Hō͘ Pa-pa Ê Lé-mı̍h
La̍k-nı̂ chêng ê chı̍t ê Sèng-tàn chêng-mê, goá siū chit-bū só͘ pek, put-tek-put lâu tı̄ kaⁿ-ga̍k lāi koè chit ê cheh-kı̂. Keh-jı̍t tı̄ chheng-chēng ê thàu-chá, goá lı̄-khui kaⁿ-ga̍k, kín-kín ài tńg-khı̀ goá ê chhù. Hit sı̂ goá ê tē-á lāi moá-moá ê lé-mı̍h－－chiū-sı̄ goá ūi goá ê cha-bó͘-kiáⁿ só͘ pı̄-pān ê. Sı̄ chı̍t ê chin hân-léng ê chá-khí, goá chiong goā-i ê liú-á liú khí-lâi, thang hông-pı̄ hân-léng chha̍k-kut ê léng-hong. Tng goá chhong-chhong bâng-bâng teh kiâⁿ ê sı̂, ná chún khoàⁿ-tio̍h chı̍t ê soè-soè ê iáⁿ bih tı̄ kaⁿ-ga̍k ê chhiūⁿ-piah-ē.
Goá thêng-kha, siông-sè chı̍t-ē khoàⁿ, tı̄ hia goá khoàⁿ-kı̀ⁿ chı̍t ê cha-bó͘ gín-ná, i ê sin-chiūⁿ só͘ chhēng sı̄ chin po̍h ê saⁿ, kha-nı̍h ê oê iā chin phoà. I siang-chhiú lám chı̍t pau mı̍h-kiāⁿ. Goá chin kı̂-koài i sı̄ chı̄-chūi, siáⁿ-sū tı̄ chiah hân-léng ê chheng-chá khiā tı̄ chia. Chóng-sı̄ goá ê ià-siān iâⁿ-koè goá tùi i ê hò͘ⁿ-kı̂-sim, goá chiū lı̄-khui i koh kín kiâⁿ, kiâⁿ bô hn̄g, goá kám-kak ū lâng teh tè goá, goá thêng kha, oa̍t-thâu koè-lâi, khoàⁿ-kı̀ⁿ hit-ê khó-lı̂n ê cha-bó͘ gín-ná.
“Lí siūⁿ ài sím-mı̍h?” Goá kín-kín mn̄g i.
“Sian-siⁿ, lí sı̄ m̄-sı̄ hit ê kaⁿ-ga̍k ê khàn-siú?”
“Sı̄, lí sı̄ chı̄-chūi? Lí siáⁿ-sū lı̄-khui chhù lâi chia?”
“Sian-siⁿ, chin sit-lé, goá bô chhù. Nn̄g lé-pài chêng goá ê lāu-bú sí khı̀, tı̄ i lı̂m-chiong ê sı̂ i kā goá kóng, pa-pa tı̄ kaⁿ-ga̍k! I koh kóng kiám-chhái pa-pa hiān-chāi siūⁿ ài kı̀ⁿ goá là ! Goá kiû lí, lí sı̄ m̄ sı̄ thang hō͘ goá jı̍p khı̀ kı̀ⁿ pa-pa? Kin-á-jı̍t sı̄ Sèng-tàn-cheh, goá siūⁿ ài sàng i lé-mı̍h.”
“Bô, ” goá chin chho͘-ló͘ ı̀n i kóng: “Lí thang thèng-hāu kàu kui-tēng hóng-būn hit jı̍t chiah lâi!” Kóng liáu goá koh hiòng-chêng kiâⁿ, chóng-sı̄ goá kiâⁿ bô kúi pō͘, goá hoat-kak ū lâng giú goá ê goā-i ēng khún-chhiat ê siaⁿ-im ǹg goá ai-kiû kóng: “Chhiáⁿ lí m̄-thang khı̀, ” goá koh thêng-kha, chù-ba̍k khoàⁿ hit ê pi-chhám ai-kiû ê bı̄n-iông, tı̄ chit-khoán pi-siong ê chêng-kéng, ū toā lia̍p ê ba̍k-sái tùi i ê ba̍k-chiu tih lo̍h--lâi.
“Sian-siⁿ, ” i kóng: “Siat-sú goá sı̄ lí ê kiáⁿ, iā lí ê kiáⁿ sit-lo̍h lāu-bú, i ê lāu-pē koh tı̄ kaⁿ-ga̍k, i bô ū thang khı̀ ê só͘-chāi, iā bô lâng thiàⁿ i, án-ni lí siūⁿ i oē him-bō͘ kı̀ⁿ i ê lāu-pē boē? Siat-sú che sı̄ chı̍t ê Sèng-tàn jı̍t, lí ê kiáⁿ lâi kı̀ⁿ lí, iā goá sı̄ chı̍t ê kaⁿ-ga̍k ê khàn-siú, siat-sú i iau-kiû goá iông-ún i the̍h lé-mı̍h jı̍p-khı̀ hō͘ i ê lāu-pē, lí siūⁿ goá oē tùi i kóng “Khó-í” boē?”
Tı̄ chit ê sı̂-chūn, goá ê nâ-âu-kńg tı̄ⁿ khí-lâi, goá kâm ba̍k-sái tùi i kóng: “Sı̄ là ! Soè-kiáⁿ, lí thang khı̀ kı̀ⁿ lí ê lāu-pē.” Goá chiū khan i ê chhiú, chin kín koh kiâⁿ tò-tńg kaⁿ-ga̍k, goá ê sim teh siūⁿ chhù-nı̍h ê cha-bó͘-kiáⁿ.
Tńg-lâi kàu pān-kong-sek í-āu, goá chhiáⁿ i kiâⁿ-kı̄n hoé-lô͘, koh kiò lâng khı̀ chhoā 37 hō ê hoān-lâng chhut-lâi. Tng hoān-lâng kiâⁿ jı̍p pān-kong-sek, khoàⁿ tio̍h i ê kiáⁿ tı̄ hia ê sı̂, i ê bı̄n chek-sı̂ hián-chhut chin siū-khı̀ ê khoán-sit. I ēng chho͘-ló͘ ê thài-tō͘, chiong i ê kiáⁿ sak chhut-khı̀, kóng: “Lí-lı̄, lí lâi chia chò sím-mı̍h? Lí sı̄ ài sím-mı̍h? Kín-kín tńg-khı̀ ma-ma hia!”
“Pa-pa, ” i ná kóng ná háu, “Ma-ma í-keng sí là ! Tı̄ nn̄g lé-pài chêng sí-khı̀, tng i sí ê sı̂, i hoan-hù goá tio̍h hó-hó chiàu-kò͘ sió-tı̄ Chùn-bêng, in-ūi lí chin thiàⁿ i, i koh kiò goá kā lí kóng i thiàⁿ lí, chóng-sı̄, Pa-pa…”Kóng kàu chia i háu kàu boē chhut-siaⁿ… “Téng lé-pài, Chùn-bêng iā sí-khı̀ là ! Hiān-chāi chí-ū chhun goá chı̍t-lâng, pa-pa, kin-á-jı̍t sı̄ Sèng-tàn-cheh, in-ūi lí chin thiàⁿ Chùn-bêng, goá siūⁿ lí kiám-chhái iā hi-bōng tùi i tit-tio̍h chı̍t hāng lé-mı̍h.”
I chiū tháu-khui chhiú-nı̍h ê chhiú-kin, the̍h chhut chı̍t kńg chin súi ê thâu-mn̂g lâi, tng i chiong chit ê mı̍h khǹg tı̄ lāu-pē ê chhiú ê sı̂, i kóng: “Che sı̄ in chiong Chùn-bêng bâi-chòng í-chêng, goá tùi i ê thâu-khak ka khí-lâi ê.”
Chit sı̂, 37 hō ê hoān-lâng toā-siaⁿ thı̂-khàu chhin-chhiūⁿ gín-ná, liân goá iā sı̄ án-ni teh háu, tı̄ chit chióng chêng-sû ê kek-tōng-ē, “37 hō” chiong i ê cha-bó͘-kiáⁿ lám tı̄ i ê hoâi-tiong.
Chit khoán sı̂n-sèng ê tiûⁿ-bı̄n, hō͘ goá m̄-káⁿ khoàⁿ, goá chiū khui mn̂g chhut-khı̀, lâu in nn̄g lâng tı̄ hia. Chı̍t tiám-cheng āu, goá koh tńg-lâi, 37 hō phō i ê kiáⁿ tı̄ hoé-lô͘ piⁿ, i ēng ià-siān ê ba̍k-chiu khoàⁿ goá kóng: “Sian-siⁿ, goá liân chı̍t chiam chı̂ⁿ iā bô.” I ná kóng ná thǹg i hit niá hoān-lâng chhēng ê goā-i. “Ūi-tio̍h Siōng-tè ê iân-kò͘, kiû lí hō͘ i chhēng chit niá saⁿ tńg-khı̀, m̄-thang hō͘ i chhēng chiah po̍h ê saⁿ chhut-khı̀! Goá kam-goān ūi lín chò jı̄m-hô ê kang-chok lâi pó͘-poê. Sian-siⁿ ! Kiû lí chún i chhēng chit niá goā-i.” Ba̍k-sái chhin-chhiūⁿ khe-chúi tùi chit ê ngē-sim ê ta-po͘ lâng ê bı̄n lâu lo̍h-lâi.
“Bô, ” goá kóng: “Lí thang chhēng lí ê saⁿ, goá boē oē hō͘ lí ê kiáⁿ án-ni tńg-khı̀. Goá beh chhoā I khı̀ goá ê chhù, hō͘ goá ê hū-jı̂n lâng thè i siūⁿ pān-hoat.”
“Goān Siōng-tè chiok-hok lí, ” chit ê hoān-lâng ēng thı̂-khàu liáu-āu chhám-chheh ê siaⁿ kā goá chiok-hok.
Goá chiong chit ê cha-bó͘ gín-ná chhoā tńg-khı̀, i kap goán saⁿ-kap toà kúi-nı̂ kú. Āu-lâi i sı̀n Chú, chiâⁿ-chò chı̍t ê Ki-tok-tô͘.
Koh keng-kè kúi-nı̂ āu ê chı̍t-jı̍t, goá kàu chı̍t ê chin chéng-kiat ê sió ka-têng thàm-hóng. Lí-lı̄ kap i ê lāu-pē －－hiān-chāi i í-keng sı̄ chı̍t ê têng-thâu-siⁿ ê sı̀n-tô͘. In-ūi i āu-lâi hoé-kái, siū tháu-pàng chhut kaⁿ, hiān-chāi i kap i ê cha-bó͘-kiáⁿ saⁿ-kap teh koè khoài-lo̍k ê Ki-tok-hoà ê seng-oa̍h. Che oân-choân sı̄ hit ê bı̂-sè ê Sèng-tàn lé-mı̍h phah-khui kong-ngē ê sim.
Sèng-tàn-cheh Ê Sı̂n-jiah
Kū-nı̂ Sèng-tàn-cheh ê sò͘ lé-pài chêng, ū chı̍t ê lé-pài chá-khí, goá ê lāu-pē m̄ ài khı̀ lé-pài, hit sı̂ goá siūⁿ i pèng bô ı̀-sù beh kiâⁿ tı̄ tūi-lo̍h ê lō͘, chóng-sı̄ hit pái chiū chiâⁿ-choè i tūi-lo̍h ê khai-sí, i chhin-chhiūⁿ lo̍h-kiā it-tı̍t lu lo̍h-khı̀, tı̍t-kàu Siōng-tè ēng goá lâi kiò-chhíⁿ i. Che sı̄ goá chı̍t-sı̀-lâng choè kı̂-biāu ê keng-giām.
Goán ê ka-têng sı̄ chı̍t ê hēng-hok ê Ki-tok-tô͘ ka-têng. Lāu-pē sı̄ chı̍t ê phó͘-thong ê siong-jı̂n, iā sı̄ chı̍t ê hó ê Ki-tok-tô͘, i siông-siông ài ūi Ki-tok chò kan-chèng, iā chin jia̍t-sim chham-ka kàu-hoē ê chū-hoē. Tong-jiân i ū chı̍t ê chin toā ê iá-sim beh kiàn-siat i ê sū-gia̍p, chí ū goán m̄ chai hit ê iá-sim sı̄ joā toā, nā chai goán chiū oē khah ūi i kı̂-tó. Láu-sı̍t kóng, goá lóng m̄-bat ūi i khoà-lū, goá siūⁿ i sı̄ chin hó ê lâng, só͘-í bô khiàm-ēng goán thè i kı̂-tó.
Ū chı̍t-jı̍t, tı̄ Sèng-tàn-cheh ê 2 ge̍h-jı̍t chêng, lāu-pē jı̍p lâi tû-pâng. Goán í-keng chia̍h chá-tǹg liáu, chún-pı̄ beh khı̀ kàu-hoē. Chóng-sı̄ i chhēng hit su beh khı̀ phah kiû ê saⁿ kóng. “Kin-á-jı̍t lín tio̍h iông-ún goá bô khı̀ pài-tn̂g, in-ūi goá kin-á-jı̍t ū iok-hoē, chit-ê hoē tùi tı̄ goá ê sū-gia̍p sı̄ chin ū ǹg-bāng.”
Goá siūⁿ goá ê lāu-bú it-tēng tı̄ i ê bı̄n ū chin kan-khó͘ ê piáu-chêng, goá ê lāu-pē chiū kā i lám teh, soè-siaⁿ tùi i kóng “m̄-bián khoà-lū, Má-ka-lí, goá m̄ sı̄ beh siông-siông án-ni, chit ê hoē(club)kàu tang-thiⁿ chiū beh kiat-sok, kin-á-jı̍t goá sı̄ siū lâ-ní-sūn sian-siⁿ ê chiau-thāi, siat-sú goá nā tit-tio̍h i ê hoaⁿ-hí, i oē kā goá bé chin choē mı̍h. Lí chai nā sı̄ án-ni, lán sı̄ oē thang tit joā choē lı̄-ek, lán chiū beh toā sêng-kong.”
I chiong chū-tōng-chhia ê só-sı̂ the̍h hō͘ goá kóng: “Poē-tí, kin-á-jit lí sái-chhia, in-ūi goá bô beh khı̀.”
Goán í-keng chún-pı̄ hó, chiū sái-chhia khı̀ lé-pài-tn̂g. Goán lóng kám-kak chin kan-khó͘, goán boē thang sióng-siōng lāu-pē bô lâi lé-pài, hoán-tńg tı̄ lé-pài-jı̍t beh khı̀ phah Ko-ní-hu kiû(golf) －cháiⁿ-iūⁿ oē án-ni! Kàu pài-tn̂g, bo̍k-su mn̄g lāu-bú, lāu-pē cháiⁿ-iūⁿ bô lâi, lāu-bú chí-ū ı̀n kóng “Sū-gia̍p siōng” chiū kiâⁿ soá khı̀ pa̍t-ūi, bián-tit i ê ba̍k-sái tih lo̍h lâi.
Lí kiám-chhái m̄ káⁿ siong-sı̀n lāu-pē tùi hit pái chiū bô koh kàu lé-pài-tn̂g －tı̍t-kàu Chú Iâ-so͘ kiù i chhut i ê lô-bāng. Í-āu i siông-siông tı̄ lé-pài-jı̍t kap Iā-ní-sūn sian-siⁿ ū iok-hoē, nā bô chiū ū pa̍t ê lí-iû bô ài khı̀ lé-pài.
Goá boē thang biâu-siá goán ê sim ê thòng-khó͘ sı̄ joā toā. Goán tùi án-ni siông-siông kūi-lo̍h ūi i kı̂-tó. Bo̍k-su siūⁿ ài bán-hoê i, lâi khó͘-khǹg i, chóng-sı̄ lāu-pē hoán-tńg siū-khı̀, bô ài koh kı̀ⁿ bo̍k-su. Goán chí-ū pek-chhiat kı̂-tó, koh chı̄n goán só͘ oē hō͘ lāu-bú khoài-lo̍k.
Goán ê kàu-hoē tı̄ Sèng-tàn-cheh lóng ū te̍k-pia̍t ián ke̍k, chit pái goá iā siū kéng beh chò Iok-sek. Goá kı̀-tit goá ê a-kū ū chı̍t niá saⁿ thang hō͘ goá chhēng chò Iok-sek, goá chiū tùi i chioh. Hit niá saⁿ sı̄ pe̍h-sek ê, goá chhēng khí-lâi chin tn̂g, kiám-chhái hō͘ thiⁿ-sài chhēng sı̄ khah ha̍h, chóng-sı̄ goá siūⁿ pau thâu-kin chiah chhēng hit niá chiū thang chò Iok-sek.
Sèng-tàn-cheh ê sò͘-jı̍t chêng, goá chhiáⁿ lāu-pē tio̍h kap goán khı̀ chham-ka Sèng-tàn ê khèng-chiok hoē, chóng-sı̄ i kóng kap Iâ-ní-sūn sian-siⁿ í-keng ū iok-hoē. Iâ-ní-sūn sian-siⁿ siông-siông hō͘ lāu-pē toā ê bēng-lēng, lāu-pē chin chiàⁿ ho̍k-chiông i. Goán chai-iáⁿ i só͘ beh hù ê hoē pèng m̄ sı̄ hó ê. Sèng-tàn boán-hoē, sı̄ chhin-chhiūⁿ múi nı̂ tı̄ chin choē ki-koan teh kú-hêng ê bô Sèng-tàn ı̀-gı̄ ê boán-hoē.
Taⁿ Sèng-tàn mê kàu là ! Goán ê sian-siⁿ kiò goán tio̍h tı̄ chhù-nı̍h chhēng piáu-ián ê saⁿ chhēng hō͘ piān, in-ūi pài-tn̂g bô só͘-chāi thang hō͘ hiah choē lâng oāⁿ saⁿ.
Goá chiū chhēng a-kū hit niá chin tn̂g ê saⁿ, thèng-hāu goá ê pêng-iú lâi chio goá khı̀. Tng goán sái-chhia keng-koè Iâ-ní-sūn kong-si ê sı̂, í-keng chin àm. Hit sı̂ goá khoàⁿ tio̍h lāu-pē ê chhia tı̄ mn̂g-kháu, goá chek-sı̂ siūⁿ-tio̍h “Cháiⁿ-iūⁿ goá m̄ jı̍p-lâi khı̀ chio lāu-pē khı̀ pài-tn̂g? Kiám-chhái goá chit ê sı̂-chūn kā I chhiáⁿ, i oē kap goán khı̀.”
Goá chiū kiò goá ê pêng-iú thêng-chhia, goá thǹg goá hit niá toā-niá saⁿ, beh lo̍h-khı̀ ê sı̂ lāu-bú iô-thâu piáu-sı̄ bô ǹg-bāng. Goá chai-iáⁿ lāu-pē tı̄ tá-lo̍h chı̍t-keng, in-ūi i bat chhoā goá khı̀ nn̄g-pái, mn̂g sı̄ khui-khui, goá chiū jı̍p khı̀ hit ê àm-àm bô kng ê toā thiaⁿ, chù-ı̀ thiaⁿ im-ga̍k ê siaⁿ sı̄ tùi tó-ūi lâi. Goá thiaⁿ-tio̍h chhiùⁿ-koa kap ga̍k-khı̀ ê siaⁿ ê sı̂, goá chiū kiâⁿ kūn ū siaⁿ ê só͘-chāi. Goá siūⁿ ài pài-thok chı̍t ê lâng kiò goá ê lāu-pē chhut-lâi, chóng-sı̄ piⁿ-á bô lâng, só͘-í goá chiū kiâⁿ oá koaiⁿ teh ê mn̂g, thau khui chı̍t-phāng, beh khoàⁿ lāi-bı̄n ê chêng-hêng.
Goá tiām-tiām khui mn̂g, bô lâng oē khoàⁿ tio̍h goá, in-ūi tiān-hoé bô chin kng, goá khiā ê só͘-chāi sı̄ àm-àm. Tùi hia goá oē-thang khoàⁿ tio̍h goá ê lāu-pē. Tı̄ lāi-bı̄n ū chı̍t-tè tn̂g ê toh-á, toh-téng ū chiú-kan kap choē-choē chia̍h-mı̍h, ta̍k ê lâng toā-siaⁿ teh hoah, teh thiàu iā teh lim.
Jiân-āu goá chin chheng-chhó khoàⁿ tio̍h goá ê lāu-pē ê bı̄n, goá sûi-sı̂ bêng-pe̍k jı̍p-khı̀ chio i iā sı̄ bô chhái-kang. I tı̄ hia kiâⁿ lâi kiâⁿ khı̀, toā siaⁿ teh hoah. Hit sı̂ Iâ-ní-sūn sian-siⁿ kiò chı̍t ê lâng the̍h hip-siōng-ki beh lâi hip-siōng, choân-thé hip liáu-āu, Iâ-ní-sūn sian-siⁿ kiò goá ê lāu-pē kap lēng-goā kúi ê lâng kiâⁿ lâi khiā tı̄ goá ê mn̂g-chêng beh lēng-goā hip chı̍t-tiuⁿ.
Goá tio̍h toā-kiaⁿ, siūⁿ ài cháu chhut-lâi, chóng-sı̄ goá khoàⁿ in bô hoat-hiān tio̍h goá bih tı̄ mn̂g-āu. Goá koh khoàⁿ in ûi-lûi tı̄ tn̂g-toh, Iâ-ní-sūn sian-siⁿ ê chhiú moa tı̄ goá ê lāu-pē ê keng-thâu, chı̍t-chhiú the̍h chiú-poe hoah kóng “Lim chı̍t poe! Ūi Chú-jı̍t-o̍h kàu-oân Lí Cha-lí lim chı̍t poe!!”
Goá thiaⁿ in liām lāu-pē ê miâ, goá ê sim kan-khó͘ kàu beh piak-phoà. Goá hiám-hiám toā-siaⁿ hoah chhut-lâi, goá chı̍t-sı̀-lâng boē bat hiah-nı̍h kan-khó͘ sim khoàⁿ goá ê lāu-pē. Goá lı̄-khui hit ê só͘-chāi ê sı̂, thiaⁿ tio̍h in toā-siaⁿ teh hoah kóng kín-kín sé goân-pán khoàⁿ só͘ hip ê cháiⁿ-iūⁿ.
Goá tò-tńg lâi chhia-lāi, bô kā lāu-bú kóng goá só͘ khoàⁿ-kı̀ⁿ ê, goá m̄ ài i sit-lo̍h Sèng-tàn-mê ê khoài-lo̍k. Goá chí-ū kā i kóng bô hoat-tō͘ thang chio lāu-pē chhut-lâi. Goán kàu pài-tn̂g, goá chhut-ián só͘ tam-jı̄m ê chiat-bo̍k, Siōng-tè ê thiàⁿ-thàng, chhe I ê to̍k-siⁿ Kiáⁿ lâi sè-kan beh chín-kiù chhin-chhiūⁿ goá chit-khoán choē-jı̂n, chit khoán ê hok-im sù hō͘ goá sı̀n ê ióng-kám. Goá chai-iáⁿ Chú í-keng chín-kiù goá, iā goá sı̄ sio̍k tı̄ I ê, goá khak-sı̀n I oē ūi goán khui chı̍t-tiâu lō͘. Sui-jiân ū chit khoán ê ǹg-bāng, iáu-kú tı̄ goán beh tńg-lâi ê lō͘-chiūⁿ, goá chin khoà-lū, lāu-pē oē chiú-chùi tńg-lâi.
Goán tńg-lâi kàu chhù ê sı̂, khoàⁿ-tio̍h lāu-pē ê chhia í-keng tı̄ chhia-khò͘. Goán jı̍p chhù-lāi ê sı̂, goán chin tio̍h-kiaⁿ, hoat-hiān tio̍h lāu-pē pèng bô chiú-chùi, i tı̄ kheh-thiaⁿ kiâⁿ-lâi kiâⁿ-khı̀, chhùi-lāi teh liām. “Boán-hoē hù-liáu cháiⁿ-iūⁿ?” Goá ê lāu-bú soè-siaⁿ mn̄g i.
Lāu-pē bô ı̀n, iáu-kú kè-sio̍k tı̄ thiaⁿ-lāi kiâⁿ-lâi kiâⁿ-khı̀, i ê chńg-thâu-á teh so i ê thâu-khak. Jiân-āu i tùi i ê lak-tē-á lāi the̍h chhut chı̍t-tiuⁿ siōng, chù-sı̂n khoàⁿ tiap-á-kú, chiū koh kiâⁿ-lâi kiâⁿ-khı̀. I ka-kı̄ án-ni liām kóng: “Goá ê kiáⁿ tı̄ hia, goá kéng-jiân m̄-chai! Goá ê kiáⁿ tı̄ hia, goá kéng-jiân m̄-chai!!”
Choè-āu goán chiah tùi i thiaⁿ sū-chêng ê keng-kè. “Goá chha-put-to boē kı̀-tit hit sı̂ goá sı̄ teh choè sím-mı̍h.” I ná kóng ná beh háu ê khoán-sit. “Goá chí-ū oē-kı̀ tit Iâ-ní-sūn kiò goá kap te̍k-pia̍t kúi ê pêng-iú lēng-goā kap I hip-siōng, chóng-sı̄, tng in soé siōng khí-lâi ê sı̂…”.
I the̍h hit tiuⁿ siōng chhut-lâi hō͘ goán khoàⁿ. Tı̄ in sı̀ ê lâng ê āu-bı̄n, chiū-sı̄ tı̄ goá lāu-pē ê āu-bı̄n, ū goá hit ê choè thòng-sim ê ê piáu-chêng ê siōng hip tı̄ hia.
“Goá boē thang siong-sı̀n hit ê sı̄ Poē-tí.”Goá ê lāu-pē soat-bêng kóng “Che chhin-chhiūⁿ sı̄ chı̍t ê sı̂n-jiah, chit-tiuⁿ siōng hō͘ goá chek-sı̂ chhíⁿ-gō͘ khí-lâi. Goá só͘ siūⁿ-tio̍h ê sı̄ goá tio̍h kín-kín kap Chú Iâ-so͘ hó-sè, nā lı̄-khui I ê lō͘ goá oē hō͘ goá ê kiáⁿ-jı̂ kiàn-siàu. Só͘-í goá chiū chek-sı̂ kap Iâ-ní-sūn saⁿ-sı̂, goá kā i kóng, i thang chiong i ê bēng-lēng hō͘ pa̍t-lâng, thang chio pa̍t-lâng khı̀ lim, thang kap pa̍t-lâng tı̄ lé-pài-jı̍t khı̀ phah Ko-ní-hu-kiû. Goá í-keng ià là ! Chit-tiuⁿ siōng phah-soàⁿ hit ê boán-hoē, chha-put-to chit-poàⁿ ê lâng kap goá chò-hoé lı̄-khui hit ê boán-hoē. Goá siūⁿ in iā oē siūⁿ tio̍h in ê kiáⁿ-jı̂.” Kàu chit sı̂ goá kóng, “Pa, goá ài kā lí soat-bêng siáⁿ-sū goá tı̄ hia.”
“Kiáⁿ ah! M̄-bián chit-chūn soat-bêng, chit sı̂ goá ài múi chı̍t ê ūi goá kı̂-tó.” Goá iáu m̄-bat chham-ka hiah-nı̍h khoài-lo̍k ê kı̂-tó-hoē !
Í-āu tng goá ǹg lāu-pē soat-bêng goá cháiⁿ-iūⁿ khı̀ kàu tı̄ hia ê sū, lāu-pē kóng: “Kiáⁿ! Goá bô tui-kiû lí cháiⁿ-iūⁿ khı̀ tı̄ hia, che sı̄ Chú ēng kı̂-biāu ê hong-hoat, hō͘ goá chai-iáⁿ I tı̄ goá ê sin-piⁿ teh koan-chhat it-chhè goá ê só͘ chò. Goá beh éng-oán kı̀-tit chit ê kà-sı̄.”
Chhin-ài ê pêng-iú, tng che Sèng-tàn-cheh koh chı̍t-pái lı̂m-kàu, tng goán koh chı̍t-pái chò-hoé ê sı̂, goá boē thang boē-kı̀-tit kám-siā Siōng-tè tı̄ Sèng-tàn-cheh só͘ kiâⁿ ê sı̂n-jiah.
