10. Ài Khàu Bô Ba̍k-sái.
Chin-chiàⁿ sı̄ ài khàu bô ba̍k-sái, sim ná-chún beh piak-lı̍h ê kan-khó͘, hı̄n bē-tit chek-sı̂ chhah-sı̍t poe kàu ài-jı̂n ê sin-piⁿ. Pêng-sı̂ m̄-bat khı̀ kàu tang-pō͘, chū ta̍h-chhut pı̄ⁿ-ı̄ⁿ ê kha kín cháu kàu chhia-chām, khı̀ bé chı̍t tiuⁿ khoài-chhia-phiò, kàu Tâi-pak to͘ í-keng koè-tàu āu lah. Tùi hia koh choán chhia kàu So͘-ò͘. Tı̄ lō͘-tiong ū Ku-soaⁿ ê kéng-tı̀, iân-lō͘ chin súi, se̍k-iông chiò tı̄ hái-bı̄n, hông-hun kui-phâng ê hı̂-chûn ê bí-kéng, tùi tı̄ i lóng bô ı̀-gı̄ lah. Sim cha̍t thóng-thóng, siông-siông thau lâu ba̍k-sái. Kàu So͘-ò͘ í-keng àm lah, So͘-Hoa kong-lō͘ ê khı̀-chhia í-keng koè sı̂-kan, tio̍h tán-hāu bı̂n-á chá-khí chiah ū koh hoat-chhia. Taⁿ beh cháiⁿ-iūⁿ, ka-kı̄ chı̍t ê cha-bó͘ gín-ná-lâng m̄-bat poàⁿ ê lâng, chin chhiⁿ-so͘, m̄-bat chhut-goā chiah hn̄g. Nā siūⁿ beh khı̀ hioh lú-siā, iū siūⁿ tio̍h tı̄ nn̄g-goe̍h goā jı̍t chêng tı̄ Tâi-tiong Ka-pin lú-siā ê sū. Jı̄-hō-pâng ê khoán-sit, ná-chún tı̄ ba̍k-chêng hiān-hiān, siūⁿ liáu put-kak sim koh pho̍k-pho̍k-chhéng chin kiaⁿ. Só͘-í m-káⁿ siūⁿ beh khı̀ hioh lú-siā, kiâⁿ lâi kiâⁿ khı̀ chin ià-siān, āu-lâi khı̀ chhia-chām chē. Chē kàu chin àm, ka-kı̄ chı̍t ê kiaⁿ, che iā m̄-sı̄ pān-hoat. Āu-lâi ū chı̍t ê kéng-chhat lâi, chiah pài-thok i chhoā i khı̀ pài-tn̂g keh-mı̂.
Keh chá-khí bô khoà chia̍h-pn̄g, chiū khı̀ chhia-chām, bo̍k-su-niû lâu i chia̍h-pn̄g, i hui-siông ê kheh-khı̀, āu-lâi tı̄ chhia-thâu bé mı̄-pau chí-ki, chū chhut-mn̂g kàu chá-khí chiah chia̍h. Āu-lâi chē chhia. So͘-Hoa kong-lō͘ ê chhia, sui-jiân sı̄ khı̀-chhia (chū-tōng-chhia) iáu-kú ná hoé-chhia lè, khioh kui pang chiah hoat, ū-sı̂ chı̍t pang 7, 8 tâi chhia, chı̍t tâi chē iok 50 lâng. In-ūi lō͘ e̍h, chı̍t bı̄n soaⁿ, chı̍t bı̄n hái, hái tō sı̄ Thài-pêng-iûⁿ, hit-ê kéng-tı̀ hui-siông súi. Te̍k-pia̍t lō͘-tiong ū keng-koè Chheng-chúi toān-gâi, ū-sı̂ hái-bı̄n tà-bū ū khēng, chhia oán-jiân cháu tı̄ hûn-bū ê khēng-téng, chin-chiàⁿ ū “Ú-hoà teng-sian” ê kám-khài. Ná-chún hoat-sı̍t poe chiūⁿ thiⁿ ê chhù-bı̄. Sui-jiân sı̄ chiah súi ê kéng-tı̀, Lân-hiong lóng bô kám-kak. Chin-chiàⁿ sı̄ sim cha̍t-cha̍t, chí-ū Chheng-choâⁿ ê bı̄n-iáⁿ, kap Jı̄-hō-pâng ê chêng-hêng. Loân-ài, loān-ài tàu-tí sı̄ tiⁿ, á-sı̄ khó͘ ah? Siông-siông the̍h chhiú-kin-á khí lâi thau chhit ba̍k-sái.
Pēⁿ-ı̄ⁿ sı̂-chit khı̀, it-sim beh chhoē chêng-jı̂n, kàu hit mńg-po͘ chiah kàu Hoa-liân. Hit ē-tàu bô chia̍h, iā m̄-chai iau. Lo̍h-chhia chek-sı̂ kiò saⁿ-lián-chhia lâi chē, chhiáⁿ i kā i thoa khı̀ Tiong-chèng-lō͘ 35 hō. Kàu-ūi lo̍h-chhia, taⁿ-thâu chı̍t ē khoàⁿ, m̄-sı̄ phoê-ê tiàm, sı̄ sé-saⁿ-á tiàm. Tio̍h chı̍t kiaⁿ kā thoa-chhia--ê kóng, Lí kiám thoa tio̍h ūi? I kóng bô chhò. Chiū lo̍h khı̀ mn̄g hit keng sé-saⁿ-á tiàm ê láu-pán kóng, “Lín chia kiám m̄-sı̄ Tiong-chèng-lō͘ 35 hō?” “Sı̄.” “Kiám m̄-sı̄ Hoa-bí phoê-ê tiàm?” “M̄-sı̄.” “Bô, lín chia kiám ū Hoa-bí phoê-ê tiàm?” “Bô.” Lân-hiong soà gāng-gāng, ná-chún hō͘ tiān tiān--tio̍h chı̍t-iūⁿ, tiām-tiām khiā tit hó-kú, chiah koh mn̄g kóng, “Lín chia ū chı̍t ê kiò-choè Tân Chı̀n-sêng á-bô?” Hit-ê lâng ı̀n kóng, “Bô.” “Iā in kiáⁿ kiò-choè Tân Chheng-choâⁿ lín bat thiaⁿ-kı̀ⁿ--bô?” “M̄-bat.” Kàu-chia lâi Lân-hiong kha lóng nńg chı̍t koe̍h lah. Khoàⁿ lâi kàu chiah hn̄g, m̄-bat poàⁿ-ê lâng, tē-hng, lâng-bı̄n lóng chhiⁿ-so͘, chai oân-choân hō͘ Chheng-choâⁿ phiàn-khı̀ lah. Chin-chiàⁿ sı̄ ài sí bē tn̄g-khùi. Khoàⁿ chı̍t ê lâng hó hó m̄ choè, sı̄ pēⁿ-ı̄ⁿ só͘ tùi-tiōng ê hō͘-sū pan-tiúⁿ, sı̄ Ki-tok-kàu ka-têng ê lú-chú. Lâi thiaⁿ chit ê bē io̍h-á cháu kang-ô͘ ê lâng ê chhùi. Bô thàm-thiaⁿ, bô mn̄g pē-bó, bô bó mā iáu-ū pē. Bô kı̂-tó, kan-taⁿ thiaⁿ tiⁿ-bı̍t ê oē, ná-chún ho͘-sı̂n chí-ū khoàⁿ tio̍h thn̂g, m̄-chai kóng kiâⁿ-jı̍p ho͘-sı̂n-tng ê lāi-bı̄n, ē cháu bē tit chhut--lâi.
Mn̄g lóng bô, chin kiàn-siàu, iā khı̀, iā kiaⁿ, iā sit-bāng, bān-kám kau-chı̍p. Chin-chiàⁿ sı̄ ài khàu bô ba̍k-sái. Ba̍k-sái lóng kian lo̍h-khı̀, ba̍k-kho͘ âng-âng, chū án-ni pháiⁿ-sè, pháiⁿ-sè, bı̄n kín oa̍t piⁿ-á kiâⁿ lı̄-khui hit-keng sé-saⁿ-á tiàm. Hit-sı̂ jı̍t iáu kng-kng, m̄ kam-goān, ná siáu cha-bó͘ leh, ēng kiâⁿ--ê, chhiú koāⁿ chı̍t-sut-á tán-lō͘, beh hō͘ bı̄-lâi ê ta-koaⁿ, koāⁿ teh tōng-tōng-hı̀ⁿ, cháu-piàn Hoa-liân-chhı̄ beh jı̄n-chin kā i chhoē khoàⁿ ū Hoa-bí phoê-ê tiàm á-bô, khah-chhoē to͘ chhoē bô. Chhoē kàu àm, nn̄g-ki kha ngē khok-khok, kha-té lóng phòng-phā. Ū kúi-nā pái kiâⁿ tùi pài-tn̂g chêng koè, nā-sı̄ kàu chia iā bô hit hō ióng-khı̀ thang jı̍p-khı̀ mn̄g bo̍k-su. Kàu chia sin-thé sim-sı̂n lóng chin ià-siān lah. Chū án-ni thoa tı̂m-tāng ê kha, bān-bān ǹg pak-pêng ê toā-lō͘ bóng kiâⁿ. Sı̂ iā bô chá lah, tùi hia koh khı̀ chiū-sı̄ Bí-lûn. Kàu Bí-lûn kiô-téng chē tiàm hia háu chı̍t khùn. Hut-jiân siūⁿ khí chá-jı̍t kam-tiⁿ ê bí-kéng, Chheng-choâⁿ só͘ bat chhiùⁿ hō͘ i thiaⁿ ê liû-hêng koa.
“Hian lí ê bı̄n-phè khí--lâi.”
1. Chhiáⁿ hian lí ê bı̄n-phè khí--lâi,
Hō͘ goá khoàⁿ lí ê ba̍k-bâi,
Lí ê ba̍k-bâi sè koh tn̂g ah!
Ná-chún chhiū téng hit-ê sin-goe̍h.
(lú) Goá ê ba̍k-bâi sè koh tn̂g ah!
Chin-chiàⁿ ná-chún chhiū téng sin-goe̍h.
2. Chhiáⁿ hian lí ê bı̄n-phè khí--lâi,
Hō͘ goá khoàⁿ lí ê ba̍k-chiu,
Lí ê ba̍k-chiu o͘ koh kim ah!
Ná-chún chin-chu ê hiah-nih súi!
(lú) Goá ê ba̍k-chiu o͘ koh kim ah!
Chin-chiàⁿ chhin-chhiūⁿ chin-chu hiah-nih súi.
3. Chhiáⁿ hian lí ê bı̄n-phè khí--lâi,
Hō͘ goá khoàⁿ lí ê chhùi-tûn,
Lí ê chhùi âng koh sè-ê ah!
Ná-chún gō͘-goe̍h ê sió eng-thô.
(lú) Goá ê chhùi âng koh sè-ê ah!
Chin-chiàⁿ ná gō͘-goe̍h ê sió eng-thô.
4. Chhiáⁿ hian lí ê bı̄n-phè khí--lâi,
Hō͘ goá khoàⁿ lí ê bı̄n-māu,
Lí ê bı̄n âng hún koh ı̂ⁿ ah!
Ná-chún âng pı̂n-kó kàu chhiu-thiⁿ.
(lú) Goá ê bı̄n âng hún koh ı̂ⁿ ah!
Chin-chiàⁿ ná pı̂n-kó kàu chhiu-thiⁿ.
Siūⁿ kàu chia, hóng-hut hit mńg-po͘ tı̄ Tâi-tiong kong-hn̂g koh kiâⁿ kàu Chúi-goân-tē, āu-lâi chē tı̄ chúi-thah ê ē-bı̄n chháu-po͘-á téng, lâm-hong bı̂-bı̂-á chhoe--lâi, thâu-mn̂g sió-khoá sàm-sàm tı̄ bı̄n-nih tín-tāng hit sı̂, Chheng-choâⁿ chhiùⁿ chit tiâu koa, hit-ê siaⁿ-liōng ê súi, thiám-mı̄ ê khoán-sit, chit sı̂ lóng chiâⁿ-choè chiù-chó͘, chhim-ian Mô͘-kúi ê kiò siaⁿ. Hit sı̂ chhiùⁿ liáu chit tiâu koa, nn̄g ê chē sio kheh, Lân-hiong phēng-oá Chheng-choâⁿ ê heng-chêng, taⁿ thâu, niàu-khí ba̍k-chiu khoàⁿ Chheng-choâⁿ, bı̄n bún-chhiò. Chheng-choâⁿ ēng chiàⁿ-chhiú khin-khin bong i ê thâu-chang, thè i chéng-lí sûi lo̍h-lâi tı̄ bı̄n-nih ê thâu-mn̂g, kā i kóng, “Goá só͘ thiàⁿ--ê, lán tı̄-chia kóng-oē bô lı̄-piān, bān-it nā hō͘ se̍k-sāi lâng khoàⁿ-tio̍h chin pháiⁿ-sè, lán koh lâi-khı̀.” Kóng liáu hû i khí--lâi, khan i ê chhiú nn̄g lâng saⁿ-pâi chò-hoé kiâⁿ, tı̍t-tı̍t kàu Ka-pin lú-siā 4 lâu thâu-téng tē 2 hō pâng.
Ah! Choē-ok ah! Chhiong-moá ù-oè, khi-phiàn, kan-hiám, ká-mō͘, gūi-siān, khang-hi, o͘-àm ê sè-kài. Tı̄ tó-ūi ū thiàⁿ, tı̄ tó-ūi ū sêng-sı̍t? Sı̄ lâng á-sı̄ kúi ah? Thang chiù-chó͘ ê Jı̄-hō pâng, thang kiaⁿ-hiâⁿ ê sè-kan. Í-keng ū sin-ı̄n nn̄g goe̍h goā-jı̍t lah. Cháu-tâu bô lō͘, kiám iáu ū bı̄n thang tò-khı̀ kı̀ⁿ tông-sū, kiám ū bı̄n thang tò-khı̀ kóng hō͘ lāu-pē thiaⁿ. Pak-tó͘ chı̍t-jı̍t chı̍t-jı̍t ná toā-ê. Seng-khu-piⁿ iā bô chin liōng-siōng ê chı̂ⁿ, siūⁿ liáu koh khui siaⁿ háu chı̍t khùn. Lâi kàu chia bān-sū soah lah. Kin-tú koh oa̍h lo̍h-khı̀ iā bô sim-sek, chiū khiā--khí-lâi, chhek chı̍t ê sè-bı̄n, siūⁿ beh thiàu tùi Bí-lûn kiô-ē lo̍h-khı̀. Tú-tú hāⁿ chı̍t kha koè kiô-niû hit pêng ............
11. Kı̂-sı̍t Tàu-tí Sı̄ Cháiⁿ-iūⁿ?
Kha tú hāⁿ koè kiô-niû beh thiàu lo̍h-khı̀, āu-bı̄n tú gū chı̍t ê kéng-chhat khiâ chū-choán-chhia sûn-lô lâi kàu hia, goân-in sı̄ i tùi hn̄g-hn̄g í-keng thiaⁿ-kı̀ⁿ chit kak-sı̀ ū cha-bó͘ lâng teh khàu ê siaⁿ, jı̂-chhiáⁿ hit-ê siaⁿ sı̄ chin chhiⁿ-chhám, só͘-í i chiah ē sûn tùi chit pêng lâi. Thiàu lo̍h chhia beh kā i giú leh í-keng siūⁿ bān, khiú bô tiâu, āu-bı̄n ê saⁿ-á-ki giú-phoà lı̍h chin hn̄g, kiat-kio̍k iû-goân sı̄ poa̍h lo̍h khı̀. Goân-lâi chit tiâu khe lı̄ hái í-keng chin kı̄n, koh khı̀ chiū-sı̄ hái-kı̂ⁿ, chúi sè bān, nā-sı̄ siong-tong chhim, kéng-chhat chū án-ni toè i thiàu lo̍h-khı̀, chı̍t sı̂ Lân-hiong ū tı̂m lo̍h-khı̀, āu-lâi koh phû khí-lâi, kéng-chhat tùi thâu-chang kā i giú leh, siû 5, 6 pō͘ chiū peh chiūⁿ hoāⁿ, kā i giú chiūⁿ hoāⁿ ê sı̂ seng-khu tâm lok-lok, iā chia̍h kúi-nā chhùi chúi; ka-chài hit sı̂ í-keng chin àm, nā bô, lâng ún-tàng ē toè kui-tı̄n. I iā tâm, kéng-chhat iā tâm, nn̄g ê seng-khu lóng tâm lok-lok, ná chún lo̍h-thng-ke chı̍t-iūⁿ. Kéng-chhat chū án-ni toà i khı̀ phài-chhut-só͘.
Kéng-chhat hó-ı̀ kiò i ê hū-jı̂n-lâng chhut-lâi chiap Lân-hiong jı̍p-khı̀ oāⁿ ta ê saⁿ-khò͘. Kéng-chhat iā khı̀ oāⁿ saⁿ, oāⁿ liáu chiah mn̄g i sı̄ ūi sím-mı̍h in-toaⁿ beh thiàu chúi chū-sat; Lân-hiong chiū chiông-thâu kàu-boé tāi-lio̍k kóng hō͘ i thiaⁿ. Hit sı̂ tú àm-sı̂ ê 11 tiám goā, hit-ê kéng-chhat chū án-ni toà Lân-hiong kap kháu-keng choè-hoé khı̀ kéng-chhat-kio̍k. In-ūi phài-chhut-só͘ bô tú-hó ê só͘-chāi thang pó-hō͘, kàu kéng-chhat-kio̍k í-keng chiâⁿ poàⁿ-mı̂ lah, só͘-í liam-piⁿ siat-hoat hō͘ i tiàm tı̄ hū-lú ê hiu-khé-sek, hō͘ i tı̄ hia keh chı̍t mı̂, kè-jı̍t koh-chài siông-sè mn̄g kháu-keng, kio̍k-tiúⁿ iok-sok beh thè i tiau-cha. Kio̍k-tiúⁿ hián-bêng cha̍p-hun ê tông-chêng; jı̍t beh àm kéng-chhat the̍h Lân-hiong ka-kı̄ thǹg khí-lâi pha̍k ê saⁿ-khò͘ lâi hō͘ i koh oāⁿ tò-tńg, koh keh-jı̍t kéng-chhat-kio̍k-tiúⁿ chiū phài hit-ê kiù i ê kéng-chhat kā i pó-hō͘, sàng i tò-khı̀ kàu Soaⁿ-pà kau in lāu-pē.
Choē-ok ê kang-chı̂ⁿ chiū-sı̄ sí. Lí khoàⁿ, ūi-tio̍h tham-loân chı̍t-sı̂ jio̍k-thé chêng-io̍k ê khoài-lo̍k, lâi tı̀-kàu cheng-chho siū thún-ta̍h, jiân-āu hō͘ lâng hiat-ka̍k, chit hō sū m̄-sı̄ hiān-sı̂ chiah ū. Lí khoàⁿ kó͘-chá Kū-iok sı̂-tāi Tāi-pı̍t ê kiáⁿ Àm-lûn ké-pı̄ⁿ, ài Ap-sa-liông ê sió-moāi Tha-má khı̀ khoàⁿ--i, in-ūi i tham-loân Tha-má ê súi, kiò Tha-má the̍h mı̍h khı̀ pı̄ⁿ-chhn̂g hō͘ i chia̍h, kàu kèng-jiân kā i kiông-ù, phah lâ-sâm--i, āu-lâi m̄-tı̍h--i, ngē-ngē kā i koáⁿ chhut-khı̀ (Ⅱ Sat-bó-jíⁿ 13: 1—19). Àm-lûn kap Tha-má sı̄ siāng pē bô siāng bó ê hiaⁿ-moāi, siōng-chhiáⁿ káⁿ án-ni choè, hô-hòng chit tia̍p ê lâng, (āu-lâi Àm-lûn hō͘ Ap-sa-liông thâi sí). Lú-sèng ah! Lín tio̍h kéng-séng, tio̍h chhiat-chhiat kı̀-sim, lín sı̄ choè sêng-siū ê hong-bı̄n, lâng thau-chia̍h khı̀ lah, choē ê chéng-chí sı̄ tiàm tı̄ lí ê chhân, gia̍t-thai àm-kiat, hit sı̂ beh án-choáⁿ liáu-khiok.
Kéng-chhat pó-hō͘ Lân-hiong kàu-ūi kau-hō͘ in lāu-pē, mn̂g-kháu ûi chı̍t-tı̄n lâng, ū ê khó-lı̂n, ū ê thí-chhiò, ū ê bih-chhùi, ū ê phùi-noā, ū ê thè i lâu ba̍k-sái, ū ê kóng eng-kai, ū ê kóng taⁿ khoàⁿ beh án-choáⁿ? Kéng-chhat lı̄-khui liáu-āu, Lân-hoeng chū án-ni kūi lo̍h-khı̀, in lāu-pē chhiáⁿ lâi khoàⁿ ê lâng lóng chhut-khı̀, thiaⁿ mn̂g koaiⁿ khí--lâi, khı̀ gû-tiâu gia̍h hit ki pêng-sı̂ teh bu̍t gû ê tı̂n-tiâu lâi, khan thian-bûn tùi kha-chiah-phiaⁿ siāu 3 ē, lóng o͘-chhiⁿ hàng khí--lâi. Khı̀ chı̍t ē huih hiám-á bū chhut--lâi, kóng, 3 ê chí-moāi-á lí siāng chiâⁿ-mı̍h, chı̄n ǹg sı̄ lí, lí kin-á-jı̍t m̄-nā bē ǹg-tit, soà poè-ò͘ pē-bó kap Siōng-tè ê miâ; lín pâ kap lín lāu-bú sı̄ chèng-keng ê lâng, tùi kong chiū pài Siōng-tè, choè tiúⁿ-ló, lí chū sè tı̄ lín bó ê pak-tó͘-lāi chiū sı̀n Chú, lí kin-á-jı̍t káⁿ choè chhut chit hō bô bı̄n-phoê sià chó͘-kong ê sū.
Nā-sı̄ Lân-hiong iau-ki koh sit-tǹg, phun-pho chhoē ài-chêng ê siû-jı̂n, thiàu-chúi chū-sat, chhı̀ kéng-chhat-kio̍k liû-tı̀ ê chu-bı̄, siū kéng-chhat ê hō͘-sàng, siū lâng phùi-noā bih-chhùi; kàu chia lâi Lân-hiong chin-chiàⁿ sı̄ sim, sin lóng ià-siān, seng-khu koh ū sin, ná tú in lāu-pē 3 ē tı̂n-tiâu ē tiâu, chū-té kūi-leh teh háu, siāu 3 ē chū án-ni un lo̍h-khı̀ tó tùi thô͘-kha lo̍h-khı̀. In a-ché Lân-eng koáⁿ-kín oá--lâi, tùi a-pa ê chhiú kā i lia̍h-leh; in a-pa khı̀ chı̍t ē chū án-ni the tùi piah-nih lo̍h khı̀, the tiàm hia chhoán; toā-ché Lân-eng tı̍t-tı̍t kiò a-pa m̄-káⁿ, thè in sió-moāi kūi in a-pa. Sió-moāi Lân-jı̂ khoàⁿ a-ché un-tó tùi thô͘-kha lo̍h khı̀, kín khı̀ hû in a-ché, háu a-ché, jı̂-āu Lân-jı̂ iā khui-siaⁿ háu “A-pâ-ah m̄-káⁿ à lah.” Lân-hiohg ka-kı̄ iā háu m̄-káⁿ, peh khí--lâi ēng pê--ê pê kàu in a-pa ê bı̄n-chêng koh tı̍t-tı̍t kiò m̄-káⁿ, kàu chia i chiah chhim-chhim thòng-kám i ê choē ê thang kiaⁿ, chı̍t lāi-bı̄n chhiong-moá thı̂-khàu ê siaⁿ, 3 ê kiáⁿ lóng kūi-kūi tı̄ bı̄n-chêng.
Éng-hok hiaⁿ iā chhiú-nńg chhoê-á pàng-khı̀, siūⁿ tio̍h i ê hiân-chhe Chhiu-kùi-ah nā tı̄-teh, kiáⁿ ê sū, lāu-bó ê chí-tō sı̄ chin iàu-kín, 4 hoè Lân-hiong chiū bô bó, só͘-í tùi cha-bó͘ gín-ná ê khan-kà ū khah bô chiu-chı̀. Put-ti put-kak Éng-hok hiaⁿ soà khui-siaⁿ háu in hiân-chhe Chhiu-kùi-ah lâi chá sí, i choè pē, cha-po͘-lâng bē hiáu léng-tō, chiah ū kin-á-jı̍t ê chhiⁿ-chhám. Hit 3 ê kiáⁿ thiaⁿ in lāu-pē teh khàu hiân-chhe, 3 ê siūⁿ tio̍h sí-khı̀ ê lāu-bú, siūⁿ in kin-á-jı̍t choè bô bó ê kiáⁿ ê pháiⁿ-miā, tāi-ke lóng koh khui-siaⁿ háu, chı̍t bı̄n kiò m̄-káⁿ, chı̍t bı̄n háu pháiⁿ-miā bô bó, chı̍t bı̄n m̄-kam hō͘ nı̂-lāu ê a-pa siū-khı̀ kàu án-ni. Háu tit chin chhiⁿ-chhám, bē su lāi-bı̄n sí lâng. Hit sı̂ tú-gū toā-hàn kiáⁿ-sài tùi chhân-nih tò-lâi, thiaⁿ lāi-bı̄n háu kàu án-ni, bo̍k-bêng kı̂-biāu, án-choáⁿ liân lāu tiūⁿ-lâng iā háu. Tùi thiaⁿ-mn̂g sak bē khui, tùi chàu-kha-mn̂g ngē sak-jı̍p-khı̀, chiah khoàⁿ tio̍h in 4 ê pē-á-kiáⁿ tı̄ hia khàu choè chı̍t tui. I iā khoàⁿ tio̍h tı̂n-tiâu, iā khoàⁿ tio̍h in ı̂-á Lân-hiong chhēng phoàⁿ-saⁿ jı̍p--lâi, tı̄ Bí-lûn-kiô téng hō͘ kéng-chhat giú bô tiâu, giú lı̍h-khı̀ ê saⁿ, koh Lân-hiong ê bı̄n chin chhiⁿ, koh sán, chin pháiⁿ khoàⁿ, i kám-kak sı̄ ūi Lân-hiong ê sū, koáⁿ-kín chhah in tiūⁿ-lâng khı̀ pâng-keng bı̂n-chhn̂g the, tāi-ke chiah háu khah sè-siaⁿ, hit àm tāi-ke bô khoá chú, bô khoá chia̍h. Chng-nih ê lâng, chı̍t chhùi thoân chı̍t chı̍h, sı̍t-chāi chin kiàn-siàu. Lân-hiong tùi tò--lâi lóng m̄-káⁿ chhut-lâi kı̀ⁿ lâng. Taⁿ chia chhiáⁿ àn-hā.
Taⁿ lâi kóng Chheng-choâⁿ tàu-tí sı̄ sím-mı̍h hoè? Chheng-choâⁿ kóng in pâ kiò choè “Tân Chı̀n-sêng,” bô-iáⁿ; sı̄ Tân Sêng, lâng lóng kiò i A-sêng-peh. Khui phoê-ê-tiàm sı̄ kó͘-chá ê sū, chá in tiàm Tâi-lâm khui Hoa-bí phoê-ê-tiàm ū-iáⁿ, taⁿ bô lah. In sı̄ Tâi-lâm lâng, thái ē lâi Hoa-liân, kóng--lâi chiū oē thâu-tn̂g. A-sêng-peh siàu-liân chin gâu khai, chia̍h-chiú hoah-kûn, pau-chhı̄ cha-bó͘ ta̍k hāng to͘ ē. Ta̍k ê bêng chai hoah-kûn ê siaⁿ hóng-hut sı̄ án-ni “Chóng-khai”=10. “Khoài-tâu”=9. “Pat-sian”=8 (Sian bô-lō͘). “Chit-chhiâu”=7 (Chhiâu-lâi chhiâu-khı̀). “Lak-lián”=6. “Gō͘-gō͘”=5 (Gō͘-tio̍h). “Sí-sí”=4. “Sám-sám”=3. “Liáng-kô”=2. “Tan chı̍t-kô”= 1. Lí khoàⁿ chiah-ê siaⁿ sı̄ goā-nih ê pháiⁿ chhái-thâu, A-sêng chiū-sı̄ chı̍t ê chiú-kúi. Tiàm ná choè ná liu-boé, jı̂-chhiáⁿ koh kap lâng poa̍h bí-kiáu.
Tı̄ Chheng-choâⁿ 8 hoè hit nı̂, châi-sán chiah choè chı̍t-ē khı̀, chá tùi “Pó-bí-lâu” chhoā chı̍t ê toā-sek gē-toàⁿ, kiò choè Hoa-bí-hông chhut--lâi, châi-sán chı̍t ē phoà, lâng m̄-bat--i, choè i liu. Hoa-bí-hông chū án-ni cháu lâi Hoa-liân, lâi oá ki-lú-ı̄ⁿ “Hí-siong-hông”. A-sêng-peh chū án-ni iā pàng bó͘, pàng kiáⁿ jiok koè-lâi Hoa-liân, só͘-í Chheng-choâⁿ chiah ē kóng i sı̄ Hoa-liân lâng. In lāu-bó m̄-goān koè--lâi, ka-kı̄ chı̍t ê tiàm Tâi-lâm khan Chheng-choâⁿ, kâⁿ kàu Chheng-choâⁿ kok-bı̂n ha̍k-hāu pit-gia̍p, hit nı̂ liû-hêng kám-mō͘, in lāu-bú ūi liû-hêng kám-mō͘ chiah sí. Tùi án-ni Chheng-choâⁿ chiah khı̀ Hoa-liân chhoē in lāu-pē. Hit sı̂ in lāu-pē í-keng bô koh khui phoê-ê-tiàm. I pêng-sı̂ chin gâu chhiùⁿ-khek, chū án-ni iā lâi oá “Hí-siong-hông” chiú-lâu kà gē-toàⁿ chhiùⁿ-khek. Bô-lūn Lâm-koán, Pak-koán lóng ū siong-tong ê gián-kiù. Chheng-choâⁿ in lāu-pē ū hō͘ i khı̀ tha̍k Siong-gia̍p.
Tng Lân-hiong khı̀ chhoē hit sı̂, A-sêng-peh í-keng nı̂-lāu lah, bô siaⁿ thang koh kà khek, iā bē hong-liû lah. Taⁿ sı̄ taⁿ chı̍t-tàⁿ phoê-ê tàⁿ-á teh pó͘ phoê-ê, koh-chài péng kū-gia̍p, put-sı̂ tı̄ chhı̄-tiûⁿ piⁿ, hán-tit soá-ūi, chá-khí sı̂-á oàⁿ-oàⁿ chiah chhut--lâi, ē-po͘ sı̂-á chá-chá chiū tò-khı̀. Só͘-í Lân-hiong chū-jiân sı̄ chhoē-bô.
Koh kóng kàu Chheng-choâⁿ kin-pún m̄-bat tiàm Hoa-liân, in-ūi i lóng sı̄ tiàm Tâi-pak ê chè-io̍h kong-si. Hit-ê chū-chí Lân-hiong m̄-chai, in-ūi i m̄ kā Lân-hiong kóng. Tı̄ hia ū chin toā ê lí-iû leh, sı̄ Lân-hiong gām-bı̄n, hō͘ lâng khàm tı̄ àng-lāi.
12. Siuⁿ bān lah
Án-choáⁿ kóng Lân-hiong sı̄ hō͘ lâng khàm tiàm àng lāi. Án-choáⁿ Chheng-choâⁿ phoà-pı̄ⁿ, kong-si ē beh kā i chhut hùi tı̄-liâu, nn̄g lé-pài chiū ē tit chhut-ı̄ⁿ, án-choáⁿ oān kàu saⁿ lé-pài, kong-si iā bē ke-oē. Goân-in tı̄ chia, chiū-sı̄ i sı̄ kong-si keng-lí ê bı̄-lâi ê kiáⁿ-sài, chū chá chiū í-keng tèng-hun lah. Nā-sı̄ án-ni thái ē kap Lân-hiong hiah chhin-jia̍t. He sı̄ chhái-hoe-phang. Bı̍t-phang teh chhái-hoe, chı̍t-lúi hoe koè chı̍t-lúi hoe ê chhiú-toāⁿ, bı̍t-phang ūi beh chhái hoe ê bı̍t, ta̍k pái i to͘ sı̄ kap hoe chin chhin-bı̍t, m̄-koán seⁿ-sí, hām sin kap miā tı̍t-tı̍t tùi hoe-sim chǹg lo̍h-khı̀, bô sioh i kap hoe saⁿ-chim ê chhin-bı̍t. Bı̍t chhái liáu ē koh lâi á-bē? Bē lah, hiat-ka̍k--lí, liân oa̍t-thâu to͘ bô, choè i khı̀, thí-sı̍t poe hō͘ lí jiok.
Chheng-choâⁿ sim-té ná ū-iáⁿ teh ài Lân-hiong leh. I só͘ phèng-tiāⁿ ê bı̄-hun-chhe sui-jiân bô Lân-hiong ê súi, m̄-kú ū châi, sè, le̍k; i tı̄ kong-si ê tē-ūi sı̄ khò in bı̄-lâi ê tiūⁿ-lâng ê sè, in bó͘ ê āu-thâu sı̄ i ê āu-piah-soaⁿ. I ná ū khoàⁿ-tio̍h soaⁿ-lāi ê chhoan-ko͘. Chháu-tē ko͘-niû sui-jiân sı̄ tha̍k-koè chho͘-tiong, tı̄ pēⁿ-ı̄ⁿ hiah kú, ū sán-pô, hō͘-sū ê chu-keh. Nā-sı̄ chū sè sı̀n Chú, pài Siōng-tè, lóng sı̄ kap pài Siōng-tè ê lâng kau-poê chhut-jı̍p, sêng-sı̍t, bô oan-khiau, tı̍t-tı̍t, ta̍k hāng khoài sı̀n--lâng. Chheng-choâⁿ ê chhùi bē su koà siang ê chı̍h, siàn tit Lân-hiong hı̄-á phak-phak. Koh ín-iú lú-sek ê láu-chhiú, Lân-hiong chı̍t chiah ná toā-ti, kúi-kù-á oē kā i ngiau, kúi-hāng-á mı̍h choè bí-khng kā i soah lo̍h-khı̀, chiū toè lâng tı̍t-tı̍t kiâⁿ.
Án-choáⁿ thang kap lâng iok-sok siong-hoē, án-choáⁿ thang kap lâm-sèng chē sio-kheh, thâu-khak tı̄ lâm-sèng ê heng-chêng. Koh thang toè lâng khı̀ lú-siā, káⁿ toè lâng peh kàu 4 lâu, koh khui pâng-keng, chí-ū nn̄g ê, mn̂g só khí-lâi, só-sı̂ tē tiàm cha-po͘-lâng ê tē-á. Koh khı̀ hit chhut ē chhòng sím-mı̍h? Sı̄ pí khoàⁿ hoé khah bêng. Kai sí, chin-chiàⁿ kai sí. Kàu hia beh cháu bô lō͘ lah. M̄-sı̄, kàu hit chūn bē siūⁿ beh cháu lah, hit sı̂ ê sim sı̄ chhi-bê chùi-chiú ê chōng-thài, sim bâng--khı̀ lah. Chū thâu tı̄ i-ı̄ⁿ ê sı̂, àm-sı̂ m̄-sı̄ tio̍h i lûn-tio̍h tong-tı̍t, chiū m̄ eng-kai khı̀ kò͘ i, beh khı̀ eng-kai chio phoāⁿ. Chin-chiàⁿ sı̄ hō͘ kúi bê, chúi-kúi teh kiò Pái-sūi chiū-sı̄ án-ni.
Chin-chiàⁿ sı̄ hō͘-hoé siuⁿ bān lah. Chheng-choâⁿ chhut-ı̄ⁿ bô loā-kú, chiū kap keng-lí ê cha-bó͘-kiáⁿ kiat-hun. Poàⁿ chio-chhoā, in-ūi sin-niû hit pêng ê sió-tı̄ iáu chin sè-hàn, só͘-í phín hō͘ in chio, kàu sió-tı̄ toā-hàn chiah chhut-khı̀, só͘-í it-chhè ê kiat-hun-hùi lóng in tiūⁿ-lâng chi-lí, chin-chiàⁿ sı̄ tit chhe-ka-châi ê hó-ūn-jı̂. Chhám ê chí-ū sı̄ pe̍h hō͘ lâng chau-that, lé-choá, chhù-lú pó-kùi ê sèⁿ-miā hō͘ lâng thiah phoà koh hō͘ lâng hiat-ka̍k, gia̍t-thai koh àm-kiat, sı̄ chhàu-chiān ê kū-hoè, choè pò͘ ta̍t-chı̂ⁿ, choè saⁿ m̄-ta̍t chı̂ⁿ. Taⁿ beh án-choáⁿ?
Kan-ta Chheng-choâⁿ teh sóng-khoài, teh tit chhe-ka-châi. Nā-sı̄ hó kéng bô kú, Chheng-choâⁿ kiat-hun bô loā-kú, Tiong Jı̍t Lô͘-kau-kiô sū-piàn hoat-seng, keh-nı̂ ê 4 goe̍h chhe 5, Chheng-choâⁿ ê âng-toaⁿ-á kàu lah. Chiū-sı̄ siū Jı̍t-pún chèng-hú ê Lio̍k-kun-séng tiàu i khı̀ choè thong-e̍k. Tāi-seng khı̀ Hoâ-pak, tong-sı̂ kóng hō-choè Pak Chi, āu-lâi toè kun tı̍t-tı̍t choán-chiàn kàu Hoâ-lâm. Tng Sè-kài tē 2 hoê tāi-chiàn liân-hoat ê sı̂, chiū choán-chiàn khı̀ Lū-sòng. Khí-thâu tı̄ Ma-ni-lah, āu-lâi iā bat kàu Phek-iâu, hit sı̂ Jı̍t-kun liân-chiàn liân-sèng, tùi jı̄-téng-peng tı̍t-tı̍t seng, seng kàu chún-ùi. Sè-thâu chin hó, chhēng kun-chong hip siōng kià tò-lâi hō͘ in bó͘. Ba̍k-chı̍t-nih koè 5, 6 nı̂. Sio̍k-gú án-ni kóng, “Chûn-oân kàu ta̍k ê káng-kháu to͘ ū in chhù.” Chheng-choâⁿ kàu ta̍k só͘-chāi iā-sı̄ án-ni.
Tong-sı̂ Jı̍t-pún choè chiàn-sèng-kun ê kun-kí sı̍t-chāi chin kiàn-siàu, tò-chhù chhí-tı̄ lêng-jio̍k lâng ê hū-lú. Chóng-sı̄ lí iā m̄-bián siūⁿ i ê hū-jı̂n-lâng tı̄ chhù-nih sı̄ choa̍t-tùi ê cheng-chiat. Kiat-hun bô chı̍t nı̂, iáu-boē khioh gín-ná, tng chheng-chhun, sı̄ sè-sio̍k bô sı̀n tō-lí ê ka-têng, tı̄ Tâi-pak chhia-hoâ ê só͘-chāi, lí siūⁿ i kiám ē tiām-tiām lâi chiú khang-pâng. Só͘-í i iā thau kiâⁿ i ê lō͘.
Kàu chiàn-cheng ê hō͘-poàⁿ, hut-jiân Chheng-choâⁿ ê siau-sit chū án-ni tn̄g-khı̀ lah, m̄-sı̄ tn̄g tiap-á-kú, sı̄ éng-oán ê tn̄g-khı̀. Tùi siau-sit tn̄g-khı̀ liáu-āu, koh hiah kú bô tńg-lâi, put-ti put-kak Chheng-choâⁿ ê hū-jı̂n-lâng toè lâng khı̀ lah. In seⁿ-pē iā khoàⁿ-phoà, bô chhap, pàng hō͘ in cha-bó͘-kiáⁿ chū-iû. Taⁿ chia chhiáⁿ àn-hā. Khah iàu-kín lán koh lâi siūⁿ Lân-hiong ê sū.
