“Lí tńg--lâi-a? Î......kin-á-jı̍t ha̍k-hāu chiah chá pàng-o̍h--o͘?” Ma-ma tng tı̄ chàu-kha chú-chhài, khoàⁿ-tio̍h Chèng-kı̂ tńg--lâi, chin chhin-chhiat teh kā mn̄g.
“Hmh!” Chèng-kı̂ chhı̀n-chhái pian chı̍t ê lí-iû: “Kin-á-jı̍t bô siōng hú-tō-khò, só͘-í khah chá tńg--lâi.” Kóng soah, sûi cháu jı̍p-khı̀ pâng-keng, kā mn̂g koaiⁿ--leh.
“Ouh! Lín pa-pa kin-á-jı̍t àm-sı̂ beh tńg--lâi, lí ē-sái kā téng-pái ha̍k-hāu oe8-tô͘ tit-chióng ê chok-phín the̍h hō͘ i khoàⁿ, i it-tēng ē chin hoaⁿ-hí.”
Chèng-kı̂ sim-lāi kiaⁿ chı̍t tiô. Pa-pa ùi i kok-hāu-á 4 nı̂ khai-sí, tō in-ūi khang-khoè ê koan-hē, tiāⁿ tı̄ Hoa-lian chò hái-hoāⁿ ê kang-têng, keh chı̍t goe̍h-jı̍t chiah tńg-lâi 3~4 kang-á, í-chá i nā tńg--lâi, pē-á-kiáⁿ lóng ū kóng ū chhiò, chū-chiông khı̀ tha̍k kok-tiong liáu-āu, khai-sí kap Ông Kı̂ hit-koá pêng-iú tàu-tı̄n, sêng-chek mā ná lâi ná bái, tiāⁿ-tiāⁿ koh ē chhut chōng-hóng, pêng-siông-sı̂-á ma-ma koh koán i bē-tiâu, só͘-í ta̍k-pái pa-pa tńg--lâi lóng ē chhoē i sǹg-siàu, m̄-chiah pē-á-kiáⁿ ê koan-hē piàn kah chin bô hó, kı̀ⁿ-bı̄n m̄-sı̄ hông mē tō-sı̄ hông phah.
Chèng-kı̂ kám-kak pa-pa bô ài--i.
In-ūi ē kiaⁿ, Chèng-kı̂ it-tı̍t tiàm tı̄ pâng-keng lāi-té bô chhut--lâi. Àm-tǹg chia̍h pá, lâu tı̄ ha̍k-hāu『晚自習』ê che-che mā tńg--lâi-a. Chèng-kı̂ hoat-hiān che-che bı̄n-sek chin kı̂-koài, koh ē kā ma-ma khiú khı̀ piⁿ--á kóng sè-siaⁿ-oē, i sim-lāi siūⁿ kóng “chhám--a”, beh piak-khang--a, chit-pái ún sí--ê, choaⁿ-á koh cháu jı̍p-khı̀ pâng-keng bih.
10 tiám chó-iū, pa-pa tńg--lâi-a, kā ma-ma thn̄g--koè ê chhài chia̍h-chia̍h--leh, liáu-āu, kā Chèng-kı̂ kiò lâi thiaⁿ--nih.
Chèng-kı̂ in chhù sı̄ saⁿ lâu ê kong-ú, chhù-lāi ka-kū chin kán-tan, kheh-thiaⁿ tiong-ng khǹg sı̂n-bêng kap chó͘-sian pâi-ūi, koh ū chı̍t tâi tú bé bô joā jú ê tiān-sı̄, hún-pe̍h ê piah-téng, che-che kap ka-tı̄ kok-hāu-á hām kok-tiong ê chióng-chn̄g tah kah kui-phiàn, iáu-boē kap Ông Kı̂ in tàu-tı̄n chhit-thô chı̀n-chêng, Chèng-kı̂ ê sêng-chek it-tı̍t bē-bái.
Ou kah ē hoat-kng ê phoê-hu, jú hông kám-siū tio̍h pa-pa giâm-siok ê gán-sı̂n, tn̂g-kı̂ tı̄ jı̍t-thâu ē-kha chò khang-khoè, pa-pa ê phoê-hu pha̍k kah koh o͘ koh kim.
“Lí kóng, e-po͘ lí cháu khı̀ toh?”
Chèng-kı̂ thâu àⁿ-àⁿ: “Bô.” I thau khoàⁿ piⁿ--á ê che-che, che-che ná bô tāi-chı̀--leh, tı̄ lēng-goā chı̍t keng pâng-keng lāi-té teh khoàⁿ chheh, chún-pı̄ ko-tiong liân-khó.
“Siáⁿ-mih bô? Lí e-po͘ kám ū tı̄ ha̍k-hāu?” Ma-ma ê siaⁿ lio̍h-á chhoah-chhoah.
“Lí sı̄ án-choáⁿ beh thau-cháu-o̍h? Lí kóng, lí kám ū kap lâng oan-ke sio-phah?” Pa-pa giâm-lē ê siaⁿ, hō͘ Chèng-kı̂ kiaⁿ kah m̄-káⁿ ı̀n.
“Lâi! Saⁿ thǹg lo̍h-lâi hō͘ ma-ma khoàⁿ.” Ma-ma chhun-chhiú beh kā Chèng-kı̂ ê liú-á tháu--khui, Chèng-kı̂ liòng--chı̍t-ē, iáu-sı̄ hông khoàⁿ-tio̍h heng-khám ê gêng-hoeh.
“Ah! Nah ē án-ne? Tàu-té hoat-seng siáⁿ-mih tāi-chı̀?” Ma-ma chin m̄-kam teh siòng Chèng-kı̂ ê siong, ba̍k-kho͘ ta̍uh-ta̍uh-á tâm--khí-lâi.
“Lí tàu-té sı̄ án-choáⁿ beh kap lâng sio-phah? Sí gín-á, lí kioh-sı̄ m̄ kóng-oē tō ē-sái chún-soah sı̄--bô?” Pa-pa koh chı̍t-pái chin siūⁿ-khı̀ kā pek-mn̄g.
“It-tēng sı̄ kap Ông Kı̂ o̍h chò pháiⁿ, chit-ê gín-á í-chá to bē án-ne--leh......” Ma-ma it-tı̍t jı̄n-ûi Chèng-kı̂ sı̄ koai gín-á.
“Oeh! Lí nah lóng m̄ kóng-oē?” Pa-pa jú siūⁿ-khı̀--a, Chèng-kı̂ chai-iáⁿ pa-pa hoeh-ap koân, mā m̄-káⁿ jiá i siūⁿ-khı̀, m̄-koh pa-pa án-ne kā pek, soah hō͘ i jú kín-tiuⁿ.
“Sı̄ m̄-sı̄ hit-ê Ông Kı̂ ?” Pa-pa bı̄n se̍h hiòng ma-ma: “In tau tiān-oē kúi hoan? Goá khà tiān-oē kā in pē-bó kóng.”
Chèng-kı̂ chı̍t thiaⁿ-tio̍h pa-pa beh khà tiān-oē khı̀ Ông Kı̂ in tau, kui-ê lâng thiàu--khí-lâi, hoah kóng: “Lí siūⁿ beh chhòng siáⁿ? Lí mài ta̍k-pái tńg--lâi to siūⁿ beh kā goá mē!” I siūⁿ beh iōng chit pō͘ lâi choán-ı̂ pa-pa ê chù-ı̀.
“Lí kóng siáⁿ-mih? Chò m̄-tio̍h tāi-chı̀ koh kóng chit chióng oē!” Pa-pa kui-ê bı̄n tiùⁿ âng--khí-lâi, siang-chhiú kûn-thâu-bó tēⁿ kah ân-ân-ân.
“Tō-sı̄ án-ne, ta̍k-pái tńg--lâi to beh kā goá mē, pêng-siông-sı̂-á koh bô teh kā goá koan-sim.” Chèng-kı̂ kám-kak chin úi-khut, pa̍t-lâng ê pa-pa ta̍k kang lóng ē tńg chhù, ka-tı̄ ê pa-pa soah chı̍t goe̍h-jı̍t chiah tńg-lâi 2~3 kang, chhù--nih kan-taⁿ ū ma-ma kap che-che nn̄g ê cha-bó͘, chin chē i ū chhù-bı̄--ê, ma-ma kap che-che lóng bô siáⁿ chhù-bı̄. I tiāⁿ-tiāⁿ kám-kak kap Ông Kı̂ in kóng n̂g-sek chhiò-oē, khoàⁿ A phı̀ⁿ ke khah ū ı̀-sù, m̄-koh pē-bó soah jı̄n-ûi Ông Kı̂ sı̄ put-tat-put-chhit ê chhit-thô gín-á.
“Lí kóng siáⁿ-mih? Goá bô hoat-tō͘ tńg--lâi, mā-sı̄ ūi-tio̍h chia̍h thâu-lō͘ chhı̄ lín, nā bô, lín beh án-choáⁿ ū pn̄g thang chia̍h?” Pa-pa chèng-keng siūⁿ-khı̀--a, i siūⁿ kóng, ta̍k kang tı̄ Hoa-lian siàn hái-hong, pha̍k jı̍t-thâu, chò chho͘-tāng ê khang-khoè, lóng sı̄ ūi-tio̍h chit-ê ke, ta̍k-pái koh tio̍h hō͘ hiah-ê goā-séng-khiuⁿ ê chú-koán tiau, i lóng jím--lo̍h-lâi bô-ài kè-kàu, tō-sı̄ ūi-tio̍h beh thàn he tām-po̍h-á sin-súi lâi ûi-chhı̂ in chit-ê ka-têng, chit-má in kiáⁿ kèng-jiân tng i ê bı̄n kóng chit chióng oē.
“Thàn siáⁿ-mih chı̂ⁿ? Goá liân lêng-iōng-chı̂ⁿ to bô, lâng......” Chèng-kı̂ kám-kak ka-tı̄ kóng kah ū koá chhiau-koè, m̄-koh oē to í-keng kóng chhut chhùi--a.
Pa-pa sim-lāi chı̍t chūn ká-thiàⁿ, sı̄ ā, tı̄ chit-ê sı̂-tāi, chò-kang-á chı̍t goe̍h-jı̍t thàn--tio̍h ê chı̂ⁿ ke̍k-ke thang ûi-chhı̂ chhù--nih ê khai-siau niâ, chhù--nih hit tâi chhái-sek tiān-sı̄, koh sı̄ gín-á khoàⁿ-tio̍h pa̍t-lâng tau ū, it-chài kā ai-kiû, i chiah kā o͘-pe̍h tiān-sı̄ oāⁿ-tiāu, ūi-tio̍h bé chit tâi chhái-sek tiān-sı̄, i chhùi-khí-kin kā--leh, ke ka-pan kúi-nā lé-pài, chiah ū thang bé--ê, nah koh ū siáⁿ-mih chı̂ⁿ thang hō͘ gín-á chò lêng-iōng-chı̂ⁿ?
“Lí chit-ê gín-á, goá khoàⁿ, bô hō͘ lí chı̍t-koá kà-sı̄ bē-sái--chit!” Pa-pa soà-chhiú sa chı̍t ki saⁿ-keng-á tō tùi Chèng-kı̂ seng-khu sut--lo̍h-khı̀, Chèng-kı̂ kám-kak phoê-hu thiàⁿ kah beh lih--khui-a, ba̍k-sái sûi liàn--chhut-lâi, koh ná sı̀-kè siám pa-pa chhiú--nih ê saⁿ-keng-á.
“Ah, mài án-ne--lah! Chèng-kı̂, kín kā pa-pa hoē sit-lé!” Ma-ma ba̍k-sái ná tih ná beh chó͘-tòng lia̍h-kông ê pa-pa, che-che mā cháu chhut-lâi khó͘-khǹg: “Pâ--á, mài án-ne--lah! Pâ--á!” M̄-koh pa-pa chhiú--nih ê saⁿ-keng-á iáu-sı̄ it-tı̍t tùi Chèng-kı̂ seng-khu sut--lo̍h-khı̀.
Chèng-kı̂ tòng bē-tiâu--a, cháu jı̍p-khı̀ pâng-keng lāi, kā mn̂g só--khí-lâi, pa-pa chhut-la̍t lòng kúi-ē-á mn̂g, lòng bē khui, kong-ke̍k chiah thêng--lo̍h-lâi.
Chit mê, Chèng-kı̂ thiaⁿ-tio̍h pē-bó tı̄ in pâng-keng--nih kóng chin kú ê oē, ka-tı̄ ba̍k-sái lâu--leh lâu--leh chiah khùn--khı̀.
(TGB Thong-sı̀n tē 51 kı̂, 2003 nı̂ 12 goe̍h)
