A-Tiong peh kap A-Tiong ḿ sı̄ chı̍t tùi tiong-hō͘ iū-koh láu-sı̍t ê chò-sit lâng. Ang-á-bó͘ nn̄g lâng sui-jiân bô siū sím-mı̍h kàu-io̍k, m̄-kú khiok chai-poê chhut chı̍t ê chiâⁿ ū sêng-chiū ê hāu-seⁿ, i sı̄ tı̄ Bí-kok chı̍t keng chin chhut-miâ ê kong-si teh chia̍h thâu-lō͘, sǹg--khí-lâi ká-ná chin hó-koè ê khoán-sit.
Ū chı̍t nı̂ ê joa̍h-thiⁿ, A-Tiong peh chiap tio̍h in kiáⁿ tùi Bí-kok kià--lâi ê phoe, kóng beh kiò in nn̄g ê lāu--ê khı̀ Bí-kok thit-thô, sūn-soà toà--chı̍t-chām-ah. Nn̄g ê lāu--ê chham-siông ê kiat-kó, chiū koat-tēng beh khı̀--lah. In-ūi tùi in ê cha-po͘ sun saⁿ tang chêng tı̄ Bí-kok chhut-sı̀ í-lâi, iáu-koh m̄ bat kı̀ⁿ-koè i chı̍t bı̄n, mā m̄ chai seⁿ-chò ı̂ⁿ, á-sı̄ píⁿ.
A-Tiong peh kap A-Tiong ḿ nn̄g lâng lóng ū chá khí--lâi ê sı̍p-koàn. Chá-khí-sı̂ thiⁿ iáu boē kng, nn̄g ê lāu--ê chiū sio-chio khı̀ hái-piⁿ-á sàn-pō͘, tı̄ lō͘-tô͘ tiong soà tú tio̍h chı̍t ê jia̍t-chêng ê a-tok-á tùi-bı̄n kiâⁿ--koè-lâi. Chú-tōng gia̍h chhiú kā in sio-chioh-mn̄g kóng, “Gû bô ni.” A-Tiong peh thiaⁿ bô ı̀-sù chiū soà-chhùi kā i ı̀n kóng, ”Goá A-Tiong.” Chhin-chhiūⁿ chit khoán chêng-hêng sio liân-soà tāi-khài ū chı̍t lé-pài kú. Ū chı̍t àm, tng choân ke chò-hoé teh chia̍h àm-tǹg ê sı̂, A-Tiong peh tòng boē tiâu chiū khui-chhùi mn̄g i ê hāu-seⁿ kóng, “Gû bô ni” tàu-té sı̄ sím-mı̍h ı̀-sù? In hāu-seⁿ bûn-bûn-á chhiò i kóng, “He tō-sı̄ gâu-chá ê ı̀-sù--lah.” A-Tiong peh tı̀m-thâu sè-siaⁿ hoê-èng kóng, “Hò͘ⁿ! án-ni--o͘h,” sim-lāi ū sò͘ ê khoán.
Keh-tńg chá-khí A-Tiong peh kap A-tiong ḿ te̍k-pia̍t koh khah chá khí--lâi, lâi kàu tı̄ pêng-siông-sı̂ kap A-Tok-á sio tú-bı̄n ê só͘-chāi thèng-hāu, tng A-Tok-á kiâⁿ kı̄n-oá--lâi ê sı̂, chiū koáⁿ-kín seng kia̍h chhiú chhut toā-siaⁿ kiò kóng, “Gû bô ni.” Chit hoê oāⁿ A-Tok-á chū-jiân teh ı̀n i kóng, “Goá A-Tiong.” Náu-kin chı̍t sı̂ tńg boē koè--lâi ê A-Tiong peh, sim-lāi teh siūⁿ, “ngh, ngh, ná ē án-ni? Chin kı̂-koài--o͘h?”
(Tâi-oân-jı̄ tē 7 kı̂, 2001 nı̂ 5 ge̍h)
