Khò͘ Le̍k-tek ê sió-toān

Tı̄ A-hui-lı̄-ka chiu ū chı̍t-ê Kam-tok, sèⁿ Khò͘ miâ Le̍k-tek. Chò gín-ná ê sı̂, i tú-tio̍h Hoê-hoê-kàu khí peng lâi thún-ta̍h i-ê hiuⁿ-siā, sio hit só͘-chāi ê chhù-the̍h, thâi hiah-ê ióng-chòng ê lâng. Nā-sı̄ hū-jı̂n-lâng cha-bó͘ gín-ná kap sè-hàn gín-ná lóng hō͘ i lia̍h liáu-liáu; ēng chûn chài-khí se-iûⁿ ê só͘-chāi, bē lâng chò lô͘-châi.

Khò͘ Le̍k-tek chò gín-ná ê sı̂, i-ê pún-miâ kiò A-kài; lāu-pē hō͘ lâng thâi-sí, pún-sin kap i-ê lāu-bó sió-tı̄ sió-moē lóng-chóng hō͘ lâng lia̍h khı̀, koáⁿ jı̍p toā-chûn té, kan-khó͘ kóng bē-liáu. To̍k-to̍k keng-koè jı̍t-chí put-chí kú-tn̂g, hái-ê chúi-lō͘ iā chin-hn̄g; só͘-í tı̄ chúi-lō͘ ê tiong-kan sí beh chı̍t-poàⁿ khı̀. Tán-thāi kàu se-iûⁿ, A-kài hō͘ lâng bē, kā lâng oāⁿ chı̍t-chiah bé; i-ê lāu-bó sió-tı̄ sió-moē koh lēng-goā bē hō͘ pa̍t-lâng chò lô͘-châi; koh hō͘ lâng kúi-nā hoan kā bē-lâi bē-khı̀. Kàu boé-chhiú lâi, lóng sı̄ chiong lâng oāⁿ hoè; pah-goā lâng ê tiong-kan lóng hē tı̄ chhng-té, sí--ê put-chí chē.

A-kài tit-tio̍h bô siáⁿ-tāi, beh koh chài-khı̀ pa̍t só͘-chāi. Kai-chài tı̄ chúi-lō͘ ê sı̂, tú-tio̍h chhut-sûn hái-bı̄n ê peng-chûn, pı̄ i chó͘-chí, cha-giām hoàn-bē ê sū; só͘-í chhng-té hiah-ê sí bô liáu--ê, lóng-chóng koáⁿ-koè peng-chûn ê só͘-chāi, chèng-lâng hoaⁿ-hí phut-phut-thiàu. Liáu-āu chit-chiah peng-chûn pha tı̄ Hok-lı̄-teng siâⁿ, kı̄n hit só͘-chāi ê káng-kháu. Hit-ê siâⁿ-lāi ū chı̍t-chō Iâ-so͘-kàu ê lé-pài-tn̂g; toà tı̄ pài-tn̂g ê bo̍k-su lâi kàu hit-chiah peng-chûn ê téng-bı̄n, khoàⁿ-kı̀ⁿ A-kài chhin-chhiūⁿ sûn-liông ê khoán-sit; só͘-í mn̄g i , Lí kam-goān toè goá mah? Goá chiū chhoā lí jı̍p siâⁿ-lāi tha̍k-chheh, A-kài put-chí hoaⁿ-hí. Hit-ê bo̍k-su chiah chhoā i jı̍p siâⁿ kàu lé-pài-tn̂g lāi, kà-sı̄ i , iúⁿ-chhı̄ i . Kàu 18 hoè kam-goān siū sé-lé jı̍p kàu-hoē; só͘-í oāⁿ i-ê pún-miâ, kè-chò Khò͘ Le̍k-tek.

Tùi hit-tia̍p sêng-sı̍t kàu-ke̍k, lı̍p-chı̀ kng-bêng ê tē; kú-kú chú-ı̀ soan-tō ê sim, siông-siông kiaⁿ-liáu bē-tit kàu. Koh kàu Eng-kok ê Chu-ı̄ⁿ-lāi kúi-nā nı̂ lâi bián-lē, kèng-jiân ka-tı̄ chhut khùi-la̍t, tit-tio̍h toā chı̀n-pō͘; kàu tı̄ châi-tiāu chò chiâⁿ, chú-ı̀ beh khı̀ pún-hiuⁿ thoân tō-lí.

Kı̍p tńg-khı̀ pún só͘-chāi liáu-āu, chiong-kı̄n saⁿ nı̂ ê kú, hut-jiân tú-tio̍h i-ê lāu-bó, iáu teh kā lâng chò lô͘-pı̄; tāi-ke sò͘-chhut kan-khó͘ ê chêng, iā hoân-ló, iā hoaⁿ-hí; kai-chài i-ê sió-tı̄ sió-moē iā iû-goân tı̄ pún-hiuⁿ kā lâng chò lô͘-châi. A-kài chiū chhut-chı̂ⁿ kā i sio̍k-hoê. Sǹg lâi ê tiong-kan, chū pun khui kàu chò-hoé, í-keng 25 nı̂ ê kú; chiah kı̀-tit chiông-chiân tı̄ chit chiu khiā-khí ê lâng, bô chı̍t si-lı̂ ê tı̀-sek, chhin-chhiūⁿ cheng-seⁿ chı̍t khoán; saⁿ kap chia̍h lâng, kèng-pài ngó͘-siōng, só͘ kiâⁿ siâ-phiah; taⁿ kin-ná-jı̍t toā-toā cheng-choa̍h, kèng-jiân chai lé bat gı̄ ê lâng chē-chē, iáu-kú boē chı̄n. Só͘-í Khò͘ Le̍k-tek koan-chhut pún-sin ê chı̂ⁿ-châi, lâi chò sio̍k-hoê pa̍t-lâng ê sin-kè; tı̄ chit só͘-chāi chiū ū lâng o̍h hit-ê khoán, kám-hoà lâng chin-chē. Kàu tı̄ khui gı̄-o̍h, siat io̍k-eng-tông, í-kı̍p hoan-e̍k Sèng-chheh kap chiah-ê hó sū, chiām-chiām heng-khí. Kúi cha̍p nı̂ chı̄n-sim lâi kàu-hoà, chiū-sı̄ chit lâng chò khí-thâu; ná chin-chhiūⁿ A-hui-lı̄-ka chiu gâu ê sèng-jı̂n.

Tùi án-ni miâ-siaⁿ thoân kàu goā-pang; chèng-lâng kí i chò kàu-hoē-lāi ê kam-tok; hiān-sı̂ iû-goân tı̄ pún-hiuⁿ chhut-la̍t kà-sı̄ lâng. In-ūi jı̍t-chí khoài koè, hut-jiân-kan ló-mō͘; sui-sı̄ ló-mō͘, cheng-sı̂n iáu-kú chòng-kiān. Siūⁿ khí Khò͘-kong chò gín-ná ê sı̂, tú-tio̍h hō͘ lâng lia̍h, kut-jio̍k pun khui, koh keng-koè chē-chē ê kan-khó͘, kàu boé in bó-kiáⁿ ē koh chò-hoé, kiám m̄-sı̄ in-ūi Khò͘-kong ū hit tiám chin-sêng ê sim, tit-tio̍h Siōng-tè pı̀-iū tı̄ bô hêng bô siōng ê tiong-kan. M̄-nā kut-jio̍k tùi i chı̍t lâng tit-tio̍h in-tián, chiū hit chiu ê lâng pêⁿ-pêⁿ tit-tio̍h in-hūi. Nā m̄-sı̄ hit-ê bo̍k-su chhoā i tò-khı̀, chí-sı̄ i chò chiâⁿ châi-tiāu, beh thái-ē án-ni?

Chiok-kiàn Kiù-chú Iâ-so͘ ê chû-pi, bô sió-khoá m̄ kàu; án-ni thang chò kng-bêng ê kan-chèng.

(Tâi-oân Hú-siâⁿ Kàu-hoē-pò tē 65 tiuⁿ，1890 nı̂ 10 goe̍h)