Jı̂n-tō chú-gı̄ chiū sı̄ Phok-ài, Chū-iû, Pêng-téng. Chit saⁿ ê toā būn-toê sı̄ tùi Ki-tok-kàu siⁿ-chhut. Ki-tok kàng-sè thoè lâng siū sí sio̍k-choē, thiàⁿ tùi-te̍k, thoè hāi i ê lâng kı̂-tó kiû Thiⁿ-pē sià in ê choē; kà-sı̄ lâng, tùi-te̍k tio̍h thiàⁿ i, loé-mē lín-ê tio̍h chiok-hok i, khún-tio̍k lín-ê thoè i kı̂-tó, án-ni oē tit lín Thiⁿ-pē ê pò-siúⁿ. Che sı̄ Phok-ài.
Chū-iû. Sı̄ bô siū ap-chè, pé-pa̍k, kiaⁿ-hiâⁿ, hoān-sū ū chū-chú ê koân-hān. Chú ū kóng, “Chin-lí tháu-pàng lín, bián siū Mô͘-kúi pé-pa̍k, bô choè chē-koà ê lô͘-châi.” Pó-lô kóng, “Tio̍h ēng chū-iû thàn Sèng Sı̂n, m̄-thang thàn su-io̍k, che sı̄ chin-chiàⁿ ê tháu-pàng.”
Pêng-téng. Ki-tok chı̀-chun kàng-kē choè lâng, ka-kı̄ khoán-thāi choè lô͘-po̍k, kā ha̍k-seng soé kha, sı̄ lâu I ê bô͘-hoān hō͘ lâng o̍h khiam-sùn. I kóng: “Goá bô khoán-thāi lín choè lô͘-po̍k, in-ūi lô͘-po̍k m̄-chai chú-lâng ê só͘ kiâⁿ; sı̄ ēng lín choè pêng-iú, choè Thiⁿ-pē ê kiáⁿ.” Che sı̄ sı̀n-tô͘ tē-it hó ê toē-ūi, iáu-bô thang pí lah. Ū tō-lí ê kok chiū ēng chí saⁿ hāng choè iàu-kín. Bí-kok kiàn-lı̍p sı̄ Jı̂n-tō chú-gı̄, bô ài chhim-chiàm pa̍t-lâng ê toē, ài pó-hō͘ lâng . Chá in ê kok-lāi ū lô͘-lē; āu-lâi Lı̂m Khéng Chóng-thóng hiat-chiàn lâi tháu-pàng in. Chêng-nı̂ Hoâ-hú hoē-gı̄, ū lâng soan-giân Bí sı̄ ài chiàm Tiong-hoa ê toē. Āu-lâi Khap-tēng (Hardeng) Chóng-thóng tùi gı̄-hoē soat-bêng, nā ū chiàm toē, chiū bô Jı̂n-tō chú-gı̄. Āu-lâi bô lâng koh lām-sám soan-giân.
Eng, Bí, kàu ı̄ⁿ-pang thoân chin-tō, chiū-sı̄ ūi-tio̍h thiàⁿ Chú, thiàⁿ lâng ê bo̍k-tek; hoán-tńg ū lâng siⁿ-khí húi-pòng ê oē, kóng in ài boé jı̂n-sim, chiàm thó͘-toē; kiat-kio̍k chiū bô-iáⁿ. Tiong-kok, Tâi-oân ê kū-koàn bô thian-tō, só͘-í Jı̂n-tō chú-gı̄ ū sit-lo̍h, tùi-tiōng Lı̄-kí chú-gı̄, Kim-chı̂ⁿ chú-gı̄ ê su-sióng chin chāi chhim. Tē-it bô jı̂n-tō sı̄ chhoā soè-ı̂ ê , boé lâng choè lô͘-châi, cha-bó͘-kán, hō͘ in chiong-sin boē chiâⁿ lâng. Che sı̄ ū hāi jı̂n-tō, iā bia̍t-bô thian-tō.
Chèng-hú niá Tâi í-lâi, ū ēng chin-choē hong-hoat ài chia̍t-chí chiah-ê pháiⁿ hong-sio̍k; m̄-kú iā sı̄ boē lı̄, lâng chin gâu nǹg hoat-lu̍t-phāng.
Chèng-hú chiat-chè soè-ı̂, lâng chiū-chō tông-ku-jı̂n, siⁿ-kiáⁿ ēng jiōng-tō͘ jı̍p-hō͘. Iā ū hit hō kam-goān choè hā-chiān ê chhiap. Chiat-chè boé cha-bó͘-kán, chiū ēng ióng-lú ê bêng-gı̄, sı̍t-chāi iû-goân sı̄ teh choè cha-bó͘-kán. Chiat-chè ióng-lú-ê, sı̄ ūi-tio̍h chhiong-ki ê lâng, pun chin-choē lâi thàn-chia̍h, m̄-kú iáu ū chı̍t sut-á lō͘ thang jı̍p. Ū chún lâng pun chı̍t nn̄g-ê lâi thoân hō͘-sû, chóng-sı̄ lâng sūn chit ê ki-hoē, iū chin-choē teh choè bô jı̂n-tō ê sū. Nā bô kiáⁿ, sı̍t-chāi pun lâi ióng-sêng choè hō͘-sū, che sı̄ chin ha̍p jı̂n-tō, in-ūi lán sı̄ ka-cho̍k chú-gı̄, tāi-ke ài ū soà-chiap hō͘-sè-tāi ê su-sióng. M̄-kú ū lâng hāu-siⁿ cha-bó͘-kiáⁿ chin toā tı̄n, iáu-boé sàn-hiong-lâng ê cha-bó͘-kiáⁿ lâi choè chhe-ēng, che bêng-bêng ū cha-bó͘-kán ê chèng-kù.
Chá ū cha-bó͘-kiáⁿ chhut-kè, ū kah lāu-pô, cha-bó͘-kán; taⁿ chiū pun ióng-lú sûi khı̀ choè chhe-ēng. Che kám m̄-sı̄ bô jı̂n-tō Chú-gı̄ mah ? Án-ni lâi khoàⁿ lâng ê liông-sim sı̄ sún-jı̂n lı̄-kí khah choē, gâu thé-thiap kan-khó͘ lâng-ê sı̄ chió. Choè chit hō sı̄ bô kong-tek-sim, pé-pa̍k lâng, chhut-chāi in khó͘-to̍k boē tô-siám-tit. Nā ū khiàm-ēng lâi ēng chhiàⁿ, sı̍t-chāi sı̄ khah hó miâ-siaⁿ, chiah oē siⁿ-khí chū-iû pêng-téng ê thiàⁿ-sim.
Lūn chit chân ióng-lú choè cha-bó͘-kán ēng, lán tâng sı̀n Chú ê hiaⁿ-tı̄ chí-bē put-chí tio̍h sió-sim tı̂-hông. Nā bô, ná chún tı̍t-tı̍t teh liû-hêng ê khoán, in-ūi hoē-goā ê lâng teh phoe-phêng lán, só͘-í tio̍h sió-sim. Lán sı̀n Chú lâm-hū ló-iù, hù-kùi pı̂n-chiān sı̄ Pêng-téng chú-gı̄, m̄-thang án-ni bô jı̂n-tō, oē hō͘ hoē-goā ê lâng chhē khang-phāng; iā kiaⁿ-liáu Sian-ti chiù-chó͘ ê oē ū èng-giām. Í-sài-a, Iâ-lı̄-bí, put-sı̂ chek-pı̄ Iû-thài ê peh-sı̀ⁿ bô thiàⁿ sòng-hiong-lâng , só͘-í in ū choē lah ! Ná-tan tùi Tāi-pı̍t kóng, “Ū hó-gia̍h lâng, gû-iûⁿ chin-choē; lâng-kheh lâi m̄-kam thâi; sòng-hiong lâng chí-ū chı̍t chiah iûⁿ-á-bú, chiū kā i khan-lâi thâi, i ê choē tio̍h cháiⁿ-iūⁿ pān ?” Tāi-pı̍t ı̀n kóng, “Tio̍h thâi, thang tû pháiⁿ hong-sio̍k tı̄ peh-sı̀ⁿ ê tiong-kan.” Sian-ti kóng, “Choè chit hō sū chiū-sı̄ lí.” Hit-sı̂ Tāi-pı̍t chiah jı̄n-choē, chai sı̄ ū toā sit-lo̍h i ê liông-sim, siū chiù-chó͘. Chiàu thian-lí lâi lūn, tio̍h ū Jı̂n-tō chú-gı̄ chiah ha̍p-lí. Nā khoàⁿ Se-kok ū Jı̂n-tō chú-gı̄ lóng khah hoat-ta̍t.
Án-ni put-lūn kok-ka, chong-kàu, siā-hoē, ka-têng, kò-jı̂n, tio̍h ū Jı̂n-tō chú-gı̄, hō͘ chiah-ê put-hoat ê hong-sio̍k oē tû-khı̀, chiah ū sı̍t-hêng Ki-tok só͘ kiàn Phok-ài, Chū-iû, Pêng-téng ê bo̍k-tek. Nā ûi-hoān sı̄ ko͘-hū Chú ê toā-un chin chhim.
(Tı̂-oân Kàu-hoē-pò tē 469 koàn, 1924 nı̂ 4 ge̍h)
