4. Chià-hn̂g Tiong Ê Eng-hiông
A-thiam-peh in tú teh chhò kam-chià. Kı̄n-lâi ū tùi lâm-iûⁿ lâi ê chià-chéng kiò-choè “Sam-it-lêng--ê” (310 hō-á), kam-chià-ki sı̄ sè-sè, m̄-kú hoat-tit chin toā bô͘, chin ū gia̍h, chèng lo̍h-khı̀ hit thâu chı̍t-nı̂ boē-sı̄ hó, têng jı̄-nı̂, saⁿ-nı̂ koh-khah hó, gâu kò͘--ê ū ê têng gō͘-nı̂ chiah piàⁿ chià-thâu. A-thiam-peh siūⁿ kóng án-ni khah séng kang, koh siu-liōng iā bē-bái, só͘-í i iā kap lâng chèng chit khoán kam-chià. Nā-sı̄ kam-chià sı̄ chhah tı̄ soaⁿ-phiâⁿ, só͘-í nā chhò kam-chià ê sı̂, tio̍h ke ēng chin-chē kang-hùi, in-ūi it-it tio̍h tùi soaⁿ-phiâⁿ-téng ēng lâng-kang ngē giâ kàu ū gû-chhia lō͘ ê só͘-chāi, chiah ē tit hē gû-chhia. Sı̍t-chāi chin khiàm kang. Tú-hó chhò kam-chià ê khau-á-pêng liu-tio̍h A-thiam-peh, koáⁿ-sı̂ koáⁿ-khek tio̍h kín chhò, nā bô, koè khau chiū bô o͘-tâi (kam-chià chhia) thang hē, hit sı̂ sı̄ chin hùi-khı̀. Chı̍t lâng hı̄n bē-tit peh choè nn̄g ê, liân A-thiam-peh lāu-lâng to tio̍h chhut mn̂g.
Tú-gū Éng-hok-ah lâi, sı̄ chin toā ê pang-chān. Éng-hok-ah sı̄ hái-kháu lâng, chū 9 hoè chhut mn̂g kā lâng khoàⁿ gû-á, bān-poaⁿ ê kan-khó͘ to tú-tio̍h, jı̂-chhiáⁿ pí lâng khah toā-hàn, iok ū gō͘-chhioh-chhit goā oá gō͘-chhioh-peh. Jı̂n-châi siⁿ choè bē-bái koè-tit khı̀. Sui-jiân sı̄ m̄-bat jı̄, nā-sı̄ choè lâng khiam-pi, un-khûn kut-la̍t, pháiⁿ-miā kiáⁿ chhı̀n-chhái chia̍h, khang-khoè choè liáu ū sè-bı̄n, koh ū la̍t. A-thiam-peh khoàⁿ liáu chin kah-ı̀. Éng-hok-ah ka-kı̄ iā jı̄n-hūn, koh lâi siū A-thiam-peh in chı̍t-ke ê hó-ı̀, chin toā ê an-ùi. Jı̂-chhiáⁿ sı̄ tı̄ Ki-tok-tô͘ ê ka-têng, i kám-kak sı̄ i it-seng só͘ m̄-bat tú-tio̍h ka-têng-tek ê un-loán. Kam-chià chhò 3, 4 jı̍t chiū liáu, nā-sı̄ chiap lo̍h-khı̀ tio̍h ku̍t chhiū-chı̂. Tio̍h seng chhò chhiū-chı̂ kó, āu-lâi ku̍t chhiū-chı̂, koh tio̍h taⁿ chhiū-chı̂ kàu gû-chhia-lō͘ hō͘ gû-chhia chhia, soà giâ chhiū-chı̂ kó hō͘ gû-chhia chhia, chhia kàu chhù, ū-ê chiū án-ni bē chhiⁿ-chû, lâu chı̍t pō͘-hūn khí-lâi chhoah chhiū-chı̂-chhiam thang chhı̄ cheng-siⁿ. Chhiū-chı̂ kó-á tio̍h koè lân, jiân-āu pha̍k hō͘ ta, tui kui tui thang choè hoé-chhâ. Kam-chià chhò liáu, chià-ha̍h iā tio̍h tui kui tui thang hiâⁿ. Kı̄n-lâi chhâ chin oh khioh, nā khah chiâⁿ-mı̍h ê chhâ, chı̍t pah kin oá 25, 6 kho͘, só͘-í liân soaⁿ-lāi ê lâng to m̄-kam hiâⁿ chhâ, lóng taⁿ chhut-lâi bē.
Án-ni chhò kam-chià leh, liáu-āu koh ku̍t chhiū-chı̂ leh, liân-liân chiâⁿ poàⁿ goe̍h-jı̍t chin bô êng. Só͘-í Éng-hok-ah chū án-ni tiàm in hia choè kang. Chı̍t-chhut chı̍t-jı̍p lóng kap Chhiu-kùi-ah choè tı̄n, put-ti put-kak ná chhin-bı̍t. Ū chı̍t jı̍t teh chhò kam-chià ê sı̂, án-choáⁿ tùi hn̂g-kiⁿ ê chhiū-phè nâ-á, hut-jiân ē cháu chı̍t boé hō͘-soàⁿ-chat chhut-lâi, thái tú-hó ē sô tùi Chhiu-kùi-ah ê sin-piⁿ lâi, hut-jiân Chhiu-kùi-ah kiaⁿ chı̍t ē bı̄n chheⁿ sún-sún, khui siaⁿ hiàm, ki chı̍t ē chin toā siaⁿ, sin-piⁿ ê cha-bó͘ gín-á phoāⁿ, ū-ê kiaⁿ kàu cháu kàu poa̍h-poa̍h lo̍h-khı̀. Hit boé choâ chám-jiân toā-boé, tāi-iok ū saⁿ-chhioh goā oá 4 chhioh tn̂g, sı̍t-chāi chin ē kiaⁿ lâng. Éng-hok-ah kín cháu oá--lâi, kip kàu-teh bô khoà the̍h sím-mı̍h, chū án-ni chhun chhiú tùi choâ-boé kā i koāⁿ koân, hiù tı̍t-khı̀, tiàm thâu-khak boé hui chı̍t liàn, ēng-iáu chı̍t chhiú chhò kam-chià ê chià-to chū án-ni kā i sut-khı̀, hit boé choâ chū án-ni hō͘ i phut choè nn̄g koe̍h, hiat tùi hn̂g-goā chhiū-phè nâ-á hit pêng koè-khı̀. Ka-chài chha chı̍t tiám-tiám-á, nā bô Éng-hok lâi, Chhiu-kùi ah chiàu khoàⁿ ē hō͘ kā-tio̍h ê khoán. Kàu choâ phah-sí liáu, tāi-ke chiah chhiò--chhut-lâi. Tng-sı̂ kín-tiuⁿ kap hit-ê eng-hiông hı̀-ke̍k-sèng ê tiûⁿ-bı̄n sı̍t-chāi iā kiaⁿ, iā hó chhiò.
Hiah-ê cha-bó͘ gín-á-phoāⁿ put-ti put-kak chê-siaⁿ hoah kóng “Chhiu-kùi-ché, ka-chài lín Éng-hok hiaⁿ kiù--lí.” Bô phah-sǹg ê tiong-kan, soà chiong Éng-hok kap Chhiu-kùi-ah nn̄g ê lâng ê miâ kiò liâm chò-hoé, jı̂-chhiáⁿ hit tiong-kan koh ke hē chı̍t kù “Lín,” hián-bêng lâng soà chiong Éng-hok-ah kā i sǹg choè A-thiam-peh in ke-lāi ê chı̍t ê lâng ê khoán. Éng-hok-ah thiaⁿ chı̍t ē soà khiā--teh gāng-gāng, bı̄n âng-âng, kám-kak hı̄-á chin sio, bı̄n chin hoat-hōng, sim-thâu pho̍k-pho̍k-chhéng, sim-lāi ū bē-hiáu kóng ê hoaⁿ-hí kap boán-chiok-kám, chı̍t bı̄n kám-kak chin pháiⁿ-sè, tùi Chhiu-kùi sió-chiá chin put-chū; ná thang kóng, “Chhiu-kùi-ché ah, hó ka-chài lín Éng-hok hiaⁿ,” thiaⁿ liáu sim bē-hiáu kóng. Hāi-sí Chhiu-kùi sió-chiá bı̄n iā oa̍t bô lō͘, chı̍t ê bı̄n iā sı̄ âng kòng-kòng. Nā-sı̄ sim-lāi iā ū bē-hiáu hêng-iông ê khoài-kám, kap kám-kak tı̄ i ê sin-piⁿ ū khò-tit chū ê lâm-sèng, chin-chiàⁿ sı̄ ū eng-hiông khı̀-khài ê lâng. Thiaⁿ lâng kóng, “Lín Éng-hok hiaⁿ,” só͘-í i bô ı̀-sek, tùi chhùi ı̀n hiah-ê cha-bó͘ gín-ná phoāⁿ kóng, “Lín tio̍h-kâu lah.” Jiân-āu ēng bún-chhiò ê bı̄n, taⁿ-thâu khí-lâi thau khoàⁿ Éng-hok-ah. Éng-hok-ah sı̄ chı̍t kho͘ chhāi chhāi, bē su khı̀ hō͘ tiān tiān-tio̍h, kim-kim teh khoàⁿ Chhiu-kùi-ah ê tōng-chok. Só͘-í put-ti put-kak nn̄g ê sı̀ lúi ba̍k-chiu ê sı̄-soàⁿ soà it-tı̀ kau-chhe tı̄ chı̍t ê ı̀-gı̄ koh-khah chhim-tn̂g tiⁿ-bı̍t ê hoàn-sióng tiong.
Tùi hit jı̍t khí, Éng-hok-ah ná chún kám-kak chū-hū i ū pó-hō͘ Chhiu-kùi-ah ê gı̄-bū. Iā Chhiu-kùi-ah àm-àm iā kám-kak ài kap Éng-hok-ah chhin-kı̄n, thang tit-tio̍h i pó-hō͘ ê khoán-sit. Tùi án-ni, nn̄g ê chiū ná seⁿ-chhut chhin-bı̍t-kám.
5. Hoaⁿ-hí Ê Ba̍k-sái
Toā iok poàⁿ goe̍h-jı̍t āu khang-khoè lio̍h-á khah êng, Éng-hok-ah chiū siūⁿ kóng, taⁿ khah bô pek-kang lah, tāi-khài sı̄ A-thiam-peh káⁿ m̄-koh chhiàⁿ--i lah. Tùi án-ni ū chı̍t chá khí, i chiū siūⁿ beh kap A-thiam-peh in saⁿ-sı̂, koh khı̀ pa̍t-ūi chhoē khoàⁿ ū sím-mı̍h kang thang choè á-bô? A-thiam-peh, A-thiam-ḿ nn̄g lāu chin hó-ı̀ tı̍t-tı̍t kā i lâu. Kı̂-sı̍t i tiàm liáu sı̄ chin ài tiàm. Sim-té sı̄ teh siūⁿ, nā ē-tit tiàm chia khah-kú, m̄-sı̄, beh sı̄ ē-tit éng-oán tiàm chia m̄ chin hó. M̄-kú ka-kı̄ siūⁿ, beh-thái-ū kàu chit hō chu-keh thang hō͘ lâng lâu tı̄ chia khah kú, á-sı̄ éng-oán tiàm chia. Goân-in, (1) Ka-kı̄ siūⁿ goá sı̄ toaⁿ-sin-hàn, sı̄ liû-lı̂ sit-só͘ ê ko͘-jı̂, ná ē ū lâng iân neh. (2) Chiah-nih sàn, seng-khu tn̄g poàⁿ-bûn, kóng khah kiàn-siàu, iā bô saⁿ-á-khò͘ thang oāⁿ. Tı̄ chià-hn̂g soaⁿ-phiâⁿ choè kang siông-siông thǹg-pak-theh, hit-niá lāi-saⁿ tiāⁿ thǹg khí lâi soaⁿ-khe-á sé-sé leh, phi tiàm chhiū-phè nâ-á téng pha̍k hō͘ i ta, kàu beh tò-khı̀, chiah koh the̍h lâi chhēng. Bô thang thè-oāⁿ ê pō͘-hūn, sı̍t-chāi chhēng kàu bē kóng-tit ê kiaⁿ-lâng koh pháiⁿ-bı̄. Kı̂-sı̍t sim-té ka-kı̄ cha̍p-jı̄-hun ê ut-ı̀, koh loé-chı̀. M̄-kú koh chı̍t bı̄n, kám-kak tı̄ A-thiam-peh ê tau, só͘ hióng-siū tio̍h chit-khoán ka-têng-tek jı̂n-chêng un-loán ê khı̀-hun, sı̄ it-seng thâu chı̍t pái só͘ tú-tio̍h--ê. La̍k-hoè bô lāu-pē, cha̍p-hoè bô lāu-bú, káu-hoè khı̀ kā lâng chhı̄-gû, tı̄ āu-chek ê tau hō͘ lâng khó͘-to̍k, khı̀ chhı̄-gû-á ê sı̂ khùn gû-tiâu; chı̍t hāng, chı̍t hāng ná cháu-bé-teng, lóng tı̄ i ê thâu-náu lāi koh chhut-hiān.
Tı̄ chia cháiⁿ-iūⁿ, A-thiam-peh khoán-thāi i ná-chún ke-lāi lâng, ta̍k saⁿ-tǹg kap A-thiam-peh choè-hoé chia̍h, te̍k-pia̍t nā lé-pài-jı̍t, siông-siông liân A-thiam-ḿ, kap Chhui-kùi-ah iā tāi-ke choè-hoé chia̍h, thang pı̄-pān choè-hoé khı̀ siú lé-pài, sı̍t-chāi oân-choân ná chı̍t-ke lâng. Chı̍t sut-á to bô khoàⁿ-khin--i ê ı̀-sù. Koh chı̍t hāng hō͘ i só͘ m̄-bat tú-tio̍h ê sū, chiū-sı̄ múi àm ê ka-têng lé-pài. Tāi-ke choè-hoé gı̂m-si, tha̍k Sèng-keng, kı̂-tó hit-ê kèng-khiân ê khong-khı̀; te̍k-pia̍t A-thiam-peh ū chı̍t ê sı̍p-koàn, chiū-sı̄ ài khui-thiah Sèng-keng tiong kúi-kù kà-sı̄, bián-lē ê oē. I sı̄ chı̍t ūi thè-jı̄m ê lāu tiúⁿ-ló, nā-sı̄ i ê jia̍t-sim, kap kèng-khiân chin thang hō͘ lâng choè bô͘-iūⁿ. Koh chı̍t hāng hō͘ i ı̀n-siōng chin chhim-khek--ê, chiū-sı̄ Chhiu-kùi sió-chiá ê gı̂m-si, hit-ê siaⁿ ê súi, chheng-liāng, oán-choán, koân, kē, oē-kù hun-bêng, koh hit-ê gı̂m-si ê thài-tō͘ khiân-sêng, kiong-kèng, m̄-sı̄ chá i tı̄ Thian-thian-lo̍k, Chhian-lí-iân, Bān-lí-hông só͘ thiaⁿ-tio̍h hiah-ê ki-lú, á-sı̄ iá-ke só͘ teh chhiùⁿ ê khek, á-sı̄ liû-hêng koa só͘ ē pí--tit ê. I ka-kı̄ m̄-bat-jı̄, koh bô o̍h, nā-sı̄ thiaⁿ A-thiam-peh in chı̍t-ke teh gı̂m, sı̍t-chāi ū bē kóng tit ê kám-kek.
Te̍k-pia̍t ū chı̍t mı̂-hng, tha̍k-tio̍h chı̍t chām kò͘-sū kóng, Iâ-so͘ teh chhoē chı̍t chiah phah-m̄-kı̀ⁿ, kiâⁿ bê-lō͘ ê iûⁿ, koh kóng hòng-tōng-chú ê phı̀-jū, láu-sı̍t kóng i àm-chı̄ⁿ lâu chin-chē ba̍k-sái. Tông-sı̂ thiaⁿ-kı̀ⁿ in chhiùⁿ, “......Chí-ū chı̍t chiah bê tı̄ soaⁿ-kan, lı̄-khui iûⁿ-tiâu bô-lō͘. Bê tı̄ soaⁿ-niá, piàn kiâⁿ hong-pho, Bô siū liông-bo̍k koán-lí chiàu-kò͘......” I thiaⁿ chiah-ê oē, chı̍t sı̂ siūⁿ kóng hit chiah bê iûⁿ chiū-sı̄ i pún-sin, thâu àⁿ-àⁿ, ba̍k-sái hò͘ m̄-khui, kín ké chhut-khı̀ phùi thâm, soà khı̀ chhek-só͘ háu chı̍t khùn, ba̍k-sái chhit-chhit beh chiah koh jı̍p--lâi. I lia̍h-chún lâng m̄-chai, bô lâng khoàⁿ-kı̀ⁿ leh. A-thiam-peh, A-thiam-ḿ ba̍k-chiu he-he lāu-lâng-ke, bô kám-kak iā bô tek-khak, nā-sı̄ thái phiàn Chhiu-kúi-ah ē tit koè, Chhiu-kùi-ah lı̄-hāi, kúi-thâu kúi-náu, tiāⁿ-tiāⁿ to teh koan-chhat i ê hêng-tōng, jı̂-chhiáⁿ tùi sim-té teh koan-sim i ê tāi-chı̀. Put-kò chit-ê cha-bó͘ gín-ná sı̄ chin chèng-keng, pêng-sı̂ m̄-bat hih-hiauh, hoān-sū tāi-tāi toān-toān. I chiū khoàⁿ i lâi in tau, kúi cha̍p-jı̍t iā m̄-bat oāⁿ saⁿ-á-khò͘, lāi-saⁿ kiaⁿ lâng koh phoà-phoà, nā ū chhut-mn̂g, sı̄ lı̄-iōng jı̍t-iām thǹg khí lâi tiàm khe-á-té sé lâi pha̍k, beh tò-khı̀ koh chhēng lo̍h-khı̀--ê. I chiū-sı̄ put-jím-sim, koh jı̍p-mn̂g iā bô khoàⁿ-kı̀ⁿ i ū pau-ho̍k-á, liōng-pit seng-khu sı̄ chū chhēng hit-su, kı̂-û bô lah. Só͘-í i tı̄ kúi-nā-jı̍t chêng, chhut-khı̀ Sin-hoà ke-á tùi bé chhiū-chı̂ ê lâng sǹg-siàu ê sı̂ chiū ū kā i bé nn̄g-su lāi-saⁿ, lāi-khò͘ tò--lâi, nā-sı̄ chhoē iáu-boē ū chı̍t ê ki-hoē, m̄-káⁿ kóng chhut--lâi, iā kèng koh-khah m̄-káⁿ hiahN hō͘ i oāⁿ.
Kàu chit sı̂ khoàⁿ i sio-sı̂ beh tò-khı̀, iā in lāu-pē tı̍t-tı̍t kā i lâu. Kı̂-sı̍t i sı̄ bû ka khó-kui, tùi chia chhut-khı̀ liân kin-mı̂ m̄-chai beh khı̀ tó-ūi an-bı̂n to m̄-chai. Tı̄ chia in khoán-thāi i choè lâng-kheh, tı̄ lâng-kheh keng-á khùn. I soà hut-jiân koh siūⁿ tio̍h, “Chí-ū chı̍t chiah bê tı̄ soaⁿ-kan, lı̄-khui iûⁿ-tiâu bô-lō͘.” Soà kı̀m bē-tiâu soà háu chhut--lâi, A-thiam-peh tio̍h chı̍t kiaⁿ, koáⁿ-kín kā i an-ùi, chiah mn̄g i tàu-tí i ê sin-sè sı̄ cháiⁿ-iūⁿ? I chiah it-gō͘, it-cha̍p, tùi sí lāu-pē kóng-khí, kóng kàu lâi in tau ûi-chí ê khó͘-kéng sı̍t-chêng hō͘ in thiaⁿ. A-thiam-peh, A-thiam-ḿ, liân Chhiu-kùi Sió-chiá iā kı̀m bē-tiâu, tāi-ke tùi i cha̍p-jı̄-hun ê tông-chêng, soà sı̀-ê háu-háu choè chı̍t tui. Hit-sı̂ A-thiam-peh chhut-siaⁿ kóng, “Taⁿ lán tāi-ke kūi-lo̍h lâi kı̂-tó.” Tāi-ke chiū lóng ûi-ûi kūi-lo̍h tı̄ thiaⁿ-nih lâi kı̂-tó. Hit-ê ı̀-sù sı̄ kóng kiû Siōng-tè kiù chit-ê chheng-liân, thè chit-ê chheng-liân khui-lō͘. Siaⁿ siaⁿ, kù kù chin-chiàⁿ sı̄ kèng-khiân, chhin-chhiat, ū moá-moá ê thiàⁿ-sim.
Kı̂-tó soah khí-lâi, A-thiam-peh chiah khui-chhùi koh kóng, “Éng-hok, kı̀-jiân sı̄ án-ni, sǹg sı̄ bô chhin bô chhek, chí-ū toaⁿ-sin, goá chia iā sı̄ chin khiàm kang, chhiáⁿ lí m̄-bián koh khı̀ pa̍t-ūi, chū án-ni tiàm goá chia. Koh goá ǹg-bāng lí ē-tit kap goán tâng-sim pài Siōng-tè, ǹg-bāng Chú chín-kiù--lí. Lí siūⁿ cháiⁿ-iūⁿ?” Chhiu-kùi Sió-chiá iā chān-chhùi kóng, “Éng-hok-hiaⁿ tiàm chia lah. Goán pa-pa to án-ni kóng.” Éng-hok chı̍t sı̂ ū kı̀m bē-tiâu ê hoaⁿ-hí, siuⁿ hoaⁿ-hí soà koh háu chhut--lâi. I sı̄ kám-kak kin-á-jı̍t A-thiam-peh beh siu-liû--i, tùi kin-á-jı̍t í-āu i ū an-ki ê só͘-chāi. M̄-bián sim tiāⁿ khoà-sim, kóng taⁿ koh khı̀ m̄-chai beh khı̀ tó-ūi. Koh siāng iàu-kín chiū-sı̄ i kám-kak chhin-chhiūⁿ tùi “Ah! bô-chêng peng-léng ê lō͘-piⁿ, siū kiù cháu-jı̍p lâi thiàⁿ-thàng un-loán ê ka-têng.” Ná-chún chı̍t chiah poa̍h lo̍h lô͘-kô͘-moê té peh bē khí-lâi ê káu-á kiáⁿ, tng tı̄ beh sí, koâⁿ kàu khū-khū-chùn ê tiong-kan, hō͘ thiàⁿ i ê chú-lâng, khioh i lâi pó-sioh ê sim-chêng. Kı̀m bē-tiâu chū án-ni kūi tùi A-thiam-peh ê bı̄n-chêng kiò chı̍t siaⁿ “A-peh,” soà koh khui-siaⁿ háu kàu pí thâu-tú-á koh-khah chhám-chheh. A-thiam-peh kín kā i khan khí--lâi. Chı̍t chhiú hoāⁿ tı̄ i ê keng-thâu-téng kóng, “Tio̍h kám-siā Siōng-tè ê khui-lō͘.” Tùi án-ni khí--lâi, ba̍k-sái chhit-chhit-leh chiah bô koh háu.
6. Chiap-siū Iâ-So͘
Hit àm A-thiam-ḿ te̍k-pia̍t pān khah chhiⁿ-chhau, iā thâi ke, kiò bo̍k-su lâi saⁿ-kap chia̍h; bo̍k-su sūn-soà tı̄ hia ka-têng lé-pài, ēng chē-chē tō-lí lâi an-ùi, kóng hō͘ Éng-hok thiaⁿ. Éng-hok siū chin toā ê kám-kek. Lé-pài soah, bo̍k-su tò-khı̀. A-thiam-ḿ chiong Chhin-kùi-ah ūi-tio̍h Éng-hok-ah só͘ bé ê lāi-saⁿ lāi-khò͘ hiahN hō͘ i thang oāⁿ, chiū kiò i khı̀ sé seng-khu, kám-kak thong-ke toā hoaⁿ-hí, sui-bóng lóng bô lēng-goā piáu-sı̄ sím-mı̍h ı̀-sù, nā-sı̄ kám-kak lāi-bı̄n ke chı̍t ê lâng, hit-ê sim-chêng ū chhin-chhiūⁿ pē-kiáⁿ ê chhin. Keh-jı̍t A-thiam-peh the̍h 50 kho͘ (Jı̍t-pún sı̂-tāi ê chı̂ⁿ) hō͘ Éng-hok, kiò i khı̀ Sin-hoà ke-á khı̀ bé ê, boe̍h, á-sı̄ chián pò͘ tò-lâi choè saⁿ-khò͘ thang thè-oāⁿ. I lâi tiàm hia 15 jı̍t kú, nā chiàu sǹg, chia̍h thâu-ke, sı̄ bē kham-tit niá kàu hiah chē chı̂ⁿ, nā-sı̄ A-thiam-peh bô kap i kè-kàu. I chiū khı̀ bé chı̍t siang sin phâng-pò͘ ê, bé nn̄g siang boe̍h, koh chián tām-po̍h pò͘ tò-lâi, chhiáⁿ Chhiu-kùi sió-chiá kā i choè saⁿ. Keh-jı̍t lé-pài chiū chhēng sin saⁿ, sin ê, khı̀ lé-pài. Saⁿ hun lâng, chhit hun chng, thâu-mn̂g chián-chián leh, iû boah-boah leh, koh chhēng chı̍t-ē-á ha̍h-su ê saⁿ-khò͘, kak-tit chin hó khoàⁿ, chin-chiàⁿ sı̄ it-piáu ê jı̂n-châi.
Hit-hāng kau-chhiâng koh toā-hàn, thé-keh hó, koh ū la̍t, chiū chin iâⁿ--lâng. Tùi hit sı̂ Éng-hok-ah chiū kap A-thiam-peh chò-hoé tiàm. Éng-hok-ah kó-chin chin kut-la̍t, tiâⁿ-thâu tiâⁿ-boé chéng-lí kàu chin chheng-khı̀, chhù-chêng āu-piah ê lı̂-pa lóng koh têng ûi, ti-tiâu, ke-tiâu lóng koh têng chéng-lí; m̄-nā án-ni, sı̀-kè chı̍t-khang chı̍t-khut ê só͘-chāi lóng thūn hō͘ i pı̂ⁿ. Chit-ê ke hut-jiân chhin-chhiūⁿ tit-tio̍h sin ê oa̍h-khı̀, ná-chún chhiū-ba̍k chiap-tio̍h chhun-thiⁿ ê un-loán, lóng koh puh-íⁿ ê khoán-sit. Koè-khı̀ A-thiam-peh nı̂-lāu lah, chū-jiân ta̍k hāng ū pàng khah bô chiu-chı̀, lām-lām lùi-lùi. Taⁿ ke-lāi ná-chún ū sin ê chú-lâng lâi chiáng-lí ê khoán-sit, ta̍k hāng to ū sin ê khı̀-siōng.
Nā-sı̄ A-thiam-peh choè sū bô bóng-tóng, bô hâm-hô͘, i lóng bô kóng sím-mı̍h. I chù-sı̂n tiām-tiām teh khoàⁿ chit-ê chheng-liân. Tē it, ài khoàⁿ i ê sı̀n-gióng, ū hoaⁿ-hí chiap-siū Iâ-so͘ á-bô? Phín-hēng ū têng-thâu-siⁿ á-bô? Tē jı̄, ài khoàⁿ chit-ê chheng-liân ê sim-sèng ū tiāⁿ á-bô, chin-sim beh chò-hoé tiàm á-bô? Bān-bān koan-chhat i ê hêng-tōng kú-chí, kóng-oē, sim-su cháiⁿ-iūⁿ? Chhân, hn̂g, soaⁿ-phiâⁿ, chhù, sui-jiân sı̄ bô chē, m̄-kú sı̄ choân châi-sán, sı̄ chı̍t ke khò chiah-ê lâi seng-oa̍h--ê. Lāi-bı̄n bô pa̍t-lâng, chí-ū Chhiu-kùi ah, nā ē ēng-tit, chiū chiong Chhiu-kùi-ah phoè--i, chū án-ni chio jı̍p--lâi, iā choè bêng-lêng-chú ê khoán-sit. Tē saⁿ, nā beh án-ni, tio̍h chhûn Chhiu-kùi-ah ê ı̀-sù, chim-chiok khoàⁿ in nn̄g ê chheng-liân ē ha̍h á bē? Nn̄g ê ū iân-hūn á-bô? Só͘-í A-thiam-peh tiām-tiām lóng m̄ kóng. Khí-thâu sı̄ kóng choè tn̂g-kang, chia̍h piān-piān chı̍t goe̍h-jı̍t 30 kho͘, koh khı̀ chiah chiàu khoàⁿ. Chhin-chhiūⁿ án-ni chı̍t nı̂ liân kú, lâi ê sı̂ Éng-kok-ah sı̄ 21 hoè ê oá chiâⁿ cha̍p goe̍h-á hit sı̂, taⁿ ba̍k-chı̍t-nih sı̄ keh-nı̂ ê oá 11 goe̍h lah. Chit sı̂ Éng-hok-ah sı̄ 22 hoè, Chhiu-kùi-ah sı̄ 21 hoè. A-thiam-ḿ tiāⁿ koáⁿ A-thiam-peh, kā i kóng, “Lāu-è, khoàⁿ sı̄ thò-tòng lah. To hō͘ lán khoàⁿ nı̂-goā kú lah, khoàⁿ liáu sèng-chêng to chin hó, iā chin kut-la̍t.” A-thiam-peh sim-lāi iáu teh tán chı̍t hāng sū, chiū kóng, “Bān-chiah leh, goá iáu teh tán chı̍t hāng sū, nā-sı̄ goá m̄ kóng-chhut, beh tán kàu kàu sı̂ chiah lâi phah-sǹg.”
A-thiam-ḿ lia̍h-chún sı̄ hō͘ in kap-pâng hit jı̍t ài kí-hêng kiat-hun-sek, ài chhiáⁿ lâng-kheh tio̍h thâi-ti. Só͘-í i chiū ı̀n kóng, “Lāu-è, goá ū chhûn-pān leh là, lí iā soà bô khoàⁿ-kı̀ⁿ goá ū keng chı̍t chiah pah chhit-peh kin ê ti-phoe, koh ke, gô, ah chı̍t tı̄n, lí kiám bô khoàⁿ-tio̍h.” ”M̄-sı̄ hit hō sū lah.” A-thiam-ḿ sahN-thâu m̄ khí, soà tiām-tiām m̄-káⁿ koh mn̄g. A-thiam-peh iā chū án-ni tiām-tiām.
Cha̍p-it goe̍h-boé ū chı̍t lé-pài, bo̍k-su hoat-piáu kóng chiok Sèng-tàn chêng beh mn̄g tō-lí, nā kam-goān chiap-siū sé-lé, beh koat-sim jı̄n Chú lâi kui-oá I ê lâng, thang lâi pò-miâ. Chū chá Éng-hok chiū chin pı̄-pān sim, pe̍h-oē-jı̄ Sèng-si, Sèng-keng iā lóng chin se̍k, ē hiáu tha̍k lah. Chin-chiàⁿ ū koat-sim beh chiap-siū Chú ê kiù-in, só͘-í i chiū kap A-thiam-peh chham-siông, kóng i beh khı̀ pò-miâ mn̄g tō-lí, khó-í put khó-í. A-thiam-peh kóng chū-jiân khó-í, chóng-sı̄ iû lí ê chū-iû, m̄-thang chhut tı̄ bián-kióng, koh-khah m̄-thang chham-chhap pa̍t-mı̍h ı̀-sù. Niá sé-lé, chí-ū chiū-sı̄ hián-bêng lí ū goān-ı̀ hoán-hoé chiap-siū Iâ-so͘ choè lí ê Chú, chí-ū án-ni ê ı̀-sù, í-goā m̄-thang siūⁿ kóng niá sé-lé kap lí tiàm goá chia á-sı̄ bô tiàm goá chia ū sím-mı̍h koan-hē.
Kèng koh-khah m̄-thang ūi-tio̍h hiān-chāi tiàm tı̄ goá chia ê chêng-hūn lâi thàn goá thiaⁿ tō-lí. Che oân-choân sı̄ chhut tùi lí ê chū-iû ı̀-chı̀, chū-hoat-tek, chū-kak tùi lêng-hûn ê chín-kiù ū su-iàu chiah thang. Éng-hok-ah kàu chia cha̍p-hun bêng-pe̍k tō-lí, chin-sı̍t chai Chú Iâ-so͘ í-goā pèng bô pa̍t ê chín-kiù. Iā chhim-chai Siōng-tè ê thiàⁿ, chiū koat-sim pò-miâ, siū mn̄g tō-lí. Tı̄ hit nı̂ ê 12 goe̍h 23 hit lé-pài, chiū siū chiap-la̍p, niá-siū Sé-lé, soà siū chiap-chiū Sèng-chhan. Taⁿ A-thiam-peh só͘ teh tán ê m̄-sı̄ pa̍t-mı̍h, chiū-sı̄ chit hāng, chiū-sı̄ ài chai i kó-chin oē choè chin-sı̍t ê Ki-tok-tô͘ á-bē. Nā ē, i chiah beh chiong cha-bó͘-kiáⁿ Chhiu-kùi-ah phit-phoè--i. Taⁿ Éng-hok-ah kó-jiân niá sé-lé jı̍p sèng-hoē lah. Hit sı̂ A-thiam-peh chiū chin hoaⁿ-hí, kā A-thiam-ḿ kóng, goá só͘ teh tán ê chiū-sı̄ chit tiám. A-thiam-ḿ chiah chhiò chhut-lâi kóng, “Lâng iā ē chai, lí to m̄ kā lâng kóng, lí nā khah-chá kóng, goá mā khah-chá kiò i khı̀ mn̄g tō-lí.” A-thima-peh kóng, “Án-ni to bô sı̍t-chāi, sı̄ ài hō͘ i chū-hoat-tek liáu-kái Chú ê chín-kiù, ūi beh chhoā-bó͘ tit ke-hoé ê, to bē ēng-tit.” “Lí lóng mā sı̄ án-ni, hiah-nih téng-chin.” “Sı̄ o͘h, lán cha-bó͘-kiáⁿ chí-ū chı̍t ê nā-tiāⁿ, koh it-chhè beh kau-tài i, m̄-thang ló-chhó.”
“Taⁿ i ka-kı̄ kam-goān khı̀ mn̄g tō-lí, koh hō͘ lí kā i kóng kàu hiah bêng lah, án-ni m̄ to hó lah, m̄-siáⁿ ?” “Iáu-boē leh, lāu-è, kín pháng bô hó-se, kín kè bô hó ta-ke, lí sı̄ m̄-bat thiaⁿ-tio̍h sı̄ bô? Lí kan-ta la̍k-la̍k-chhoah. Lí m̄-tio̍h koh mn̄g lán cha-bó͘-kiáⁿ khoàⁿ i beh bô?” “Ài-ò, lí chiâⁿ tı̍t ò͘, lāu-è, lí iā bô khoàⁿ nn̄g ê hiah ū oē kóng, tâng chhut, tâng jı̍p, nn̄g ê hiah sio thé-thiap, saⁿ pang-chān lâi chò-hoé choè khang-khoè.” “Sui-bóng sı̄ án-ni, mā tio̍h kā i mn̄g khoàⁿ leh, chun-tiōng kiáⁿ pún-lâng ê ı̀-kiàn.” Tùi án-ni chiū thau kiò kiáⁿ Chhiu-kùi-ah lâi mn̄g.
