Hō͘ Goá Ê Seng-gâi Tit-tio̍h Kái-piàn Ê Chı̍t Sùn-kan
Sı̂-kan í-keng chin àm, sı̀-bı̄n chēng-chēng, bān-mı̍h lóng jı̍p tı̄ in ê an-hioh, chóng-sı̄ goá iáu tı̄ goá ê chheh-pâng lāi, chù-sı̂n teh tha̍k Ta̍t-ní-bûn ê chı̀n-hoà-lūn. I ê bû-sı̂n-lūn í-keng chiàm-niá goá ê sim, sui-jiân goá sı̄ chı̍t ê sı̂n-ha̍k-seng, sui-jiân goá bat tùi lı̂m-chiong ê toā-chí iok-sok beh choè bo̍k-su, i iā chiong só͘ khiām ê chı̂ⁿ the̍h hō͘ goá, chóng-sı̄ tùi goá tha̍k tio̍h chit pún chheh, goá ê sı̀n-gióng chiū hoat-seng chin toā ê tōng-iâu! Goá tı̂m-su, goá be̍k-sióng, chiū tı̄ sim-lāi koat-tēng tùi ha̍k-kı̂ m̄ ài tò khı̀ tha̍k Sı̂n-ha̍k. Siōng-tè ê chûn-chāi tùi goá í-keng sı̄ chı̍t ê gı̂-būn.
Hut-jiân goá thiaⁿ tio̍h ū lâng teh phah-mn̂g ê siaⁿ, goá khui-mn̂g khoàⁿ tio̍h chhù-piⁿ ê Pe̍k-lông hu-jı̂n kia̍h teng-hoé khiā tı̄ hia.
I in-ūi kap goá siāng-seⁿ, só͘-í sı̄ chhin-kau ê pêng-iú. I khui-chhùi chiū kóng:
“Iok-hān, chhiáⁿ lí chit sı̂ kap goá lâi khı̀ goá ê chhù, goá ê tiōng-hu chin gûi-kip, ài lí lâi, ” I ê siaⁿ chin kip.
“Ài goá khı̀? Lí eng-kai khı̀ chhiáⁿ bo̍k-su!” Goá kā i the-sı̂.
“Ah! Iok-hān lí sı̄ i ê hó pêng-iú, i ài lí khı̀.”I kian-koat án-ni kóng.
Goá chiū ko͘-put-chiong the̍h goá ê Sèng-keng kap i khı̀. Lō͘ tiong goá lóng bô kóng-oē, in-ūi goá chin hoân-ló chit ê bô sı̀n-gióng ê lâng, beh cháiⁿ-iūⁿ oē thang an-ùi lı̂m-chiong ê lâng.
Jı̍p i ê chhù, khoàⁿ tio̍h Pe̍k-lông tı̄ bı̂n-chhn̂g nı̍h, i chheⁿ-pe̍h ê bı̄n, hō͘ goá liân-sióng kàu i ê sí. I khan goá ê chhiú, soè-siaⁿ tùi goá kóng, “Iok-hān, goá chai goá í-keng kiâⁿ kàu tı̄ sí-ı̀m ê soaⁿ-kok, chóng-sı̄ goá ê sim bô piān, goá bô ū pêng-an, chí-ū kiaⁿ-hiâⁿ, goá siūⁿ tio̍h koè-khı̀ goá bô sı̍t-chāi thiàⁿ goá ê hū-jı̂n-lâng, iā bô thiàⁿ Siōng-tè, tı̄ ka-têng sı̄ hō͘ lâng thó-iàm ê thó͘-lâng, goá ê choē chiah tāng, goá beh cháiⁿ-iūⁿ ah!” Goá hian-khui Sèng-keng tha̍k Iok-hān 14 chiuⁿ: “Lín ê sim bo̍h-tit peh-pa̍k, lín tio̍h sı̀n Siōng-tè, iā tio̍h sı̀n Goá……” I Ko-lı̂m-to 15 chiuⁿ 55 chat: “Sí ah, lí ê khah-iâⁿ tı̄ tá-lo̍h? Sí ah, lí ê lı̄-hāi tı̄ tá-lo̍h? Sí ê lı̄-hāi sı̄ choē, choē ê koân-sè sı̄ lu̍t-hoat, chóng-sı̄ kám-siā Siōng-tè I hō͘ lán tùi lán ê Chú Iâ-so͘ Ki-tok tit-tio̍h khah-iâⁿ”. I Iok-hān 1 chiuⁿ 9 chat: “Lán nā jı̄n lán ê choē, Siōng-tè sı̄ chin-sı̍t kong-gı̄, beh sià-bián lán ê choē, soé-tû lán lóng-chóng ê put-gı̄”. I thiaⁿ liáu chin siū an-ùi, ài goá chiong Sèng-keng chioh i, soà chò kı̀-hō tı̄ só͘ tha̍k ê só͘-chāi. Goá chiong Sèng-keng the̍h hō͘ i liáu, chiū tò-khı̀ khùn. Chóng-sı̄ khùn boē khı̀. Goá siūⁿ lâng ê oa̍h-miā nā kó-jiân sí chiū soah, án-ni jı̂n-seng ū sím-mı̍h kè-ta̍t? Goá siūⁿ nā chin-chiàⁿ bô lêng-hûn ê tit-kiù, chí-ū kúi-cha̍p nı̂ ê jio̍k-thé seng-oa̍h, án-ni ū siáⁿ lō͘-ēng?
Keh chá-khí Pe̍k-lông hu-jı̂n lâi kā goá kóng, i ê tiōng-hu chin an-jiân koè-sı̀, tı̄ ûi-giân tiong kóng ài goá chú-chhı̂ i ê chòng-sek. Goá thiaⁿ liáu chin tio̍h-kiaⁿ, chiū mn̄g kóng “Ài goá! Ài goá chú-chhı̂ i ê chòng-sek? ” Goá khoàⁿ i tı̀m-thâu, koh lâu ba̍k-sái. I ê iau-kiû tùi tı̄ hiān-chāi ê goá bô m̄ sı̄ chı̍t ê tāng-tàⁿ, in-ūi goá ê sı̀n-gióng í-keng chhin-chhiūⁿ soa-téng ê thah lóng-chóng tó-hoāi lah! “Iok-hān, lí eng-kai chin hoaⁿ-hí chun-chiàu pêng-iú ê ûi-giân lâi chò chit ê kang. Chhiáⁿ lí m̄-thang the-sı̂, sı̂-kan sı̄ 2 tiám.” I bô thèng-hāu goá ê tah-èng, kóng liáu chiū tńg-khı̀. Goá be̍k-sióng i ê poè-iáⁿ, sim-thâu ū kóng boē chhut ê pi-siong.
Hit ē-po͘ goá kèng-jiân khiā tı̄ tâi-téng, tı̄ goá ê bı̄n-chêng ū Pe̍k-lông ê ûi-thé, goá àⁿ-thâu khoàⁿ ê sı̂, koaⁿ-chhâ téng só͘ siá ê miâ hō͘ goá tio̍h chı̍t-kiaⁿ. “Iok-hān Pe̍k-lông” goá ê miâ! Cháiⁿ-iūⁿ goá ê miâ siá tı̄ koaⁿ-chhâ ê téng-bı̄n? Sûi-sı̂ goá ê ba̍k-chiu ian-n̄g, goá bô khoàⁿ-kı̀ⁿ pa̍t-lâng, chí-ū khoàⁿ-tio̍h goá tı̄ koaⁿ-chhâ lāi. “Iok-hān Pe̍k-lông sí lah! Che sı̄ goá ê chòng-sek.” Goá ê sim-lāi ū siaⁿ án-ni kā goá kóng, sò͘-hun cheng kú goá khiā-teh, boē chhut-siaⁿ, tı̄ goá ê náu-hái lāi chí ū siūⁿ tio̍h goá－－koè-khı̀ ê goá, hiān-chāi ê goá－－. Ah! Goá kiám m̄ sı̄ chı̍t ê sui-jiân oa̍h-teh, khiok chhin-chhiūⁿ sí ê toā tōng-bu̍t mah? Goá ê sim siū Mô͘-kúi chhiúⁿ-toa̍t khı̀ lah! Goá siūⁿ beh lı̄-khui Siōng-tè.Ah! Goá sı̍t-chāi chin khó-lı̂n, Siōng-tè kin-á-jı̍t iáu thiàⁿ goá, án-ni kiò-chhíⁿ goá, hō͘ goá ūi-tio̍h ka-kı̄ chò chòng-sek, bô m̄ sı̄ ài goá chiong kū-lâng bâi-chòng, chò sin chhòng-chō ê lâng mah?
Tng goá siūⁿ tio̍h goá sı̄ chú-chhı̂ ê lâng, goá iáu-boē kóng sím-mı̍h ê sı̂, goá hoat-hiān tâi-ē ê lâng lóng chù-ba̍k tı̄ goá, ū chhı̄-bú chhı̄-chhū ê siaⁿ. Goá bián-kióng khui chhùi kóng an-ùi ê tō-lí, kı̂-sı̍t goá m̄ chai ka-kı̄ teh kóng sím-mı̍h, tı̄ goá ê náu-lāi ū sı̂ hoê-sióng tı̂m-su. Chòng-sek soah, Pe̍k-lông hu-jı̂n kā goá kóng, i iáu-boē bat thiaⁿ-tio̍h chiah-nı̍h siū an-ùi ê tō-lí, thian-tông ê chûn-chāi sı̄ i siū an-ùi ê kin-kù. I soeh-siā soah, kóng khí koaⁿ-chhâ téng ê miâ ū chháu-tú-khám ê chhò-gō͘. I soat-bêng: “Pek-lông chiong lí ê Sèng-keng khǹg tı̄ i ê heng-chêng, jı̍p-bo̍k ê sı̂, pēⁿ-ı̄ⁿ ê lâng chiàu Sèng-keng lāi ê chhiam miâ siá chhut, tı̀-kàu ū chiah sit-lé ê chhò-gō͘.” Goá sim-lāi àm-chı̄ⁿ kám-siā Siōng-tè só͘ an-pâi chit ê chhò-gō͘, hō͘ goá tùi chit ê siū kiò-chhíⁿ!
Tò-lâi chhù-nı̍h, goá chiong Mô͘-kúi ê chheh sio khı̀, koat-sim beh toè Chú. Taⁿ goá í-keng sı̄ chı̍t ê kàu-hoē ê bo̍k-su, goá í-keng ū koh ūi-tio̍h choē-choē lâng chú-chhı̂ chòng-sek, múi pái hit ê kái-piàn goá ê chı̍t-sùn-kan ê sū, lóng oē koh phû tı̄ goá ê sim-tiong. Goá hiān-chāi oē thang koh khah toā siaⁿ tha̍k: “Sí ah! Lí ê khah-iâⁿ tı̄ tá-lo̍h? Lí ê lı̄-hāi tı̄ tá-lo̍h ah?” (John Bown)
Pa-lia̍p-pa
Tang-pêng ê thiⁿ tú-chiah phú-kng, Iâ-lō͘-sat-léng siâⁿ iáu tı̄ an-chēng tiong, Kok-kok-thaⁿ soaⁿ-téng ê saⁿ ki sı̍p-jı̄-kè, iáu chhāi tı̄ hia hián-chhut chhiⁿ-chhı̀n. Tùi hit pêng hn̄g-hn̄g ê sió-lō͘ ū chı̍t ê tiong-liân ê lâm-chú kiâⁿ lâi. Tùi i kiâⁿ-lō͘ ê pō͘-tiāu khoàⁿ lâi, thang chai i sı̄ chı̍t ê thé-keh kiat-sı̍t, koàn-sı̀ kiâⁿ soaⁿ-lō͘ ê lâng. I sūn hit tiâu sió-lō͘ peh-chiūⁿ soaⁿ-téng, tı̄ hit saⁿ-ki sı̍p-jı̄-kè kha kiâⁿ-lâi kiâⁿ khı̀, sim-lāi ná-chún ū bû-hān ê kám-sióng. I m̄ sı̄ pa̍t-lâng, goân-lâi chiū-sı̄ hit ê chhut-miâ ê kiông-tō---Pa-lia̍p-pa.
I tı̄ tiong-ng hit ki sı̍p-jı̄-kè chêng khiā tiâu, chū-giân chū-gú kóng, “Chia chiū-sı̄ in sòng-sit sı̀ⁿ-miā ê só͘-chāi! Che sı̄ Lô-má lâng choè chân-jím, choè thòng-khó͘ ê sí-hêng! Chit ê sí pún-lâi sı̄ goá ê!” I oa̍t-thâu khoàⁿ tò-pêng ê sı̍p-jı̄-kè kóng: “Tí-má sı̄ tèng tı̄ chit ki, i sı̄ goá tı̄ Iâ-lı̄-ko lō͘-chiūⁿ kú-kú-ê tông-chı̀.”
I koh oa̍t koè chiàⁿ-pêng ê sı̍p-jı̄-kè kóng: “Ah! Tí-su-má-su sı̄ tèng tı̄ chit ki! Khó-lı̂n ê Tí-su-má-su! I iáu nı̂-khin chhin-chhiūⁿ gín-ná, chiū siū ín-iú jı̍p bê-lō͘! I kàu Iâ-lı̄-ko lō͘-chiūⁿ kéng goá choè i ê thâu-ba̍k. Goá pún eng-kai chhe i tńg-khı̀ Ka-pek-lông i ka-kı̄ ê chhù, chóng-sı̄ i khiok ài koè chit-chióng chhiúⁿ-kiap ê iá-goā seng-oa̍h. Hiān-chāi i nı̂-khin ê sı̀ⁿ-miā kèng-jiân kiat-sok tı̄ chit ê thang kiaⁿ ê sı̍p-jı̄-kè téng.”
Oa̍t-thâu koè-lâi, i khoàⁿ tiong-ng hit ki sı̍p-jı̄-kè, koh chhut-siaⁿ kóng: “Tı̄ chit ê sı̍p-jı̄-kè téng, in chiong hit ê nı̂-khin ê Ka-lı̄-lı̄ lâng tèng-sí. Chit ki sı̍p-jı̄-kè pún-lâi sı̄ goá ê, nā m̄ sı̄ hiah-ê hoat-kông ê kûn-chiòng kian-chhı̂ beh tèng-sí I, pàng goá chū-iû, hiān-chāi goá í-keng kap goá ê tâng-phoāⁿ chı̍t-iūⁿ là!Hit sı̂ goá sui-jiân tı̄ kaⁿ-ga̍k lāi, chóng-sı̄ ‘Tèng I tı̄ sı̍p-jı̄-kè!Tèng I tı̄ sı̍p-jı̄-kè, ’chit ê hoah-hiàm ê siaⁿ iā thoân-jı̍p goá ê hı̄-á. Taⁿ i sí là, goá ê tâng-phoāⁿ iā sí là!Iā goá tit-tio̍h tháu-pàng.”
Tāi-khài í-keng khiā kú là, i chiū chē tı̄ chı̍t-tè chio̍h-thâu-téng, àⁿ-thâu teh tı̂m-su, ná-chún teh hoê-e̍k i koè-khı̀ poàⁿ seng-gâi ê keng-le̍k. Chit-sı̂ thiⁿ-kng là, chóng-sı̄ Iâ-lō͘-sat-léng ê ke-lō͘, iáu chin chió lâng.
“Hiaⁿ-tı̄ lí tı̄ chia mah? Sím-mı̍h sū hō͘ lí chiah-nı̍h chheng-chá kàu Kok-kok-thaⁿ soaⁿ-téng －－In tèng sı̍p-jı̄-kè ê só͘-chāi?”
Pa-lia̍p-pa chí-ū àⁿ-thâu tı̂m-su, m̄-chai siáⁿ-sı̂ chı̍t ê chheng-liân iā peh-chiūⁿ soaⁿ-téng, só͘-í hō͘ i ê siaⁿ tio̍h-kiaⁿ. Put-kò āu-lâi khoàⁿ hit ê chheng-liân ê iông-māu chin un-jiû, koh chheng-ho͘ i choè hiaⁿ-tı̄ chiah an-sim, chiū kín ı̀n kóng: “Put-kò sı̄ lâi khoàⁿ-khoàⁿ lè!”
“Tong-sı̂ ê chêng-kéng sı̍t-chāi chhiⁿ-chhám thang kiaⁿ, hit sı̂ lí tı̄ chia mah?” Hit ê chheng-liân mn̄g.
Pa-lia̍p-pa kóng: “Goá bô tı̄ chia, nā sı̄ goá ê pêng-iú tı̄ chia!” I ê ı̀-sù sı̄ chí sı̍p-jı̄-kè téng hit nn̄g ê.
“Hit nn̄g ê kiông-tō, chı̍t ê iáu chin nı̂-khin, in siū phoàⁿ sí-hêng goá sı̄ oē bêng-pe̍k. Chóng-sı̄ hit ê Ka-lı̄-lı̄ lâng Iâ-so͘ siū phoàⁿ sí-hêng, goá chiū boē bêng-pe̍k! Tùi I sı̄ bô lí-iû ê. I chiah jı̂n-chû, tùi lâng moá ū un-hūi, siông-siông kiâⁿ hó sū, pang-chān lâng. I chheng Siōng-tè choè I ê Pē, bô lí-iû tēng I sí-choē. Chóng-sı̄ koaⁿ-hú kèng-jiân án-ni chò. Ah! In lêng-goān pàng hit ê kiông-tō Pa-lia̍p-pa! Bô chhò, i chiū sí tı̄ Pa-lia̍p-pa eng-kai sí ê sı̍p-jı̄-kè téng!”
Pa-lia̍p-pa tı̀m-thâu kóng: “Sı̄ là! Hit ki sı̍p-jı̄-kè eng-kai sı̄ tèng Pa-lia̍p-pa, án-ni i chiū thang kap pa̍t ê tâng-phoāⁿ chò-hoé sí-khı̀.”
Hit ê chheng-liân àⁿ-thâu tı̄ hia kiâⁿ-lâi kiâⁿ-khı̀, sim-lāi su-siúⁿ chiah-ê sū ê keng-kè.
“Hiaⁿ-tı̄, lí ún-tàng bô khoàⁿ koè chiah toā ê ióng-khı̀, ” i tùi Pa-lia̍p-pa kóng: “Lí ún-tàng m̄-bat khoàⁿ koè chiah toā ê sià-bián ! Ah, tng in chiong teng tèng-jı̍p I ê sin-thé ê sı̂, I án-ni kóng: “Pē ah! Sià-bián in, in-ūi in só͘ chò ê in m̄-chai.” Pa-lia̍p-pa chin tio̍h-kiaⁿ mn̄g kóng, I chin-chiàⁿ án-ni kóng mah?”
Hit ê chheng-liân kóng: “Sı̍t-chāi án-ni kóng! Tng I koà tı̄ sı̍p-jı̄-kè téng ê sı̂, iáu chin jı̂n-chû tùi tâng-tèng ê kiông-tō kóng-oē. Kı̂-tiong chı̍t ê kiông-tō ki-chhiò i, chóng-sı̄ lēng-goā chı̍t ê khiok hoán-hoé i ê choē. Hit ê Ka-lı̄-lı̄ lâng chiū lı̂n-bín i, èng-ún i saⁿ-kap tiàm lo̍k-hn̂g.”
Pa-lia̍p-pa chit sı̂ khiā khí-lâi, mn̄g kóng: “Sı̄ in tiong-kan ê tá-lo̍h chı̍t ê?” Hit ê chheng-liân lâng khoàⁿ i ê thài-tō͘ kám-kak kı̂-koài, chiū kóng: “Goá thài oē kı̀ chheng-chhó sı̄ tá-lo̍h chı̍t ê? In nn̄g ê lóng sı̄ tı̄ Iâ-lı̄-ko lō͘-chiūⁿ kap Pa-lia̍p-pa saⁿ-kap siū lia̍h ê, Pa-lia̍p-pa sı̄ kı̂-tiong choè khó͘-ò͘ⁿ ê chı̍t ê. Chóng-sı̄ i khiok siū tháu-pàng. Tèng sı̍p-jı̄-kè hit jı̍t, i iáu koaiⁿ tı̄ kaⁿ-lāi, koè An-hioh-jı̍t chiah tit tháu-pàng.”
“Sı̄ là! Sı̄ là! Goá chai-iáⁿ, chóng-sı̄ pêng-iú, tàu-té sı̄ tá-lo̍h chı̍t ê hoé-kái?” “Goá siūⁿ khoàⁿ-māi, ” hit ê chheng-liân thêng tia̍p-á kú, chiū chhiú kí tò-pêng ê sı̍p-jı̄-kè kóng: “Sı̄ tèng tı̄ chit ki sı̍p-jı̄-kè téng hit ê……Tí-su-má-su, goá siūⁿ in sı̄ án-ni kiò i. Sı̄ là ! Chiū-sı̄ chit ê. I chek-pı̄ hit ê ki-chhı̀ Iâ-so͘ ê, koh tùi Iâ-so͘ kóng, Lí ê kok kàng-lı̂m ê sı̂, chhiáⁿ kı̀-liām goá !”
Pa-lia̍p-pa koh mn̄g: “Hit ê Ka-lı̄-lı̄ lâng cháiⁿ-iūⁿ ı̀n i?”
I kóng “Kin-á-jı̍t lí beh kap Goá kàu lo̍k-hn̂g!” Pa-lia̍p-pa kóng: “Án-ni kóng, Tí-su-má-su ū hoé-kái koh tit sià-bián lah!”
Hit ê chheng-liân chit sı̂ hoán koè lâi mn̄g Pa-lia̍p-pa: “Lí siáⁿ-sū chiah-nı̍h koan-sim? Lí kiám bat in mah?” Pa-lia̍p-pa tiû-tû tiap-á-kú chiah kóng: “Goá sı̄ in ê tông-chı̀, sı̄ in ê thâu-ba̍k……”
Hit ê chheng-liân tò-thè nn̄g-pō͘, ba̍k-chiu tiāⁿ-tiāⁿ kiaⁿ-hiâⁿ kóng: “Lí sı̄ Pa…lia̍p…pa!” Pa-lia̍p-pa an-ùi i kóng: “Lí m̄-bián kiaⁿ goá. Chia sı̄ Iâ-lō͘-sat-léng, pèng m̄ sı̄ Iâ-lı̄-ko ê lō͘-chiūⁿ, pēng-chhiáⁿ……”
In ê tâm-oē tiong-toān lah! In-ūi ū kúi ê hū-jı̂n-lâng chhiⁿ-kông ǹg soaⁿ-téng cháu-lâi. Hit ê chheng-liân liû-sim khoàⁿ, chiū tùi Pa-lia̍p-pa kóng: “In lóng sı̄ kun-toè hit ê Ka-lı̄-lı̄ lâng ê. Tng I siū tèng sı̍p-jı̄-kè ê sı̂, in lóng tı̄ chia siong-sim thı̂-khàu! Sı̄ lah! Choè sian hit ê sı̄ Ngá-kok ê lāu-bú Má-lı̄-a, tē-jı̄ ê sı̄ Sat-lô-bí, choè-āu hit ê sı̄ Hi-lu̍t ê koán-ke Khó͘-sat ê bó͘ Iok-a-ná. Hiān-chāi in ná chún chin khoài-lo̍k.”
Teh kóng ê sı̂, hit saⁿ ê hū-jı̂n-lâng cháu kàu lah, Iok-a-ná khoàⁿ-kı̀ⁿ hit ê chheng-liân chiū khui-chhùi kóng: “Iok-ná, joā-nı̍h êng-kng ê siau-sit, joā-nı̍h kı̂-biāu ê siau-sit!” Sat-lô-bí soà-chiap kóng: “Goán chha-put-to m̄ káⁿ siong-sı̀n!” Má-lı̄-a kóng: “Sı̍t-chāi chhin-chhiūⁿ chı̍t ê bāng!”
Iok-a-ná kóng: “Chóng-sı̄ che sı̄ chin-sı̍t ê.” Saⁿ-ê hū-jı̂n-lâng, lí chı̍t kù, goá chı̍t-kù, Iok-ná kap Pa-lia̍p-pa thiaⁿ lóng boē bêng-pe̍k, chiū tui mn̄g kóng “Tàu-té sı̄ sím-mı̍h sū?”
Iok-a-ná kí soaⁿ-kha ê chı̍t ê hoe-hn̂g kóng “Lí chai-iáⁿ! Lán ê Chú siū bâi-chòng tı̄ Iok-sek ê hn̂g-tiong.” “Goán khak-sı̀n I sı̄ lán ê Bí-sài-a, só͘-í lán kun-tè I.” Má-lı̄-a kóng: “Chóng-sı̄ I siū tèng sı̍p-jı̄-kè, lán ê ǹg-bāng lóng siau-sit lah.” Sat-lô-bí chiap-soà kóng: “Só͘-í goán koat-ı̀ tı̄ I sin-chiūⁿ chı̄n goán só͘ oē chò ê hong-hoat, piáu-sı̄ goán ê sim-ı̀. Goán toà hiuⁿ-iû beh khı̀ boah I ê sin-si, che iā sı̄ tı̄ bô êng tiong ū-pı̄ ê.”
“Kim chá-khí, goán chin chá toà hiuⁿ-iû kàu hûn-bōng khı̀.” Iok-a-ná kóng: “Goán sim-lāi ū chı̍t ê boē oē kái-koat ê būn-tê, chiū-sı̄ beh cháiⁿ-iūⁿ soá-khui bōng-kháu ê toā tè chio̍h, chóng-sı̄ tng goán kàu-ūi ê sı̂, khiok khoàⁿ-kı̀ⁿ hit tè chio̍h-thâu í-keng soá-khui!” “Soá-khui?” Iok-ná mn̄g.
Má-lı̄-a kóng: “Sı̄ lah! Hit ê bōng-mn̂g sı̄ khui lah! Koh ū nn̄g-ê chhēng pe̍h-saⁿ ê thiⁿ-sài tı̄ hia khoàⁿ-siú.” In tùi goán kóng: “M̄-bián kiaⁿ, goá chai lín sı̄ teh chhoē tèng sı̍p-jı̄-kè ê Iâ-so͘. I bô tı̄ chia, chiàu I só͘ kóng ê, I í-keng koh-oa̍h lah!”
Iok-a-ná chhiú kí tiong-ng hit ki sı̍p-jı̄-kè kóng: “Sí tı̄ chit-ki sı̍p-jı̄-kè téng ê Chú í-keng tùi sí koh-oa̍h lah! Goán ài koáⁿ-kín chiong chit ê hó siau-sit pò lâng chai.”
Sat-lô-bí kóng: “Tú-chiah goán khoàⁿ-kı̀ⁿ lín tı̄ chia, só͘-í tiâu-kang lâi kā lín kóng. Lán ê Chú sı̄ oa̍h ê ! Hiān-chāi goán beh kín jı̍p Iâ-lō͘-sat-léng siâⁿ pò hō͘ I ê ha̍k-seng chai.”
Iok-ná kóng: “Goá iā beh khı̀ pò siau-sit!” In sı̀-lâng chiū kín-kín lo̍h soaⁿ khı̀.
Pa-lia̍p-pa tùi thâu kàu boé tı̄ hia thiaⁿ, bô chhap-chhùi. Hiān-chāi in lóng khı̀ lah, lâu i chı̍t-lâng tı̄ sı̍p-jı̄-kè kha. I chē lo̍h siông-sè su-siūⁿ. I kı̀-tit i siàu-liân ê sı̂, boē kiâⁿ chhò-lō͘ í-chêng, bat thiaⁿ koè koan-hē Bí-sài-a ê ū-giân, in ê bı̂n-cho̍k lóng ǹg-bāng chı̍t-ūi Kiù-chú ê lâi-lı̂m. Nā sı̄ hiān-chāi I kèng-jiân thè goá sí! Ah, goá hı̄n boē-tit chhin-chhiūⁿ hit ê Tí-su-má-su tı̄ lı̂m-chiong sı̂ tit i sià-bián! I chù-ba̍k khoàⁿ hit ki khang ê sı̍p-jı̄-kè, kè-sio̍k be̍k-sióng, sı̀-bı̄n iû-goân an-chēng, ná-chún ū chı̍t-chióng i boē bat thiaⁿ koè ê im-ga̍k tı̄ i ê hı̄-á-piⁿ teh hiáng. I put-ti put-kak kūi-lo̍h tı̄ sı̍p-jı̄-kè kha.
Ná chún ū chı̍t ê siaⁿ-im tùi i kóng: “Pa-lia̍p-pa, I ūi lí sí, iā-sı̄ ūi chéng-kô tı̄ choē-ok tiong ê sè-jı̂n sí. Hoān-nā khò chit ê sı̍p-jı̄-kè, hoé-kái ê choē-jı̂n, beh tit-tio̍h sià-bián. Chu-âng ê choē beh piàn pe̍h chhin-chhiūⁿ seh, khiam-pi thòng-hoé kàu sı̍p-jı̄-kè lâi ê lâng, i ê choē-tàⁿ beh éng-oán siū tû-khı̀.”
“Pa-lia̍p-pa, m̄-thang koh kiâⁿ tı̄ Iâ-lı̄-ko hit tiâu choē-ok ê tō-lō͘, tùi taⁿ í-āu, lí tio̍h ēng thè lí sí ê Iâ-so͘ chò lí ê tō-lō͘, in-ūi I bat kóng: “Goá chiū-sı̄ tō-lō͘, chin-lí, oa̍h-miā.”
Ba̍k-sái tùi Pa-lia̍p-pa ê ba̍k-chiu lı̀n-lo̍h--lâi, lâu-koè i moá ū chhùi-chhiu ê bı̄n, koh tih tı̄ thô͘-kha. Tùi i chò kiông-tō tı̍t-kàu siū lia̍h chē kaⁿ-ga̍k, i bat siū siong lâu-huih, chóng-sı̄ boē-bat lâu chı̍t-tih ba̍k-sái. Hiān-chāi tı̄ sı̍p-jı̄-kè chêng, i boē thang koh lún. Toà tio̍h siong-thiàⁿ ê sim i soè-siaⁿ kóng: “Chú ah! sià-bián goá chit ê choē-jı̂n.”
Hut-jiân i ná-chún thiaⁿ-kı̀ⁿ chit ê siaⁿ-im kóng: “Siōng-tè thiàⁿ sè-kan lâng, sı̄m-chı̀ chiong I ê to̍k-siⁿ Kiáⁿ siúⁿ-sù sè-kan, hō͘ kı̀ⁿ-nā sı̀n I ê lâng boē tı̂m-lûn oē tit-tio̍h éng-oa̍h.”
Chit-chióng ı̀-goā ê pêng-an chı̀n-jı̍p i ê sim. I bān-bān khiā khí-lâi, chí ū khoàⁿ-kı̀ⁿ thài-iông tú chiūⁿ khí-lâi. I boē bat khoàⁿ koè chêng-bı̄n ê thiⁿ sı̄ chiah-nı̍h kng-bêng, chhàn-lān, chhiong-moá ǹg-bāng!
