1. Kám-siā Siōng-tè toā un-sù;
Bōng un chhut-sı̀ kàu chit-chūn,
Jı̍t-mı̂ kò͘ goán lóng bô thêng;
Ēng Lí bû hāng ê thiàⁿ-chêng,
Sı̂-siông sù-hok lóng bô lı̄;
Gı̂m-si kám-siā kàu chı̍t sı̀.
2. Hi-tō͘ kong-im kè jı̍t-chí;
Lóng bô ūi Chú choè sím-mı̍h;
Sı̍t-chāi ko͘-hū Chú un-tián;
Kiû Chú lı̂n-bín lâi sià-bián,
Khún-kiû si-un Pē Siōng-tè;
It-seng kap goán siông tı̄-teh.
3. Kám-siā kàu-hoē chèng bo̍k-tióng;
Kà-sı̄ ín-chhoā gâu poê-ióng,
Bōng Chú thiàⁿ-thàng sim kám-kek;
Hoê-sióng kim-hun chin put-tek,
Bêng-pek bān-mı̍h Lí siúⁿ-sù;
Ài hiàn hō͘ Lí choè khı̀-kū.
4. Hōng-hiàn bı̂-sè sió kàu-sek;
Poê-iúⁿ kiáⁿ-jı̂ ū tō-tek,
Ài beh kàu-ióng ū siông-sek;
Ǹg-bāng chiong-lâi tit lı̄-ek,
Só͘ hiàn nā ha̍p Chú chí-ı̀;
Goān Chú chhin-chū lâi chí-sı̄.
5. Sū-sū êng-kng Lí miâ sèng;
Kiû Chú chiok-hok goán it-seng;
Só͘ chhun jı̍t-chí ū kng-bêng;
Hoaⁿ-hí ūi Chú lâi hiòng-chêng,
Sù goán kàu-hoē ū kng-êng;
O-ló kám-siā Chú bô thêng.
(Lú-soan Goe̍h-khan Tē 109-110 kı̂, 1968 nı̂ 1-2 goe̍h)
