut-jiân hoān-tio̍h chit ê kı̀m-lēng. hō͘ lâng kā i chhut-phoà; chhâ-khó hit-ê-sū kó-chin ū-iáⁿ. Kok-ông chek-sı̂ beh chiàu kok-hoat pān--i; choán-siūⁿ kóng, Goá chí-ū chit-chı̍t-tiâu ê hiat-me̍h, toàn-toàn m̄-thang choa̍t-liáu chó͘-chong ê hō͘-sû; m̄-kú kok-hoat iū bē-sái--tit tô-cháu. Nā in-ūi su-sū lâi hoè- bô kong-gı̄, beh án-choáⁿ siat-lı̍p hoat-tō͘ ? In-ūi le̍k-ài lâi phian-thán, beh án- choáⁿ kà-sı̄ peh-sèⁿ? Chá-àm chhau-sim peh-pak; ài-tit lióng-choân-kı̂-bí, iū bô hit-ê kè. Siūⁿ-kàu bē-chia̍h bē-khùn--tit; hut-jiân-kan ū chı̍t-jı̍t siūⁿ-chhut thè- sio̍k ê kè-tı̀; chiū tng chèng-lâng ê bı̄n-chêng, kah i-ê Thài-chú lâi kūi--teh, chhiat-chhiat chek-pı̄--i, kóng, Goá chham lí lūn in, sı̄ pē-kiáⁿ, lūn gı̄, sı̄ kun-sı̂n; hoat-lu̍t sı̍t-chāi bē tô-pı̄--tit, chóng-sı̄ in-chêng iā oh-tit koah iā; lí nā kó-jiân ē kái-kò oāⁿ sin-ho͘h, goá goān chham lí tàu-siū-choē. Chek-sı̂ ka- tı̄ phah chı̍t-lúi ba̍k-chiu khí--lâi, kah Hêng-tiōng iā phah in Thài-chú chı̍t-ba̍k. Thài-chú siong-sim kàu-ke̍k chhám-chheh hoán-hoé chiông-chiân ê sit-chhò, toā-siaⁿ kóng, Goá ê pē chō-ūi, chiah-nı̄ chun, nı̂-hoè, chiah-nı̄ lāu, lâi thè-goá siū-khó͘, goá sim m̄-sı̄ chhâ--ê chio̍h--ê, goá beh-thài-ē jím--tit--leh? Chū hit-sı̂ chheng-sim koáⁿ-io̍k, sé-thoā tek-hēng, kái-kò oāⁿ-sin; kàu-boé kó-jiân chò hó jı̂n-kun. Thong-kok ê peh-sèⁿ chiong chit-khí-sū kā i liû-thoân o-ló; iū-koh chı̍t-ê chı̍t-chhùi siàu-liām kok-ông ê tek-hēng, chheng-ho͘ Thài-chú ê hiân; hit-ê ı̂m-loān ê hong-sio̍k, iā in-ūi án-ne ū khah léng--khı̀.
Khı̀-chin-chú teh phoe-phêng kóng, Thiⁿ-ē bô hit-hō m̄-thiàⁿ-kiáⁿ ê pē; hām- lo̍h-choē, pē kap i siū hêng-hoa̍t, kàu āu-lâi kiáⁿ ē-hiáu-tit hoán-hoé kái-kò, hō͘ pē lâi tit-tio̍h hiân ê kiáⁿ. lâng chai hit ê kiáⁿ ē ké-pı̀ⁿ chiông-chiân ê chhò-gō͘, kiám iā soà chai sı̄ tùi hit-ê pē ê ēng- sim kàu-hiah-nı̄ khó͘ lâi--ê mah? Taⁿ Thiⁿ-pē chhòng-chō lâng-lūi, khoàⁿ-chò ı̀-ài ê kiáⁿ; lâng kı̀-jiân hoān choē, i nā chiàu kong-gı̄ ēng thiⁿ-lí lâi chek-hoa̍t--lán, m̄-kú hāi-tio̍h in-chêng, nā in-ūi su- chêng it-bı̄ lâi sià-bián--lán, m̄-kú hāi- tio̍h kong-gı̄. Só͘-í chiah hoà-sin kàng- lo̍h sè-kan, miâ-chò Iâ-so͘, lâi thè-lâng siū-khó͘, kiù chiah-ê bān-peh-sèⁿ; lūn jı̂n-ài iā kàu, lūn kong-gı̄ iā chin; sı̍t-chāi sı̄ chin bô-tā-oâ ê khó͘-sim. Khoàⁿ Lô-má 3:26. Lâng siat-sú ē hiáu-tit sé- tû oāⁿ-sin, í-keng pò i-ê toā-in, bān-hūn iā pò bô chı̍t-hūn. Hit-hō kiān-koai put- siū kàu-hoà--ê chóng bē-bián--tit tio̍h hō͘ I khiàn-chek. Che m̄-sı̄ Thiⁿ-pē khı̀- choa̍t lâng, sı̍t-chāi sı̄ lâng ka-tı̄ khı̀- choa̍t lah!
(Tâi-lâm-hú-siâⁿ kàu-hoē-pò tē 17 tiuⁿ, 1886 nı̂ 11 goe̍h)