1. Hō͘ goá bô hoat oàn-siaⁿ
Tùi Hok-ek-hiaⁿ put-hēng chá koè-sin, chiū hit-sı̂ í-āu i ê hū-jı̂n-lâng Siok-cheng, chin chiàⁿ sı̄ kan-kan khó͘-khó͘ khek-khı̂n khek-khiām, oá-khò hit siang-chhiú kā lâng choè saⁿ lâi khan nn̄g ê kiáⁿ. Toā-hàn--ê ta-po͘ miâ Bûn-hoâ, tng-sı̂ 10 hoè, sè-hàn--ê lú ê kiò Lē-hoâ tng-sı̂ 5 hoè. I ê tiōng-hu sı̄ pún-sū lâng, oa̍h tong-sı̂ teh khui sı̂-pió tiàm, sin-lô chhiàⁿ chin chē ê. Nā sı̄ chí-moāi chin lêng-lāi, i ka-kı̄ siūⁿ bē-hiáu kng kiō, chiū m̄-thang khui kiō-tiàm. Sui-bóng ū toā-peh, sió-chek, chóng-sı̄ bô lâng pài Siōng-tè, jı̍t-thâu chhiah iāⁿ-iāⁿ, sûi-lâng kò͘ sı̀ⁿ-miā. Só͘-í i chek-sı̂ chéng-lí, chiong só͘ khiàm--lâng ê hêng chheng-chhó, sé kàu tı̍t chhun bô loā chē, chiū poaⁿ-jı̍p chhı̄-tiûⁿ-lāi. Ki-liông ê seng-lí, tı̄ chhı̄-tiûⁿ lāi sím-mı̍h to͘ ū. I chiū tı̄ tú-hó ê só͘-chāi tùi lâng poâⁿ chı̍t-keng sè-sè ê tiàm ūi, bó kiáⁿ chiū tı̄ hia choè saⁿ-khò͘ tùi chhâi-hông lâi tō͘-oa̍h. Siōng-tè si-un lı̂n-bín i, i jia̍t-sim khı̂ⁿ-tiâu tı̄ Chú, i tı̄ kàu-hoē tng chip-sū, chiáng-lí kàu-hoē ê koè-kè, pang-chān Chú-jı̍t-o̍h, sèng-koa-pan, i sı̄ gı̂m lú kē-siaⁿ ê léng-tō-chiá, i iā chiáng-lí Lú Soat-tō-hoē ê koè-kè, choè lâng tiong-hō͘, giâm-chèng, chheng-pe̍k, hō͘ kàu-hoē lāi-goā ê lâng só͘ chun-kèng. Tiōng-hu sí hit nı̂ i chiah 30 hoè, chin chē lâng beh lâi kā i choè chhin-chiâⁿ, i lóng kā lâng the-sı̂, i kam-goān lô-khó͘ lâi khan kiáⁿ.
Hit àm chia̍h-pá ta̍k-hāng khoán chheng-chhó, chiū kiò nn̄g ê kiáⁿ lâi, chiàu-siông choè ka-têng lé-pài. Ba̍k-chı̍t-nı̍h Bûn-hoâ í-keng 11 hoè, kok-bı̂n ha̍k-hāu 3 liân, Lē-hoâ iā 6 hoè lah.
Hian-khui sèng-si choè-hoé gı̂m.
Sèng-si ê oē kóng:
1. Siat-sú ū siáⁿ sè-kan hēng-hok, Bô siū sèng-sim ún-chún, Tān goān oá-kūn chû-pi chō-chêng, Chān goá goān-ı̀ kèng-chun.
2. Kiû sù tı̀n-chēng kám-siā ê sim, Hō͘ goá bô hoat oàn-siaⁿ, Goān Lí chiap-soà lı̂n-bín bô soah, Goá goān ūi Lí phoe-miā.
3. Tān goān it-seng kap Chú saⁿ-sûi, Toè Lí éng bô lı̄-khui, Goān Chú ēng kng chiò goá chiân-tô͘, Kap Lí tâng kàu hit ūi.
(Chit siú si ê chok-chiá sı̄ jia̍t-sim ê lú-tô͘, i ê bı̄-hun-hu chin siàu-liân eng-chùn, tng beh kiat-hun ê chêng-jı̍t, tı̄ hô-nı̍h sé-e̍k, sit-chiok thu̍t-kha poa̍h kàu tı̄ chhim ê ūi, tùi án-ni sit-sū éng pia̍t, chí-moāi ūi chit-ê sū hoân-ló tı̀-pı̄ⁿ, it-seng sin-thé loán-jio̍k, siông-siông kha̍h-chhn̂g, chit siú chiū-sı̄ i tı̄ pēⁿ-chhn̂g tiong só͘ choè ê si, chē-chē lâng ài gı̂m).
Hit àm chiū-sı̄ Siok-cheng ê tiōng-hu sí tùi nı̂ ê jı̍t. Bē-bián-tit siūⁿ tio̍h chá-chêng kap hiān-kim chiū ba̍k-sái sı̀-lâm-sûi. Nā-sı̄ i bô loé-chı̀, ba̍k-sái chhit-chhit leh, chiū hian-khui Sèng-keng lâi tha̍k, Ko-lı̂m-to chiân-su 10 chiuⁿ 10 chat, kóng “Lí iā bo̍h-tit nga̍uh-nga̍uh liām, chhin-chhiūⁿ in tiong-kan ū lâng nga̍uh-nga̍uh liām, XXXX 13 chat: Lín só͘ tú-tio̍h ê chhı̀ bô m̄ sı̄ lâng ê siông-sū; Siōng-tè sı̄ sı̀n-sı̍t, bô beh hō͘ lín tú-tio̍h chhı̀ kè-thâu tı̄ lín só͘ oē tng; chiū-sı̄ tı̄ siū chhı̀ ê sı̂ beh soà khui thoat-chhut ê lō͘, hō͘ lín tng oē khı̀.”
Tha̍k liáu kiò kiáⁿ saⁿ lûn oa̍t-liām Si-phian 23 phiⁿ, koh phoāⁿ kiáⁿ liām Sı̀n-keng, koh liām 10 tiâu-kài, Chú ê kı̂-tó-bûn, āu-lâi i pún-sin chiah ēng kán-tan ê kı̂-tó lâi soah. Jiân-āu ū kóng tām-po̍h pa-pa ê sū hō͘ tāi-ke siàu-liām chāi-seⁿ ê pa-pa sı̄ hô-téng ê thiàⁿ-sioh in. Choè chit-khoán ê kı̀-liām, soà kó͘-lē kiáⁿ-jı̂ tio̍h lı̍p-chı̀, kian-sim sı̀n Chú, oá-khò Chú jı̄n-chin lâi chı̀n-pō͘. Sió-moāi Lē-hoâ sè-hàn khah bē-hiáu thiaⁿ, nā-sı̄ Bûn-hoâ kù-kù tı̀m-thâu, ba̍k-sái koà tiàm ba̍k-kı̂ⁿ, chhiú tı̄ⁿ kûn thâu-bú, chhùi-tûn kā ân-ân, kù-kù léng-siū lāu-bó ê kà-sı̄, sim-té lı̍p-sē kian-sim beh siú ma-ma ê hoan-hù, lı̍p-chı̀ choè koai-kiáⁿ lâi êng-kng Siōng-tè pò-tap pa-pa, ma-ma ê in. Keh-jı̍t piàⁿ-sàu teh pha̍k-mı̍h ê sı̂, chiong lāi-bı̄n ê mı̍h lóng the̍h chhut-lâi goā-bı̄n pha̍k-jı̍t, hut-jiân tı̄ keh-á-téng, bô teh kah ê mı̂-phoē lāi, mı̂-phoē chih hó-hó siu tı̄ hia, tı̄ hit lāi-bı̄n khoàⁿ-tio̍h chı̍t ê choá-khe-á, lāi-bı̄n ū té chı̂ⁿ, ū chı̍t-kak--ê, iā ū nn̄g-kak--ê, iā ū gō͘-kak--ê, iā ū gı̂n-phiò, lóng-chóng ū 4 kho͘ goā-gı̂n. I ê lāu-bó chin kı̂-koài, mn̄g bô khı̀ tha̍k-chheh ê Lē-hoâ, che sı̄ sím-mı̍h chı̂ⁿ, Lē-hoâ iô-thâu m̄ kóng, khah mn̄g to͘ m̄ kóng, ma-ma mn̄g i cháiⁿ-iūⁿ lí mn̄g m̄ kóng? I kóng, “Ko-ko kóng m̄-thang kóng,” án-ni Lē-hoâ chin siú iok, i thiàⁿ a-ko. Lāu-bó chiū bô koh pek--i, kóng, “Hó, thèng-hāu lín ko-ko tò--lâi, goá chiah lâi mn̄g i, án-choáⁿ ē chhàng hiah chē chı̂ⁿ tiàm phoē-lāi, bô hō͘ ma-ma chai, koh mn̄g m̄ kóng.”
(khiàm tē 27 kı̂, 1960 nı̂ 5 ge̍h)
2. Saⁿ-khoán ka-têng.
3. Saⁿ-khoán chhú-lí-hoat.
Tùi kòng-phoà hoe-kan ta̍k-lâng poê 5 kho͘-gı̂n, Siok-cheng ê chhú-lí-hoat lán í-keng chai. Thian-lâi-ā tò-khı̀ beh kā in lāu-bú the̍h, in lāu-bú kóng i m̄-chai. Chiong chit-ê sū kā in lāu-pē kóng. Toā-tiâu-ah, peh-khí-lâi thiàu, chek-sı̂ khı̀ sa chı̍t-ki tı̂n-tiâu chhin-chhiūⁿ teh bu̍t-gû án-ni tı̍t-tu̍t, chhoh koh kiāu. Thian-lâi-ā bùn tùi toh-kha lo̍h-khı̀, koh thoa chhut-lâi ēng kha chàm, tǹg lap-chē lo̍h-khı̀, chhia-tó oáⁿ-táu-á kòng-phoà chin chē tè oáⁿ, in lāu-pē koh-khah khı̀, mē i khoàⁿ beh khı̀ tó-ūi sí, kín khı̀ sí. Thian-lâi-ā chū án-ni khàu tùi goā-bı̄n chhut-khı̀, kàu in lāu-pē bô khoàⁿ-kı̀ⁿ ê ūi ba̍k-sái chhit-chhit leh, khui-chhùi chhoh in lāu-pē, pàng-tiau in lāu-pē to m̄-thang chia̍h lāu, i tek-khak beh pò-oan. Lóng bô kóng beh hêng--lâng, hit-àm Thian-lâi-ā khı̀ goā-kháu liû, bô chia̍h, liû kàu chin àm chiah sô tò--lâi. In lāu-pē tú gū ū oá-chûn, kò͘ chhut-hoè iā bô koh mn̄g.
Keh bı̂n-á-chài Thian-lâi-ā khı̀ háⁿ Hián-chó͘ kà i thè i chhut-chı̂ⁿ thang poê, nā bô beh cheng--i. Hián-chó͘ saⁿ-á-tē lāi-bı̄n put-sı̂ to͘ ū chı̂ⁿ, nā pı̂n-toāⁿ kiâⁿ sûi-piān chio pêng-iú chē saⁿ-lián-chhia tò-khı̀ kā lâng chhut-chı̂ⁿ, gō͘-kho͘-gı̂n i sı̄ bô khoàⁿ-kı̀ⁿ, koh Lı̂m gı̄-oân kap Tân Toā-tiâu tı̄ bó͘ hong-bı̄n sı̄ ū àm-thong ê só͘-chāi, chiū-sı̄ tı̄ cháu-su ê sı̂, Lı̂m sian-siⁿ chin su-iàu Toā-tiâu ê pang-chān. Só͘-í Hián-chó͘ ê chı̂ⁿ, mı̍h sı̄ hō͘ Thian-lâi-ā ēng bû-sò͘, nńg--ê iā beh i, ngē--ê iā beh i, Hián-chó͘ nā hō͘ lâng khi-hū, Thian-lâi-ā iā thè i choè kûn-thâu tiam. Só͘-í Hián-chó͘ ēng chı̂ⁿ phàⁿ, Thian-lâi-ā ê kûn-thâu-bú toā-lia̍p, Bûn-hoâ tı̄ in tiong-kan, chhin-chhiūⁿ chíⁿ-á chhap tı̄ khóng-chhiok, kap chhâi-lông tiong. M̄-kú sı̄ tông-kip-seng, jı̂-chhiáⁿ beh khı̀, beh tò-lâi lóng siāng tiâu-lō͘, só͘-í m̄ kap in kiâⁿ iā hō͘ in chau-that, beh kap in kiâⁿ iā hō͘ in chhí-tı̄, sı̍t-chāi sı̄ chin oh choè lâng.
Koh kóng tò-tńg--lâi piàⁿ-sàu hit-jı̍t, ta̍k-hāng mı̍h the̍h chhut lâi pha̍k, péng-péng hiah-ê bô lō͘-ēng ê mı̍h, Siok-cheng khoàⁿ-choè bô lō͘-ēng--ê lóng kā i hiat-ka̍k. Kı̂-tiong ū hiah-ê chhit-cha̍p-tâng peh-cha̍p-thih, put-tōng lí-khian ê mı̍h, Lē-hoâ lia̍h choè chin pó-poè, pau chı̍t-pau chı̍t-pau ûn-ûn-á siu hó-sè, liân chı̍t-sian liù-phí liù-phí bı̄n kū-khı̀ niau-niau ê âng-á, oá chiâⁿ-chhioh toā, só͘ chhēng ê saⁿ iā kū-kū-khı̀ lah, iā chin m̄-kam siu hó-sè, Siok-cheng lóng khoàⁿ choè bô lō͘-ēng kā i hiat-ka̍k, ū ê kā i pàng hoé-sio.
Lē-hoâ khı̀ tha̍k Iù-tı̄-hn̂g tò--lâi, khoàⁿ chı̍t-ē toā m̄-kam, chı̄n sò͘ ē khı̀ khioh tò-tńg--lâi, te̍k-pia̍t hit sian âng-á ê saⁿ ū hō͘ hoé sio-tio̍h, chhiú-kut chı̍t-ki iā sió-khoá sio-tio̍h, Lē-hoâ kín-khı̀ tùi hoé-tiong kiù i chhut, lâu ba̍k-sái chin m̄-kam. Lē-hoâ sui-jiân sı̄ 6 hoè, kı̂-sı̍t chiah ū 5 hoè chiok, nı̂-boé ut-hoè ê kiáⁿ, chin m̄-kam, khioh lâi phō tiàm heng-chêng, kín khioh ma-ma ê pò͘-liâu-á lâi kā i pau-chhiú, ná-chún hō͘-sū chı̍t-iūⁿ ê koan-sim hoān-chiá, koh kiû ma-ma kā i choè sin-saⁿ. Siok-cheng khí-thâu khoàⁿ liáu iā hó-khı̀, iā hó-chhiò, chóng-sı̄ āu-lâi chiū siūⁿ eng-kai tio̍h thé-thiap sè-kiáⁿ ê sim, chun-tiōng sè-kiáⁿ ê só͘-iú-koân, mı̍h sı̄ i ê, bô kap i chham-siông, bô tit sè-kiáⁿ ê liōng-kái, sûi-piān chiong lâng khoàⁿ choè ke-hoé ê mı̍h kā lâng hiat-ka̍k, sı̄ bû-sı̄ lâng ê jı̂n-koân ê chun-giâm, koh te̍k-piat tùi i ê hó pêng-iú “Bí-lē” (hit-sian âng-á ê miâ), kā i lia̍h khı̀ hō͘ hoé-sio koh-khah m̄-tio̍h, koè-khı̀ Bí-lē kap i khùn, hō͘ i phō, hō͘ i āiⁿ, choè i ê lâng-kheh hō͘ i chhiáⁿ, i bô tı̄-teh, lán chiū chiong i só͘ khoàⁿ choè hó pêng-iú ê, kā i hiat hō͘ hoé-sio, chin-chiàⁿ siong-tio̍h sè-kiáⁿ ê iú-jı̂-kám, bo̍k-koài Lē-hoâ siong-sim. Taⁿ tio̍h oân-sêng i ê nńg-sim ê hêng-ûi chiah hó, siat-sú lán nā ngē-ngē kā i chhiúⁿ hiat-ka̍k, kóng m̄-thiaⁿ, soà kā i phah, kóng i sam-pat, kàu hiah toā-hàn lah iáu teh sńg âng-á, án-ni chı̍t-sut-á to͘ bô lı̄-ek hit-ê gín-ná ê cheng-sı̂n kàu-io̍k, koh tian-tò hō͘ i giâu-gı̂ lāu-bú ê áu-hoâiⁿ, bô chêng, bô thiàⁿ-sim, i beh m̄-goān lí, khoàⁿ-khin lāu-bó ê só͘-choè, beh it-seng kı̀-tit lí ê iá-bân, m̄-nā bô poê-io̍k i ê chû-sim, iú-gı̂, koh hō͘ i phāu bô-hān ê siong-pi-kám, kap m̄-kam-goān lāu-bú bô chêng-lí, ko-ap-tek chhiú-toāⁿ ê khoán-thāi.
Siok-cheng siūⁿ-lâi siūⁿ-khı̀ chiū kín koh chiong lân-san-pò͘ thè “Bí-lē” choè sin-saⁿ, iā tùi Lē-hoâ hoē sit-lé, kā i kóng, Ma-ma chı̍t-sı̂ siūⁿ bô tio̍h, bē kı̀-tit mn̄g Lē-hoâ iáu ū khiàm-ēng Bí-lē á-bô.” Tek-khak m̄-thang bû-sı̄ sè-kiáⁿ ê chū-chun-sim.
Lē-hoâ chiū chhit i ê ba̍k-sái, bı̄n tńg-chhiò, phō i ê Bí-lē lâi phēng tiàm ma-ma ê heng-chêng. Tı̄ hia piáu-hiān jı̂n-kan ê un-loán, chiah soah-khı̀ hiám-hiám sio-sí sè-kiáⁿ ê hó-pêng-iú, léng-khok hiong-sat, châm-jím ê sū-kiāⁿ, hit-ê hong-pho chiah pı̂ⁿ-tiāⁿ. Lán iàu-kín tio̍h thé-thiap sè-kiáⁿ iù-chíⁿ ê sim-lêng.
(khiàm tē 29 kı̂, 1960 nı̂ 7 ge̍h)
5. “Phah hō͘ lí sí”
Ū chı̍t jı̍t Lē-hoâ tùi iù-tı̄-hn̂g tò--lâi, seng-khu hui-siông lâ-sâm, goân-in sı̄ tı̄ iù-tı̄-hn̂g kap lâng sńg-chúi, iù-tı̄-hn̂g ū phùn-chúi-tı̂, tı̂ té ū chhı̄ kim-hı̂, hit jı̍t kap kı̂-û ê gín-ná tı̄ pó-bó bô khoàⁿ-kı̀ⁿ ê sı̂ thau khı̀ sńg-chúi, sio hò͘, chin sim-sek, chiok hoaⁿ-hí, só͘-í seng-khu soà phah-tâm. Āu-lâi koh khı̀ soa-á-tui sńg, só͘-í seng-khu kō kàu o͘ kúi-kúi, tò--lâi ê sı̂ ma-ma khoàⁿ chı̍t-ē hui-siông siū-khı̀, tı̄ choè-saⁿ ê pò͘-chhn̂g téng ū chhioh, sûi-piān gia̍h khí--lâi liân-liân bô kéng só͘-chāi kā i bu̍t chin-chē-ē, chin khı̀, sim pho̍k-pho̍k-chhéng, chhiú phı̄-phı̄-chhoah kóng, “Bu̍t chı̍t-ē tháu-khùi leh, ē hō͘ lí khı̀--sí, iān-thâu kā lí kóng seng-khu tio̍h m̄-thang bak kiaⁿ-lâng, lí chiah thiau-ı̀-kò͘ bak kiaⁿ-lâng, án-ni kiám ē khoàⁿ-tit, chı̍t seng-khu bē su ná kúi, iā teh lâu-phı̄ⁿ, khoàⁿ tio̍h chin-chheh”, m̄-goān koh kā i liàm chı̍t-ē kóng, “Bē tit lín pē sí, lio̍h-á chiū léng-tio̍h lâu-phı̄ⁿ, lí iā káⁿ sńg-chúi.” Lē-hoâ tı̍t-tı̍t háu, iā thiàⁿ, iā kiaⁿ. Tú hit sı̂ Lē-hoâ ê lāu-su, pó-bó tùi hia koè, i iā sı̄ lán kàu-hoē ê chí-moāi, i ū tha̍k koè lán Sı̂n-ha̍k-ı̄ⁿ ê pó-bó-kho, iù-tı̄-hn̂g iā sı̄ lán kàu-hoē siat--ê. I tùi hia koè thiaⁿ Lē-hoâ teh háu, chiū oat lâi kā i khoàⁿ, khoàⁿ Siok-cheng chip-sū khı̀ phut-phut, chhiú iáu-kú gia̍h chhioh, chiū oá-khı̀ ēng chhiò-iông lâi khó͘-khǹg Siok-cheng chip-sū, soà hoē sit-lé kóng, “Chin sit-lé, in-ūi goá sit chù-ı̀ ê kam-tok, só͘-í hō͘ i khı̀ bak-chúi, bak kàu hiah tâm.” Siok-cheng chip-sū kı̀-jiân khoàⁿ pó-bó hiah chhiò-iông, hiah chhin-chhiat teh hoē, ka-kı̄ iā chin pháiⁿ-sè, chhioh pàng leh, chiū khan Lē-hoâ lâi oāⁿ-saⁿ.
Hit àm tng gín-ná khı̀ hioh-khùn ê sı̂ pó-bó lâi chhoē Siok-cheng chē, kap i tâm-lūn gín-ná kàu-io̍k ê sū, kóng khí hiān-chāi ê kàu-io̍k su-tiâu (kàu-io̍k siōng su-siúⁿ ê tiâu-liû) kap éng-koè chin toā ê koh-iūⁿ choè toā koh-iūⁿ ê kúi-nā tiám.
1. Tùi-tiōng kò-jı̂n chū-iû chú-gı̄, chá sı̄ kok-ka chú-gı̄, ka-cho̍k chú-gı̄, taⁿ sı̄ pı̀ⁿ choè kò-jı̂n chú-gı̄, chá Tiong-kok ê su-siúⁿ sı̄ kóng, “Kun io̍k sı̂n sú, sı̂n put-sú put-tiong.” “Hū io̍k chú sú, chú put-sú put-hàu”. Ì-sù sı̄ kóng “Jı̂n-kun nā ài jı̂n-sı̂n sí, jı̂n-sı̂n bô sí, án-ni jı̂n-sı̂n sı̄ bô chı̄n-tiong”. “Lāu-pē nā ài kiáⁿ sí, kiáⁿ nā bô sí, án-ni kiáⁿ sı̄ put-hàu”. Án-ni jı̂n-sı̂n sı̄ lē-sio̍k jı̂n-kun, sı̄ chhin-chhiūⁿ lô͘-châi, sèⁿ-miā, jio̍k-thé, sim-chı̀ lóng oân-choân sio̍k tı̄ jı̂n-kun, án-ni choè jı̂n-sı̂n m̄-nā jio̍k-thé, liân cheng-sı̂n, sèⁿ-miā to bô chū-iû. Kiáⁿ iā sı̄ lāu-pē ê hū-sio̍k phín, chı̍t ki thâu-mn̂g, chı̍t tè ê phoê-hu to͘ sı̄ tùi pē, bó siū--ê, só͘-í tio̍h koah-bah hêng bó, khek-kut hêng pē, it-seng ūi kok-kun lâi sí chiah sı̄ tiong, ūi pē-bó lâi sí chiah sı̄ hàu, pē-bó tı̄ teh ê sı̂ m̄-thang khı̀ hn̄g-hn̄g ê só͘-chāi, chá Jı̍t-pún sı̂-tāi ê kàu-io̍k, Thian-hông pē-hā sı̄ hiān sı̂n-jı̂n (hiān-chāi oa̍h-oa̍h tı̄ lâng ê tiong-kan, ba̍k-chiu khoàⁿ ē tio̍h ê Siōng-tè lâng), só͘-í in ū lâng kóng in ê Thian-hông pē-hā chiū-sı̄ boa̍t-sè ê Ki-tok. Tāi-tang-a chiàn-cheng, chiū-sı̄ Sı̂n chhe Jı̍t-pún tùi tang-hng jı̍t-thâu chhut ê só͘-chāi khí--lâi ê kiù-chú, beh lâi kái-hòng jı̂n-lūi. Lán chai che lóng sı̄ lâng ê khong-sióng, kap khoa-tāi-kông, chóng-sı̄ chit-ê su-siúⁿ sı̄ cha̍p-hun ê lı̄-hāi, chhim-jı̍p tı̄ Jı̍t-pún kok-bı̂n ê sim chin chhim, chiū pı̀ⁿ choè kun-kok chú-gı̄, chhut chē-chē te̍k-kong-tūi, ūi-tio̍h in ê “Tāi-kun” (tè-ông) sui-jiân sí tı̄ tó-ūi to͘ kam-goān, jı̂-chhiáⁿ beh sí ê sı̂ to toā-siaⁿ ho͘-kiò kóng, “Thian-hông pē-hā bān-soè” chiah sí. Án-ni kóng sı̄ chin “Cheng-tiong eng-ióng”, lí khoàⁿ chit-ê su-siúⁿ sı̄ hô-téng ê lı̄-hāi.
Í-siōng ê su-siúⁿ m̄-sı̄ kóng bô chin-lí, bô hó-chhù, tek-khak iā ū i ê te̍k-tiông, chiah ē chûn-chāi koh liû-thoân kàu hiān-chāi, chóng-sı̄ kı̄n-lâi chit-ê hó͘-tēng kò-jı̂n ê chū-iû ê su-siúⁿ tı̍t-tı̍t bu̍t-lo̍k (bô khı̀), kò-jı̂n ê chū-iû chú-gı̄ ê su-siúⁿ tı̍t-tı̍t teh phû-thâu, chiū-sı̄ tùi-tiōng kok kò-jı̂n ê chū-iû hoat-tián, kok-lâng ū i jı̂n-keh ê chun-giâm, kun ài jı̂n-sı̂n sí, jı̂n-sı̂n i bô tek-khak beh sí. I ū i ê chū-iû ı̀-chı̀ i m̄ sí, m̄ kap i sûn-sí (choè-hoé sí) iā bē thang kóng i put tiong. Pē ài kiáⁿ sí, kiáⁿ m̄ sí iā bē thang kóng kiáⁿ put-hàu, kiáⁿ ū kiáⁿ ê siūⁿ hoat, choè hoat, chá nā án-ni sı̄ kóng “ge̍k-kun” “poān chó͘” á-sı̄ “poē chó͘”. Taⁿ i ū chū-iû hiông-hui (chı̄n-la̍t, toā ē poe) ê ki-hoē. Pē-bó tı̄ teh i lı̄-khui pē-bó, kò͘-hiong poe kàu thiⁿ-piⁿ, hái-kak to͘ bô lâng kóng i put-hàu.
Chá beh chhoā, beh kè, tio̍h pē-bó chú-ı̀, phı̄n moâi-lâng-pô-ā kóng, tong-sū lâng bô sio khoàⁿ, “kiâm-chhài kiâm toâ-toâ, pē-bó chú-hun bô tâ-oâ.” “Hı̄n miā, oan-siû chiah ē choè ang-bó͘.” “Che sı̄ thih-teng tèng toā-thiāu, ē tit jı̍p sı̄ bē-tit chhut, it-seng ê kiat-ha̍p” che sı̄ kó͘-chá ê su-siúⁿ, taⁿ che sı̄ hó á bái? Sı̂-kan kap to-sò͘ ê lâng ê keng-giām ê le̍k-sú ē phoàⁿ-toàn.
Hiān-chāi ê kiat-hun sı̄ tiōng kò-jı̂n ê chū-iû, iú-hàu ê kiáⁿ chiū chûn pē-bó ê ı̀-kiàn choè chham-khó, put-hàu ê kiáⁿ chiū put-kò-būn, liân mn̄g lí pē-bó to bô. Chū-iû khı̀ kong-chèng kiat-hun, sı̄m-chı̀ chū-iû “loân-ài” “loān-ài” “chhı̀ kiat-hun” “chiām tông-ki”, chiong sèng-kau choè iû-hı̀, thit-thô, chin sı̄ chū-iû, lı̂-hun iā sin-bûn khé-sū kóng-kò, che chiū-sı̄ hiān-tāi ê kò-jı̂n chū-iû hiān-siōng. Taⁿ che sı̄ hó á m̄ hó, iā sı̄ tio̍h thèng-hāu sı̂-kan, kap to-sò͘ lâng ê keng-giām chiah lâi chèng-bêng.
Lán Ki-tok-kàu, te̍k-piat kàu-hoē beh si-hêng Ki-tok-kàu kàu-io̍k, nge̍h tı̄ chit nn̄g ê toā sı̂-tāi ê tiong-kan lán beh án-choáⁿ lâi hō͘ chit-ê tāi-chı̀ ē tiâu-hô. Hiān-chāi chē-chē ka-têng lāu kap siàu-liân--ê bē hô chiū-sı̄ tı̄ chia, lāu--ê chip kó͘-hoat, ka-cho̍k chú-gı̄, choa̍t-tùi ài chun-kó͘ hoat-chè chiah ē ēng-tit, siàu-liân--ê chú-tiuⁿ ài chū-iû chú-gı̄, kò-jı̂n chú-gı̄, án-ni kap kó͘-chá-sek ê ka-cho̍k chè-tō͘, oân-choân bē hô. Lán ê Chú-jı̍t-o̍h (kàu-hoē ha̍k-hāu) kap káng-toâⁿ-téng ê káng-tō beh án-choáⁿ? Che sı̄ chin toā ê būn-tê. Chin àm lah, pó-bó kap Siok-cheng saⁿ-sı̂ tò-khı̀.
(khiàm tē 31 kı̂, 1960 nı̂ 9 ge̍h)
