Sim-sı̂n khah tiāⁿ liáu-āu, Chèng-kı̂ cháu tńg-khı̀ kàu-sek, khoàⁿ-tio̍h Táng--ê tng teh kap cha-bó͘ gín-á kóng-sńg-chhiò.
Chèng-kı̂ chiâⁿ bē-sóng, kiò Táng--ê koè-lâi mē--kúi-kù, boé--á siūⁿ-siūⁿ--leh, sı̄ ka-tı̄ ūi-tio̍h beh kek toā-pān lâi liâu chit thoaⁿ, bián oàn-thàn pa̍t-lâng, tō bô koh kóng siáⁿ--a.
Keng-koè chit kiāⁿ tāi-chı̀ liáu-āu, Chèng-kı̂ kám-kak chit khoán seng-oa̍h chin ià-siān--a, siūⁿ beh chò chı̍t-koá kái-piàn, m̄-koh lâng nā hông tēng-hêng, tō chiok pháiⁿ koh khı̀ kái-piàn pa̍t-lâng tùi ka-tı̄ ê ı̀n-sióng, koh-chài kóng, Chèng-kı̂ ê koat-sim mā bô-kàu, soà--lo̍h-lâi ê jı̍t-chí, kāng-khoán put-sı̂ teh oan-ke, sio-phah, ui-hia̍p, thè lâng chhut-thâu.
Tha̍k ko-tiong chit toāⁿ sı̂-kan, i mā tiāⁿ khı̀ chhoē Sím Lêng-sı̀n, Sím--ê kap kı̂-thaⁿ lâng kāng-khoán, mā-sı̄ tha̍k ko-chit, koh sı̄ hong-phêng bô kài hó ê ko-chit. Só͘-ūi hong-phêng bô hó, sı̄ kóng seng-ha̍k-lu̍t kē, su-chu bái, ha̍k-seng lóng ài tı̄ goā-kháu jiá sū-hui hit khoán--ê.
Chit kang, Sím--ê chhoā Chèng-kı̂ khı̀ chham-ka chı̍t ê su-jı̂n chū-hoē.
He sı̄ Chheng--á kap chı̍t-tı̄n tē-thâu lô͘-moâ ê chū-hoē, ta̍k-ê lâng bı̄n khoàⁿ--lâi lóng pháiⁿ-chhèng-chhèng, chhiūⁿ tiān-iáⁿ lāi-té pháiⁿ-lâng ê kak-sek.
In chai-iáⁿ Chèng-kı̂ sı̄ Sím Lêng-sı̀n ê pêng-iú ê sı̂, tō chiâⁿ sio-lo̍h kap i sio-chioh-mn̄g.
“Lâi lâi lâi, lim-chiú, m̄ lim tō-sı̄ boài hō͘ goá bı̄n-chú.”
In-ūi ke-kiám ū tı̄ goā-kháu teh cháu-chông, chit khoán tiûⁿ-bı̄n Chèng-kı̂ mā bē chheⁿ-so͘, m̄-koh tùi-hong ê thài-tō͘ hō͘ i bô kài sóng-khoài.
In ùi chái-khí lim kàu àm-sı̂, it-tı̍t lim kàu Chèng-kı̂ thâu-khak gông-gông ê sı̂, Sím--ê chiah poê i tńg chhù.
Tı̄ lō͘--nih, Chèng-kı̂ tòng bē-tiâu tı̄ tiān-hoé-thiāu-á-kha thò͘ kúi-nā-pái.
“Lí kám koh hó-sè hó-sè?” Sím Lêng-sı̀n ná tah Chèng-kı̂ ê kah-chiah-phiaⁿ ná mn̄g: “Tio̍h--lah, lí kám se̍k-sāi Ah-ông?”
“Ah-ông? M̄-bat thiaⁿ--koè.”
“I sı̄ Thian-tō-bêng ê hù-tông-chú, goá chêng chı̍t-chām-á bat khı̀ chhoē i, i kóng chin him-sióng--goá.”
“Lí kóng siáⁿ? Lí......án-ne ha̍k-hāu ê khò-gia̍p beh án-choáⁿ?” Chèng-kı̂ chhoah chı̍t tiô.
“Hoâiⁿ-tı̍t koh tha̍k mā bô siáⁿ chhù-bı̄--a, put-jû pá-ak sı̂-kan, hó-hó-á sńg--chı̍t-ē.”
Chèng-kı̂ m̄-chai beh koh kóng siáⁿ, kui lō͘ tō lóng tiām-tiām bô koh chhut-siaⁿ.
I sim-lāi chin tiuⁿ-tû, i siūⁿ kóng, nā koh án-ne lo̍h--khı̀, m̄-tāⁿ sió-tı̄, hoān-sè liân i ka-tı̄ to ē jú bak jú chhim, choè-āu ē chhoē bô hoê-thâu-lō͘.
Sui-bóng án-ne siūⁿ, m̄-koh i sim-lāi bô chò siáⁿ-mih koat-tēng, it-tı̍t kàu āu--lâi thiaⁿ-tio̍h nn̄g ê siau-sit.
Tē it kiāⁿ sı̄, goân-pún tı̄ kok-tiong hông thè-ha̍k ê Ông Kı̂, choán kàu kı̂-thaⁿ kok-tiong liáu-āu tō chū-po̍k-chū-khı̀, khai-sí toè lâng teh kiâⁿ o͘-siā-hoē, chı̍t-pái teh kā lâng『勒索』ê sı̂, giâ chhèng khı̀ chı̍t ê toā seng-lí-lâng chhut chı̂ⁿ khí ê toā-lâu kang-tē kā lâng ui-hia̍p, goân-pún kan-taⁿ sı̄ hiòng khong-khı̀ khui-chhèng beh kâng heh-kiaⁿ, siūⁿ bē kàu soah toāⁿ-tio̍h chı̍t ê kang-lâng, hit-ê kang-lâng tong-tiûⁿ sí--khı̀, Ông Kı̂ hông thong-chı̍p, tô khı̀ lâm-pō͘.
Thiaⁿ kóng hit-ê kang-lâng ū nn̄g ê sè-hàn cha-bó͘-kiáⁿ.
Tē jı̄ kiāⁿ sı̄, Chheng--á in-ūi tiāⁿ-tiāⁿ phiàn kāng chng thau-cháu-chhù ê cha-bó͘ gín-á ê kám-chêng, tông-ki bô joā kú tō kā lâng bē khı̀ Tâi-pak, ín-khí chin chē lâng put-boán, chêng kúi kang tı̄ Ke-lâng Kiat-siông toā-lâu lâu-kha, hō͘ lâng giâ to-á ùi sim-chōng tu̍h sí.
Thiaⁿ kóng, hiah-ê cha-bó͘ gín-á ū--ê kan-taⁿ 13 hoè.
Chèng-kı̂ koat-tēng beh kiat-sok chit chióng seng-oa̍h.
Hit-chūn i ê kong-khò m̄-sı̄ kài hó, ū kúi-nā kho su-iàu pó͘ khó, m̄-koh i lóng thiau kò͘-ı̀ boài tha̍k-chheh, siūⁿ beh hông thè-ha̍k, thang choán khı̀ kı̂-thaⁿ ha̍k-hāu .
In pē-bó chai-iáⁿ Chèng-kı̂ ê chêng-hêng liáu-āu, kā mē--kúi-kù-a, m̄-koh mā bô i hoat, mā-sı̄ tio̍h khı̀ kā pān choán-ha̍k ê tāi-chı̀.
Chèng-kı̂ tō án-ne sūn-sè lı̄-khui hiah-ê lâng, choán khı̀ kàu Tâi-pak ê ha̍k-hāu, tı̄ goā-kháu soè-chhù toà, mā sǹg sı̄ lı̄-khui chhù--a. Chèng-kı̂ só͘-ū ê koan-hē lóng tio̍h-ài têng-sin lâi--koè.
Chèng-kı̂ iáu sǹg hó-ūn, poaⁿ--khı̀ bô joā kú, tō ū kı̂-thaⁿ ê chhù-kha chú-tōng lâi kap i se̍k-sāi. Hit-ê lâng kiò chò Cheng Chùn, sı̄ chò chúi-tiān--ê, thiaⁿ kóng ū sin chhù-kha lâi toà, tō chin hoaⁿ-hí khı̀ kā lòng-mn̂g.
Chèng-kı̂ khoàⁿ-tio̍h Cheng Chùn liáu-āu, sim-lāi chin giau-gı̂: “Siā-hoē jı̂n-sū tāi-khài lóng m̄-sı̄ siáⁿ-mih hó-lâng......” Kán-tan kap i chio-ho͘--kúi-kù liáu-āu, tō kín kā pâng-keng-mn̂g koaiⁿ--khí-lâi.
M̄-koh chit-ê Cheng Chùn sian-seⁿ sı̍t-chāi chin jia̍t-sim, ta̍k-pái lóng ē kap Chèng-kı̂ sio-chioh-mn̄g, mā chin koan-sim i ê seng-oa̍h, koh tiāⁿ chhiáⁿ Chèng-kı̂ khı̀ i pâng-keng lim-tê, khai-káng.
Sı̂-kan kú--lâi, nn̄g ê lâng jú lâi jú sio-lo̍h, boé--á koh ke kau chı̍t ê chhù-kha pêng-iú.
Chit-ê chhù-kha sı̄ sàng-phoe--ê, kiò chò Ko Gı̂-sèng, chin tiau-tı̍t, ta̍k kang thàu-chá khí-chhn̂g lóng ē thiaⁿ-tio̍h i pâng-keng thoân lâi Tâi-gí liû-hêng-koa ê im-ga̍k-siaⁿ. Sı̄ Cheng Chùn seng cháu khı̀ kap chit-ê Ko--sian-seⁿ sio-chioh-mn̄g, in chiah sio-lo̍h--khí-lâi-ê.
In saⁿ ê ta̍k kang siōng-pan, siōng-khò tńg--lâi lóng ē chò-hoé khai-káng, siáⁿ-mih to ē-tàng káng, m̄-koh it-tēng bē khiàm n̂g-sek chhiò-oē. Āu--lâi koh ū chı̍t ê Tāi-tông Kang-ha̍k-ı̄ⁿ ê ha̍k-seng ka-jı̍p in ê chū-hoē, kiò chò Sió-n̂g.
Chı̍t-pái joa̍h--lâng àm-sı̂, sı̀ ê lâng chò-hoé tı̄ Cheng Chùn pâng-keng teh khai-káng.
Cheng Chùn thiau-kang phiak sè-pha tiān-hoé, hō͘ khı̀-hun kám-kak chin iu-chēng, lâng mā toè leh sóng-khoài--khí-lâi, ē-tàng thán-pe̍h kóng sim-lāi-oē.
Chit-chūn, Chèng-kı̂ khoàⁿ-tio̍h Cheng Chùn chiàⁿ-chhiú ê tiong-cháiⁿ bô--khı̀-a, i chhoah chı̍t tiô: “Cheng......lí ê chéng-thâu-á......”
Cheng Chùn kā ka-tı̄ ê chéng-thâu-á khoàⁿ--chı̍t-ē, chhiò-chhiò kóng: “Lí kóng chit ki sı̄--bô? Bô siáⁿ--lah, khı̀ hō͘ ke-khı̀ teh tn̄g--ê.”
“Siáⁿ?” Kı̂-thaⁿ lâng mā lóng kiaⁿ chı̍t tiô.
Chèng-kı̂ chai-iáⁿ kang-tiûⁿ ū chin chē ke-khı̀, chin gûi-hiám, chhiūⁿ Chı̀n-êng kang-gia̍p-khu mā tiāⁿ hoat-seng chit chióng tāi-chı̀, m̄-koh thiaⁿ-tio̍h Cheng Chùn án-ne kóng, sim-thâu iáu-sı̄ ē sng, choaⁿ-á kā mn̄g: “Kám sı̄ phong-phú-lé-suh?” Phong-phú-lé-suh sı̄ Jı̍t-pún-miâ, sı̄ kóng chı̍t chióng kiông-le̍k ka-ap ê ke-khı̀.
“Sı̄ ah, chhut-lâi chò tāi-chı̀ bô joā kú tō tú--tio̍h-a, mā bô hoat-tō͘.”
“Hit-chūn kám ē chin thiàⁿ?” Sió-n̂g chhiúⁿ leh mn̄g.
“Chin kı̂-koài, tú hông teh--tio̍h ê sı̂ bô siáⁿ-mih kám-kak, it-tı̍t tán kàu hō͘ lâng sàng khı̀ kàu pēⁿ-ı̄ⁿ, ma-ma lâi kā goá khoàⁿ ê sı̂, kui-ê ba̍k-sái chiah liàn--chhut-lâi.”
Chèng-kı̂ kám-kak Cheng Chùn chin kian-kiông, mā kám-kak Tâi-oân chò-kang-á-lâng chin khó͘-liân.
M̄-koh, Cheng Chùn chit-ê lâng chin lo̍k-koan, mā bô kah-ı̀ kám-siong ê khı̀-hun, sûi koh kā khı̀-hun bú kah chin hoaⁿ-hí.
Chha-put-to hoan-tiám--a, Cheng Chùn hiông-hiông chin chèng-keng teh mn̄g: “Lín kám ū phı̄ⁿ-tio̍h siáⁿ-mih bı̄?”
Chèng-kı̂ in saⁿ ê hō͘-siong siòng--chı̍t-ē, koh phı̄ⁿ-phı̄ⁿ--leh, kóng: “Bô ah, siáⁿ-mih bı̄?”
“Ná-chhiūⁿ sı̄ tiān-soàⁿ sio--khı̀ ê bı̄, goá khoàⁿ--chı̍t-ē.” Cheng Chùn kiám-cha chhah sio-koàn ê tiān-soàⁿ, bô siáⁿ būn-tê.
Chèng-kı̂ chiah teh siūⁿ kóng sı̄ Cheng Chùn siuⁿ bín-kám--a, Cheng Chùn í-keng cháu khı̀ lâu-boé-téng ê『陽台』kiám-cha.
“Hāi--a! Hāi--a! Hoé-sio-chhù--a!” Cheng Chùn cháu--tńg-lâi ê sı̂, ná chông ná hiu, Chèng-kı̂ in lóng kiaⁿ--tio̍h.
“Beh án-choáⁿ? M̄-bat tú koè chit chióng tāi-chı̀......” Chèng-kı̂ sim-lāi soah kín-tiuⁿ--khí-lâi.
“Kín khı̀ lâu-kha lòng kı̂-thaⁿ lâng ê pâng-keng-mn̂g.” Cheng Chùn kā thê-chhéⁿ, in chiah hiông-hiông cheng-sı̂n, kín khai-sí hêng-tōng.
In kúi-ê cháu khı̀ lâu-kha, ū--ê khà tiān-oē, ū--ê kā lâng lòng-mn̂g, Sió-n̂g soah toā-toā-siaⁿ teh hoah: “Chhám--a, lán lâu-téng--ê bô kiò--tio̍h!” Kóng soah, koh chhóng-pōng cháu--khí-lih.
Chèng-kı̂ mā toè leh beh khí--lih, m̄-koh tı̄ lâu-thui-kháu i tiuⁿ-tû chı̍t bió. Bô, ē-sái kóng liân chı̍t bió to bô.
Chèng-kı̂ sim-koaⁿ-thâu phû-chhut nn̄g chióng oân-choân bô-kâng ê soán-tek: peh--khí-lih, khó-lêng tō bô ki-hoē lo̍h--lâi-a, kám ē hông sio sí tı̄ lāi-té? Boài khí--lih, téng-koân koh teh khùn--ê, hoān-sè bē-hù cháu tō oa̍h-oa̍h hông chak--sí iah-sı̄ sio--sí.
Che bô-kàu chı̍t bió ê sı̂-kan, tùi Chèng-kı̂ sán-seng chiâⁿ toā ê chhiong-ke̍k, sı̄m-chı̀ éng-hióng i bı̄-lâi ê jı̂n-seng.
(TGB Thong-sı̀n tē 54 kı̂, 2004 nı̂ 3 goe̍h)
