Jı̂-tông Kò͘-sū Chhong-bêng ê Kâu

Í-chêng ū chı̍t chiah kâu toà tı̄ oá-kı̄n hái ê sim-lı̂m lāi, i múi-jı̍t tı̄ sim-lı̂m lāi thiàu-lâi thiàu-khı̀, pak-tó͘ iau ê sı̂ chiū bán chhiū-téng ê koé-chí lâi chia̍h, koè chin khoài-lo̍k ê seng-oa̍h. In-ūi chit ê sim-lı̂m lāi ū chin chē koé-chí, só͘-í chit chiah kâu m̄ bián hoân-ló bô mı̍h thang chia̍h, i ū chē-chē sı̂-kan thang khı̀ chhoē pêng-iú saⁿ-kap thit-thô, chin kín i chiū kap chı̍t boé soa-hı̂ chò chin hó ê pêng-iú, ta̍k-jı̍t soa-hı̂ chiū lâi kàu chhiū kha thiaⁿ kâu kóng kò͘-sū. Hut-jiân ū chı̍t jı̍t, soa-hı̂ tùi kâu kóng, “Hó pêng-iú! Goá kin-á-jı̍t chhoā lí lâi goá ê chhù thit-thô, sūn-soà khoàⁿ goán ê kok-ông, kap goán tau ê lâng. Goá siông-siông kā in kóng lí chin gâu kóng oē koh chin súi; só͘-í in chin ài kín khoàⁿ-tio̍h lí, iā kap lí chò pêng-iú, lí hoaⁿ-hí bô?” Kâu thiaⁿ-tio̍h soa-hı̂ kā i o-ló, sim-lāi hui-siông hoaⁿ-hí, kóng “Soa-hı̂ hiaⁿ, lí ê hó-ı̀ goá sı̍t-chāi hui-siông kám-siā, chóng-sı̄ lí iā chai-iáⁿ goá bē hiáu siû, goá beh cháiⁿ-iūⁿ khı̀ lín tau?” Soa-hı̂ kóng, “He chin kán-tan, lí chē tı̄ goá ê ka-chiah, goá chiū chhoā lí lâi goá ê chhù, koáⁿ-kín thiàu lo̍h-lâi! M̄-thang bē kı̀-tit, tio̍h khı̍p hō͘ tiâu.” Kâu chiū tùi chhiū téng thiàu lo̍h-lâi, chin hoaⁿ-hí chiū thiàu khı̀ chē tı̄ soa-hı̂ ê ka-chiah, soa-hı̂ sûi-sı̂ khai-sí siû chúi, tı̍t-tı̍t kàu chin hn̄g ê só͘-chāi; chha-put-to bô khoàⁿ-kı̀ⁿ sim-lı̂m lah. Chit sı̂ soa-hı̂ oa̍t-thâu koè lâi tùi kâu kóng, “Kâu hiaⁿ, goá chhoā lí lâi m̄ sı̄ beh hō͘ lí khı̀ khoàⁿ hó pêng-iú; chiū-sı̄ beh chiong lí sàng hō͘ goán ê kok-ông, in-ūi hiān-chāi goán ê kok-ông phoà-pı̄ⁿ chin siong-tiōng, i-seng kóng, tio̍h chia̍h kâu ê ‘sim’ chiah ē hó”. Kâu thiaⁿ-tio̍h khí-chho͘ chin kiaⁿ, chóng-sı̄ i siūⁿ tiap-á kú, chiū tùi soa-hı̂ kóng, “Ah, soa-hı̂ hiaⁿ chin sit-lé, goá bē kı̀-tit toà ‘sim’ tı̄ sin-piⁿ neh!” Soa-hı̂ tio̍h-kip kóng, “Cháiⁿ-iūⁿ? Lí ê sim bô toà tı̄ sin-piⁿ!” “Ah, sı̄ sı̄, goán chò kâu kap lâng bô sio-siâng, goán ê sim pêng-siông bô toà tı̄ sin-piⁿ, goá chiong goá ê sim iáu koà tı̄ hit châng chhiū-á téng, lí nā koh chhoā goá tńg-khı̀, goá it-tēng chin kín the̍h lâi hō͘ lí.” Soa-hı̂ chin sit-bāng kóng, “Ah, goán lóng m̄ chai-iáⁿ, hó, lí nā kóng lí ê sim koà tı̄ chhiū téng, goá ko͘-put-chiong tio̍h kā lí chài tńg-khı̀ the̍h!” Tng soa-hı̂ siû lâi kàu hoāⁿ-piⁿ ê sı̂, kâu chin toā siaⁿ hoah kóng, “Tı̄ hia, tı̄ hia, hō͘ hio̍h-á cha̍h teh, lí khoàⁿ goá ê sim koà tı̄ hia. Lí thèng-hāu leh, goá sûi-sı̂ the̍h hō͘ lí.” Kâu chin kín chiū peh kàu chhiū téng khı̀, soa-hı̂ tı̄ hia tı̍t-tı̍t thèng-hāu kâu beh the̍h lo̍h-lâi, chóng-sı̄ lóng bô khoàⁿ-kı̀ⁿ kâu lo̍h-lâi, chiū toā siaⁿ hoah, “Oeh, kâu-á lí cháiⁿ-iūⁿ m̄ koáⁿ-kín lo̍h-lâi, goá thèng-hāu chin kú lah, chhoē ū bô?” Kâu chhiò-chhiò tùi i kóng, “Soa-hı̂ hiaⁿ, goá ê sim m̄ sı̄ koà tı̄ chhiū-á téng, sı̄ tı̄ goá ê sin-khu lāi, chóng-sı̄ goá bô ài koh lo̍h-khı̀. Lí siūⁿ goá sı̄ hiah gōng-tai ah? Lí sı̄ chı̍t ê chhut-bē pêng-iú ê pháiⁿ-lâng, tùi kin-á-jı̍t khí goá bô beh koh kap lí chò pêng-iú, lí tńg-khı̀ kā lín ê kok-ông kóng, m̄-thang gōng siūⁿ ài beh chia̍h goá ê sim.” (Ka-têng ê Pêng-iú tē 76 kı̂, 1964 nı̂ 6 ge̍h)