13. Kan-khó͘ ū sı̂ koè
Sı̂-jı̍t teh koè chin kín, ba̍k-chı̍t-nih Bûn-hoâ m̄-nā kok-bı̂n ha̍k-hāu pit-gia̍p, iā í-keng ko-tiong pit-gia̍p, siâng hit nı̂ tit-tio̍h Siōng-tè un-tián, ū khó jı̍p lán ê Sı̂n-ha̍k-ı̄ⁿ, chit-chân sū tùi tı̄ Siok-cheng chip-sū ta̍t-tit thang o-ló, chin toā ê koat-sim. In-ūi i chū siàu-liân chí ū chiah chiú chit-ê kiáⁿ, ko͘-toaⁿ chı̍t ê kiáⁿ, só͘ ǹg-bāng ê kiáⁿ, khiām-tn̂g neh-tō͘, kiâm, sng, khó͘, chiáⁿ, bóng tō͘ koè-jı̍t lâi poê-iúⁿ chit-ê kiáⁿ. Jı̂-chhiáⁿ tı̄ ko-tiong pit-gia̍p chin iu-siù ê sêng-chek, in ha̍k-hāu ê kàu-tō chú-jı̄m, lóng kó͘-lē i khó tāi-ha̍k, jı̂-chhiáⁿ pó-sàng iā ū kàu chu-keh, nā sı̄ Siok-cheng lóng chin kian-koat kā in the-sı̂, koh Bûn-hoâ pún-sin iā chhim-chhim chai che sı̄ Siōng-tè ê tiàu-bēng. Só͘-í sim-chı̀ lóng bô iô-tāng, tı̍t-tı̍t ǹg só͘ chhah ê pio lâi cháu. Hit nı̂ iok 50 miâ ê lâm-lú khı̀ khó Sı̂n-ha̍k-ı̄ⁿ, i khó tē-jı̄ miâ jı̍p-ha̍k. Lán Sı̂n-ha̍k-ı̄ⁿ chin-chiàⁿ hoan-gêng chit khoán ko-châi ê ha̍k-seng lâi jı̍p-o̍h. Ū sı̂ lâng siông-siông kóng goán bó͘-lâng nā khó i-ha̍k-ı̄ⁿ bô tio̍h, á-sı̄ tāi-ha̍k bô tio̍h chiah hō͘ i khı̀ Sı̂n-ha̍k-ı̄ⁿ, á-sı̄ hit-ê seng-khu bô tauh-tah ê chiah lâi hiàn hō͘ Chú, che chin chiàⁿ sı̄ khoàⁿ-khin Chú ke̍k-toā ê un-sù, Kū-iok sı̂-tāi, beh hiàn sio-chè tio̍h kéng bô hâ-chhû ê iûⁿ-ko, chit sı̂ lán iā eng-kai tùi ka-kı̄ ê chèng-kiáⁿ tiong kéng hit-ê siāng gâu, siāng chiâⁿ-mı̍h--ê lâi hiàn hō͘ Chú chiah tio̍h, lí siūⁿ kiám iā m̄ sı̄ án-ni mah?
Taⁿ Siok-cheng chhim-chhim kám-siā Chú ê un-tián, chiū kam-goān chiong choè pó-poè ê lé-mı̍h, chiū-sı̄ ko͘-siⁿ ê kiáⁿ lâi hiàn hō͘ Chú. Ūi-tio̍h i ū chit hō ê iú-sim, kám-tōng chē-chē lâng kā Bûn-hoâ chòng-hêng, koh kàu-hoē K tiúⁿ-ló soà tùi Siōng-tè lı̍p-iok, i hoaⁿ-hí èng-oān chit-ê chheng-liân kàu pit-gia̍p. Nā-sı̄ Siok-cheng chin sè-jı̄ tı̍t-tı̍t the-sı̂, tān-sı̄ tiúⁿ-ló chin hó-ı̀, kàu-boé Siok-cheng chiah kā i chiap-siū, lūn Bûn-hoâ chin-chiàⁿ sı̄ chiâⁿ-mı̍h, m̄ nā tùi lāu-bó iú-hàu, khı̀ ha̍k-hāu iā-sı̄ hō͘ ı̄ⁿ-tiúⁿ í-hā chèng kàu-siū só͘ o-ló, iā sı̄ hō͘ chèng-iú só͘ thiàⁿ-sioh, i pêng-sı̂ tı̄ chhù-nı̍h tı̄ kàu-hoē, bô lūn tùi Chú-jı̍t-o̍h, Sèng-koa-pan, Chheng-liân thoân-khè, ı̀n chiu-pò, kap kı̂-thaⁿ kàu-hoē it-chhè ê kang-chok to͘-sı̄ chin jia̍t-sim, só͘-í khı̀ ha̍k-ı̄ⁿ iā-sı̄ hō͘ lâng o-ló. Siâng hit nı̂ sió-moāi Lē-hoâ iā khó-jı̍p chho͘-tiong, chı̍t-ke chin hoaⁿ-hí, Bûn-hoâ khı̀ tiàm ha̍k-ı̄ⁿ ê siok-sià, taⁿ chí ū chhun sió-moāi tı̄ chhù-nı̍h, hut-jiân kám-kak khah bô phoāⁿ, nā sı̄ sim hui-siông ê hoaⁿ-hí.
Keh nı̂ ê hioh-jia̍h, Bûn-hoâ tò--lâi, tú-sı̄ Bûn-hoâ ê lāu-pē sí moá 10 nı̂, Bûn-hoâ 21 hoè, Lē-hoâ 15 hoè, in chiū khui chı̍t ê 10 chiu-nı̂ ê tui-tō-hoē, te̍k-pia̍t chhiáⁿ bo̍k-su lâi choè chú-lí. Bo̍k-su tha̍k Khé-sı̄-lio̍k 14:13 lâi choè tê-ba̍k, kóng “Goá thiaⁿ-kı̀ⁿ tùi thiⁿ ū siaⁿ kóng, Lí tio̍h siá i, taⁿ í-āu tı̄ Chú lâi sí ê lâng ū hok-khı̀, Sèng Sı̂n kóng, sı̄ lah, hō͘ in ê tio̍h-boâ lâi an-hioh, in só͘ choè ê kang iā tè in.” Hit àm bo̍k-su só͘ kóng ê tō-lí put-chí hó, saⁿ-kap khı̀ hù ê hiaⁿ-tı̄ chí-moāi iok-lio̍k ū 50 lâng, lóng toā siū kám-kek. Te̍k-pia̍t ín-khí toā si-jı̂n Teng Iok-hān (16 sè-kí boé kàu 17 sè-kí chho͘-ia̍p) ê si lâi kóng, si tê-ba̍k kiò choè “Sí”, hit siú si kóng,
“Sí sı̂n, lí bo̍h kiau-ngō͘, sui-jiân ū lâng kóng lí hêng-chōng khó-phàⁿ, hoat-le̍k bû-pian, chhı̀-siūⁿ kó͘ lâi joā choē hô-kiat sèng-hiân, sı̄ sú jū-kui, kàu-taⁿ chiàu-kū lâu-miâ. It-sí liáu-āu goán beh tit-tio̍h éng-seng, hit-sı̂ lí khiok sí liáu, sí-bông ê sı̂n.”
Lí tha̍k chit-siú si, ū sím-mı̍h kám-sióng? Sı̍t-chāi ū iáⁿ, sí ná ū sím-mı̍h thang kiaⁿ. Tùi sí ē kiaⁿ, sı̄ in-ūi ū choē, choē kı̀-jiân tit-tio̍h Chú sé-chheng, sí ah! Lí ê lı̄-hāi ná iáu ū sím-mı̍h.
Bo̍k-su káng-tō liáu-āu, Siok-cheng in bó-kiáⁿ saⁿ-ê choè hoé ha̍p chhiùⁿ chı̍t-siú in pêng-sı̂ só͘ ài gı̂m ê si. Siok-cheng gı̂m lú kē-sia, Lē-hoâ gı̂m lú koân-siaⁿ, Bûn-hoâ gı̂m lâm kē-siaⁿ, án-ni choè 3 pō͘ ha̍p chhiùⁿ gı̂m chin hó-thiaⁿ.
Chù (1): Chit siú-si sı̄ tı̄ A. D. 1925 nı̂ ū chı̍t ê siàu-liân bo̍k-su tú kap i ê bo̍k-su-niû ha̍p-hun chı̍t nı̂ goā kú, i ê bo̍k-su-niû ūi-tio̍h siⁿ thâu-chiūⁿ kiáⁿ, tı̄ goe̍h-lāi chiū koè-sin khı̀. Bo̍k-su-niû in tau sı̄ tē-hng ê bêng-bōng ka, kam-goān hiàn-sin lâi pang-chān bo̍k-su, nn̄g-lâng ê thiàⁿ-chêng thang kóng chin-chhim, hut-jiân bo̍k-su-niû siū Chú tiàu, Bo̍k-su hui-siông ê pi-siong, chiū choè chit siú si lâi siàu-liām i, tit-tio̍h hó pêng-iú Tēⁿ Khe-phoàn bo̍k-su thè i choè tiāu, hit siú-si chhin-chhiūⁿ ē-bı̄n.
Ô͘-piⁿ Lô͘-tek
“Siū-siong ê Lô͘-tek i bô beh at-chı̍h.” Má-thài 12:20
1. Ka-lı̄-lı̄ hái Ô-piⁿ Lô͘-tek,
Ki-hio̍h bō͘-sēng chhiⁿ-lek, Ah!
Khó-sioh ah!! Hong hut-jiân khí,
Lô͘-tek siū siong hiám-chı̍h.
(Hô) Siū-siong lô͘-tek, Chú chiàu-kò͘ bô at-chı̍h, Lí thang an-sim, Chú iā kò͘ lí bô lı̄.
2. Sè jı̂n oán-jiân Ô-piⁿ Lô͘-tek,
Ū-sı̂ pêng-an sim chheng, Ah!
Khó-sioh ah!! Hō hut-jiân kàu,
Hiám choa̍t-bāng, ba̍k-sái lâu.
3. Siū koè hong hō͘ Ô-piⁿ Lô͘-tek,
Beh koh bō͘-sēng chhiⁿ-le̍k,
Lí sui siū-khó͘ iā ū sı̂ koè,
Chú beh sù-hok ka-poē.
Chù (2): (Khí-thâu choè ê sı̂ sı̄ 2 chat. Kàu A. D. 1960 nı̂, siá chit-pún “Só͘ ǹg-bāng ê kiáⁿ” ê sı̂ chiah koh siá tē 3 chat).
Tāi-ke thiaⁿ Siok-cheng chip-sū bó-kiáⁿ ha̍p-chhiùⁿ hit siú-si bô m̄ siū chin toā ê kám-kek, chē-chē lâng thè in hoaⁿ-hí kàu lâu ba̍k-sái, Chú chin-chiàⁿ pàng-sak i só͘ thiàⁿ--ê choè bô pē ê kiáⁿ, chin-chiàⁿ sı̄ hō͘ chhı̀-liān chiâⁿ-choè sèng ê lō͘ ....... Bān-hāng sū ta̍uh-ta̍uh lâi Siōng-tè bô m̄-hāu-le̍k beh lı̄-ek thiàⁿ Chú ê lâng.
Tùi án-ni Siok-cheng chı̍t-ke, jı̍t-jı̍t ná chı̀n-pō͘, ná jia̍t-sim ho̍k-sāi Chú. Bián loā kú Bûn-hoâ iā pit-gia̍p Sı̂n-ha̍k-ı̄ⁿ khı̀ choè Chú ê kang, sió-moāi Lē-hoâ iā chiàu i chû-pi ê thian-sèng khı̀ choè hō͘-sū, āu-lâi kè i-seng, Siok-cheng toè kiáⁿ khı̀ kàu-hoē, sui-bóng nı̂-lāu, iû-goân chin gâu pang-chān kàu-hoē.
(khiàm tē 39 kı̂, 1961 nı̂ 5 ge̍h )
15. Hoán-hoé ê ba̍k-sái
Sè-kan ê khang-hi chhin-chhiūⁿ phû ê hûn, koh ná-chún chá-khí sı̂ ê lò͘-chúi, hit-ê êng-hoâ hù-kùi chhin-chhiūⁿ chháu-á-hoe. Te̍k-pia̍t pháiⁿ-lâng phàⁿ-chhek chı̍t-poaⁿ, hō͘ hong chhoe khui hut-jiân soàⁿ, chiah-ê oē tùi kó͘-chá kàu hiān-kim bô m̄ èng-giām.
Só͘-í m̄-bián ūi-tio̍h put-gı̄, áu-hoâiⁿ lâi hoat-châi heng-thong ê lâng lâi put-pêng. Hoe bô pah-jı̍t âng, lâng bô chheng-jı̍t hó, iong-khı̀ bô lo̍h-soe ê kú, âng-khı̄ âng iā ē lut-tı̀.
Lı̂m gı̄-oân ê cháu-su ū chı̍t-jı̍t iā ē po̍k-lō͘. Tùi i ê pō͘-hā Tân Toā-tiâu sí āu, ūi-tio̍h Gān-piah bé-thâu ê phài-piat, koh ūi-tio̍h gı̄-oân kèng-soán ê tóng-cheng, jı̍t-jı̍t tùi-te̍k ná chē. Koh tùi kó͘-chá chiū kóng “Kau koa khêng kau kúi sı̂, khan-gû hoàn-á chia̍h liáu bí.” Ū chia̍h chiū iô-boé, bô chia̍h chiū kā--lâi. Pa-kiat thái ē thàu ah? Thèng-hāu lí pak-tó͘-piⁿ ū pn̄g-lia̍p ê sı̂, choè chı̍t pái chiah kā lí bu̍t-siu chhiong-kong. Tı̄ Toā-tiâu-á sí lo̍h bô loā-kú ê sı̂, Lı̂m gı̄-oân ê châi-sán ūi-tio̍h kèng-soán, ūi-tio̍h cháu-su hoat-kak ê bu̍t-siu chhiong-kong, thang kóng chhun iā m̄ chiâⁿ-mı̍h lah. Put-gı̄ lâi ê chı̂ⁿ, chū-jiân iā-sı̄ hō͘ lâng poē lâi lâu chhut-khı̀. Tùi án-ni miâ-siaⁿ sè-le̍k it-lo̍k chhian-tiōng. Poa̍h chı̍t-ē tah-té tah-té, koè-khı̀ lâng tùi i hû-kha sâng-chhiú, taⁿ chı̂ⁿ bô, tē-ūi bô, chin loé-chı̀, ná hı̂ bô chúi bē sô, lâng bô chı̂ⁿ chiū so̍h-kô, soà tài chhin-chhiūⁿ cheng-sı̂n chhò-loān-chèng thoa nı̂-goā kú chiū sí khı̀. Hián-chó͘, khoàⁿ in lāu-pē ê boa̍t-lō͘ chū-jiân kám-kak chin chek-bo̍k bô-liâu. M̄-kú chia̍h-chhoé chai chu-bı̄, it-pún bān-lı̄ ê cháu-su, ná ū hiah khoài kam-goān pàng khı̀ ah? Só͘-í i koat-sim it put-chok, jı̄ put-hiu. Chı̍t-pái chı̄n ko͘-tù kā i piàⁿ lo̍h, ná poa̍h-kiáu teh lián-pó leh, ē, koh giâ khí--lâi, bē, tó lo̍h khı̀, sí-ba̍k chiah goān kheh, seⁿ-sí, heng-pāi, ē bē chı̄n chit ē, chiū chhin-sin chhoā in bó͘ choè-hoé koè Hiong-káng, kap tāi-lio̍k ê pháiⁿ-lâng thong, tit-tio̍h chin chē mô͘-hui jı̍p-chhiú, chiong hiah-ê hun choè chin chē pō͘-hūn lâi chhàng, ǹg-bāng the̍h ē koè-chhiú. Bé sı̂-pió khak lâi jı̍p, choè phoê-ê kāu-té--ê, ê-té lóng khang-khak, bé pò͘, kńg pò͘ ê chhâ-pán iā khang-khak, toà sè-sè-sn̂g ê tiⁿ-koé, it-chhè ê it-chhè to͘ siūⁿ hoat-tō͘ lâi chhàng, liân in thài-thài to͘ hui-siông ê sat-sim, thâu-mn̂g thı̀ khí--lâi, chiah tı̀ mô͘-kû, tı̄ mô͘-kû té iā chhàng. Bô phah-sǹg thiⁿ put-chiông jı̂n-goān, ū-iáⁿ lah, nā hō͘ i choán ē koè-chhùi, ē hoat-chiūⁿ pah-bān, m̄-kú bē, tû in bó͘ só͘ chhàng ê í-goā lóng hō͘ hái-koan chhiau--tio̍h, án-ni thàn ê tú-liáu ê iáu bô siáⁿ kàu. Hiān put-hiān Hián-chó͘ seng hō͘ lâng khu leh, in bó͘ the̍h koè-chhiú, tng tı̄ soàⁿ-khui ê sı̂, tùi bó͘-bó͘ i-seng kap kúi ê a-phiàn, mô͘-hui kúi ê bô kín-sı̄n, liân in bó͘ kiōng 20 goā lâng lóng hō͘ lâng chang--tio̍h, jı̂n-hoān ê sàn-pò͘ kàu tı̄ choân-séng.
Kàu chia bô-lūn bu̍t-chèng, jı̂n-chèng, sı̂-kan, tiûⁿ-só͘, kap it-chhè hoān-choē ê sū-chèng lóng chhiong-hun, bô só͘ thang koh piān-bêng. Só͘-í hu-hū lóng siū kong-phoàⁿ, it-chhè ê châi-sán chhiong-kong, soà soan-phoàⁿ tô͘-hêng 15 nı̂, pak-toa̍t kong-koân 15 nı̂, sı̄ in-ūi sı̄ chho͘-hoān, nā bô eng-kai tio̍h sí-hêng. It-chhè oân lah, lí siūⁿ Hián-chó͘ hu-hū nā koaiⁿ 15 nı̂ chhut--lâi hit sı̂ kúi-hoè, choè lâng iáu ū sím-mı̍h ǹg-bāng, lâm--ê koaiⁿ tı̄ lâm-kaⁿ pâng, lú--ê koaiⁿ tı̄ lú-kaⁿ-pâng. Hián-chó͘ siū phài o̍h choè tı̂n-í, Hián-chó͘-só siū phài choè chhâi-hông, in-ūi i chêng ū o̍h iûⁿ-chhâi, múi-jı̍t chhēng khı̀ kaⁿ-ga̍k lāi it-tēng ê hoān-lâng saⁿ, tı̄ khàn-siú giâm-lē kàm-tok ê ē-bı̄n lâi thoa-boâ, kàu chia lâi it-seng siū sēng, ēng chı̂ⁿ ná ēng chúi ê Hián-chó͘, saⁿ-tǹg bô hı̂ bah chia̍h bē lo̍h-khı̀ ê hó-miā kiáⁿ, ba̍k-sái chún pn̄g thun, hoán-hoé tı̂ lah.
Ū chı̍t-jı̍t kàu-hoè-su Gô͘ bo̍k-su khı̀ kaⁿ-ga̍k-lāi káng-tō, kóng soah ū chı̍t ê hoān-lâng chhéng beh kiû kı̀ⁿ-bı̄n, chiū tı̄ hoān-lâng hoē-bı̄n sek, tùi khàn-siú ê ín-chhoā, toà chı̍t ê hoān-lâng lâi kap Gô͘ bo̍k-su kı̀ⁿ-bı̄n, Bûn-hoâ chı̍t sı̂ m̄ káⁿ jı̄n, in-ūi koè-khı̀ bı̄n âng-ko chhiah-chhı̍h, chhēng sı̄ lı̂n-lô pháng-si, kóng hong téng-pêng oē ê lâng, chit sı̂ sı̄ jû-thâu sàm-koè, sı̂n-khı̀ ko-soe, ba̍k-chiu-á thap-thap, chhùi-chhiu-á tn̂g-tn̂g, jı̍p-lâi thâu-khak chhih-chhih, chı̍t-chhiú khan saⁿ-á-ki khí-lâi chhit ba̍k-kı̂ⁿ. Chin kú chiah gia̍h-thâu kóng, “Kàu-hoè-su sian-siⁿ, lí kóng sı̄ Gô͘ bo̍k-su, kiám sı̄ Bûn-hoâ hiaⁿ.” Bûn-hoâ thiaⁿ tio̍h i ê siaⁿ-im, khoàⁿ i gia̍h-thâu khí--lâi, chiah jı̄n-tit i sı̄ Hián-chó͘, chı̍t sı̂ bē-hiáu ı̀n, soà gāng-gāng, kàu chin kú chiah ı̀n kóng, “Lí sı̄ Hián-chó͘ hàⁿ? Taⁿ lí thài ē pı̀ⁿ án-ni.” Hit sı̂ nn̄g ê chhiú sio-khan, Hián-chó͘ lâu-chhut hoán-hoé ê ba̍k-sái, soà kā i kóng i ê hū-jı̂n-lâng Hông-kiau iā lâi koaiⁿ tı̄ lú-kaⁿ pâng, ba̍k-sái sı̀-lâm-sûi hò͘ bē lı̄. Bûn-hoâ chı̍t sı̂ siūⁿ khí téng 2, 3 goe̍h-jı̍t chêng Thian-lâi ê siū chhèng-sat, kin-á-jı̍t koh khoàⁿ Hián-chó͘ ê chô-gū, khó-lı̂n nn̄g ê gín-ná pêng-iú kin-á-jı̍t án-ni ê lo̍h-tiûⁿ, choē ê kang-chı̂ⁿ sı̄ sí, chiū chiong Iâ-so͘ sı̍p-jı̄-kè ê kiù-un thoân hō͘ i, Hián-chó͘ lâu ba̍k-sái kau-tāi i nn̄g ê kiáⁿ chı̍t ê lâm--ê, chı̍t ê lú--ê, chhiáⁿ Bûn-hoâ thè i siat-hoat hō͘ in jı̍p Io̍k-iù-ı̄ⁿ, chhiáⁿ i tāi-lí i choè lāu-pē, tài-liām chū-sè kau-poê choè gín-ná pêng-iú ê chêng, ēng Iâ-so͘ ê tō-lí lâi kàu-tok in, ǹg-bāng i ê kiáⁿ ē sı̀n Iâ-so͘, hui-siông kám-kek him-bō͘ Bûn-hoâ chū-sè sı̀n Iâ-so͘, siū lāu-bú ēng Chú ê tō-lí kàu-tok ê kiat-kó, Bûn-hoâ kā i tah-èng, chiū ūi-tio̍h i lâi kà hit nn̄g ê gín-ná, iā siông-siông khı̀ chhoē Hián-chó͘ in hu-hū ēng tō-lí lâi thoân hō͘ in.
Tùi chiah-ê sū Bûn-hoâ chiah koh khah chù-ı̀ gián-kiù siàu-liân hoān-choē ê būn-tê, sı̍t-chāi chin thang kiaⁿ, múi-nı̂ múi-nı̂ ū ke bô kiám, jı̂-chhiáⁿ sêng-kûn ká-tóng, cho͘-chit chián-liú thoân, lóng sı̄ bē sêng-liân ê gín-ná kā i gián-kiù hit-ê goân-in, chē-chē lóng sı̄ tùi ka-têng kàu-io̍k m̄ hó ê só͘ tı̀. (Tāi-khài chhin-chhiūⁿ ē-bı̄n)
1. Put hô-bo̍k ê ka-têng. 2. Léng-tām bô thiàⁿ-chêng ê ka-têng. 3. Pē-bó hêng-ûi put-chèng ê ka-têng. 4. Pàng kù-chāi i khı̀ ê ka-têng. 5. Koán-kàu koè giâm ê ka-têng. 6. Koè-thâu le̍k-ài ê ka-têng. 7. Pē-bó bô chiâu-chn̂g ê ka-têng. 8. Kı̂-thaⁿ siū phian-thán ê thiàⁿ, á-sı̄ ka-têng sàn-hiong, toà-toà lām-lām chham-chham, tı̀-kàu pē-kiáⁿ, bó-kiáⁿ ê chêng seⁿ khí keh-mo̍͘h, put-jû-ı̀ ê koè-jı̍t.
(Chhut pháiⁿ gín-ná kap pē-bó ê koan-hē)
100 ê pháiⁿ gín-ná ê tiong-kan 1. Tùi pē-bó bû-ti só͘ tı̀ ū 47 ê. 2. Tùi pē-bó hoān-choē só͘-tı̀ ū 5 ê. 3. Tùi pē-bó sí-bông só͘-tı̀ ū 38 ê. 4. Tùi pē-bó lı̂-hun só͘-tı̀ ū 13 ê. 5. Tùi pē-bó chân-hoè só͘ tı̀ ū 10 ê. 6. Tùi pē-bó ū m̄-hó ê sı̄-hò͘ⁿ só͘-tı̀ ū 11 ê. 7. Tùi pē-bó choè put-chèng ê sū-gia̍p só͘-tı̀ ū 4 ê. Kı̂-thaⁿ tùi siā-hoē khoân-kéng ê phái éng-hióng chū-jiân iā bô chió.
Khó-pí tı̄ ha̍k-hāu, kau pêng-iú, khı̀ gû-lo̍k ê tiûⁿ-só͘, tùi chheh (âng-á-chheh, liân-khoân-tô͘), tiān-iáⁿ, chhoē thâu-lō͘, í-kı̍p hiat-thóng ûi-thoân, kı̂-thaⁿ chéng-chéng ê koan-hē, sı̍t-chāi chin thang kiaⁿ. Taⁿ Bûn-hoâ m̄ sı̄ choan-ka, chóng-kóng tùi chiah-ê sū hō͘ i chhim-chhim thòng-kám tong-sı̂ 3 ê ka-têng ê kàu-io̍k.
1. Bûn-hoâ ka-kı̄ siūⁿ lāu-bó ēng Chú ê tō-lí kà in hiaⁿ-moāi. Ēng-thiàⁿ, sı̀n-gióng, kèng-khiân, giâm-kín, chèng-tı̍t, sêng-sı̍t lâi hú-tō ín-chhoā i kap sió-moāi.
2. Tân Toā-tiâu chek ēng hòng-jı̄m, ū sı̂ bû-lí ê koè giâm, chân-khok ê thé-hêng, chhoh-mē lâi kà, Thian-lâi koh pún-sin só͘ kiâⁿ put-chèng.
3. Lı̂m gı̄-oân ēng le̍k-ài, koh hòng-sù, bô thêng-tō͘ ê lām-hùi, lâi hú-hoà phah-pháiⁿ i ê kiáⁿ Hián-chó͘.
Kàu kin-á-jı̍t ê koé-chí lóng chhut-hiān lah. Bûn-hoâ siūⁿ kàu chiah-ê tāi-chı̀, ná-siūⁿ chiū ná thòng-kám chū-sè tio̍h ēng chong-kàu kàu-io̍k lâi ín-chhoā sè-kiáⁿ kàu tı̄ Chú ê pit-iàu, chiū koh-khah kám-kek lāu-bú ê úi-tāi, kap Chú-jı̍t-o̍h, kàu-hoē ha̍k-hāu ê iàu-kín. Put-kak kūi-lo̍h khún-chhiat kı̂-tó, ǹg-bāng Chú si-in tı̄ chèng sè-kiáⁿ ê téng-bı̄n, tùi hit sı̂ khí chiū koh-khah koat-sim tùi-tı̄ jı̂-tông chong-kàu kàu-io̍k lâi hē la̍t, koh chı̍t-bı̄n it-hoat iú-hàu nı̂-lāu ê lāu-bú, toā-toā kám-siā i chū-sè kàu-tok--i ê un.
－Oân-
(Ka-têng ê pêng-iú tē 26,28, 30,32-38,40 kı̂, 1960 nı̂ 4,6,8,10-12,1961 nı̂ 1-4,6 ge̍h)
