Kam-chià chhin-chhiūⁿ I ê miâ

Goán ê kàu-hoē ū chı̍t-ê Hoâ-koan ché, chin gâu chhah-hoe. I ê gâu m̄-sı̄ phó͘-thong ê gâu, sı̄ tō-hêng chhim koh kâⁿ ū bı̄ ê sai-hū-thâu. Kin-nı̂ sin-chhun, i ēng kam-chià ûi káng-tâi, hō͘ goán ná tiàm tı̄ kam-chià-hn̂g tiong chò lé-pài. Kam-chià tú-tú chhin-chhiūⁿ i ê miâ, hó chia̍h kiam hó-thiaⁿ, chı̍t-ki m̄-bián loā-choē chı̂ⁿ, pō͘ jı̍p chhùi-lāi sı̄ siang-thâu tiⁿ, Tâi-oân ū kam-chià, lán ê sim ná ē boē kám-siā. Kin-nı̂ ê bú-chhin-chiat, i koh hùi sim-hiat, pài thok Sù-thı̄n hiaⁿ tńg-khí Kháu-pi ê soaⁿ-téng, chhò kúi-ki tek, ēng tek piⁿ chò kè, hō͘ Chú-jı̍t-o̍h ha̍k-seng tiàm hit téng koân lâi chhah-hoe. Hoe-kè piⁿ hó hit ē-po͘, bô hong iā bô hō͘, Chú-jı̍t-o̍h ha̍k-seng sio-chhoā lâi-kàu lé-pài-tn̂g, chhah-hoe chhah kah boē-kı̀-tit thang chia̍h-pn̄g. Hoe seng chhah tı̄ sè-sè ê hoe-nâ, the̍h lâi tek-phō kha, tùi kē tiàu chiūⁿ koân, tùi koân tiàu lo̍h kē, tiàu kah kui-ê hoe-kè choân-sı̄ hoe. Koè-jı̍t ê chá-khí, chò lé-pài ê sı̂, in chiū khiā tiàm tek-phō kha lâi hiàn-si. Tek koân, a-bú ê un-chêng koh khah koân, hoe súi, a-bú ê sim-tn̂g koh khah súi. Goān Siōng-tè chiok-hok lín, éng-oán chheng-chhun, bí-lē, chhin-chhiūⁿ hoe siông khui. ( Tâi-oân Kàu-hoēKong-pò tē 2066 kı̂, 1991 nı̂, 10 goe̍h )