Kám-in ê Sim

A-pek-lia̍p-hán khah-iâⁿ tùi-te̍k liáu-āu, chiū chiong só͘ cheng-toa̍t ê mı̍h cha̍p hūn thiu chı̍t hūn hiàn hō͘ Be̍k-ki-sé-tek, chò kèng-hōng ê lé-bu̍t. Che sı̄ hián-bêng A-pek-lia̍p-hán ū kám-in ê sim in-ūi Siōng-tè chō͘ i tek-sèng. Lâng nā chin chai Siōng-tè ê jı̂n-ài chū-jiân ài hiàn lé-gı̂ lâi piáu-bêng kám-siā ê khiân-ı̀. Tùi lâng teh hiàn lé-gı̂ ê khoán-sit, chiū thang khoàⁿ chhut hit ê lâng sı̍t-chāi jia̍t-sim teh ho̍k-sāi Siōng-tè á-bô.

Lūn A-pek-lia̍p-hán só͘ hiàn-ê khó-kham chò chèng Sı̀n-tô͘ chı̀n-hiàn ê kui-lē. Lūn Hi-pek-lâi lâng ê sán-gia̍p, he̍k-sı̄ tùi chhân-hn̂g, he̍k-sı̄ tùi cheng-seⁿ, he̍k-sı̄ tùi chiàn sèng só͘ tit-tio̍h châi-bu̍t, éng tio̍h seng cha̍p hūn ta̍h chı̍t hūn hiàn hō͘ Siōng-tè, āu-lâi chiong kı̂-û--ê lâi ka-tı̄ ēng. Lūn in ka-tı̄ ēng hit káu hūn kó-jiân thang tit-tio̍h toā hok-khı̀, in-ūi í-keng tāi-seng thiu cha̍p hūn chı̍t khí-lâi. Chāi in khiok siông-siông siūⁿ, nā bô án-ni seng thiu hit chı̍t hūn, tek-khak bē an-sim hióng-siū Siōng-tè sù in ê hok-khı̀. Ūi-tio̍h án-ni-seⁿ só͘-í in tio̍h siông-siông chhûn-pān khek-kí ê sim lâi pò-tap Siōng-tè.

Tio̍h khoàⁿ in só͘ chûn ê sim-ı̀ chiū chai Siōng-tè ū tùi-tiōng á-bô. Lâng nā chhut tùi sêng-sim ı̀-ài lâi hiàn, Siōng-tè chiah hoaⁿ-hí chiap-la̍p; siat-sú nā bô hit hō sı̍t-sim, sui-bóng ū hiàn iáu-kú Siōng-tè lia̍h-chò chhin-chhiūⁿ khang-khang. Lūn Hi-pek-lâi ê lâng chhin-kı̄n Siōng-tè lâi hiàn lé-mı̍h, chāi in lia̍h che chò ke̍k toā ê hok-khı̀; nā bē án-ni chò chiū éng lia̍h chò tē it lêng-jio̍k ê sū.

Taⁿ Hi-pek-lâi lâng ê hong-hoat thang chò lán chèng lâng ê bô͘-iūⁿ. Lán Ki-tok-tô͘ m̄ thang khah su in, tio̍h kı̀-tit Pó-lô bat hoan-hù Ko-lı̂m-to lâng kóng, Múi chhit jı̍t ê thâu chı̍t jı̍t lín chiah ê sûi lâng chiàu i só͘ siu jı̍p lâi chek-hē. Lūn lâng múi nı̂ ê tek-lı̄ lâi thiu cha̍p hūn chı̍t khiok sı̄ hó koà iông-ı̄ⁿ thàn ê hoat-tō͘. Sı̀n-tô͘ khiok bô hō͘ lu̍t-hoat pé-pa̍k; nā chhut tùi bián-kióng, bô sím-mı̍h kam-goān lâi hiàn lé-gı̂, Siōng-tè chiū bô hoaⁿ-hí kàm-la̍p. Chóng-sı̄ nā chin-chiàⁿ sêng-sim ho̍k-sāi Siōng-tè, chiū hit hō bián-kióng ê khek-kí ē pı̀ⁿ chò him-bō͘ ı̀-ài. Lâng nā chiong só͘ cheng-toa̍t ê mı̍h lâi saⁿ-pun, hit-tia̍p sim sı̄ hoaⁿ-hí; chóng-sı̄ nā chiong hit ê mı̍h ê siāng hó-ê lâi hiàn hō͘ Chú, sim iáu-kú khah hoaⁿ-hí.

Chiàu Hi-pek-lâi lâng só͘ thàn ê kui-lē, thang kà-sı̄ lán chai tē it toā ê hok-khı̀ sı̄ tùi sim ē kam-goān hiàn seⁿ-chhut-lâi. Sı̄ chhin-chhiūⁿ Má-lia̍p-ki kóng, “Tio̍h la̍p cha̍p hūn ê chı̍t hūn jı̍p tı̄ khò͘-pâng hō͘ tiàm tı̄ goá ê chhù tit-tio̍h hó mı̍h, chiong che lâi chhı̀ Goá, thèng-hāu Goá phoà-khui thiⁿ ê khiah, chiong ū chhun ê hok-khı̀ piàⁿ lo̍h-lâi hō͘ lí sǹg bē-tit liáu.”

(Tâi-lâm Kàu-hoē-pò tē 295 koàn, 1909 nı̂ 10 ge̍h)