Liāu Sêng-phi Ong, tı̄ 5 goe̍h 6 hō pia̍t-sè, hióng-siū 69 hoè. Sè-hàn ê sı̂, kap i ê lāu-pē gián-kiù hàn-ha̍k. Tùi Bêng-tı̄ 37 nı̂ (hit-sı̂ i 34 hoè) tng Pó-chèng khí, tı̍t-kàu seng-thian, tùi kok-ka, kàu-hoē, tē-hng kòng-hiàn chin toā.
I bat chò Ke-chng-tiúⁿ, Sı̀n-iōng cho͘-ha̍p-tiúⁿ, Hia̍p-gı̄-hoē-oân téng, chin kú. Siū koaⁿ-thiaⁿ kap tē-hng put-chí chun-kèng tin-tiōng.
Tı̄ Bêng-tı̄ 38 nı̂, i ū chhèng-āu pò kok, hiàn ¥18.60 chò kun-chu. Tit-tio̍h hā-sù Bo̍k-poe. Í-āu ū tit-tio̍h siúⁿ Tâi-oân Sin-chiong, Tāi-lé Kı̀-liām-chiong, Chhiah-sı̍p-jı̄-siā chóng-chhâi piáu-chiong, Lio̍k-kun Tāi-sı̂n Kám-siā-chn̄g, Siúⁿ-hun-kio̍k chóng-chhâi Po-chn̄g, Ài-kok Hū-jı̂n-hoē-tiúⁿ Siā-chn̄g. Kı̂-thaⁿ iáu chin-chē, m̄-bián koh kóng.
Lūn i ê chú-lú: Tióng-lâm Liāu Un-jı̂n, put-hēng 3 nı̂ chêng tı̄ Kiaⁿ-to͘ pia̍t-sè, i sı̄ Bûn-ha̍k-sū, I-ha̍k Phok-sū. Chhù-lâm Liāu Un-khoe, sı̄ Tiat-ha̍k Phok-sū. Sam-lâm Liāu Un-gı̄, sı̄ Hoà-ha̍k Phok-sū. Sı̀-lâm Liāu Un-chèng, gō͘-lâm Liāu Un-chı̀n, sı̄ Siong-ha̍k-sū. Tē 2 sim-pū kap tē 3 sim-pū, pún lóng sı̄ Bí-kok che̍k. Tē 2 sim-pū ê ha̍k-ūi sı̄ B. A. (Bûn-ha̍k-sū). Tē 3 sim-pū ê ha̍k-ūi sı̄ B. A. (Bûn-ha̍k-sū). I 3 ê cha-bó͘-kiáⁿ lóng sı̄ Ko-lú chhut-sin, 3 ê kiáⁿ-sài lóng sı̄ siong-tong ê jı̂n-bu̍t.
Lūn i ê hiaⁿ-tı̄: Liāu Hoàn-chiong kap i 3 ê kiáⁿ lóng sı̄ I-ha̍k Phok-sū. (Khó-sioh Liāu Hoàn-chiong Phok-sū, chûn-nı̂ tı̄ Siōng-hái pia̍t-sè). Liāu Sam-tiōng tı̄ Chó-tiū-tiân Tāi-ha̍k chāi-ha̍k tiong pia̍t-sè. Liāu Hêng-seng sı̄ Keng-chè ha̍k-sū. Mn̂g-lāi choan-sı̄ ha̍k-sū, phok-sū, lóng sı̄ Sêng-phi ong chı̍t lâng tı̍t-chiap kàn-chiap ê oān-chō͘. Che káⁿ sı̄ hái-sū tiong só͘ hán-iú.
Tùi kàu-hoē lâi kóng, chū Bêng-tı̄ 29 nı̂ chò Chip-sū í-lâi, lóng-chóng tng Chip-sū 8 nı̂, Tiúⁿ-ló 24 nı̂. Kı̄n-lâi in-ūi sū-gia̍p kap seng-khu loán-jio̍k, iáu-kú sim siông-siông teh siàu-liām kàu-hoē. Bat pêng-siông-jı̍t kúi-nā pái kàu pài-tn̂g, sı̀-ûi sûn-sûn khoàⁿ-khoàⁿ, chim-chiok kè-e̍k, khoà-lū kàu-hoē ê keng-chè kap it-poaⁿ ê chōng-hóng.
Hiān-sı̂ kàu-hoē chhù-tē sı̄ i 28 nı̂ chêng hiàn--ê, hiān-sı̂ ta̍t beh 8, 9 chheng kho͘. Pài-tn̂g sı̄ i kó͘-bú hoē-iú, kap hoē-iú ngē-kha-keng khí--ê. Tùi 3 nı̂ chêng ū teh kè-e̍k pài-tn̂g tio̍h ı̂-choán tı̄ khah tú-hó ê só͘-chāi, chiū tı̄ kū-nı̂ bé chı̍t tè 3 hun goā beh chò pài-tn̂g tē, oá 5000 kho͘. Kàu beh koè-sı̀, ū ûi-giân tio̍h koh hiàn tàu chı̍t bān, sı̄ tùi 2, 3 nı̂ lâi chiū ū àn-sǹg beh hiàn--ê.
I ê chò lâng: sı̄ chin ū lí-tı̀. Nā ū lí-khı̀, 3 hoè gín-á i to thiaⁿ i. Tùi kàu-hoē hiàn-kim: i nā siông-sè chim-chiok liáu-āu, ū ín m̄-bat bô kià. Ū kúi-nā pái, sı̄ bô ín lâi kià. I nā chai hoē-iú kó-jiân ū chin chı̄n-la̍t iā chò bē kàu--ê, i lóng hoaⁿ-hí pau-boé. I beh chò hó-sū, bô ài lâng chai. I kúi-nā pái kiò chip-sū tio̍h chim-chiok tiau-cha kàu-hoē ū loā-chē kan-khó͘ lâng, chiū àm-chı̄ⁿ pang-chān in. I iā bat kiò lâng tio̍h tê chı̂ⁿ pang-chān kan-khó͘ lâng. I iā bat kià chı̂ⁿ pang-chān bó͘ chū-iû ê thoân-tō-chiá.
I ê chù-ı̀ la̍t chin kiông. Seng-khu sui-sı̄ chin ià-siān, iáu-kú i sı̂-sı̂ chin kín-tiong. Che sı̄ pêng-siông lâng só͘ bô--ê.
Pêng-siông kiám-chhái khah bô êng, choè-kı̄n tı̄ pēⁿ-chhn̂g-tiong, khak-sı̍t chin tı̀-ı̀ sià-choē chheng-gı̄ ê in-tián. Chhut-la̍t pı̄-pān sim beh kı̀ⁿ Chú ê bı̄n. Bô kiaⁿ sí. Lâng nā khı̀ thàm i, i siāng ài, sı̄ kap i kı̂-tó.
Taⁿ Thiⁿ-pē ê chí-ı̀ sêng, tháu-pàng i ê lô-khó͘, jı̍p Chú ê êng-kng khoài-lo̍k. Kàu-hoē thiaⁿ i koè-sin, joā chē lâng ū ai-ai chı̍p-chı̍p, ūi i lâu m̄-kam ê ba̍k-sái. Kiû Chú an-ùi i ê ûi-cho̍k.
(Tâi-oân Kàu-hoē Kong-pò tē 653 hō, 1939 nı̂ 8 ge̍h)
