Kèng Hó-hiaⁿ-tı̄-á
1. Chhit goe̍h kèng-hōng Hó-hiaⁿ-tı̄
Chit chân tāi-chı̀ ke̍k put-gı̄
Sèng-jı̂n ê chheh ū chí-sı̄
Kèng-tiōng kúi-sı̂n jı̂ oān-chi
2. Iàu-kín jı̂n-gı̄ toā iú-ek
Lūn kàu kèng kúi bô tı̀-sek
Kúi-á bô-hêng iā bô-siōng
Siáⁿ-sū kèng I hiah tùi-tiōng?
3. Hiān-hiān ê lâng oh ho̍k-sāi
Bô-hêng ê húi àn-choáⁿ pài
Ta̍k-hāng tāi-chı̀ tio̍h séng-chhat
Chū-jiân ná kú chiū ná bat
4. Lâng-kheh kàu chhù beh khoán-thāi
Tāi-seng mn̄g I toh-lo̍h lâi
Tit chai miâ-sèⁿ kap só͘-chāi
Jiân-āu hòng-sim saⁿ khoán-thāi
5. Che sı̄ sian-peng jı̂-hō͘ lé
Tı̂-hông kong-kùn kap chha̍t-bé
Kau lâng siōng-chhiáⁿ tio̍h séng-chhat
Kau kúi koh-khah tio̍h saⁿ-bat
6. Che kúi khí-thâu sı̄ chı̄-chūi?
Chiū-sı̄ sè-kan ê jı̂n-lūi
Kúi-á boē sí ia̍h sı̄ lâng
Kap lán tāi-ke lóng saⁿ-tâng
7. Chóng-sı̄ chò lâng ke̍k-kı̂ sàn
Chiū-sı̄ khit-chia̍h kap lô-hàn
Kàu chhù kiû-khit ke̍k-kı̂ mı̂
Khah pun ia̍h sı̄ chı̍t nn̄g-ı̂ⁿ
8. Chı̍t pái nn̄g pái chiū siá-sı̀
Saⁿ pài sı̀ pái, koáⁿ I khı̀
Khit-chia̍h lô-hàn lín chin khı̄
Kàu sí kiò I Hó-hiaⁿ-tı̄
9. Boē-sí lâng khòⁿ bô ba̍k-tē
Sí-liáu sio hiuⁿ teh kā hē
Thiám-mı̄ kúi-sı̂n kiû hok-khı̀
Che sı̄ choē-ok ê tāi-chı̀
10.Mûi-nı̂ chhit-goe̍h chiàu kū-lē
Mı̍h-kiāⁿ pâi kàu bô tàng hē
Iū kóng kúi-á lâi iông-kan
Bô hàu iau-kúi ē kiò-chhan
11.Siat-sú kúi-á nā ū chia̍h
Jı̄m lí khah hàu bô kàu-gia̍h
Nā kúi ē chia̍h kui-toh sàu
Āu-nı̂ bô lâng káⁿ koh hàu
12.Lín taⁿ sio-hiuⁿ teh ho͘-chhiáⁿ
Siat-sú kúi-á nā ū-iáⁿ
M̄-kú chhit-goe̍h chiah hàu khí
Pa̍t goe̍h iau kàu poàⁿ sió sí
13.Sui-sı̄ lâng-lâng lóng teh hàu
Khêng-chin sı̄ lâng siūⁿ m̄-kàu
Sui-bóng mı̍h-kiāⁿ pâi chê-pı̄
Siáⁿ-lâng khoàⁿ-kı̀ⁿ Hó-hiaⁿ-tı̄?
14.”It-sim sêng-kèng”siá chāi kı̂
Ǹg-bāng kúi-á bo̍h the-sı̂
Liōng-iok sio-hiuⁿ teh ho͘-chhiáⁿ
Ki-sı̍t kúi-á sı̄ bô-iáⁿ
15.Lâng kóng, Kau chha̍t chia̍h-liáu bí
Kau kúi kiám bô chhoā khı̀ sí
Pêng-an hok-khı̀ Thian sù--lâi
M̄-sı̄ kúi-á ē pho͘-pâi
16.Jı̂n-gı̄ lé-tı̀ nā heng-khí
Thiⁿ chiong pêng-an siúⁿ-sù lí
Tiong-hàu liâm-chiat nā tùi-tiōng
Thian sù hok-khı̀ bo hān-liōng
17.Chò hó ê lâng kàng pek-siông
Chò pháiⁿ ê lâng kàng pek-iong
M̄-sı̄ kèng-kúi thang kiû hok
Sı̄ khoàⁿ só͘ kiâⁿ ê siān-ok
18.Hàu kúi tāi-ke kek hong-sı̂n
Lı̄-ek sı̄-bô; pe̍h-liáu gı̂n
Chhài, pn̄g, koe-chí, lóng ké-khang
Kúi-á khoàⁿ-kı̀ⁿ khiú thâu-chang
19.Án-ni só͘ choè bô sı̍t-chāi
Siat-sú ū kúi koh-khah hāi
Ǹg-bāng kèng kúi kiû pó-pı̀
Hoán-tńg jiá I toā siū-khı̀
20.Kúi-á ū-ê chin pháiⁿ-phiah
M̄-nā m̄-chia̍h soà hoah-lia̍h
Kúi-á pí lâng khah m̄-hó
Khoàⁿ teh phiàn I soà chhia-tó
21.Phiàn-lâng siōng-chhiáⁿ phiàn bē khı̀
Hô-hòng phiàn kúi ê tāi-chı̀
Goán kóng hàu-liáu mı̍h goân-chāi
Lín kogn2 hàu kúi mı̍h khoài-hāi
22.Tio̍h chai chhit-goe̍h joa̍h-thiⁿ sı̂
Ta̍k-hāng mı̍h-kiāⁿ khoài sit-bı̄
M̄-sı̄ bak kúi chhùi-noā-choâⁿ
Sı̄ lâng ka-tı̄ teh saⁿ-moâ
23.Goá taⁿ kóng che sı̄ phı̀-jū
M̄-sı̄ kó-jiân ū che sū
Chiàu lín só͘ chai lâi kóng-khí
Chí-bêng chı̍t chân bô tō-lí
24.Phı̀-jū lâng khı̀ pa̍t só͘-chāi
Hó-ı̀ chhiáⁿ i lâi khoán-thāi
Pn̄g-táu ē-té hē chho͘-khng
Téng-bı̄n chí-ū tām-po̍h pn̄g
25.Lâng-kheh phâng oáⁿ beh khı̀ té
Chiah chai chú-lâng teh khau-sé
Lâng-kheh siū-khı̀ chin bô-kio̍k
“Siáⁿ-sū kiò goán lâi lêng-jio̍k?”
26.Lí taⁿ m̄-thang kàu goán tau
Kho͘ káu jiok lí kha-chhng-āu
Lán lâng siōng-chhiáⁿ ū che tāi
Khi-phiàn kúi-á koh-khah hāi
27.Lâng kóng teh hàu hó-hiaⁿ-tı̄
Hàu-lâi hàu-khı̀ hàu ka-tı̄
Chiong lâng phı̀-jū Hó-hiaⁿ-tı̄
Che sı̄ lêng-jio̍k á m̄-sı̄?
28.Siōng-tè tō-lí lâi thoân-pò
Kóng lâng kèng kúi toā choē-kō
Lín chhiáⁿ hoê-siūⁿ lâi chiūⁿ-chō
Ǹg-bāng pêng-an siau chai-hō
29.Tha̍k-sò͘ bêng-pe̍k hiù chēng-chúi
Phiàn-lâng kóng i khoàⁿ-kı̀ⁿ kúi
Ēng chhiú lāng-lâi iū lāng-khı̀
Bêng-pe̍k ê lâng ū ki-chhı̀
30.Kı̀ⁿ kúi sai-kong pe̍h-chha̍t-hı̀
Che sı̄ bê-he̍k gōng peh-sı̀ⁿ
Khún-kiû Thiⁿ-pē sù tı̀-sek
Hō͘ lâng kín-kín tio̍h bêng-pe̍k
(Tâi-oân Kàu-hoē-pò Tē 487 hō, 1925 nı̂ 10 ge̍h)
