Kóng Tâi-gí Chin Khin-sang(Tâi-gí-bûn Kio̍k-pún)
Tiûⁿ-só͘: Ko-hiông-chhı̄ Lo̍k-jı̂n Iù-tı̄-hn̂g Kàu-sek lāi.
Jı̂n-bu̍t: Lāu-su(LS), cha-po͘ gín-á(A-chong,AC), cha-bó͘ gín-á(A-lē, AL).
Tiûⁿ-kéng: LS, AC, AL chē tı̄ í-thâu-á téng, ûi chò poàⁿ-ı̂ⁿ hêng.
AC kap AL:Lāu-su gâu-chá.
LS: Lín chin gâu-chá. Kin-á-jı̍t chiok hó thiⁿ. Chia̍h pá á-boē?
AC kap AL: Chia̍h pá--ah.
AC: Lāu-su, lán kin-á-jı̍t beh kóng sím-mı̍h chhù-bı̄ ê tāi-chı̀?
LS: Lán beh lâi kóng Tâi-gí(thoa-tn̂g bān-bān-á kóng).
AL: (chhiúⁿ tāi-seng kóng) Lāu-su, goá châng ē-tàu kóng ū kàu chē Tâi-gí ô͘!
LS: Ô͘! Lí khı̀ tó-ūi chhit-thô ?
AL: (hoaⁿ-hí hêng) Châng goá kap Pa-pa, Ma-ma tò-khı̀ Pı̂n-tong chng-kha A-má tau chhit-thô, chin hó-sńg. A-má chhoā goá khı̀ bo̍k-tiûⁿ khoàⁿ gû. Ta̍k chiah gû lóng chin toā-chiah, chin pûi. Ū-ê teh chia̍h chháu, ū-ê teh lim-chúi, ū-ê tú-á chhut-sı̀ liân lō͘ to kiâⁿ bē chāi, chin kó͘-chui.....(i ê oē hō͘ AC cháⁿ tn̄g)
AC: (chhiúⁿ teh kóng)Uô͘ iê iô͘ suo͘ Thâi-yû.....(LS kā i ê oē chhiat tn̄g)
LS: A-chong, hō͘ A-lē--ah seng kóng liáu. Tán--chı̍t--ē khah oāⁿ lí kóng.
AC: (bô siáⁿ kam-goān)Hâu lah.
AL: Goá ta̍k pái khı̀ A-má in tau, A-má lóng ē chhoā goá khı̀ chhân--nı̍h, hn̂g--nı̍h, á-sı̄ bo̍k-tiûⁿ chhit-thô. A-má ē kā goá kóng chiok chē in sè-hàn sı̂-á ê tāi-chı̀. Bô chı̂ⁿ thang tha̍k-chheh, tio̍h ài khı̀ chhân-hn̂g tàu-saⁿ-kāng, mā ài kā lâng khan gû khı̀ chia̍h chháu. A-má koh ē kóng chiok-chē chiok chē kò͘-sū hō͘ goá thiaⁿ, goá lóng thiaⁿ kah khōng-kha-khiàu. A-má iā ū kà goá liām chiok chē koa ô͘!
LS: (tùi AL kóng) Chin--ê. A-lē, lí kám beh liām hō͘ tāi-ke thiaⁿ.
AL: hó ah. Tiám á tiám tin-tang, Gû-bah chhá hong-chhang. Tiám á tiám tin-tang, Pe̍h-soat Kong-chú beh kè ang. Tiám á tiám tin-tang, MacDonald hioh 5 kang. Tiám á tiám tin-tang, Superman pōng bí-phang. Tiám á tiám tin-tang, Sèng-tān Lāu-kong chhùi-khí lak kah lang-lang-lang. Tiám á tiám tin-tang, o̍h Tâi-gí chin khin-sang! O̍h Tâi-gí chin khin-sang!
LS: A-lē ū kàu gâu. Lán kā i phah pho̍k-á.A-chong, lí kám ū khı̀ chhoē A-kong, A-má chhit-thô?
AC: Pa-pa, Ma-ma hiı̂n-mâng, mê siı̂-chian tái uô͘ chhyú uái-phuô͘ chia. Mê chhií táu ná pian, A-má, A-kong thaⁿ-miı̂n suo͘ tiih Thâi-yû uô͘ iô͘ thin mê iô͘ tông, lı̂n-chyu tiih siâu-phn̂g-iô͘ iê to͘ suo͘ Thâi-yû, chiin pú hâu oân.
AL: Chó iáng hâu khô-sı̂! Chng-kha ū chiok chē chiok chē hó sńg ê tāi-chı̀. Goán A-kong, A-má ē chhoā goá khı̀ chhân--nı̍h hop sı̀-kha-á, khı̀ chúi-khut-á piⁿ lia̍h o͘-tō͘-koâi-á, kā goá kóng chiok chē kó͘-chá kó͘-chá ê kò͘-sū. Goá siōng ài tı̄ àm-sı̂ chia̍h pá liáu-āu, tó tı̄ A-má ê seng-khu piⁿ khoàⁿ thiⁿ-téng ê chhiⁿ kah goe̍h-niû, bô tiuⁿ-tı̂ tio̍h khùn--khı̀--ah. Goá mā ū kah chhù-piⁿ ê gín-á sńg pò keh-á, chhiāng-óng, siàn ang-á-phiau, tiak chu-á, che lóng sı̄ lán tı̄ Ko-hiông chhı̄ lāi sńg bē tio̍h ê mı̍h-kiāⁿ (AL jú kóng jú hoaⁿ-hí).
AC: (him-siān ê piáu-chêng) Chó iáng hâu sín-fû o͘h! Uô͘ to͘ pú sı̂n chó iáng. A-má suo͘ tiih hoá, uô͘ thin pú tông, uô͘ chiı̂ nn̂g í-chiı̂ toé thaⁿ sâ-siáu. A-má toé Ma-ma suo͘, “Khah ē bô kà i kóng Tâi-gí. Hāi goá nā tú tio̍h chiah ê gín-á ná é-káu khı̀ tú tio̍h chhàu-hı̄ⁿ-lâng--leh.” Chiin sang nâu-chin.
LS: A-chong lí m̄-bián kiaⁿ, koh koè chı̍t sı̂-á, lí tō ē-hiáu kah A-má kóng Tâi-gí--ah.
AC: Chin ê mā?
LS: Sı̄--ah. Tùi Kin-nı̂ ê 9 goe̍h-hūn khai-sí, choân Tâi-oân só͘ ū ê sió-pêng-iú lóng tio̍h ài o̍h Tâi-gí. Ta̍k lé-pài ū 1 kàu 2 chiat ê Tâi-gí khò. Koè bô goā kú, A-chong lí tio̍h ē-hiáu kah A-má kóng Tâi-gí, mā ē-sái kah chng-kha ê sió-pêng-iú chò-hoé chhit-thô--ah.
AC: Ū chiah-nı̍h-hó ê tāi-chı̀. Pú-kuó͘ uô͘ tiih lâu-sii hâu-siáng to͘ pû-hoé suo͘ Thâi-yû, thaⁿ-mn̂g chiı̂n-moh chiau uô͘-mn̂g? (AC ū sió-khoá hoâi-gı̂)
LS: Che lí m̄-bián kiaⁿ. Lán Sin-heng-khu ê Siā-khu Tāi-ha̍k í-keng beh tı̄ kin-nı̂ 8 goe̍h 27 kàu 12 goe̍h 30 lâi pān sió-ha̍k tiong-ha̍k Tâi-gí lāu-su ê su-chu jı̄n-chèng poê-ióng, bo̍k-tek tio̍h sı̄ beh hùn-liān chiah ê lāu-su ē-hiáu kóng Tâi-gí, ē-hiáu kà Tâi-gí, ē-sái kā lán chiah ê gín-á-hiaⁿ kah gín-á-koaⁿ kóng chiok chē Tâi-oân sim-sek ê mı̍h-kiāⁿ. Siōng tiōng-iàu--ê sı̄ kà lán ē-sái kah A-kong, A-má kóng-oē, khai-káng, ē-hiáu thiaⁿ A-kong, A-má kóng-kó͘ ô͘!
AC: Chó-iáng hâu páng! (koh lâi tùi kiàⁿ-thâu kóng) Sû-sû, Puô͘-puô͘, Ku-ku, A-ı̂, chhı̂n nı̍h-mn̂g ı̂-tín iáu lâi sáng-khó syoê Thâi-yû o͘h!
AL: (ǹg kiàⁿ-thâu) Tāi-ke tàu-tı̄n lâi o̍h Tâi-gí, hō͘ só͘ ū ê sió-pêng-iú lóng ē-hiáu kóng Tâi-gí. A-kong, A-má phō sun, thiaⁿ sun chhiò-haiⁿ-haiⁿ.
LS: (ǹg kiàⁿ-thâu) Beh kà lán ê gín-á kóng liàn-tńg ê Tâi-gí, beh ín-chhoā in him-sióng Tâi-oân hong-hù koh sim-sek ê le̍k-sú bûn-hoà, beh hō͘ in poê-phoāⁿ A-kong, A-má chò-hoé liū-koè kó͘-chá-sı̂ ê kı̀-tı̂. Chhiáⁿ lín lâi pò-miâ Ko-hiông-chhı̄ Sin-heng-khu Siā-khu Tāi-ha̍k ê Tâi-gí-bûn Siá-chok kap Him-sióng. Pó-chèng lín ē-tàng o̍h tio̍h siōng-kài chèng-khak ê Tâi-gí-bûn, siōng-kài chhù-bı̄ ê Tâi-oân kò͘-sū, siōng-kài ū kó͘-chá-bı̄ ê Tâi-oân hong-sio̍k, siōng kài chhiⁿ ê Tâi-oân bûn-hoà.
Kám-siā! Ló͘-la̍t. E̍k-chiá Koeh Bûn-kheng
(Tâi-oân-jı̄ cha̍p-chı̀ tē 8 kı̂, 2001 nı̂ 7 ge̍h)
