Jı̄-cha̍p Sè-kí ê Chú-jı̍t-o̍h 06

Tē 6 Phiⁿ Chóng-lūn Tē 6 chiuⁿ Tùi Chú-jı̍t-o̍h bo̍k-su ê gı̄-bū Jı̍t-pún ê bo̍k-su á-sı̄ thoân-tō-su tùi Chú-jı̍t-o̍h bô kàu loā jia̍t-sim, ún-tàng ū chin chē ê lí-iû. (1) Bo̍k-su gō͘-kái in ê pún-chit, lia̍h chò sı̄ kan-ta káng-tō nā-tiāⁿ. (2) Jı̂-tông kā poah chı̍t-piⁿ, chí-ū tio̍h-gán tı̄ toā-lâng, jia̍t-sim tı̄ koáⁿ-kín beh chō-sêng chı̍t ê to̍k-lı̍p ê kàu-hoē. (3) Koan-hē Chú-jı̍t-o̍h ê sū, chha-put-to choân-jiân m̄ chai-iáⁿ, sui-jiân tı̄ sı̂n ha̍k-hāu ū tha̍k sı̂n-ha̍k á-sı̄ soat-kàu-ha̍k, chóng-sı̄ bô tha̍k jı̂-tông ha̍k. (4) Jı̍t-pún ê bo̍k-su á-sı̄ thoân-tō-su ê tiong-kan chin chē sı̄ chhin-chhiūⁿ sian-jı̂n ê kun-chú, só͘-í bô ha̍h tı̄ chhin-chhiūⁿ Chú-jı̍t-o̍h tio̍h ài ū sū-bū ê châi. Í-goā kiám-chhái iáu ū chin chē ê lí-iû, chóng-sı̄ chiah ê sı̄ chú-iàu ê, án-ni bo̍k-su á-sı̄ thoân-tō-su bô chhut-se̍k tı̄ Chú-jı̍t-o̍h, iā lóng bô chò sím-mı̍h, só͘-í chū-jiân kàu-hoē ê sı̀n-tô͘ ē siūⁿ kóng Chú-jı̍t-o̍h sı̄ sı̀n-tô͘ ka-kı̄ ê sū-gia̍p. Put-lūn chit ê sı̄ chin toā ê chhò-gō͘. Bô khoàⁿ-tāng Chú-jı̍t-o̍h ê bo̍k-su sı̄ m̄-chai ka-kı̄ ê chit-bū sı̄ sím-mı̍h ê lâng. Tàu-tí bo̍k-su sı̄ sím-mı̍h? Kiám m̄-sı̄ ē-thang kiò chò bo̍k-chiá? Nā bô khoàⁿ-kò͘ chiah ê sè-chiah iûⁿ-á ê bo̍k-chiá, tek-khak bē thang kiò chò chin-chiàⁿ ê bo̍k-chiá, m̄ sı̄ kan-ta toā-lâng chiah sı̄ kàu-hoē lāi ê iûⁿ, chiah ê jı̂-tông chū-jiân sı̄ sè-chiah iûⁿ. Ū sı̂ iā thang kóng, bo̍k-chiá só͘ choè tio̍h chı̄n-la̍t chò ê kang, chiū-sı̄ tio̍h ióng-io̍k chiah ê khó-ài ê sè chiah iûⁿ-á. Ki-tok kiám bô kóng kàu saⁿ pái, kā Pí-tek kóng “Tio̍h chhı̄ goá ê iûⁿ-á kiáⁿ.” Bo̍k-su ê jı̄m-bū m̄ sı̄ kan-ta káng-tō, tio̍h koán-lí ū koan-hē kàu-hoē choân-thé chı̀n-pō͘ ê thoân-tō ê sū-gia̍p. Bo̍k-su tı̄ kàu-hoē ê tē-ūi kap chek-jı̄m, nā chiàu tı̄ Bí-kok lâi kóng sı̄ tı̄ Tāi-thóng-léng, iā nā chiàu tı̄ Jı̍t-pún lâi kóng sı̄ tı̄ Chóng-lí tāi-sı̂n. Bu̍t-lūn bo̍k-su bô it-tēng tek-khak tio̍h kà Chú-jı̍t-o̍h á-sı̄ tio̍h koán-lí, chí-ū tio̍h ū chek-jı̄m koán-lí Chú-jı̍t-o̍h ê toā ūn-choán. Hoān-nā chò bo̍k-su ê lâng beh ka-kı̄ chı̍t ê lâng chò 10 ê lâng ê kang, m̄-ta̍t-tio̍h ēng cha̍p ê lâng ê la̍t hō͘ in kok lâng chò kang sı̄ khah hó. Bô-lūn sı̄ tı̄ Chú-jı̍t-o̍h, á-sı̄ kiōng-lē-hoē, á-sı̄ kı̂-thaⁿ chéng-chéng thoân-tō ê sū-gia̍p, nā ē-hiáu ēng kàu-hoē ê hoē-oân hō͘ in chò chhin-chhiūⁿ kha-chhiú lâi oa̍h-tāng ê bo̍k-su, sı̄ siōng ū kè-ta̍t ê bo̍k-su. Kin-á-jı̍t ê bo̍k-su ka-kı̄ chı̍t ê lâng chò siuⁿ-chē kang m̄-chai sú-iōng hoē-iú ê hoat-tō͘ ê khoán. I ê thoân-tō bē cha̍p-hun ê sêng-kong, hit ê goân-in kiám-chhái sı̄ chāi tı̄ chia. Só͘-í chò bo̍k-su ê lâng tı̄ in kàu-hoē ê Chú-jı̍t-o̍h tio̍h ka-kı̄ ēng hui-siông ê jia̍t-sim chı̄n-la̍t lâi chò. Ē-bı̄n beh kú-khí bo̍k-su tùi Chú-jı̍t-o̍h ê sim-tek. (1) Tio̍h chı̄n-la̍t chí-tō Chú-jı̍t-o̍h ê kàu-oân, koh tı̄ kàu-hoē-oân ê tiong-kan tio̍h chı̄n-liōng chún-pı̄ khah chē lâng thang chò Chú-jı̍t-o̍h ê kàu-oân. (2) Sui-jiân nā bô ka-kı̄ kà á-sı̄ koán-lí, tı̄ Chú-jı̍t-o̍h beh khai-sí ê sı̂, á-sı̄ beh soah ê sı̂, tek-khak tio̍h chhut-se̍k, tı̄ hia hiàn kı̂-tó á-sı̄ kóng té-té ê oē, thang bat ha̍k-seng ê bı̄n. (3) Nā kàu-hoē khah hoat-tián, lēng-goā hē thoân-tō-su á-sı̄ hù bo̍k-su ê sı̂, tio̍h siat-tı̀ choan-jı̄m chò Chú-jı̍t-o̍h ê kang ê thoân-tō-su. (4) Bo̍k-su m̄-sı̄ kan-ta sı̄ kàu-hoē, iā-sı̄ hit ê Chú-jı̍t-o̍h ê bo̍k-su, só͘-í tio̍h bat ha̍k-seng ê miâ, koh tio̍h ū in ê miâ-phō͘. (5) Nā hit ê kàu-hoē ê Chú-jı̍t-o̍h bē hó-sè ê sı̂, m̄ sı̄ chí-ū hāu-tiúⁿ á-sı̄ kàu-oân tio̍h hū-chek nā-tiāⁿ, tio̍h ē kı̀-tit bo̍k-su iā tio̍h kak-gō͘ chò-hoé taⁿ hit ê chek-jı̄m. (6) Ha̍k-seng ê tiong-kan nā ū phoà-pēⁿ ê lâng, tio̍h khı̀ kā thàm. (7) Tı̄ lō͘-nih nā tú-tio̍h ha̍k-seng ê sı̂, ēng chhiò-iông lâi chih-chiap in, chhin-chhiat kā mn̄g ha̍k-seng á-sı̄ in pē-bó khoàⁿ ū pêng-an bô. (8) Ha̍k-seng ê tiong-kan nā ū lâng siū sé-lé, tio̍h chhiáⁿ hit pan ê kàu-oân tô͘-bô͘ hō͘ hit ê ha̍k-seng ê sı̀n-gióng hoat-ta̍t. (9) Chin kú chò ha̍k-seng, iā iáu boē siū sé-lé ê lâng, chhiáⁿ kàu-oân tio̍h chù-ı̀, khoàn-bián i tio̍h siū sé-lé. Koh m̄-thang bē-kı̀-tit, tùi 12, 3 hoè kàu 20 hoè ê tiong-kan niá sé-lé sı̄ choè hó ê sı̂-ki. (10) Tio̍h kap hāu-tiúⁿ á-sı̄ kàu-oân, ū siông-siông chhin-bı̍t ê kau-poê, chı̀-chió chı̍t-nı̂ tio̍h chha-put-to 2 pái chiau-thāi chiah ê lâng, chò-hoé tông-lo̍k. (11) Chú-jı̍t-o̍h ê keng-hùi chı̄n-la̍t tùi kàu-hoē chi-chhut hō͘ i ū kàu. (12) M̄-thang bē-kı̀-tit bı̂n-á-jı̍t ê kàu-hoē-oân chiū-sı̄ kin-á-jı̍t ê ha̍k-seng. (13) Tùi jı̂-tông ēng Ki-tok ê kà-sı̄ hō͘ in liū, liān 1 jı̍t 1 khek to m̄-thang bē-kı̀-tit. (14) Lé-pài ê sı̂ tek-khak tio̍h ūi-tio̍h Chú-jı̍t-o̍h kı̂-tó. (15) Kı̂-tó-hoē ê kı̂-tó sū-hāng tio̍h hē Chú-jı̍t-o̍h ê sū-hāng. (16) Chú-jı̍t-o̍h ê ia̍h-oân-hoē ê sı̂ tek-khak tio̍h ka-kı̄ chhut-se̍k. (17) Tio̍h siông-siông káng-tō, koan-hē tùi jı̂-tông chò sı̄-toā-lâng ê pún-hūn. (18) M̄-thang bē-kı̀-tit, sí ê Chú-jı̍t-o̍h sı̄ teh tāi-piáu sí ê bo̍k-su. (19) Tio̍h kap hāu-tiúⁿ chiâⁿ-chò chı̍t-thé lâi chò kang. Í-goā kiám-chhái iáu ū, chóng-sı̄ chiah ê sū-hāng nā ē-kı̀-tit, koh kā sı̍t-hêng, ún-tàng ē tit-tio̍h chin sèng-tāi ê Chú-jı̍t-o̍h. Siat-sú kin-á-jı̍t ê bo̍k-su, nā chù-ba̍k tı̄ jı̂-tông, choan-sim ūi-tio̍h Chú-jı̍t-o̍h chò kang, chiū 100 nı̂ āu tek-khak beh hō͘ chit ê kok-ka pı̀ⁿ chò Ki-tok-kàu kok, jı̂-tông nā bô kā kiù, beh thài ē kiù sè-kài! Ta̍k-jı̍t teh kı̂-tó kóng “Goān Lí ê kok lı̂m-kàu” ê bo̍k-su, chhiáⁿ ē kı̀-tit nā bô ín-chhoā jı̂-tông lâi chiū-kı̄n Ki-tok, tek-khak bē thang tit-tio̍h sèng-kok ê lı̂m-kàu.