Í-chêng ū chı̍t ê chhâ-hu (khioh chhâ ê lâng), toà tı̄ soaⁿ-kha, ta̍k-jı̍t jı̍t-thâu chhut-lâi, i chiū toà pn̄g-pau kap i só͘ oá-khò lâi chhò-chhâ ê chı̍t ki pó͘-thâu, chiūⁿ soaⁿ chhò chhâ.
Ū chı̍t jı̍t, i chiàu siông khı̀ soaⁿ-nı̍h chhò chhâ, kàu tiong-tàu hioh-khùn, siūⁿ beh chē teh chia̍h-pn̄g ê sı̂, hut-jiân-kan thiaⁿ-tio̍h tùi soaⁿ-kok tiong ū ho͘-kiù ê siaⁿ, “Kiù-miā! Kiù-miā leh!” I thiaⁿ chin bêng, sim-lāi siūⁿ kóng, it-tēng ū lâng tú-tio̍h gûi-hiám ê tāi-chı̀, chiū sûi-sı̂ chiong pn̄g-pau hē-teh, ǹg hoat-chhut siaⁿ-im ê só͘-chāi cháu-khı̀.Kó-jiân khoàⁿ-tio̍h chı̍t ê lāu a-pô poa̍h tı̄ khiⁿ-khàm té, khiⁿ-khàm té ū chúi teh lâu, sui-jiân bô chhim, chóng-sı̄ chúi lâu chin kín. Lāu a-pô siang-chhiú lám tı̄ chı̍t lia̍p toā chio̍h-thâu, siūⁿ beh peh khí-lâi, chóng-sı̄ bô hoat-tō͘. Chit ê chhâ-hu khoàⁿ-kı̀ⁿ, koáⁿ-kín lo̍h-khı̀, kiù i khí-lâi. Lāu a-pô ê kha tio̍h-siong, huih tı̍t-tı̍t lâu, chhâ-hu sûi-sı̂ ēng i ê chhiú-kin pa̍k a-pô siū siong ê só͘-chāi koh chiong ka-kı̄ ê pn̄g chı̍t poàⁿ pun i chia̍h.
Chia̍h-pn̄g āu, lāu a-pô tùi chhâ-hu kóng, “Goá ê kha tio̍h siong, bē kiâⁿ lō͘, chhiáⁿ lí āiⁿ goá tńg-khı̀!” Chhâ-hu khoàⁿ i ê khoán-sit chin khó-lı̂n, chiū āiⁿ i tńg-khı̀.
Chhâ-hu beh tò-khı̀ ê sı̂, a-pô ūi-tio̍h pò-tap chhâ-hu ê thiàⁿ-sim, chiū chiong chı̍t chiah ke-bó sàng i, koh tùi i kóng, “Chit chiah ke-bó ta̍k-jı̍t ē siⁿ chı̍t lia̍p nn̄g, nā ū chit chiah ke-bó, lí chiū m̄ bián koh khı̀ soaⁿ-nı̍h chhò-chhâ, chóng-sı̄ bô-lūn cháiⁿ-iūⁿ m̄-thang thâi i.” Chhâ-hu sim-lāi siūⁿ, chı̍t lia̍p nn̄g chiah ta̍t joā chē chı̂ⁿ! Chóng-sı̄ a-pô ê hó-ı̀, i chiū lia̍h tńg-khı̀. Tē 2 jı̍t, ke-bó kó-jiân siⁿ chı̍t lia̍p nn̄g, chhâ-hu tùi ke-siū nı̍h the̍h nn̄g lâi khoàⁿ, kám-kak chit lia̍p nn̄g chin tāng, chù-ı̀ khoàⁿ-māi, ah, goân-lâi sı̄ chı̍t lia̍p kim ke-nn̄g, i hoaⁿ-hí kàu thiàu khí-lâi, chhiò gı̄-gı̄! Chhâ-hu chiong kim ke-nn̄g the̍h khı̀ ke-nı̍h bē chin chē chı̂ⁿ. Chhin-chhiūⁿ án-ni, ke-bó ta̍k jı̍t lóng siⁿ chı̍t lia̍p kim ke-nn̄g, chhâ-hu chin kín chiū pı̀ⁿ chı̍t ê hó-gia̍h lâng, i chiū lóng m̄ bián koh khı̀ soaⁿ-nı̍h chhò chhâ lah.
Chóng-sı̄ lâng ê sim siông-siông sı̄ bô hān, tı̄ bô ê sı̂ ǹg-bāng ū, ū ê sı̂, ǹg-bāng koh khah chē, bē kám-kak boán-chiok, ū chı̍t jı̍t i chē teh siūⁿ, ke-bó ta̍k-jı̍t chí ū siⁿ chı̍t lia̍p, án-ni chin chió, nā ē-thang chò chı̍t pái tit-tio̍h kúi-nā lia̍p sı̄ khah hó, i siūⁿ-lâi siūⁿ-khı̀, siūⁿ-tio̍h nā chiong ke-bó thâi sí, chiong só͘ ū ê kim ke-nn̄g lóng the̍h chhut-lâi, m̄-bián ta̍k-jı̍t teh thèng-hāu chı̍t lia̍p chı̍t-lia̍p. I soà bē kı̀-tit lāu a-pô tùi i kóng ê oē, sûi-sı̂ giâ to thâi ke-bó, chóng-sı̄ i phoà-khui ke-bó ê pak-tó͘ ê sı̂, lāi-bı̄n khang-khang, liân chı̍t lia̍p iā bô. I chiah chin hō͘-hoé ka-kı̄ thài tham-sim.
(Ka-têng ê pêng-iú tē 69 kı̂, 1963 nı̂ 11 goe̍h)
