Tām-chúi tiong Ha̍k-hāu lia̍t-ūi seng-tô͘ pêng-an !
Tùi goán kap lín saⁿ lı̄-khui kàu chit-tia̍p, tı̄ lō͘-tiong ū tit-tio̍h pêng-an. Chúi-lō͘ chin pı̂ⁿ-tháⁿ. Sui-bóng tı̄ toā-iûⁿ thiⁿ-khı̀ put-chí léng, siông-siông ū lo̍h seh, iáu-kú hong-éng put-chí tiām-chēng.
Tùi Hoâiⁿ-pin kàu Ka-ná-tāi tah chûn 15 jı̍t kú, tı̄ lō͘-tiong bô sím-mı̍h thang khoàⁿ, chí-ū kúi-nā bé keng-hı̂ nā-tiāⁿ. Chı̍t jı̍t ū chı̍t bé put-chí toā bé, tāi-iok ū sı̀ tn̄g tn̂g, phû oá tı̄ chûn-nı̍h. I ê thâu-khak chha-put-to ū chı̍t tn̄g khoah.
Kàu Vanco͘ver, ū kàu-hoē kap pêng-iú lâi tán-chih goán. Goán tı̄-hia 2 jı̍t kú, toà tı̄ chá-nı̂ thong sè-kài Marathon soán-chhiú ê lâng ê tau. Hit ê soán-chhiú sı̄ miâ kiò Dick Grant. I soè-hàn ê sı̂ nā tah hé-chhia, á-sı̄ chē bé-chhia chiū hı̂n; só͘-í ko͘-put-chiong tio̍h liān-sı̍p cháu. Tùi án-ni i chiâⁿ choè sè-kài ê soán-chhiú.
Lı̄-khui Vanco͘ver goán koh chē hé-chhia, keng-kè Lo̍k-ki soaⁿ lâi kàu chit ê só͘-chāi. Ka-ná-tāi ê hé-chhia put-chí toā tiuⁿ. Mı̂-sı̂ ū pı̄-pān bı̂n-chhn̂g, jı̍t-sı̂ ū chàu-kha thang hō͘ lâng chú-chia̍h. Án-ni só͘-hùi khah séng. Nā-sı̄ tı̄ chhia-lāi sı̍t-tông chia̍h, ta̍k hāng chin kùi. Koe-nn̄g 1 lia̍p 4 kak gûn, keng-chio chı̍t koeh 6 kak gûn, kam-á chı̍t lia̍p 7 kak. Nā-sı̄ tı̄ chhia-lāi ū thih-chàu, ka-kı̄ pı̄-pān chiū chin séng. Tı̄ chhia-lāi goán ta̍k tǹg ū chú-pn̄g, put-chí lı̄-piān kap sim-sek. Pa̍t ê tah-kheh put-chí piàⁿ-sè, lóng sı̄ ko-téng ê chóng-phò͘, chin gâu chú. Keng-kè Lo̍k-ki soaⁿ, kéng-tı̀ kàu-ke̍k súi. Soaⁿ-téng lóng sı̄ seh, soaⁿ-kha sı̄ chhiū-nâ kap chhân-hn̂g. Nā-sı̄ koân ê soaⁿ lóng sı̄ chı̍t bān chhioh í-siōng. Lo̍k-ki soaⁿ kè liáu (2 jı̍t, 1 mı̂) chiū keng-kè chı̍t ê toā pı̂ⁿ-iûⁿ. Chit ê só͘-chāi chhut be̍h kap gû, bé chin choē.
Hiān-chāi goán tiàm chit ê só͘-chāi sı̄ tı̄ chng-nı̍h, khah koân hái 1800 chhioh. Thiⁿ-khı̀ tı̄ chia put-chí léng; chā-hng kap kin-á-jı̍t ū lo̍h seh; chúi tı̄ goā-bı̄n ū kian peng poàⁿ-chhùn kāu. Nā-sı̄ lín tı̄ Tâi-oân teh ia̍t-sı̀ⁿ chin joa̍h. Tı̄ chit chng-nı̍h só͘-chāi ê peh-sı̀ⁿ put-chí khai-hoà kap bûn-bêng. Choh-sit lâng khah choē ka-kı̄ ū chū-tōng-chhia. Chhù-lāi ke-ke hō͘-hō͘ iā ū tiān-oē. Téng lé-pài goán tı̄ chı̍t keng chng-nı̍h ê kong-ha̍k-hāu choè lé-pài. Chú-lí lé-pài--ê, sı̄ chı̍t ê choh-sit lâng; jı̍h-khı̂m--ê, sı̄ tāi-ha̍k ê chut-gia̍p-seng. Ū 6 tiuⁿ chū-tōng-chhia kap 2 tiuⁿ bé-chhia chài chiah-ê choh-sit lâng khı̀ lé-pài. Chhia lóng sı̄ in ka-kı̄ ê.
Hiān-chāi goán toà ê só͘-chāi lı̄ chit ê sió koe-chhı̄ phò͘ poàⁿ lō͘. Chit ê koe-chhı̄ chí-ū 700 lâng. Iáu-kú só͘-chāi put-chí hoat-ta̍t. Ū 3 ê i-seng, 3 ê piān-hō͘-sū, 4 keng lé-pài-tn̂g, chı̍t keng lú-koán 3 chàn lâu, chı̍t keng sió-ha̍k-hāu, chı̍t keng tiong-ha̍k-hāu, iā chı̍t khám tiàm kap Hú-chêng-koe siōng toā khám-ê pı̂ⁿ toā.
Chā-hng koe-nı̍h ê lâng ū chhiáⁿ goán khı̀ ián-soat. Goá ū kóng-khí Tām-chúi Tiong Ha̍k-hāu ê sū hō͘ in thiaⁿ. In put-chí ài chai lán Tâi-oân ê tāi-chı̀.
Koh nn̄g lé-pài goán beh lı̄-khui chia khı̀ To-lûn-to siâⁿ. To-lûn-to sı̄ toā só͘-chāi ū 50 goā bān lâng. Tùi chia kàu hia, chē hé-chhia tio̍h 3 jı̍t kú. Ǹg-bāng tı̄-hia tit-tio̍h hó ki-hoē thang pò in chai lán Tâi-oân ê siau-sit.
Chit tiuⁿ phoe kàu ūi ê sı̂ lín í-keng teh chhı̀-giām. Bāng lín tāi-ke sió-sim chiàu-kò͘ lín ê sin-thé. Iā siông-siông tı̀-ı̀ pó-siú lín ê phín-hēng. Goān lán ê Thiⁿ-pē jı̍t-jı̍t chiàu-kò͘ pı̀-iū lín.
Sūn pit chhéng-an. Tāi-chèng 10 nı̂ 5 ge̍h 12 hō
Kai Joē-liâm siá.
(Tâi-oân Hú-siâⁿ Kàu-hoē-pò tē 437 koàn, 1921 nı̂ 8 ge̍h)
