Jı̄-cha̍p Sè-kí ê Chú-jı̍t-o̍h 11

Tē 2 Phiⁿ Koán-lí-hoat (Soà-chiap 10 ge̍h hūn ê Tē 6 chiuⁿ) (4) Kóng-kò: (Bō͘-chı̍p ha̍k-seng ê hoat-tō͘ 3)
M̄-thang bē kı̀-tit kóng “Hó ê ı̀n-soat-bu̍t siông-siông sı̄ hó ê pang-chān.” Chiong kàu-hoē á-sı̄ bo̍k-su ê siá-chin, ı̀n tı̄ chin súi ê kāu-choá, iā siá Chú-jı̍t-o̍h ê bo̍k-tek á-sı̄ só͘-chāi á-sı̄ sı̂-kan, pun hō͘ jı̂-tông, nā ēng po̍h koh sio̍k ê choá ı̀n, in ē ēng khı̀ chhèng-phı̄ⁿ hiat-ka̍k khı̀, só͘-í sió-khoá ke ēng chı̂ⁿ ı̀n khah súi leh khah hó. Nā án-ni in ê pó-sioh siu khí-lâi khǹg, chiū chiām-chiām pı̀ⁿ kóng-kò, bô-kú ē pı̀ⁿ hō͘ Chú-jı̍t-o̍h ê ha̍k-seng ke-thiⁿ ê hoat-tō͘. (5) Tiāⁿ-tio̍h chò-kang ê só͘-chāi: (Bō͘-chı̍p ha̍k-seng ê hoat-tō͘ 4)
Khoàⁿ chit-lí ū kúi ê jı̂-tông, pa̍t-lí ū kúi ê jı̂-tông tio̍h siông-sè tiau-cha, hō͘ chiah ê gín-ná pun tı̄ kok-lí lâi chò kang iā-sı̄ chı̍t ê hoat-tō͘. Hāu-tiúⁿ ka-kı̄ choè su-lēng-koaⁿ, kiò kàu-oân á-sı̄ ha̍k-seng, ín-chhoā in só͘ pun tio̍h ê lí-lāi ê jı̂-tông, án-ni ê chò-kang iā-sı̄ chin hó, koh hāu-tiúⁿ tio̍h ē-kı̀-tit chiah ê jı̂-tông ê sı̀ⁿ-miâ, sı̄ chin iàu-kín ê sū. (6) Hun-pêng kēng-cheng: (Bō͘-chı̍p ha̍k-seng ê hoat-tō͘ 5)
Bí-kok ū chı̍t-keng Chú-jı̍t-o̍h, ha̍k-seng hun-pêng, tiāⁿ-tio̍h sı̂-sı̂ hō͘ kēng-cheng ke-thiⁿ sin ê ha̍k-seng. Ta̍k lé-pài lóng kong-kò khoàⁿ kah ê chit pêng ke kúi-ê, iā it ê chit-pêng ke kúi-ê, nā su ê hit pêng tio̍h chhiáⁿ iâⁿ ê hit pêng, khiok chit ê hoat-tō͘ m̄-sı̄ chin hó, m̄-kú chāi-tı̄ ūn-iōng bē kah loā ū sún-hāi chiah tio̍h, só͘-í chò bō͘-chı̍p ha̍k-seng ê chı̍t ê hoat-tō͘ chiah ū siá tı̄ chia. (Thāi-sio̍k)