Jı̂-tông kò͘-sū Gín-ná ê Hoe-hn̂g

Tek-kok ū chı̍t ê chin toā-ê ê hoe-hn̂g, hoe-hn̂g ê lāi-bı̄n chai chin choē chhiū-á, hoe, kap chháu, koh ū chin choē kó͘-chui ê chiáu-á tı̄ chhiū-á téng teh chhiùⁿ chin hó thiaⁿ ê koa, hit só͘-chāi ê sè-hàn gín-ná ta̍k-lâng lóng chin ài khı̀ hia thit-thô, khoàⁿ kim-hı̂ tı̄ chúi-lāi siû-lâi siû-khı̀ chin sim-sek, poe-chiáu tı̄ chhiū téng chhiùⁿ-koa chiu̍h-chiu̍h! Chin hó thiaⁿ. Chhiū-á-ki hō͘ hong chhoe kàu iô-lâi iô-khı̀, koh ū âng--ê, chhiⁿ--ê, pe̍h--ê, n̂g--ê, hún-âng-á sek ê hoe-chháu ia̍p-ia̍p sı̄ chin súi. Hiah ê gín-ná in-ūi ū hit ê súi ê hoe-hn̂g thang thit-thô, ta̍k lâng lóng chhiò gı̄-gı̄ chin khoài-lo̍k koè-jı̍t. Chóng-sı̄ in lóng m̄ bat khoàⁿ tio̍h hoe-hn̂g ê chú-lâng, kan-ta bat thiaⁿ-tio̍h chit só͘-chāi ê lāu a-peh-à teh kóng, hoe-hn̂g sı̄ chı̍t ê chin toā-hàn ê lâng ê. Hit ê toā-hàn lâng chin pháiⁿ, ū sı̂ ē lia̍h gín-ná khı̀ kòng hō͘ sí, soà tàn lo̍h khe-á hō͘ chúi lâu. 20 nı̂ chêng hit ê pháiⁿ ê toā-hàn lâng chiū m̄ chai cháu khı̀ tó-ūi, lóng bô koh khoàⁿ tio̍h. Hiah ê gín-ná thiaⁿ liáu sim-lāi sui-jiân chin kiaⁿ, chóng-sı̄ in-ūi m̄-bat khoàⁿ-tio̍h toā-hàn lâng chiū chin an-sim tı̄ hoe-hn̂g lāi-bı̄n thit-thô, koè chin hoaⁿ-hí ê seng-oa̍h. Ū chı̍t-jı̍t ê tiong-tàu sı̂, hiah ê gín-ná koh tı̄ hoe-hn̂g lāi teh cháu sio-lia̍h cháu kàu chin sim-sek ê sı̂, hut-jiân tē ē tín-tāng, tùi hoe-hn̂g ê mn̂g-kháu ū chhin-chhiūⁿ lûi tân ê siaⁿ kóng, “Lín chiah ê sí gín-ná m̄ khah kín chhut-khı̀, goá beh kā lín phah hō͘ sí, tàn lo̍h khe-té.” Gín-ná thiaⁿ chı̍t-ē kiaⁿ chı̍t tiô, chı̍t-ē oa̍t-thâu khoàⁿ māi, ta̍k lâng lóng kiaⁿ kàu phih-phih-chhoah, ná háu cháu tò-khı̀. Chit jı̍t í-āu toā-hàn lâng chiū ta̍k-jı̍t toà hoe-hn̂g lāi teh kò͘, koh chiong hoe-hn̂g ê mn̂g ēng chin toā tè ê chio̍h-thâu that teh, só͘-í hiah ê gín-ná boē thang koh jı̍p khı̀ hit lāi-bı̄n thit-thô! Chóng-sı̄ chit jı̍t liáu-āu, hoe-hn̂g lāi ê chhiû-á hio̍h lóng lak liáu-liáu, hı̂-tı̂ ê chúi iā ta khı̀, kim-hı̂ sí kàu bô poàⁿ boé, chiáu-á iā poe liáu-liáu, ta̍k-sek ê hoe iā lóng sí-sí khı̀, jı̍t-kng bô koh chiò jı̍p, hoe-hn̂g ê lāi-bı̄n chēng chauh-chauh, léng ki-ki. Toā-hàn lâng kám-kak chin kı̂-koài, chiū siūⁿ chin choē hong-hoat beh hō͘ hoe-hn̂g koh súi khí-lâi, chóng-sı̄ lóng bô hoat-tō͘. Keh kúi-nā nı̂ hoe-hn̂g lóng bô koh súi, ta̍k-jı̍t lóng hō͘ seh khàm leh. Bô-lūn tı̄ chiáu-á chhiùⁿ-koa ê chhun-thiⁿ, hoe-chháu toā khui ê joa̍h-thiⁿ, koé-chí toā-lia̍p ê chhiu-thiⁿ lóng sı̄ hō͘ seh khàm leh. “Ah! Chin súi ê hoe-hn̂g siáⁿ-sū pı̀ⁿ-choè léng-ki-ki ê só͘-chāi.” Che sı̄ toā-hàn lâng ta̍k-jı̍t thó͘-khùi ê siaⁿ! Ū chı̍t-nı̂ tang-thiⁿ í-keng koè, chhun-thiⁿ lâi lah! Ta̍k só͘-chāi lóng khui chin súi ê hoe, chóng-sı̄ toā-hàn lâng ê hoe-hn̂g iā sı̄ hō͘ seh khàm teh, toā-hàn lâng chin siong-sim lâu ba̍k-sái, hut-jiân-kan thiaⁿ-kı̀ⁿ tang-pêng ū chiáu-á teh chhiùⁿ-koa ê siaⁿ. I chin hoaⁿ-hí, oa̍t-thâu chı̍t-ē khoàⁿ, seh lóng iûⁿ-khı̀ hoe iā khui kàu chin súi. I chin hoaⁿ-hí, chı̍t hong-bı̄n iā kám-kak chin kı̂-koài! Chóng-sı̄ i khoàⁿ-kı̀ⁿ chhiū-á ê ē-bı̄n ū chı̍t-tı̄n gín-ná teh thit-thô. In-ūi toā-mn̂g pháiⁿ-khı̀ gín-ná cháu-jı̍p-khı̀ thit-thô. Toā-hàn lâng chiū bô koh koáⁿ hiah ê gín-ná chhut-khı̀, in-ūi i chai-iáⁿ chit kúi nı̂ lâi hoe-hn̂g sı̄ in-ūi i m̄ hō͘ gín-ná lâi thit-thô, só͘-í chiah pı̀ⁿ hiah bái. Só͘-í i chiū kiò gín-ná jı̍p-khı̀ sı̀-koè thit-thô; hoe-hn̂g lāi ê hı̂-tı̂ chiū koh ū chúi, ū siû-lâi siû-khı̀ ê kim-hı̂, seh iā lóng iûⁿ-khı̀. Jı̍t-kng koh chiò jı̍p-lâi, ta̍k-iūⁿ ê hoe lóng koh khui kàu chin súi chin phang. Chiáu-á iā poe-lâi poe-khı̀, koh chhiùⁿ chin hó thiaⁿ ê koa. Hoe-hn̂g koh súi khí-lâi lah, hiah ê gín-ná lóng sio-chio khı̀ thit-thô, soà kap toā-hàn lâng chò pêng-iú! Chhin-ài ê sió pêng-iú, lán m̄ thang ko͘-ta̍k, tio̍h kap lín ê tâng-phoāⁿ hô-hó saⁿ-kap thit-thô, tio̍h saⁿ-thiàⁿ, iā chin ǹg-bāng ē-hiáu chio pêng-iú lâi sı̀n Iâ-so͘, in-ūi I chin thiàⁿ sè-hàn gín-ná. (Ka-têng ê Pêng-iú tē 48 kı̂, 1962 nı̂ 2 ge̍h)