Jı̍t-pún oē ê kin-té

Lán sio̍k tı̄ Tâi-lâm Kàu-hoē ê hiaⁿ-tı̄ chí-moāi chē-chē-ê í-keng bat o̍h Pe̍h-oē-jı̄ . Tı̄ Jı̍t-pún kok ia̍h ū lâng ài ēng chit-hō ê jı̄ , chóng-sı̄ in ke ēng kúi-nā ê koh-iūⁿ ê jı̄ , chiū-sı̄,

z, Sı̄ sio̍k tı̄ s--jı̄ ê siaⁿ-lūi .

d, Sı̄ sio̍k tı̄ t--jı̄ ê siaⁿ-lūi.

f, Sı̄ sio̍k tı̄ h--,（ph--）jı̄ ê siaⁿ-lūi.

y, Sı̄ sio̍k tı̄ i--jı̄ ê siaⁿ-lūi .

w, Sı̄ sio̍k tı̄ u--,o--jı̄ ê siaⁿ-lūi .

r, Tn̂g-lâng kóng chit-ê r--jı̄ chhin-chhiūⁿ l--jı̄ ê siaⁿ-im ,m̄-kú sı̄ toā koh-iūⁿ . Tı̄ i--jı̄ ê thâu-chêng r--jı̄ ê im sı̄ ná-chhin-chhiūⁿ d--jı̄ ê khoán-sit .

Jı̍t-pún lâng só͘ ēng ê jı̄ sı̄ hun-piat chò nn̄g-lūi,chiū-sı̄:

I . Chú-im jı̄(chú=chú-lâng), -----a , i , u , e, o.

Chiah-ê jı̄ ū soà hun-piat chò Té-siaⁿ--ê kap Tn̂g-siaⁿ--ê,--------

a , i , u , e, o chiū-sı̄ Té-siaⁿ--ê .

ā , ı̄, ū, ē, ō chiū-sı̄ Tn̂g-siaⁿ--ê.

Ū-sı̂ i--jı̄ kap u--jı̄ ê siaⁿ sı̄ put-chí khin kàu oh-tit thang thiaⁿ--ê,chiū ū lâng siá i, u.

II .po̍k-im-jı̄ （po̍k=lô͘-po̍k)

KG N M Y R W

SZTD ShJChJ ChDz

HBP F

Taⁿ, beh kı̀-chài Jı̍t-pún lâng ê Jı̄-bú,--------

Jı̍t-pún Lâng Ê Jı̄-bú

a i u e o

kaga kigi kugu kege kogo

saza shiji suzu seze sozo

tada chiji chudzu tede todo

na ni nu ne no

habapa hibipi fubupu hebepe hobopo

ma mi mu me mo

ya i yu ye yo

ra ri ru re ro

wa i u ye wo

Tāi-ke khoàⁿ téng-bı̄n ê Jı̄-bú chiū chai Jı̍t-pún lâng tàu-jı̄ ū kúi-nā-ê bô chiàu chhù-sū ê thé-sek:

s i chiū-sı̄ chò sh i

z i chiū-sı̄ chò j i

t i chiū-sı̄ chò ch i

d i chiū-sı̄ chò j i

t u chiū-sı̄ chò ch u

d u chiū-sı̄ chò dz u

Koh,

y i pı̀ⁿ-chò i

w i pı̀ⁿ-chò i

w u pı̀ⁿ-chò u

w e pı̀ⁿ-chò y e

Iáu ū chı̍t-hāng tio̍h chai,chiū-sı̄ hit-ê h--jı̄ kap hit-ê f--jı̄ ,Jı̍t-pún lâng ū lia̍h chò siāng chı̍t-khoán .Tn̂g-lâng ia̍h sı̄ chha-put-to chhin-chhiūⁿ án-ni . Tō-tâi só͘ koán ê siâⁿ hō-chò hú á-sı̄ fú .

Jı̍t-pún lâng ū hō in ê Jı̄-bú chò “Gō͘-cha̍p-im ”. Lâng nā sǹg hiah-ê o͘-jı̄ sı̍t chāi ū gō͘-cha̍p--ê . Hí kı̂-û ê jı̄ in bô lia̍h chò koh-iūⁿ ê lūi, to̍k-to̍k ū hun-pia̍t in chò choa̍h-im--ê nā-tiāⁿ . Só͘ hō ê miâ chiū-sı̄,

1.Chheng-sū: chiū-sı̄ hiah-ê o͘--jı̄ ,ná“ka”,hit-hō .

2.Cho̍k-im: chiū-sı̄ hí kı̂-û ê jı̄ ,ná “ga”,hit-hō .

(Cho̍k-im ê ı̀-sù sı̄ lô-lô ,siâ,bô chiaⁿ,bô chheng).

Tı̄ téng-bı̄n sui-jiân ū lio̍h-á kı̀-chài Jı̍t-pún oē ê kin-té,iáu-kú hoān-nā só͘ ài kóng in ê oē tú-tú bêng eng-kai tio̍h thiaⁿ in pún-sin só͘ kóng ê khiuⁿ-kháu, chiah ē chiàⁿ . Tùi siá tek-khak bē-chiàⁿ.

(Tâi-lâm Hú-siâⁿ kàu-hoē-pò tē 132 koàn,1896 nı̂ 3 ge̍h)