Jı̍p-chhiu ê Tām-chúi koe-á

Jı̍p-chhiu liáu-āu ê Tām-chúi koe-á-thâu ū tām-po̍h-á léng, m̄-koh ta̍k-ê sim-lāi lóng bô sió-khoá-á koâⁿ ê kám-kak, in-ūi goán kap 1-ê chin chhù-bı̄ mā chin jia̍t-chêng ê lâng chò-hoé, tı̄ leh 1-ê bô joā toā ê só͘-chāi mā kám-kak un-loán, chit-ê lâng tō-sı̄ Hō͘-chō͘ hiaⁿ. Hō͘-chō͘ hiaⁿ 10 goā hoè-á tō lâi kàu Tâi-pak chò sai-á, hit tong-sı̂ ta̍k-ê seng-oa̍h lóng bô hó koè. Hō͘-chō͘ hiaⁿ ko-tiong chhut-gia̍p liáu-āu, tāi-seng tı̄ Tâi-pak Se-mn̂g-teng Bān-kok Hı̀-ı̄ⁿ piⁿ--á ê lí-hoat-thiaⁿ chò sam-chhit-á, keng-koè 2 kò goā goe̍h, Hō͘-chō͘ hiaⁿ kap hit-chūn ê siàu-liân khí chhiong-thu̍t, tō koh tńg-khı̀ ē-káng, m̄-koh ē-káng khak-sı̍t pháiⁿ koè-jı̍t, Hō͘-chō͘ hiaⁿ 18 hoè ê sı̂ koh lâi kàu Tâi-pak, tı̄ 1-ê pêng-iú ê lí-hoat-thiaⁿ chò khang-khoè, chin tn̂g 1-toāⁿ sı̂-kan liáu-āu, Hō͘-chō͘ hiaⁿ lâi kàu Tām-chúi, ka-tı̄ khui lí-hoat-thiaⁿ, boé--á oāⁿ khan-chhiú keng-êng, ka-tı̄ khı̀ sàng hái-sán. Hō͘-chō͘ hiaⁿ chit-ê lâng chin khai-lóng, kā goán kóng hái-sán, koh kóng-tio̍h i soè-hàn chng-kha só͘-chāi ê seng-oa̍h, i koh kóng-tio̍h ka-tı̄ soè-hàn ê sı̂, tı̄ Toā-nâ thau-cháu khı̀ khoàⁿ thoat-ni-bú ê tāi-chı̀. Chit-koá tāi-chı̀ kóng kah hō͘ kui chhù-keng ê lâng chhiò-hai-hāi, khoàⁿ boē chhut-lâi kóng, kı̂-sı̍t Hō͘-chō͘ hiaⁿ pún-chiâⁿ sı̄ kóng-oē soè-siaⁿ, mā bô siáⁿ káⁿ hoat-piáu ka-tı̄ siūⁿ-hoat ê lâng, tùi chèng-tı̄ 1-sut-á to m̄-bat, m̄-koh chū chham-ka “Chheng-liân Tiān-tâi” liáu-āu, chiap-chhiok tio̍h bô kāng-khoán ê koan-tiám, mā kap chin choē lâng chih-chiap, chiah ta̍uh-ta̍uh-á kā ka-tı̄ ê sim phah--khui, chit-má Hō͘-chō͘ hiaⁿ í-keng sı̄ i choh-sit hit-ê só͘-chāi ê ı̀-kiàn léng-siù, mā chin ū ka-tı̄ ê siūⁿ-hoat, siōng kài bêng-hián--ê, tō-sı̄ ta̍k-kái soán-kí, Hō͘-chō͘ hiaⁿ lóng ē choan-kang tńg-khı̀ Ka-gı̄ kū-chhù tǹg hùi-phiò, pa̍t-lâng soán-kí sı̄ ū chı̂ⁿ thang thio, m̄-koh Hō͘-chō͘ hiaⁿ soán-kí tian-tò ài ka-tı̄ khai-chı̂ⁿ chē poe-lêng-ki cháu tńg--khı̀ tǹg hùi-phiò. Chò tiān-tâi ê sı̂, Hō͘-chō͘ hiaⁿ chham-ka koe-thâu iû-hêng lóng sı̄ sù-siông--ê, i mā tı̄ tiān-tâi chiat-bo̍k--nih kóng boē-chió phoe-phoàⁿ ê giân-lūn, kan-taⁿ ūi-tio̍h 1-ê lí-sióng teh chhiong, mā-sı̄ àn chit-chūn chiah khai-sí o̍h Tâi-bûn. I tiàm ê khangpang tō iōng Tâi-bûn Lô-má-jı̄ siá “Tek Ko Chhù”. Ūi-tio̍h 1-ê kap pa̍t-lâng bô kāng-khoán ê lí-sióng, Hō͘-chō͘ hiaⁿ bat hō͘ Pó-chhit-chóng-tūi chhoē mâ-hoân--koè, tiàm-á ê khangpang mā bat hō͘ lâng lòng-phoà kúi-lō-kái, chin choē sı̂-chūn, i ê pêng-iú boē-tàng lí-kái i ê siūⁿ-hoat, m̄-koh Hō͘-chō͘ hiaⁿ lóng chai-iáⁿ ka-tı̄ beh chò siáⁿ, boē hō͘ lâng éng-hióng, put-sı̂ mā kap lâng piān-lūn ı̀-kiàn. Hō͘-chō͘ hiaⁿ ū-sı̂-á mā chin kám-khài kong, chit-má ê Tâi-pak gín-á lóng boē-hiáu kóng Tâi-gí--a, i kóng-tio̍h ka-tı̄ tı̄ chhù--nih ē iau-kiû gín-á kóng Tâi-gí, m̄-koh gín-á tı̄ goā-kháu iah-sı̄ ha̍k-hāu lóng kóng Pak-kiaⁿ-gí, tı̀-sú tiàm chhù-lāi 6~7 siâⁿ mā lóng teh kóng Pak-kiaⁿ-gí. Chit-má ê siā-hoē, liân Hō͘-chō͘ hiaⁿ chit-khoán chin ū ı̀-sek ê lâng, to bô hoat-tō͘ kái-piàn chit-khoán chêng-hêng, án-ne sı̄ m̄ sı̄ būn-toê ē jú lâi jú giâm-tiōng? Lán chin-chiàⁿ tio̍h hó-hó-á su-khó, mā tio̍h khah kín hêng-sêng Tâi-oân-lâng ka-tı̄ ê ı̀-sek. Kap Hō͘-chō͘ hiaⁿ khai-káng, hō͘ goá khoàⁿ-tio̍h 1-ê goá m̄-bat chiap-chhiok--koè ê sè-kài, chai-iáⁿ 1-ê lâng ê kái-piàn, mā khoàⁿ-tio̍h i ê jia̍t-chêng, che sı̄ lán chit-tāi ê gín-á kap in boē-tàng pí-phēng--ê. Khoàⁿ-tio̍h Hō͘-chō͘ hiaⁿ, hō͘ goá siūⁿ chin choē, mā su-khó tio̍h āu-pái beh án-choáⁿ kiâⁿ--lo̍h, sui-bóng chit-má ê siàu-liân-á tùi seng-khu-piⁿ ê tāi-chı̀ lóng bô koan-sim, ah sı̄ lóng m̄-bat, m̄-koh thiaⁿ-tio̍h Hō͘-chō͘ hiaⁿ 1-lō͘ kiâⁿ--koè ê sim-lāi-oē, goá soah kám-kak lán ê bı̄-lâi koh ū tām-po̍h-á ǹg-bāng, koh ū tām-po̍h-á kng-soàⁿ. (TGB Thong-sı̀n tē 39 kı̂, 2002 nı̂ 12 goe̍h)