Tiúⁿ-ló Ko Chài-chiok, Bêng-tı̄ 20 nı̂ 11 goe̍h 15 jı̍t chhut-sı̀ tı̄ Tâi-lâm chhı̄. Lāu-pē Ko Tióng, sı̄ Tâi-oân Tiúⁿ-ló Kàu-hoē chho͘-tāi ê thoân-tō-su, lāu-bó Chu--sı̄ Eng, ū 5 ê hāu-seⁿ 3 ê cha-bó͘-kiáⁿ. Chiū-sı̄ Ko Kim-seng Bo̍k-su, Ko Tok-hêng Bo̍k-su, Ko Chài-tek Tiúⁿ-ló, kò͘ Ko Chài-chiok Tiúⁿ-ló, Ko Chài-hok Tiúⁿ-ló, kò͘ N̂g Siù-hui Kàu-su-niû Ko--sı̄ A-kim, Gô͘ Chhiu-bı̂ Sian-seⁿ-niû Ko--sı̄ Siù-ı̂ⁿ, Lí Péng-bûn Sian-seⁿ-niû kò͘ Ko--sı̄ Siù-lí.
Ko Chài-chiok Tiúⁿ-ló chū sè thian-chu chhang-miâ, sin-thé ióng-kiāⁿ, sèng-chêng oa̍t-phoat, gâu ūn-tōng chò soán-chhiú, chiū-tiong cháu sok-le̍k kap Tek-ko-thiàu ū te̍k-tiám. Bêng-tı̄ 37 nı̂ 3 goe̍h, tit-tio̍h iu-siù ê sêng-chek chut-gia̍p Tiúⁿ-ló-kàu Tiong-ha̍k. Hit-sı̂ lāu-pē khó͘-khǹg I jı̍p Sı̂n-ha̍k, ūi-tio̍h lāu-pē chò thoân-tō ka-kè khùn-lân, chiū chı̀-goān chò i-seng lâi chū-kip thoân-tō. Bêng-tı̄ 42 nı̂ 3 goe̍h chut-gia̍p Tâi-oân Chóng-tok-hú I-ha̍k-hāu, soà lâi Tâi-lâm Pēⁿ-ı̄ⁿ hōng-chit chı̍t nı̂. Keh nı̂ 4 goe̍h chiū lâi Kong-san khai-gia̍p, khui Kiàn-an I-ı̄ⁿ. Ko Tiúⁿ-ló tùi hoān-chiá chhin-chhiat, hō͘ lâng hó chhin-kı̄n, i-su̍t koân, tı̀-kàu miâ-siaⁿ thoân kàu sı̀-hng. Hoān-chiá hong-phêng kóng,”Nā thiaⁿ-tio̍h Sian-seⁿ ê siaⁿ, pēⁿ chiū hó saⁿ-hun.” Tùi án-ni hoān-chiá ta̍k jı̍t káng pah miâ.
Ko Tiúⁿ-ló kàu Kong-san khai-gia̍p ê sı̂, Kong-san boē ū kàu-hoē. Tùi Tiúⁿ-ló ê jia̍t-sim thiàⁿ Chú, ū chio Lâm-chú kàu-hoē lâi oān-chō͘. Chiū tı̄ Bêng-tı̄ 43 nı̂ 12 goe̍h, siat-chiâⁿ Kong-san Ki-tok Kàu-hoē. Tāi-chèng 2 nı̂ 6 goe̍h siū kéng chò Tiúⁿ-ló, lâi kè-sio̍k chı̄n-la̍t tı̄ kàu-hoē. Ū kin-á-jı̍t ê Kong-san kàu-hoē, che sı̄ Chú ê in-tián lâi chiâⁿ, iā thang kóng sı̄ tùi i ê thiàⁿ Chú tı̍t-chiap kàn-chiap ê oān-chō͘, thâu-boé 20 goā nı̂.
Ko Tiúⁿ-ló m̄-nā chı̄n-la̍t tı̄ Kong-san kàu-hoē, tùi goā kàu-hoē iā chin chı̄n-la̍t. Tùi kok kàu-phài i bô hun-piat, chin ū tō͘-liōng, put-lūn sím-mı̍h kàu-phài ê sian-seⁿ kàu i ê ke, i bô sioh kim-chı̂ⁿ, hoan-gêng hō͘-thāi, iā chin chı̄n-la̍t kap i ha̍p-tông chò kang. Tùi kok-ka, siā-hoē i sı̄ chı̍t ê kong-lô-chiá. Kán-tan kí kúi hāng: tùi Tiúⁿ-ló-kàu Tiong-ha̍k, Lú-ha̍k, Sin-lâu Pēⁿ-ı̄ⁿ, Sèng-kiat kàu-hoē, Jı̍t-pún Chhiah-sı̍p-jı̄-siā, Chāi-hiong Kun-jı̂n-hoē, kı̂-thaⁿ ê kong-kiōng thoân-thé kià-hù kim-hāng bē chió. Chiau-hô 3 nı̂ 2 goe̍h 21 jı̍t, ū tit-tio̍h Tâi-oân Chóng-tok-hú Siā-hoē sū-gia̍p kong-lô-chiá ê piáu-chiong.
Bêng-tı̄ 44 nı̂ 4 goe̍h 21 jı̍t, kap Khó͘ Hān ê tióng-lú Khó͘--sı̄ Bí kiat-hun, chiâⁿ-chò hēng-hok ê ka-têng, thâu-boé 25 nı̂ kú. Ū 7 ê hāu-seⁿ, 4 ê cha-bó͘-kiáⁿ. Iāu-tong tı̄ 日本齒科醫學專門. Iāu-se tı̄ 東京高等工學校. Iāu-chhong tı̄ 京都同志社中學部. Iāu-seng tı̄ 長老教中學. Iāu-bêng tı̄ Kong-san Sió-ha̍k-hāu. Iāu-jiân, Iāu-bı̂n iáu sè-hàn. Tı̀-bí Chiau-hô 10 nı̂ 8 goe̍h 16 jı̍t, kap I-ha̍k-sū Âng Ngá-lia̍t kiat-hun. Chû-bí sı̄ 東京帝國音樂學校 chut-gia̍p, í-keng phèng-tiāⁿ Tâi-pak Lí Chhiau-jiân. Ngá-bí tı̄ 下關梅光女學院. Sèng-bí tı̄ Kong-san Sió-ha̍k-hāu.
Ko Tiúⁿ-ló pêng-sı̂ sı̄ ióng-kiāⁿ, i-gia̍p í-goā ū chhù-bı̄ chē-chē hāng, kı̂-tiong choè chhù-bı̄ sı̄ tha̍k-chheh kap pò͘-tō. Chiau-hô 8 nı̂ 2 goe̍h 11 jı̍t àm, hut-jiân khí bông-tn̂g-iām, ū keng-koè Tâi-lâm Pēⁿ-ı̄ⁿ, Tâi-pak Pēⁿ-ı̄ⁿ, Tang-kiaⁿ Sèng Lō͘-ka Pēⁿ-ı̄ⁿ, chiân-hō͘ toā chhiú-su̍t 6 hoê, kúi-nā pái siū i-seng soan-giân bô bāng lah, chóng-sı̄ tit-tio̍h Chú te̍k-pia̍t ê in-tián, kiâⁿ koân-lêng hō͘ i pêng-an koh tò-lâi Kong-san chiàu-kū hêng-i. Lō͘-ka 9:23, Chú kóng, “Ū sı̀n ê lâng ta̍k hāng lóng ē.”
Pún-nı̂ 5 goe̍h 10-17 jı̍t, Kong-san pài-tn̂g ū khui liân-iā pò͘-tō-hoē. Tiúⁿ-ló sui-jiân sin-thé iáu-boē cha̍p-hun ióng, iáu-kú chin chhut-la̍t tàu káng-ián. Koh 6 goe̍h 2-4 jı̍t tāi-kí pò͘-tō, Ko Tiúⁿ-ló kap Tiúⁿ-ló-niû lóng chhut-se̍k tàu chò-kang, kui êng-kng hō͘ Chú.
Ko Tiúⁿ-ló ū kám-liām Chú ê in, koat-sim ài ūi Chú kan-chèng, jia̍t-sim ài koh gián-kiù Sèng-keng, chiū tı̄ 6 goe̍h hā-sûn koè Kó͘-lōng-sū, beh hù Cha-keng-hoē, liáu-āu iā siūⁿ beh khı̀ Lâm-kiaⁿ koh gián-kiù pò͘-tō ê kang. Khó-sioh tı̄ chhut-goā, thiⁿ-khı̀ joa̍h, oa̍h-tāng lô koè-thâu, sin-thé chiām jio̍k, chiū tı̄ 8 goe̍h 18 jı̍t kui Tâi. Goán lóng teh ǹg-bāng i tò-lâi, thang koh saⁿ-kap ūi Chú chò kang. Bô-phah-sǹg Chú ê chí-ı̀ chiâⁿ, chiū tı̄ 10 goe̍h 31 jı̍t ngó͘-chiân 11 tiám, soah i sè-kan ê tio̍h-boâ, jı̍p tı̄ Chú éng-oán khoài-lo̍k ê an-hioh, hióng-siū 50 hoè.
Khó-siong ah! Khó-siong ah! i ê ka-têng sit-lo̍h chı̍t ê pó-poè ê thâu-lâng; kàu-hoē sit-lo̍h chı̍t ê lêng-kài ê ióng-sū; siā-hoē sit-lo̍h chı̍t ê bêng-i. Ah! Ko Tiúⁿ-ló ah!! Tı̄ chit-ê hui-siông-sı̂, Kong-san Kàu-hoē lâi sit-lo̍h lí, koh ná béng-lâng phah-chı̍h i ê keng, ióng-sū sit-lo̍h i ê chı̀ⁿ. Thiaⁿ-tio̍h ê lâng, ta̍k ê to m̄-kam, ū thang an-ùi i ê ûi-cho̍k kap goán--ê, sı̄ lán ê Chú. Tng i beh lı̂m-chiong ê sı̂, ū kóng, “Tio̍h khoàⁿ, goá ê sim-koaⁿ chin pêng-an, chin hoaⁿ-hí, goá beh tò-lâi chhoē Thiⁿ-pē, gı̂m Sèng-si tē 8 siú hō͘ goá thiaⁿ.” Kóng-soah, chiū an-jiân kap Chú saⁿ-kap khı̀.
Keh jı̍t sı̄ 11 goe̍h 1 jı̍t, ngó͘-chêng 9 tiám, tı̄ Ko chài-tek Tiúⁿ-ló ê ke chò kò-pia̍t-sek (hoé-chòng). Tâng 11 jı̍t ngó͘-āu 2 tiám, tı̄ Thài-pêng-kéng lé-pài-tn̂g chò chòng-sek. Hoē-chòng-chiá 1000 goā lâng, tiàu-sû tiàu-tiān 300 goā thong, hoe-khoân liân-te̍k chin-chē. Sek-āu, tāi-ke sàng i ê ûi-kut kàu Tâi-lâm ia̍h, 5 tiám goā kàu Kong-san, 6 tiám tı̄ ka-tı̄ ê ke khui Tui-tō-hoē, Loē Tâi-jı̂n 200 goā miâ chhut-se̍k. Pè-hoē kán kı̀ tām-po̍h tı̄ pò-choá-chiūⁿ lâi siàu-liām kò͘ Ko Chài-chiok Tiúⁿ-ló, kiû Chú an-ùi i ê ûi-cho̍k, chhoā in toè i ê kha-pō͘. A-bēng.
(Tâi-oân Kàu-hoē Kong-pò tē 622 hō, 1937 nı̂ 1 goe̍h)
