Lí Iā Tı̄ Hia Mah?
Kun-kù chı̍t tè kó͘-lāu ê thoân-soat, che sı̄ Lô-má ê chóng-tok Pún-tiu Pí-lia̍p-to, tı̄ Iâ-so͘ siū tèng tı̄ Sı̍p-jı̄-kè hit jı̍t ē-po͘ só͘ kóng ê oē, sı̄ i tùi i ê hū-jı̂n-lâng só͘ kóng ê. Hit ê liû-thoân ê kò͘-sū sı̄ án-ni:
Tùi Sèng-keng tiong, lí oē kı̀-tit Pí-lia̍p-to m̄ siong-sı̀n Iâ-so͘ bat hoān-tio̍h jı̄m-hô ê choē;khak-sı̍t bô ū chı̍t-hāng eng-kai siū tèng Sı̍p-jı̄-kè ê lí-iû, só͘-í i siūⁿ beh tháu-pàng Iâ-so͘. Hit-jı̍t chá-khí i sı̍t-chāi kám-kak kan-lân, chı̀n-thoè lióng-lân. I hō͘ hit-kûn hoā-hoā-háu ê kûn-chiòng só͘ pau-ûi tı̂ⁿ-poàⁿ. In lóng ná bı̍t-phang khı̂ⁿ tı̄ Pí-lia̍p-to ê sím-phoàⁿ chō-chêng khòng-kò hit ê tı̂m-chēng ê siû-hoān. Iâ-so͘ sı̄ cháiⁿ-iūⁿ ê khiam-pi khiā tı̄ hia, koh sı̄ cháiⁿ-iūⁿ ê jı̂n-chû. Tú-tú tı̄ chit ê sı̂, i ê hū-jı̂n-lâng sàng chı̍t hong phoe kóng “Chit ê gı̄-lâng ê sū, lí liân chı̍t-tiám-á iā m̄-thang chhap. In-ūi goá kin-á-jı̍t tı̄ bāng-tiong, ūi I siū liáu choē-choē ê kan-khó͘.”
Pí-lia̍p-to koh chı̍t-pái siūⁿ beh tháu-pàng Iâ-so͘. I kı̀-tit tı̄ Iû-thài lâng ê cheh-kı̂-tiong, ū chı̍t ê koàn-lē tio̍h tháu-pàng chı̍t ê kaⁿ-siû. Pí-lia̍p-to mn̄g in beh tháu-pàng hit ê chhut-miâ ê kiông-tō Pa-lia̍p-pa, á sı̄ beh tháu-pàng Iâ-so͘?
“Tháu-pàng Pa-lia̍p-pa!” Kûn-chiòng toā-siaⁿ jióng. “Chiong I tèng tı̄ Sı̍p-jı̄-kè! Chiong Iâ-so͘ tèng tı̄ Sı̍p-jı̄-kè!”
Í-keng khoàⁿ-kı̀ⁿ Iâ-so͘ siū thoa khı̀ sí bô ê só͘-chāi, Pí-lia̍p-to chiū khı̀ chhoē i ê hū-jı̂n-lâng Pho-ka-lia̍p. I chhui-siūⁿ kiám-chhái Pho-ka-lia̍p hō͘ hiah-ê nāu-tōng ê kûn-chiòng só͘ kiáu-jiáu, tú-tú chhin-chhiūⁿ tı̄ só͘ khoàⁿ-kı̀ⁿ ok-bāng tiong siū kiáu-jiáu chı̍t-iūⁿ. Chóng-sı̄ bô-lūn jû-hô Pí-lia̍p-to beh chèng-bêng ka-kı̄ tēng chit ê bô choē ê lâng siū Sı̍p-jı̄-kè ê sí-hêng sı̄ put-tek-í ê.
Chóng-sı̄ Pho-ka-lia̍p sit-chong lah, Pí-lia̍p-to chı̄n i só͘ oē ê khı̀ chhoē, chóng-sı̄ chhoē bô tio̍h. Kiaⁿ-hiâⁿ chiàm-niá i ê sim, sûi-sı̂ koh phài ı̄ⁿ-lāi ê peng-teng koáⁿ-kín khı̀ chhoē, chóng-sı̄ iû-goân sı̄ chhoē bô. “Kiám-sı̄ Iâ-so͘ ê pêng-iú ūi-tio̍h beh pò-siû chiong i khún-pa̍k khı̀ mah?……Á sı̄ jiáu-tōng ê kûn-chiòng jı̄n m̄ tio̍h lâng, chiong Pho-ka-lia̍p tòng choè sı̄ chı̍t ê kun-toè Iâ-so͘ ê hū-jı̂n-lâng?……”Pí-lia̍p-to tı̄ chhù-lāi kiâⁿ-lâi kiâⁿ-khı̀ pâi-hoê bô thêng, koh chı̍t-bı̄n iā kè-sio̍k teh hoat bēng-lēng. Choè-āu i bēng-lēng chı̍t ê pek-hu-tiúⁿ toà chı̍t-pah miâ ê peng-teng, chhiau-chhoē siâⁿ-lāi kap kau-goā, chhoē i ê hū-jı̂n-lâng. Che sı̄ chı̍t ê hô-téng hoân-loān ê jı̍t-chí ah!
Ē-tàu, Pí-lia̍p-to kiâⁿ kàu thang-á piⁿ koan-bōng. Chhàn-lān ê jı̍t-thâu hut-jiân sit-sek, sûi-sı̂ thiⁿ-o͘ tē-àm, āu-lâi Pí-lia̍p-to kám-kak ū tē-tāng, toā-toā ke-thiⁿ i ê khióng-hông kiaⁿ-hiâⁿ. I ê bó͘ Pho-ka-lia̍p kiù-kèng tı̄ sím-mı̍h só͘-chāi? I chı̍t-sı̂ lóng bô siūⁿ-tio̍h hit ê siû-hoān----Iâ-so͘.
Chin kú í-āu, Pho-ka-lia̍p chhut-hiān, i ê thâu-mn̂g sàm-loān, i-ho̍k bak-tio̍h nı̂-thô͘ chin lâ-sâm, ba̍k-chiu háu kàu chin âng. “Pho-ka-lia̍p, lí khı̀ tá-to̍h?” Chit ūi chóng-tok mn̄g: “Goá ūi lí khoà-sim kàu beh hoat-kông, in-ūi siâⁿ-lāi chhiong-moá tian-kông ê peh-sı̀ⁿ, koh hiān-chāi hut-jiân ū chit khoán o͘-àm ê jı̍t-sit! Chı̍t-pah ê peng siū phài khı̀ teh chhiau-chhoē lí.”
Pho-ka-lia̍p an-chēng koh khiam-pi khiā tı̄ tiōng-hu ê bı̄n-chêng.“Pún-tiu, tı̄ goá beh khı̀ ê í-chêng, bô seng kā lí kóng, in-ūi lí bē-oē ún-chún goá khı̀. Chóng-sı̄ goá khiok í-keng khı̀ choè lah, goá to̍k-to̍k tio̍h kap lí saⁿ-kap hun-tam chit ê choē ê chek-jı̄m. Lí kı̀-jiân tēng I sí-choē, tng I siū khó͘ siū sí ê sı̂, goá chı̀-chió iā tio̍h khiā tı̄ I ê sin-piⁿ.”
Pí-lia̍p-to tio̍h-kiaⁿ kàu lóng bē-hiáu-tit kóng oē. I mn̄g, “Lí iā…tı̄…hia…mah? …Lí…bat…khoàⁿ…kı̀ⁿ…? ”
I tı̀m-thâu. “Sı̄! Goá sı̄ khı̀ Kok-kok-thaⁿ. Pa̍t ê hū-jı̂n-lâng iā tı̄ hia.Ū chı̍t-ūi sı̄ I ê lāu-bú Goá hui-siông ê lı̂n-bín tông-chêng i. Ū chı̍t pái Iâ-so͘ tı̍t-chiap tùi goá kóng oē, goá chin ǹg-bāng I oē jı̄n-tit goá sı̄ chı̄-chūi, koh bêng-pe̍k tı̄ I thòng-khó͘ ê sı̂ goá sı̄ kap I saⁿ-kap siū-khó͘. Tı̄ I lı̂m-chiong ê í-chêng, I gia̍h-thâu kóng, ‘Pē ah! Goá chiong Goá ê lêng-hûn tı̄ Lí ê chhiú!’ Pí-lia̍p-to, lí bêng-pe̍k hit ê ı̀-sù mah? Sui-jiân tı̄ thòng-khó͘ ê tiong-kan, I iáu-kú oē gióng-bōng I ê Siōng-tè, siōng-chhiáⁿ koh chheng I choè ‘Pē’. I ū chı̍t-ūi Pē tı̄ thiⁿ-téng, ēng I ê thiàⁿ lâi chi-chhı̂ I !” pho-ka-lia̍p kek-tōng ê siaⁿ-im koh chiap-soà kóng “ Tı̄ hia, chiū-sı̄ hit ê kóng bē chı̄n thòng-khó͘ ê Sı̍p-jı̄-kè ē, goá iā chhoē-tio̍h I ê Siōng-tè. Tùi Iâ-so͘ ê gán-tiong, goá oán-jiân khoàⁿ-kı̀ⁿ ú-tiū it-chhè ê úi-tāi kap thiàⁿ-sim, chhiong-moá thòng-khó͘ khiok iā chhiong-moá thiàⁿ ê kong-hui ! Sı̄, Pún-tiu, goá sı̄ tı̄ hia, koh hoaⁿ-hí goá ka-kı̄ kèng-jiân ū tı̄ hia.”
Kin-á-jı̍t lán bē-oē tı̄ kāng-iūⁿ ê chêng-kéng tiong, kàu Ka-lio̍k-soaⁿ khı̀. Chóng-sı̄ lán sı̄ m̄-sı̄ ū ēng jia̍t-sêng, chhim-chai I tı̄ hit ê soaⁿ-téng ūi lán só͘ sêng-chiū ê kè-ta̍t, iā kàu hia khı̀ mah? Sı̍p-jı̄-kè sı̄ Lô-má tē-it giâm-tiōng ê hêng-hoa̍t, sı̄ hō͘ sin-thé siū chı̄n bē-oē hêng-iông ê thòng-khó͘. Phó͘-thong tùi poē-poān kok-ka ê hoān-lâng chiah ēng chit chéng ê hêng-hoa̍t. Tùi tı̄ Iâ-so͘, bô ū pí I lêng-sèng só͘ siū ê thòng-khó͘ koh khah oh-tit jím-siū ê, tı̄ chit ê sı̂-kan tiong. I ūi lán sio̍k-choē, sı̄m-chı̀ hō͘ Thiⁿ-pē tùi I ng bı̄n. Só͘-í I âu-kiò kóng “Goá ê Siōng-tè, Goá ê Siōng-tè, Lí siáⁿ-sū pàng-sak Goá?”
Siū-lān-cheh ê sı̂, hit ê siong-sim ê kò͘-sū koh toà hō͘ lán an-ùi kap ǹg-bāng ê sı̀n-sı̍t. Lán sı̄ m̄-sı̄ iu-chhiû, sit-chı̀, sòng-hiong, siong-sim…hō͘ lâng bô-lí ê khòng-kò, gū-tio̍h chhı̀-thàm kap chhı̀-liān nih? Nā-sı̄ án-ni, Iâ-so͘ sı̄ bêng-chai lán ê chêng-hêng, koh khoàⁿ-kò͘ lán ! Che sı̄ cha̍p-hun hi-kı̂ ê sū. I sui-jiân sı̄ Siōng-tè ê Kiáⁿ, kéng-jiân ū lâi kàu tē-chiūⁿ jím-siū lán só͘ tú-tio̍h ê it-chhè khó͘-thàng，sı̄m-chı̀ chhiau-kè lán só͘ siū ê.
“Lí iā tı̄ hia mah?” Sui-jiân sı̄ chı̍t-chéng thoân-soat ê kò͘-sū, nā-sı̄ Siōng-tè khak-sı̍t ū teh mn̄g lí, “Lí iā tı̄ hia mah?”
Thian-tông Thih-lō͘
Ū chı̍t-tiuⁿ ǹg sai-pêng teh kiâⁿ ê hoé-chhia, kàu chı̍t ê sió chhia-thâu, ū chı̍t ê iok 9 hoè ê cha-bó͘ gín-ná, chhiú the̍h soè kha phoê-tē-á, chiūⁿ chhia beh chē. I jı̍p chhia-lāi, sı̀-bı̄n koan-khoàⁿ, chóng-sı̄ lóng bô ū se̍k-sāi ê lâng; i ná chhin-chhiūⁿ chin ià-siān, ài beh hioh-khùn, chóng-sı̄ i m̄ káⁿ chē lo̍k khı̀. Kàu ū chı̍t ê chhâ-phiò-oân kàu, i chiū mn̄g khoàⁿ thang iông-ún i khùn tia̍p-á-kú bô, chhâ-phiò-oân kiám-cha i ê chhia-phiò, hoat-hiān tio̍h i bô phiò, chiū mn̄g i:
“Lí beh khı̀ tó-ūi?” “Goá beh khı̀ thian-tông!” “Sím-mı̍h lâng kā lí la̍p chhia-hùi?” “Sian-siⁿ ! chit tiuⁿ chhia kiám m̄ sı̄ beh khı̀ thian-tông? Iâ-so͘ kiám sı̄ bat chē chit tiuⁿ chhia?”
“Goá siūⁿ m̄ sı̄.Lí teh kóng sím-mı̍h oē, goá thiaⁿ m̄-bat.”
“Sian-siⁿ, goá ê ma-ma iáu tı̄ sè-kan ê sı̂, i siông-siông chhiùⁿ “Thian-tông thih-lō͘” ê koa hō͘ goá thiaⁿ. Goá khoàⁿ lí ê bı̄n chin un-jiû, goá siūⁿ kóng che iā sı̄ thian-tông thih-lō͘ neh! Ma-ma kóng thian-tông thih-lō͘ ê chhia-hùi lóng sı̄ Chú Iâ-so͘ la̍p liáu là ! M̄-nā án-ni ta̍k chām chhia-thâu iā lóng ū thêng, hō͘ lâng thang chē. Taⁿ ma-ma boē tàng koh chhiùⁿ koa hō͘ goá thiaⁿ, só͘-í goá beh chē chit ê hoé-chhia lâi chhoē ma-ma, thiaⁿ i chhiùⁿ thian-tông thih-lō͘ ê koa. Sian-siⁿ! Lí kiám iā bat chhiùⁿ thian-tông thih-lō͘ ê koa hō͘ lí ê cha-bó͘-kiáⁿ thiaⁿ? Lí kiám ū cha-bó͘-kiáⁿ chhin-chhiūⁿ goá chiah toā-hàn?”
Chit kù oē hō͘ chhâ-phiò-oân ê sim chin kan-khó͘, i ê ba̍k-sái tı̍t-tı̍t tih lo̍k-lâi, i kóng: “Bô, goá hiān-chāi bô cha-bó͘-kiáⁿ là! Goá ê cha-bó͘-kiáⁿ í-keng sí. Ouh! I chiūⁿ thian-tông khı̀ là!”
“Ū iáⁿ? chin hó, goá siūⁿ i iā sı̄ chē chit tiuⁿ hoé-chhia khı̀ ê, sian-siⁿ, lí iā beh khı̀ chhoē--i á m̄-sı̄?” Chhia-lāi ê lâng, thiaⁿ-tio̍h chiah-ê oē ū ê teh lâu ba̍k-sái, ū ê kóng “Goān Siōng-tè sù-hok i.” Ū ê kóng ” I sı̄ chı̍t ê sió thiⁿ-sài”. Hit ê gín-ná thiaⁿ tio̍h chiū kóng “ Sı̄ là ! Ma-ma kóng goá oē chò thiⁿ-sài nè !” Chiū koh mn̄g hit ê chhâ-phiò oân kóng:
“ Lí thiàⁿ Iâ-so͘ bô? Goá chin thiàⁿ I. Sian-siⁿ, lí nā thiàⁿ I, lí thang chē I ê hoé-chhia khı̀ thian-tông. Goá hiān-chāi beh khı̀, goá ǹg-bāng lí iā lâi khı̀. Goá chai-iáⁿ goá nā khı̀ hia Iâ-so͘ it-tēng oē chiap goá jı̍p-khı̀. I iā oē chiap lí jı̍p khı̀. Ouh! Ma-ma kóng kı̀ⁿ-nā chē I ê hoé-chhia ê lóng oē thang jı̍p khı̀. Sian-siⁿ, lí goān-ı̀ khoàⁿ thian-tông, Iâ-so͘, í-kip lí ê cha-bó͘-kiáⁿ á bô?”
Hit sı̂ chhia-lāi chhiong-moá thı̂-khàu ê siaⁿ, iû-kı̂ sı̄ chhâ-phiò-oân háu kah chin siong-sim, lóng boē kóng oē.Cha-bó͘ gín-ná koh mn̄g kóng.
“ Sian-siⁿ, goá kiám thang tó tiàm í-á hioh-khùn, goá chin ià-siān.”
“ Sı̄ là ! soè-kiáⁿ, lí thang tó lè.” “Án-ni, sian-siⁿ, kàu thian-tông ê sı̂ lí tio̍h kiò goá chhíⁿ, goá beh khoàⁿ ma-ma, lí ê cha-bó͘-kiáⁿ, í-kı̍p Iâ-so͘.”
“Hó! Hó! Chhin-ài ê thiⁿ-sài! goān...goān...goān...Siōng-tè sù-hok lí!”
Chit sı̂ hit ê cha-bó͘ gín-ná hut-jiân chù-sı̂n khoàⁿ chhâ-phiò-oân, mn̄g i kóng: “Án-ni, goá nā khoàⁿ tio̍h lí ê cha-bó͘-kiáⁿ ê sı̂, beh kā i kóng sím-mı̍h oē? Thang kā i kóng goá tı̄ chhia-lāi gū-tio̍h lí, iā teh beh lâi thian-tông á m̄-thang?”
Hit sı̂ chhâ-phiò-oân háu kah boē chhut-siaⁿ, chiū kūi tı̄ i ê sin-piⁿ, phō i kóng:
“Goá......goá goān sı̀n Iâ-so͘, hō͘ goá iā thang chiūⁿ thian-tông khı̀ kı̀ⁿ......goá......goá ê cha-bó͘-kiáⁿ.”
Ke̍k Kı̂-biāu Ê Lêng-le̍k
Ū chı̍t-pái Hui-ní tı̄ Thó͘-lûi khui-hoē. Chı̍t àm, tng i beh jı̍p lé-pài-tn̂g ê sı̂, ū chı̍t ê lâng chı̀n-chêng lâi mn̄g i kóng: “Lí sı̄ Hui-ní phok-sū á m̄ sı̄?” “Sı̄.” “Kim-ē-hng káng-tō soah, m̄-chai lí khéng kàu goá ê chhù kap goá tâm-lūn lêng-hûn ê sū á m̄?” “Hó, goá chin hoaⁿ-hí khı̀, lí tio̍h thèng-hāu goá.”
Hui-ní chı̀n-jı̍p lé-pài-tn̂g, ū lâng khoàⁿ-kı̀ⁿ i tú-chiah kap hit lâng kóng-oē, chiū mn̄g Hui-ní kóng: “Hit lâng kā lí kóng sím-mı̍h?” “I ài goá chit ê hoē soah liáu-āu khı̀ in chhù.” “Chhian-bān m̄-thang khı̀ !” “Goá í-keng tah-èng i lah, goá tek-khak tio̍h khı̀.”
Hoē soah, Hui-ní kiâⁿ mn̂g-kháu, hit lâng tı̄ hia teh thèng-hāu, chiū khan Hui-ní ê chhiú kóng: “ Toè goá lâi.” In kiâⁿ chin kú, chiū jı̍p chı̍t-tiâu sió-lō͘, koh chı̀n chı̍t-tiâu hāng-á, chiū tı̄ tē-jı̄ keng chhù ê thâu-chêng thêng-kha. Hit lâng kóng: "Hui-ní hiaⁿ-tı̄, chhiáⁿ thèng-hāu chı̍t-ē." I chiū tùi lak-tē-á lāi the̍h chhut só-sı̂, khui mn̂g liáu chiū kā Hui-ní kóng:"Chhiáⁿ jı̍p-lâi." Hui-ní jı̍p khı̀, khoàⁿ chhù-lāi ū tē-chian, ū hoé-lô͘ koh ū chı̍t tè tha̍k-chheh toh kap saⁿ-liâu í-á, í-goā, sı̀-bı̄n lóng sı̄ po̍h ê piah. Hit lâng koaiⁿ-mn̂g liáu-āu, chiū tùi khò͘ ê āu-piah-tē gia̍h chhut chı̍t ki té-chhèng kóng:" M̄-bián kiaⁿ, goá bô ı̀-sù beh hāi lí, chóng-sı̄ goá beh mn̄g lí kúi ê būn-tê. Lí cha-àm só͘ kóng ê tō-lí, sı̄ chin ê mah? Sı̄ lí ka-kı̄ só͘ chhim-sı̀n ê mah?" "Goá kóng sím-mı̍h? Boē kı̀-tit lah." Lí kóng Ki-tok Iâ-so͘ ê huih, soé-tû lán lóng-chóng ê choē. Hui-ní kóng:" Sı̄, Siōng-tè ū án-ni kóng." Hit lâng kóng:"Lí khoàⁿ chit-ki chhèng, che sı̄ goá ê chhèng, chit-ki chhèng í-keng phah-sí sı̀-ê lâng, goá ka-kı̄ phah-sí nn̄g-ê, goá chiú-tiàm ê tiàm-oân phah-sí nn̄g-ê. Chhin-chhiūⁿ goá chit khoán lâng, iáu-kú ū ǹg-bāng mah?" Hui-ní kóng:"Ki-tok Iâ-so͘ ê huih, oē soé-tû lán it-chhè ê choē."
Hit lâng kóng: " Hui-ní hiaⁿ-tı̄, iáu ū chı̍t ê būn-tê. Chit ê keh-piah ê āu-bı̄n sı̄ chı̍t keng chiú-tiàm, chit keng tiàm kap lāi-bı̄n só͘ ū ê lóng sı̄ goá ê. Goán ū boē ta̍k-khoán ê chiú, hō͘ kı̀ⁿ-nā lâi chia ê lâng. Goán siông-siông chiong kò͘-kheh lak-tē-á ê chı̂ⁿ, ēng chiú kā the̍h kàu chhun bô poàⁿ-ı̂ⁿ, bô teh koán i ê bó͘-kiáⁿ iau-gō haiⁿ-koâⁿ. Ū joā-choē pái, in ê hū-jı̂n-lâng, phō in ê sè-kiáⁿ lâi goá chia, thı̂-khàu iau-kiû goá bo̍h-tit chiong chiú bē hō͘ in ê tiōng-hu. Goá chiū chiong in koáⁿ-cháu, iû-goân kè-sio̍k goá ê chiú-gia̍p, chhin-chhiūⁿ goá chit khoán ê lâng, kiám ū ǹg-bāng mah?” Hui-ní kóng, “Siōng-tè kóng, I ê Kiáⁿ Ki-tok Iâ-so͘ ê huih, oē soé-tû lán lóng-chóng ê choē.”
“ Hui-ní hiaⁿ-tı̄, iáu ū chı̍t ê būn-tê. Hit-pêng keh-piah āu-bı̄n sı̄ chı̍t ê poa̍h-kiáu keng. Lāi-bı̄n ê khúi-chà, chhin-chhiūⁿ Sat-tàn pún-sin. Nā ū chiú-tô͘ iáu ū chhun tām-po̍h chı̂ⁿ, bô lóng ēng tı̄ chiú, goán chiū tı̄ hia kā the̍h kàu khang-khang. Iā ū lâng tùi poa̍h-kiáu keng chhut-khı̀ liáu-āu khı̀ chū-sat, in-ūi in ê chı̂ⁿ lóng su liáu-liáu, ū sı̂ só͘ su ê chı̂ⁿ sı̄ pa̍t lâng kià in ê. Chhin-chhiūⁿ goá chit-khoán lâng, kiám ū ǹg-bāng mah? ” Hui-ní kóng: “ Siōng-tè kóng I ê Kiáⁿ Ki-tok Iâ-so͘ ê huih, oē soé-tû lán lóng-chóng ê choē.”
“Koh-chài mn̄g chı̍t ê būn-tê, chiū beh pàng lí khı̀. Lí chhut-khı̀ ê sı̂, oan-koè chiàⁿ-pêng, chiū ē khoàⁿ-tio̍h chı̍t keng nn̄g-chàn ê chio̍h-chhù, he sı̄ goá ê chhù. Goá sı̄ hit keng chhù ê chú-lâng. Goá ê hū-jı̂n-lâng tı̄ hit lāi-bı̄n, goá cha̍p-it hè ê cha-bó͘-kiáⁿ Má-kek-lia̍t iā tı̄ lāi-bı̄n. 13 nı̂ chêng goá khı̀ Niú-io̍k, tú-tio̍h chı̍t ê súi ê cha-bó͘ gín-ná. Goá khi-phiàn i kóng goá sı̄ chı̍t ê seng-lí lâng. I chiū kè goá, i toè goá lâi kàu chia, chiah chai goá ê sū-gia̍p, sim-tn̂g beh piak-lı̍h. Goá hō͘ i siū chin chē thòng-khó͘, goá siông-siông chiú-chùi, phah i, pháiⁿ khoán-thāi i, koaiⁿ i tı̄ chhù-goā, hō͘ i kám-kak tı̄ sè-kan ná chhin-chhiūⁿ tı̄ tē-ge̍k, chò lâng chhin-chhiūⁿ chò káu. Chı̍t goe̍h-jı̍t chêng, goá toā chiú-chùi tńg-lâi, chı̍t-ē khoàⁿ-kı̀ⁿ goá ê hū-jı̂n-lâng, chiū hē chhiú phah i. Goá ê cha-bó͘-kiáⁿ khiā tı̄ goán nn̄g-lâng ê tiong-kan. Goá kā goá ê cha-bó͘-kiáⁿ siàn chhùi-phé, i chiū tó lo̍h-khı̀ chı̍t ê iām-jia̍t ê hé-lô͘ téng, tùi keng-thâu kàu chhiú, bô chı̍t só͘-chāi oân-choân, kiaⁿ liáu éng-oán boē thang hoê-ho̍k goân-lâi ê khoán-sit. Chhin-chhiūⁿ goá chit khoán lâng iáu ū ǹg-bāng mah? ”
Hui-ní hoāⁿ hit lâng ê keng-thâu kā i kóng: “Lí só͘ kóng ê kò͘-sū sı̄ hô-téng ê o͘-àm ! Chóng-sı̄ Siōng-tè kóng Ki-tok Iâ-so͘ ê pó-huih oē sé tû lán ê choē.” Hit lâng kóng: “To-siā, chin to-siā, chhiáⁿ thoè goá kı̂-tó, goá bı̂n-á ē-hng beh koh lâi khı̀ thiaⁿ tō-lí.”
Tē-jı̄-jı̍t siōng-ngó͘ iok-lio̍k 7 tiám-cheng, hit lâng tú tùi i ê pān-kong-sek chhut-lâi. I ê niá-toà í-keng oai lah, i ê bı̄n ū koāⁿ, ū ba̍k-sái, iā ū chin chē tı̂n-ai. I ê kha-pō͘ chhin-chhiūⁿ chiú-chùi ê lâng. Goân-lâi i ēng í-á phah-phoà sū-bū-sek ê kiàⁿ, hoé-lô͘, tha̍k-chheh-toh kap só͘ ū ê khı̀-kū, koh lòng-phoà só͘ ū ê po̍h-piah, múi-tháng ê chiú, múi-kan ê ui-sú-khí, lóng phah kàu lo̍k-hoa liû-súi, poa̍h-kiáu-toh, poa̍h-kiáu ê khı̀-kū lóng phah kàu chhùi-chhùi, hiat lo̍k hoé-lô͘ sio. Phò-hoāi it-chhè, chiū tńg-khı̀ chhù-nı̍h, peh chiūⁿ lâu-téng, chē tı̄ phòng-í, i ê hū-jı̂n-lâng tùi i ê cha-bó͘-kiáⁿ kóng, “Má-kek-lia̍t, khı̀ chhiáⁿ lín pa-pa lo̍h-lâi chia̍h chá-tǹg.” Má-kek-lia̍t chin kiaⁿ kap i ê lāu-pē kóng oē, chiū hn̄g-hn̄g khiā teh kóng: “Ma-ma kóng chá-khí-tǹg í-keng chún-pı̄ hó lah, chhiáⁿ lí lo̍h-lâi chia̍h.”
“Chhin-ài ê cha-bó͘-kiáⁿ, Pa-pa chá-khí m̄-chia̍h.” Má-kek-lia̍t koáⁿ-kín cháu lo̍h--lâi kóng: “Ma-ma, chhin-ài ê Ma-ma, Pa-pa kóng chá-khí m̄-chia̍h.” “Má-kek-lia̍t, lí boē hiáu-tit. Lí tio̍h chhiáⁿ Pa-pa lo̍h-lâi!” Má-kek-lia̍t chiū koh chiūⁿ lâu-téng, i ê ma-ma iā toà i khí-lâi. Hit lâng thiaⁿ-kı̀ⁿ i ê cha-bó͘-kiáⁿ ê kha-pō͘ siaⁿ, chiū ēng chin jı̂n-chû ê siaⁿ kóng: “Goá ê cha-bó͘-kiáⁿ ah, lâi goá chia.” I ê cha-bó͘-kiáⁿ iā kiaⁿ iā kiàn-siàu, bān-bān kiâⁿ kàu i ê bı̄n-chêng, i chiū phō i ê cha-bó͘-kiáⁿ, chē tı̄ i ka-kı̄ ê kha-thâu-u téng. I kā i ê cha-bó͘-kiáⁿ chim-chhùi liáu-āu, chiū chhut-siaⁿ thı̂-khàu. I ê hū-jı̂n-lâng khiā tı̄ lâu-thui-thâu, bo̍k-bêng kı̂-biāu . I koh tùi i ê hū-jı̂n-lâng kóng, “Chhin-ài ê hū-jı̂n-lâng ah, chhiáⁿ lâi.” Tùi án-ni i ê hū-jı̂n-lâng iā lâi chē tı̄ i tò-pêng ê kha-thâu-u téng. I ê siang-chhiú phō i ê hū-jı̂n-lâng kap cha-bó͘-kiáⁿ. I ê hū-jı̂n-lâng kap cha-bó͘-kiáⁿ koè khı̀ siông siū koè i chióng-chióng ê pháiⁿ khoán-thāi, nā sı̄ kin-á-jı̍t i phō in, kā in chim-chhùi, koh àⁿ-thâu chhut-siaⁿ toā thı̂-khàu, chêng-chōng kín-tiuⁿ sı̄m-chı̀ lâu-téng ūi-tio̍h án-ni tín-tāng.
keng-koè sò͘ hun-cheng āu, i iok-sok ka-kı̄, chiū tùi i ê hū-jı̂n-lâng kap cha-bó͘-kiáⁿ kóng,
“Hū-jı̂n-lâng ah, cha-bó͘-kiáⁿ ah, m̄-bián kiaⁿ, sı̂n kin-chá-khí ín-chhoā chı̍t ê sin ê lâng, sin ê lāu-pē tńg-lâi chhù-nı̍h. ” Tı̄ hit àm, i kap i ê hū-jı̂n-lâng, i ê cha-bó͘-kiáⁿ saⁿ-kap chı̀n-chêng chiap-siū Iâ-so͘ chò in ê Kiù-chú.
Tho̍k-chiá ! Che sı̄ sı̍t-chāi ê kò͘-sū, sı̄ Hui-ní sian-siⁿ ka-kı̄ kóng--ê. Chú Iâ-so͘ ê pó-huih, sı̍t-chāi ū sé-tû choē ê toā lêng-le̍k! M̄ nā kan-ta Hui-ní chai-iáⁿ chit ê huih ê lêng-le̍k, m̄ nā kan-ta chit lâng thâi-lâng, hāi-lâng, bô thiàⁿ hū-jı̂n-lâng, bô thiàⁿ kiáⁿ ê lâng, chai-iáⁿ chit ê huih ê lêng-le̍k, sè-kan í-keng ū chheng-bān lâng chai-iáⁿ chit ê huih ê lêng-le̍k. Lí ka-kı̄ kám-kak ū choē mah? Lí ê sim m̄ sı̄ ù-oè mah? Lí ài tit-tio̍h kiat-chēng mah? Lí m̄-thang choa̍t-bāng. Siōng-tè ê Kiáⁿ Ki-tok Ia-so͘ ê huih oē sé-tû lán lóng-chóng ê choē! Lí ê choē sui-jiân chhin-chhiūⁿ chu-âng, Chú oē hō͘ lí piàn pe̍h chhin-chhiūⁿ seh. Tho̍k-chiá! Lí nā koat-sim chiap-siū Chú, ài pó-huih sé-tû lí ê choē, chhiáⁿ lí ka-kı̄ kı̂-tó. Lí thang án-ni kóng: “Chú Iâ-so͘ ah, goá chı̄n-sim sı̀n Lí chò goá ê Kiù-chú, kiû Chú sià-bián goá ê choē, ēng Lí ê huih sé-tû goá lóng-chóng ê choē. A-men.”
