Kı̂-ı̄ⁿ ê Phô-tō-chhiū

Lı̄ Eng-kok ê kiaⁿ-siâⁿ Lûn-tun sı̀ hò͘-lō͘ ū chı̍t keng ông-kiong (Hampton Co͘rt Palace). Hit keng khí í-keng sı̀-pah goā nı̂ kú. (Hiān-kim kok-ông khiok bô toà tı̄-hia). Tı̄ hit lāi-bı̄n ū chèng phô-tô-chhiū; in-ūi thiⁿ-khı̀ léng ê iân-kò͘, bô chèng tı̄ goā-bı̄n; sı̄ khí po-lê-chhù, lâi chai tı̄ hit lāi-té. Tı̄ 1768 nı̂, kàu-taⁿ í-keng 159 nı̂ chiok, tı̄ hit-hō po-lê-chhù ū chai chı̍t-châng phû-tô, hiān-kim iáu oa̍h-teh, koh chin gâu siⁿ, bat ū chı̍t-nı̂ siⁿ oá 2200 pha, chóng-sı̄ ta̍k-nı̂ ū san-khí-lâi, chí-ū lâu 500 goā pha nā-tiāⁿ, múi-pha chhı̀n tāng ū chı̍t-kin chı̀ nn̄g-kin, koh boē chin hó-kè; lêng-seng boē chı̍t-kin ū saⁿ-kho͘ saⁿ-kak, só͘-í chı̍t-châng múi-nı̂ chhut-sek chha-put-to 1500 kho͘. M̄-nā án-ni-seⁿ. Lâng khı̀ khoàⁿ, iā ū chı̂ⁿ thang thàn. Ta̍k-nı̂ peh-sı̀ⁿ chin-chē tùi sı̀-hng kok-kok lâi khoàⁿ chit châng koh-iūⁿ ê chhiū. Jı̍p-mn̂g kok lâng tio̍h bé chı̍t tiuⁿ 4 chiam chı̂ⁿ (one peⁿy) ê jı̍p-tiûⁿ-kǹg. Kū-nı̂ oá 28 bān lâng khı̀ khoàⁿ; só͘ siu ê chı̂ⁿ sı̄ oá chı̍t bān nn̄g chheng kho͘. Koé-chí teh-beh se̍k ê sı̂-chūn, chiū ná lāu-jia̍t. Kin-nı̂ sin-le̍k 8 goe̍h-kan ū 72000 lâng khı̀ khoàⁿ;só͘ siu ê chı̂ⁿ ū saⁿ-chheng goā kho͘. Sèng-keng siông-siông bat kóng-khí phô-tô-chhiū ê tāi-chı̀. Iâ-so͘ kóng i sı̄ chin ê phô-tô-chhiū, I ê ha̍k-seng chiū-sı̄ ki; koh hiah ê ki, “kı̀ⁿ-nā kiat koé-chí ê, I chiū siu hō͘ i chheng-khı̀, hō͘ I kiat koé-chí koh-khah chē” (Iok-hān 15 chiuⁿ). (Tâi-oân-kàu-hoē-pò tē 503 koàn, 1927 nı̂ 2 goe̍h)