Sian-siⁿ sı̄ Tâi-tiong chiu Lo̍k-káng lâng; chhut-sı̀ tı̄ Bêng-tı̄ 25 nı̂ 8 goe̍h 2 jı̍t. Pē-bó chá koè-sı̀, khah bô thang siū kàu-io̍k, Sè-hàn ê sı̂, ū jı̍p chu-pâng gián-kiù Hàn-ha̍k: put-chí gâu chò Hàn-si. Chheng-liân sı̂-tāi ū o̍h tām-po̍h kok-gú; soà chı̀-goān chò Sûn-cha kúi-nā tang kú. Lı̄-khui koaⁿ-kài liáu-āu, chiū jı̍p tı̄ siong-kài, khui Iûⁿ-chhái-tiàm chin kú. Put-hēng i ê goân-phoè pia̍t-sè tı̄ hit chı̍t sı̂. Ū lâu chı̍t ê cha-bó͘-kiáⁿ, chı̍t ê hāu-seⁿ. Tı̄ che sı̂-chūn, cheng-sı̂n chin siū táⁿ-kek; kai-chài ū tit-tio̍h Ki-tok Hok-im ê kà-sı̄, chiū hoán-hoé lâi sı̀n Chú. Sı̀n Chú liáu-āu, chiū koat-sim beh hiàn hō͘ Chú, chiah chı̀-goān jı̍p Tâi-lâm Sı̂n Ha̍k-hāu. Só͘-í tı̄ 1918 nı̂, chiū jı̍p Sı̂n Ha̍k-hāu. Sı̀ nı̂ kú, siū Hāu-tiúⁿ kò͘ Sòng Tiong-kian Bo̍k-su, Kàu-su kò͘ N̂g Sı̀n-kı̂ Sian-siⁿ, Bo̍k-su kò͘ Hô-iá Sian-siⁿ ê chai-poê; tı̄ o̍h-tiong in-khı̂n bián-kióng, hó phín-hēng, chhin-chhiat hó kau-poê. I ê sèng-chit khah tiām, chóng-sı̄ pêng-iú tāi-ke lóng chun-kèng--i. Chāi hāu tiong, bat tàu pang-chān Thài-pêng-kéng kap Khoaⁿ-sai-ke ê Jı̍t-iāu-ha̍k-hāu ê kang. Kàu 1922 nı̂ 3 goe̍h chiū chut-gia̍p. Hit nı̂ ê tâng-kı̂-seng: Tân Lo̍k, Lô͘ Sióng, Gô͘ Thian-sù, peng Bêng-chhiong, Lı̂m Tiâu-khun.
Tı̄ 1922 nı̂ 4 goe̍h chhe, chiū siū Thoân-tō-kio̍k phài i khı̀ toà Phêⁿ-ô͘ Toā-sū kàu-hoē. Siāng hit sı̂, i ū koh chhoā Kong-á-nâ kàu-hoē ê chí-moē Siau--sı̄ Phoê; Sian-siⁿ-niû chiū kap i khı̀ toà tı̄ Toā-sū chò-kang 3 nı̂ goā kú. Toā-sū ê pài-tn̂g, sı̄ i kó͘-bú lâi sin kiàn-tiok--ê. [Tı̄ 1924 nı̂ 3 goe̍h, Kàu-hoē-pò tē 12 bı̄n Chiu Sian-siⁿ ū siá chı̍t phiⁿ Toā-sū Kàu-hoē ê siau-sit án-ni kóng: Kám-siā Siōng-tè khui-lō͘, ū Boán Bo̍k-su thè goán tùi Sin-lâu ê Bo̍k-su kap Sian-siⁿ, Ko͘-niû, í-kı̍p Tâi-oân ê Kàu-hoē tê 5 pah kho͘ lâi pang-chān goán koh khí sin pài-tn̂g]. Kàu 1925 nı̂ chiū choán-jı̄m koè-lâi Tâi-oân, toà tı̄ Chheng-chúi kàu-hoē chı̍t nı̂, Toā-siā kàu-hoē chı̍t nı̂, Ba̍k-sa kàu-hoē chı̍t nı̂ kú. Tı̄ 1928 nı̂ oāⁿ khı̀ toà Ka-gı̄ Tiong-hoē-lāi ê Sin-hāng kàu-hoē; iā tı̄ 1929 nı̂ choán khı̀ Tâi-tiong chiu ê Tek-san kàu-hoē. Kàu 1930 nı̂ oāⁿ khı̀ tı̄ Chiang-hoà I-koán toà 4 nı̂ kú. Chiū koh choán-khı̂n khı̀ toà Pó-táu kàu-hoē nn̄g nı̂ kú. Kàu 1936 nı̂, Thoân-tō-kio̍k ū kā i oāⁿ lâi toà tı̄ Tâi-lâm Tiong-hoē ê Kong-á-nâ kàu-hoē, kàu i pia̍t-sè.
Toà Kong-á-nâ kàu-hoē khiok chí-ū 3 nı̂ kú, chóng-sı̄ put-chí chı̄n pún-hūn liāu-lí kàu-hoē. Chāi-chit-tiong bat chhiú-su̍t bông-tn̂g-iām. Kàu hó, chiū koh-khah chhut-la̍t tı̄ i ê chit-bū. Kin-nı̂ in-ūi thé-thiap Kong-á-nâ kàu-hoē châi-chèng khah khùn-lân, ū khı̀ kiam Lâm-hoà kàu-hoē. Chāi-lâi i ê sin-thé bô kàu loā ióng, iáu-kú ūi-tio̍h kàu-hoē hoaⁿ-hí án-ni hi-seng. Choè-kı̄n siông-siông hoat koâⁿ-jia̍t ê pēⁿ. Tı̄ 12 goe̍h 7 jı̍t, ū chhut-lâi Tâi-lâm beh siat-hoat kā i ê hāu-siⁿ kiat-hun ê sū, kap beh chham-siâng mê-nı̂-tō͘ kàu-hoē chı̀n-hêng ê iàu-bū, bô phah-sǹg chhut lâi kàu lō͘-tiong sin-thé bô sóng-khoài, kàu ūi sûi-sı̂ jı̍p Sin-lâu I-ı̄ⁿ, i ê tē-jı̄ cha-bó͘-kiáⁿ tı̄-hia chò khàn-hō͘-hū, lı̄-piān thang chiàu-kò͘. I-ı̄ⁿ ê I-seng, khàn-hō͘ chı̄n-la̍t lâi kā i liâu-tı̄, put-liāu Siōng-tè ê chí-ı̀ í-keng chiâⁿ, chiū 12 jı̍t ē-tàu oá chı̍t tiám, hō͘ Siōng-tè kéng-tiàu tńg-khı̀ thiⁿ-téng, hióng-siū 48 hoè.
I ê toā cha-bó͘-kiáⁿ, ū chhut-kè, tı̄ 2 nı̂ chêng koè-óng. Hiān-chāi iáu chhun i ê Sian-siⁿ-niû kap 4 ê hāu-siⁿ, 4 ê cha-bó͘-kiáⁿ, khah chē iáu sè-hàn. Ǹg-bāng lia̍t-ūi hiaⁿ-ché thè i ê ûi-cho̍k kı̂-tó. Chhú-khı̀ Sian-siⁿ-niû ê seng-oa̍h sı̄ kan-lân; Kàu-hoē só͘ ū thang pang-chān--i ê, sı̄ sió-khoá nā-tiāⁿ.
Tı̄ 12 goe̍h 13 jı̍t ē-po͘ 5 tiám, ū tı̄ Tâi-lâm chhı̄ Tang-mn̂g Ki-tok kàu-hoē kú-hêng chòng-sek. Hit jı̍t (tú-hó Lâm Tâi Siông-tı̀ Úi-oân-hoē chū-chı̍p) chòng-sek ê sūn-sū:
Su-hoē-chiá: Chiu Êng-an Bo̍k-su.
Chàu-ga̍k: Loā Lú Thoân-tō.
Sèng Si: (138)
Sèng-chheh (2 Thê 4:1-7): N̂g Chú-gı̄ Kàu-su
Kı̂-tó: Ông Oá Bo̍k-su.
Kò͘ jı̀n lí-le̍k: Si Khun-phêng Bo̍k-su.
Soat-kàu:Phoaⁿ Tō-êng Bo̍k-su.
Tiàu-sû tiàu-tiān Lâm Tāi: Lâu Chín-hong Bo̍k-su
Ko Tiong: Tiuⁿ Sûn-in Bo̍k-su
Ka Tiong: Lı̂m Kín-sin Bo̍k-su
Tiong Tiong: Ông Siú-iông Bo̍k-su
Kı̂-thaⁿ: Tè Hoán Bo̍k-su, Lâu Tiong-kian Bo̍k-su, Sı̂n Ha̍k-hāu tāi-piáu
Tiàu-koa: Sı̂n Ha̍k-hāu pêng-iú
Ûi-cho̍k tap-sû
Sèng Si: (133)
Chiok-tó: Lâu Chín-hong Bo̍k-su.
Lūn Sian-siⁿ ê chò lâng ū 3 tiám, thang chò hó ê bô͘-hoān:
(1) Phoh-sı̍t: I it-seng ê seng-oa̍h, ta̍k hāng to sı̄ phoh-sı̍t. Tùi siā-hoē, tùi kàu-hoē, tùi ka-têng, lóng sı̄ siāng chı̍t-iūⁿ ê phoh-sı̍t seng-oa̍h. Tı̄-hiān-tāi ho̍k-cha̍p ê siā-hoē, ē thang keng-koè chit khoán seng-oa̍h, m̄-sı̄ iông-ı̄ⁿ. Thang kóng sı̄ tùi téng-bı̄n só͘ siúⁿ-sù i ê te̍k-chit.
(2) Tiong-sı̍t: Sian-siⁿ khiok m̄-sı̄ toā phok-ha̍k, iáu-kú tùi i ê chit-bū ū tiong-sı̍t. I bat tùi kı̀-chiá chioh chū-pi soat-kàu ê chhâi-liāu khı̀ chham-khó, jiân-āu kóng i ū tit-tio̍h hui-siông ê kà-sı̄; thang chai i tùi thoân Siōng-tè ê oē, m̄-káⁿ sûi-piān, in-ūi ài chò Chú tiong-sı̍t ê lô͘-po̍k. Thoân-kàu-chiá tùi soat-kàu nā sit-pāi, chiū sui-jiân kı̂-thaⁿ chhin-chhiūⁿ sêng-kong, iā boē thang kóng sı̄ sêng-kong, koh-khah bē thang kóng ū tiong-sı̍t tı̄ i ê chit-bū. Sian-siⁿ sui-jiân seng-khu bô kàu loā kiāⁿ, iáu-kú it-chhè siū kau-thok ê kàu-bū, m̄-káⁿ bô tiong-sı̍t khı̀ chò.
(3) Chhiat-sı̍t: Tùi sim-té sı̄ sêng-sı̍t, só͘-í hoān-sū chiū ū chhiat-sı̍t tı̄-teh. I ê sèng-chit sı̄ un-sûn tiām-tiām, chóng-sı̄ bān hāng sı̄ tùi-tiōng sı̍t-chè koh sek-chhiat. In-khı̂n gián-kiù, chhiat-sı̍t hōng-sū; che sı̄ Sian-siⁿ ê te̍k-tiông.
Siá kàu chia beh soah ê sı̂, ài koh kóng kúi kù lâi chò kiat-lūn. Sian-siⁿ it-seng sui-jiân bô chò siáⁿ toā chhut-tioh ê tāi-chı̀, iā bô siáⁿ chhut-miâ, iáu-kú phí-jı̂n hó-táⁿ kóng i sı̄ chı̍t ê toè Chú kàu sí, Siōng-tè ê lô͘-po̍k. Sı̍t-chāi i ē kham-tit chhin-chhiūⁿ Pó-lô Sian-siⁿ chhiùⁿ tek-sèng ê koa tńg-khı̀ thiⁿ-téng kóng: “Goá í-keng cheng-chiàn hó ê cheng-chiàn, í-keng chı̄n pháu-cháu ê lō͘-chām, í-keng siú só͘ sı̀n ê tō-lí.”
(Tâi-oân Kàu-hoē Kong-pò tē 646 hō,1941 nı̂ 1 ge̍h)
