Káu ū tı̀-sek

Lūn káu chò lio̍k-thiok, ū tı̀-sek koh ū gı̄, che sı̄ chèng-lâng só͘ chai . Kı̄n-lâi bat thiaⁿ-kı̀ⁿ káu ū kúi-nā chân kàu-gia̍h thang hián-chhut i ū tı̀-sek .

(1) Tı̄ Eng-kok Kam-tok-tiúⁿ só͘ chhı̄ ê káu,miâ-kiò “ Kéng-chhéⁿ”, siông-siông toè i-ê chú-lâng kàu Lé-pài-tn̂g. Chú-lâng jı̍p-khı̀ kóng tō-lí, káu chiū tiàm mn̂g-goā khùn teh thèng-hāu, chú-lâng chhut-lâi káu chiū toè boé-āu kap i tò-khı̀ ; ta̍k-pái sı̄ án-ni , m̄-bat sió-khoá ê chhò-gō͘ . Ū chı̍t-jı̍t Kam-tok teh kóng tō-lí , tha̍k Iok-hān ê phoe , chiông-tiong ū nn̄g kù kóng , Goá sı̍t-chāi kā lí kóng, tio̍h kéng-chhéⁿ . Hit-tia̍p káu thiaⁿ-kı̀ⁿ , lia̍h-chò sı̄ teh kho͘ i-ê miâ , liâm-piⁿ iô-boé tı̍t-tı̍t jı̍p-lâi khiā tı̄ tâi-piⁿ . Tn̂g-lāi teh chē ê lâng khoàⁿ-liáu lóng kı̂-koài i .

(2) Tı̄ Hoat-kok ê lâm-pêng ū sió hiuⁿ-siā siat chı̍t-keng siān-tông, teh kiong-kip hō͘ 20 lâng chia̍h ê gia̍h . Sàn-hiong lâng nā kàu e-hng-tǹg ê sı̂, chiū 20 lâng lóng chū-chı̍p tı̄ thang-á goā . Tı̄-hia ū tiàu iô-cheng-á, nā thiu , cheng-siaⁿ tín-tāng , lāi-bı̄n ê kha-chhiú chiū phâng chı̍t poâⁿ ê pn̄g beh hō͘ chı̍t lâng chia̍h. Chı̍t-chiah káu hūn-cha̍p tı̄ sàn-hiong lâng ê tiong-ng, chiū siūⁿ lâng chia̍h chhun-ê hō͘ i chia̍h bē pá . I khoàⁿ-kı̀ⁿ thiu-cheng-ê kı̀ⁿ ū thang chia̍h , chiū cháu-khı̀ kā cheng-á soh hō͘ cheng tân, lāi-bı̄n lâng lia̍h-chò sı̄ khah bān kàu ê sàn-hiong-lâng teh-beh lâi chia̍h, chiū koh phâng chı̍t poâⁿ chhut-lâi ; chóng--sı̄ thang-á sè-ê, kan-ta ē iông-ún hit ê poâⁿ, só͘-í bô khoàⁿ-kı̀ⁿ káu . Káu in-ūi án-ni chiū ū thang tit-tio̍h chia̍h, toā-chhùi nauh-chia̍h kàu pá . Kúi-nā pái chhin-chhiūⁿ án-ni , lāi-bı̄n ê lâng chiah chai sı̄ káu , chin kı̂-koài hit chiah káu ê tı̀-sek ; tùi hit-tia̍p ta̍k-jı̍t hō͘ i chia̍h, lóng bô khiàm-khoeh . Che sı̄ káu ē tit-tio̍h chia̍h iû-goân sı̄ oá-khò tı̀-sek . Hit-hō bô tı̀-sek ê lâng tio̍h chai thang kéng-chhéⁿ .

(3) Ū chı̍t lâng khiā-ke tı̄ kang-piⁿ , chhı̄ chı̍t-chiah káu chin toā-chiah , kā i hō-miâ kiò-chò Iok-á. In-ūi chit lâng khiā-ke tı̄ kang-piⁿ , só͘-í m̄-chún i-ê sè-kiáⁿ ka-tı̄ chhut-khı̀ hoe-hn̂g ê goā-bı̄n sı̀-kè kiâⁿ, kiaⁿ-liáu ē poa̍h-lo̍h kang tū-sí. Ū chı̍t-jı̍t mn̂g bē-kı̀-tit koaiⁿ, i-ê sè cha-bó͘-kiáⁿ beh cháu chhut-khı̀ mn̂g-goā, lóng bô lâng chai; hit chiah káu tùi hoe-hn̂g ê mn̂g cha̍h-teh, m̄-chún hit ê gín-á chhut-khı̀. Nā-sı̄ káu toā-chiah pūn-chhiâng, beh cháu chı̀n-chêng ûi gín-á ê sı̂ , e-tio̍h hit ê gín-á poa̍h-tó, chiū ēng chêng-kha jı̍h i-ê saⁿ , m̄ hō͘ i peh-khí--lâi ; káu chiū tó tı̄ gín-á ê sin-piⁿ , ēng chı̍h chı̄ⁿ i-ê bı̄n kap chhiú , ı̀-sù sı̄ beh chiàu-kò͘--i thèng-hāu i-ê chú-lâng lâi .

Hit-sı̂ ū lâng tùi hia koè , thiaⁿ-kı̀ⁿ gín-á teh-háu ê siaⁿ , koh khoàⁿ-kı̀ⁿ káu tı̄ sin-piⁿ , phah-sǹg káu teh chhòng-tı̄ i , chiū kia̍h chhoê-á beh koáⁿ hit chiah káu . Chóng--sı̄ káu m̄-nā m̄ cháu , hoán-tńg khui-chhùi hāⁿ beh lâi kā--i. Hit lâng khoàⁿ káu m̄-kiaⁿ--i , chiū khı̀ kiò in lāu-pē lâi ; in lāu-pē chı̍t-ē lâi , khoàⁿ-kı̀ⁿ án-ni, chiū chai káu sı̄ teh chiàu-kò͘--i-ê gín-á . Chiū kiò hit chiah káu ê miâ kóng , “ Iok-á ! án-ni chò chin hó , taⁿ thang jı̍p-khı̀ . ” Káu thiaⁿ i chú-lâng ê chhùi liâm-piⁿ jı̍p-khı̀ . Tùi án-ni thang chai hit chiah káu ê chı̄n-tiong , koh ē sūn-thàn i-ê chú-lâng .

(4) Ū chı̍t-chiah káu thiaⁿ-kı̀ⁿ lâng teh kóng, Ah! chiū hián-chhut kiaⁿ-hiâⁿ ê khoán. Hit chı̍t-jı̍t lâng-kheh kàu, chú-lâng kap i kóng-oē, soà kóng-khí hit chiah káu ê sū, lâng-kheh thiaⁿ-liáu, m̄-sı̀n; chiū tiâu-tı̂ kóng-chhut ah--jı̄ ! Khiok bô sím-mı̍h toā siaⁿ, chóng--sı̄ káu í-keng chhin-chhiūⁿ ū thiaⁿ-kı̀ⁿ, liâm-piⁿ bô an-jiân ê khoán-sit. Lâng-kheh koh-chài kóng, Ah ! chiū m̄-káⁿ tó, peh-khí-lâi khiā . Lâng-kheh tē saⁿ-pái koh kóng-khí , Ah ! Káu chiū iap-boé chhut-khı̀, chhin-chhiūⁿ put-chí kiàn-siàu. Lâng-kheh khoàⁿ án-ni, chiah mn̄g chú-lâng hit-ê iân-kò͘. Chú-lâng chiū kā i kóng, Chêng-jı̍t chit-chiah káu bat kā chı̍t-chiah ah khı̀ chia̍h, hō͘ lâng toā-siaⁿ hoah, hiâm i , in-ūi án-ni chiū bô bē kı̀--tit ; só͘-í hoān-nā thiaⁿ-kı̀ⁿ lâng kóng-khí, Ah ! chiū gı̂-ngái lâng sı̄ teh hiâm i , án-ni kiàn-siàu cháu-khı̀ piⁿ-á . Taⁿ nā-sı̄ káu iáu-kú bat kiàn-siàu, lâng nā chò m̄-tio̍h , iáu-kú m̄-chai kiàn-siàu , che beh án-cháiⁿ-iūⁿ leh ?

(5) Chá-chêng ū chı̍t ê cha-bó͘-gín-ná , toè in lāu-bó khı̀ thàm chhin-chhek , in lāu-bó jı̍p chhù lāi teh kóng-oē, cha-bó͘-gín-ná , tı̄ goā-bı̄n kap káu teh thit-thô , chiong in lāu-bó ê bō-á tı̀ tı̄ káu ê thâu-khak ; bô phah-sǹg hit chiah káu, thiaⁿ pa̍t chiah káu teh pūi ê siaⁿ, chiū chhut-khı̀ goā-bı̄n; cha-bó͘-gín-ná kiaⁿ-liáu in lāu-bó ê bō-á phah m̄-kı̀ⁿ , kín-kín toè i chhut-khı̀ . Káu koè chı̍t ê sè-pán ê kiô, cha-bó͘-gín-ná bô siông-sè khoàⁿ ia̍h toè i koè-khı̀ , kha ta̍h thu̍t poa̍h lo̍h kiô ē , hō͘ chúi tū kàu ba̍t-ba̍t ; ka-chài hit chiah káu khoàⁿ-kı̀ⁿ , cheh-sı̂ siû lo̍h chúi , tùi gín-ná ê saⁿ kā ân-ân,thoa chiūⁿ hoāⁿ-téng , bián tit i tū-sí .

Chiah ê í-goā, bat ū lâng kà káu the̍h-phoe, bé-mı̍h , khan chheⁿ-mê chò-hı̀ , phah-la̍h bô m̄ lóng thàn lâng ê ı̀-sù .

(6) Bat ū chú-lâng kah i-ê káu khı̀ bé bah , tı̄ lō͘--nı̍h tú-tio̍h pa̍t chiah káu , beh kā i chhiúⁿ bah khı̀ chia̍h , i chiū chhut-la̍t cháu tò-khı̀ , chiong bah kau hêng i ê chú-lâng; liâm-piⁿ tò-chhut-lâi chhoē hit chiah beh kā i chhiúⁿ-bah ê káu , chhoē tio̍h chiū chhut-la̍t kā i kàu chin siong-tiōng .

(7) Káu ē thè chú-lâng the̍h-phoe, sàng-jı̍p phoe-kio̍k siat tı̄ lō͘-piⁿ ê phoe-siuⁿ-lāi . Ū chı̍t jı̍t chú-lâng ēng kúi-nā tiuⁿ phoe kah i kā-khı̀ hē tı̄ hit--nı̍h , i chiū kā chı̍t-tiuⁿ tò-tńg-lâi; chú-lâng the̍h-khí lâi khoàⁿ , chiū-sı̄ phoe-lông ê goā-bı̄n bô liâm phoe-phiò ê iân-kò͘. Chú-lâng chin kı̂-koài .

Che lóng sı̄ thang kàu-gia̍h hián-bêng káu ê tı̀-sek . Sam-jū-keng ū kóng , “Ke ē pò thiⁿ-kng, chhâm-á ē thò͘-si, káu ē chiú-mn̂g.” Lâng nā m̄ ài tha̍k-chheh, bô ha̍k-būn, bô tı̀-sek, tian-tò m̄-ta̍t tio̍h mı̍h , kiám m̄ sı̄ chin kiàn-siàu mah ? Só͘-lô-bûn ông ū kóng, “ Seⁿ kiáⁿ nā ū tı̀-sek, lāu-pē chiū hoaⁿ-hí , seⁿ kiáⁿ nā gōng, lāu-bó chiū hoân-ló . ” (Chim-giân 10 : 1) In-ūi tı̀-sek iâⁿ-koè pó-ge̍k , kim gı̂n bô thang bé. Chit-hō chin ê tı̀-sek sı̄ sím-mı̍h leh ? “Kèng-ùi Iâ-hô-hoa chiū-sı̄ tı̀-sek ê kin-pún, lı̄-khui pháiⁿ chiū-sı̄ chhang-miâ . ” (Chim 1:7 ; Pek 28:28) Só͘-í lán tio̍h tû-khı̀ ū khoàⁿ-kı̀ⁿ kap bô khoàⁿ-kı̀ⁿ ê ù-oè. Kèng-ùi Siōng-tè lâi chiâⁿ-sèng, Che chiàⁿ-sı̄ chin-sı̍t ū tı̀-sek. Taⁿ siat-sú lán bē-hiáu kèng-ùi Iâ-hô-hoa, lâi thàn I-ê chí-ı̀, chin-chiàⁿ pí káu ê tı̀-sek teh sūn-thàn chú-lâng khah-su. Chiàⁿ tio̍h hùn-chı̀ lâi chı̀n-pō͘ tı̄ ta̍k-hāng ê tı̀-sek .

(Tâi-oân Hú-siâⁿ Kàu-hoē-pò tē 152 koàn, 1897 nı̂ 11 ge̍h)