(Hō͘ Tiuⁿ Sı̀n-tông, Ong Sūi-lı̂n, Jeff, Kı̀ Nái-goân téng.)
Chhit-nı̂ āu koh saⁿ-kı̀ⁿ,
Chhit-goe̍h ē-po͘-sı̂,
Tiám-á-ka hiám-hiám iûⁿ--khı̀
Káng-to͘ ê lō͘-piⁿ
M̄-sı̄ beh lâi ”chhoàn-liân”,
M̄-sı̄ iáu liû-loân ha̍k-seng ūn-tōng.
Kan-ta ūi-tio̍h khoàⁿ goá ê siàu-liân-sı̂,
Ku̍t-ó͘ tı̂m-té ê kı̀-tı̂,
Khoàⁿ lín chit-tı̄n kap goá sio-siâng ê
“Tâi-to̍k-siáu.”
Tiān-oē-tiong lí án-ni hêng-iông ka-kı̄,
Soà kún-chhiò chá-chêng ê tông-chı̀.
Boē kı̀-tit lí ê bı̄n-māu,
Chóng-sı̄ iáu saⁿ-kap kóng-khí:
87 tı̄ Ho͘ston, Cincinati,
88 tı̄ Peⁿ State, East Lanseng,
89 tı̄ Los Angeles,
90 tı̄ Chicago.
Poàⁿ-nı̂ chı̍t-lûn, khoà-hāu-hn̂g chhoàn-liân,
Se̍k-se̍k ê bı̄n-iông, kiò boē-chhut miâ-jı̄.
Chóng-sı̄ ū han-chû-tı̂n ê jūn,
Kap kò͘-hiong ê thô͘-phang-bı̄.
Hoé-chéng tâi tı̄ kài-giâm sı̂-kı̂,
Toà kàu pak Bí-chiu pok--khui.
Jia̍t-chêng tiám-to̍h choē-choē hāu-hn̂g,
Chèng-tı̄ tùi àm-mı̂ piān kàu thiⁿ-kng.
Pit-chiàn tùi Pak-kiaⁿ-oē chiàn kàu Eng-gí,
Jiàu-pê-á iā bô-êng chhih-chhih.
Ū lâng chheh tha̍k chı̍t-poàⁿ,
Kui-khı̀ choè o͘-miâ-toaⁿ.
Hit-sı̂ goá iáu sı̄ chhài-chiáu chı̍t-chiah,
Thiaⁿ chiân-poè kóng Pak-khà Hái-pò Sū-kiāⁿ.
Tâi-oân liû-ha̍k-seng ūn-tōng-sú,
Oa̍h-thiàu-thiàu kı̀-lio̍k tı̄ in sin-chiūⁿ.
Soà-chiap pat-lêng nı̂-tāi āu-poàⁿ-ia̍h,
Oāⁿ lán choè-tı̄n lâi siá.
Koh siong-hoē
Tı̄ ka-kı̄ ê thó͘-toē.
T shirch, té-khò͘, ūn-tōng-oê,
Liû-ha̍k-seng ê chhēng-chhah bô piàn joā choē.
M̄-kú pı̀n-piⁿ khai-sí pe̍h,
Tâng chē ê siàu-liân-poè,
Goá m̄ bat poàⁿ-ê.
Pat-lêng nı̂-tāi chá chiū soah.
“Tâi-oân Ha̍k-seng lāu lah.”
Lí án-ni thó͘ toā-khùi,
Lán ê sı̂-tāi kiám chiâⁿ-sı̍t koè--khı̀?
Koh chı̍t-pái saⁿ-sı̂,
Sı̀-soàⁿ kàu hái-kak thiⁿ-piⁿ,
Tâi-oân lâng khiā-khí ê kak-sı̀.
Boe̍h-àm ê jı̍t iáu iām, hong iā thàu,
Hông-hun ê kò͘-hiong hong-poe-soa tng kāu.
Chóng-sı̄ lán m̄-bián koh chhiùⁿ,
Ī-kok liû-lōng ê ai-chhiû.
Tó tı̄ chháu-siū ê un-loán,
Kiám bô iâⁿ-koè tha-hiong thong-mı̂ ê su-loân?
Chài-hoē, Tâi-oân Ha̍k-seng,
Tâi-oân kian-tēng ê sûn-chêng,
Taⁿ lán chı̍t-lâng áⁿ chı̍t-pha hoé,
Kiâⁿ-jı̍p ta̍k-tiâu àm-àm ê koe.
Thèng-hāu hoé nā sio hoa,
Sio-thǹg-thǹg ê hu iû-goân iā-lo̍h
Lán bat chèng-chok ê hái-tó.
Tng jı̄-cha̍p sè-kı̀ kiâⁿ-jı̍p àm-mı̂,
Jı̄-it sè-kı̀ phú-kng ê sı̂,
Lán ê kha-jiah chı̍t-choā chı̍t-choā,
Liâm choè Bí-lē-tó jia̍t-phut-phut ê si-koa.
