Kà-sı̄ cha-bó͘ gín-ná

Ta̍k-kok ê tiong-kan , ū boē siū kàu-hoà ê chhiⁿ-hoan ,cha-po͘--ê pı̂n-toāⁿ bô beh chò kang , lóng sı̄ i-ê bó͘ teh chò . Hoān it-khài keng-choh í-kı̍p iúⁿ-chhı̄ ke-lāi ê bí-niû , lóng-chóng sı̄ chhe-kah hū-jı̂n-lâng khı̀ chò , chhin-chhiūⁿ chhe-ēng lú-pı̄ chı̍t-iūⁿ . Nā-sı̄ cha-po͘--ê êng-êng chē teh chia̍h; che khiok m̄-bián lūn.

Chóng-sı̄ ū siū kàu-hoà ê pang-kok , lú-jı̂n chai thang tha̍k-chheh bêng-pe̍k lí-gı̄ ,kàu-gia̍h lâi pang-chān ke-lāi í-kı̍p pān-lí chú-chia̍h. Só͘-í lâm-jı̂n kèng--I thiaⁿ--i . Tùi án-ni khoàⁿ-khí-lâi ū tha̍k-chheh bêng lí-gı̄ , kap bô tha̍k-chheh bô bêng lí-gı̄ saⁿ-pí ,chiū-sı̄ lâng kap khı̂m-siù ê hun-pia̍t lah！Chóng-sı̄ chò pē-bú ê lâng m̄-chai thang kà-sı̄ i-ê cha-bó͘-kiáⁿ, hō͘ i chāi-chhù chò hiân ê cha-bó͘ gín-ná , chhut-kè chò hiân ê hū-jı̂n , koh āu-lâi chò hiân ê lāu-bú . Nā bô án-ni kà-sı̄--i, beh thài ū khah koh-iūⁿ hō͘ i ta̍k-jı̍t kiâⁿ khı̂m-siù ê lō͘ ah！

Kiám-chhái ū lâng kóng , Cha-bó͘ gín-ná chiū nā ē thiaⁿ-thàn kà-sı̄ , chai thang tha̍k-chheh , chai thang siá-jı̄ , chóng-sı̄ bē-ē chhut-mn̂g chò pa̍t-hāng sū , tàu-thàn chı̂ⁿ-châi , kan-ta chò i chı̍t-sin ê hióng-hok ; án-ni chhin-chhiūⁿ bô lı̄-ek . Cháiⁿ-iūⁿ m̄-chai , kı̀-jiân ē tha̍k-chheh bêng lí-gı̄ , sui-sı̄ bē tit-tio̍h thàn chı̍t-ē chı̂ⁿ , m̄-kú i-ê lı̄-ek sı̍t-chāi bô hān-liōng ;sı̄ cháiⁿ-iūⁿ mah? Chiū-sı̄ chı̍t-ke ê tiong-kan , lāu-pē chhut-goā thàn-chia̍h ; chiū kà-sı̄ kiáⁿ-jı̂ ê koân , khah chē sı̄ chāi tı̄ lāu-bú . Siat-sú sè-hàn gín-ná siū só͘ eng-kai siū ê kà-sı̄ , chò só͘ tio̍h chò ê tāi-chı̀ , tı̄ ta̍k-hāng ū chhù-sū ū kui-kí ; chò lāu-pē ê lâng khoàⁿ-kı̀ⁿ kiám bô chin hoaⁿ-hí mah? Nā-sı̄ chit-hō koân lóng-sı̄ tùi lāu-bú teh kà-sı̄--ê , tı̄ cha̍p-kháu-chàu ū la̍k chhit kháu-chàu .

Phı̀-jū chhiⁿ-mı̂-lâng beh thài-ē ín-chhoā chhiⁿ-mı̂-lâng ah？ Só͘-í chò lāu bú nā bô tha̍k-chheh bêng gı̄-lí,beh thài-ē kà-sı̄ kiáⁿ-jı̂ mah？Chiū chhong-bêng tı̀-hūi ê tiōng-hu kap gû-chhún ê hū-jı̂n beh thài-ē saⁿ-hô ; sı̄ cháiⁿ-iūⁿ mah? In-ūi gû-chhún ê hū-jı̂n , i-ê sèng-chêng sı̄ chhin-chhiūⁿ gín-ná ,i-ê kiàn-sek iā sı̄ chhin-chhiūⁿ gín-ná ; kiù-chin bē-ē kap chhong-bêng tı̀-hūi ê tiōng-hu chò phoāⁿ-tit . Kiám-chhái tiōng-hu iu-būn ê sı̂ , chiū bē-ē saⁿ an-ùi ; he̍k-sı̄ tú-tio̍h khùn-khó͘ ê kéng-hóng , i bē-ē saⁿ khó͘-khǹg . In-ūi i só͘ iàu-kín--ê , to̍k-to̍k ē hiáu-tit chhēng súi-saⁿ chhah kim-khı̀ . Siat-sú khoàⁿ-kı̀ⁿ ū sin-khoán ê chhiú-khoân , chiū kiû i-ê tiōng-hu tio̍h kín-kín kā I bé ; nā iáu-boē kā i bé , i chiū chá-àm kiáu-jiáu chô-chak ,kàu kā i bé--lâi chiàⁿ hō͘ i-ê sim ē an-chēng . Taⁿ chit-hō ê hū-jı̂n-lâng beh thài-ē pang-chān ke-lāi ah!

Koh ū lâng kóng , Lú-jı̂n kı̄n tı̄ bûn-be̍k ,khióng kiaⁿ-liáu i loán-jio̍k bē tam-tng tāi-chı̀ . M̄-chai í-keng siū kà-sı̄ ,ē bêng-pe̍k gı̄-lí, chiū ke-lāi tek-khak ū chhù-sū ,lāi-thâu chheng-chēng,saⁿ-khò͘ iā phok-sò͘ , ta̍k-hāng an-pâi kàu chéng-chê, iā thang hoaⁿ-hí kap loān-cha̍p ê ke toā ū hun-pia̍t , kiám m̄ chin hó mah? Só͘-í, Siōng-tè khoàⁿ lâm-lú lóng bô koh-iūⁿ ; in-ūi lú-jı̂n ê lêng-hûn kap lâm-jı̂n ê lêng-hûn sı̄ saⁿ-tâng pó-poè , iā ài lâm-lú saⁿ-tâng bêng-pe̍k gı̄-lí . Taⁿ iúⁿ-chhı̄ cha-bó͘-kiáⁿ nā bô kà-sı̄--i , hō͘ i ū tı̀-hūi chhong-bêng ,chiām-chiām ke-thiⁿ châi-lêng ; nā bô án-ni , chiū i beh tùi tah-lo̍h tit-tio̍h éng-oa̍h ê lō͘ lâi kiâⁿ mah? Koh i siū lı̄-ek siū sún-hāi , kiám sı̄ chı̍t-ke niā-tiāⁿ mah?Taⁿ goān khoàⁿ chit-phiⁿ--ê tio̍h chı̄n-la̍t kà-sı̄ i-ê cha-bó͘ gín-ná , hō͘ i tùi sè-hàn ha̍k-sı̍p gı̄-lí , kàu tióng-sêng chiū chiâⁿ-chò bêng-lí ê hū-jı̂n-lâng .

(Tâi-lâm Hú-siâⁿ kàu-hoē-pò tē 90 koàn,1892 nı̂ 10 ge̍h)