13. Chhàm-hoé Ê Seng-oa̍h
Lân-hiong tò-khı̀, chı̍t bı̄n chin kiàn-siàu, chin loé-chı̀; koh chı̍t bı̄n chin siong-sim, iā chin chhàm-hoé chêng ê sit-chhò. Só͘-í lóng m̄-káⁿ chhut lâi kı̀ⁿ-lâng. Sı̂-jı̍t teh koè chin-kín, bián loā-kú, keh-nı̂ ê chhun-thiⁿ, tng i 24 hoè nı̂ thâu, tùi Chheng-choâⁿ só͘ siū ê gia̍t-thai kàu goe̍h lah, chiū siⁿ chı̍t ê eⁿ-á, sı̄ cha-po͘--ê. Phı̄ⁿ tı̍t koh chiam, ba̍k-chiu toā-lúi koh têng-sûn, ē-táu hûi-hûi, chit kúi-tiám chin sêng in lāu-bú; thian-pêng khoah, ba̍k-bâi chho͘, chhùi toā-ê chin sêng in lāu-pē, chin-chiàⁿ sı̄ kiáⁿ bē thau-seⁿ tit, chı̍t poàⁿ chin sêng pē, chı̍t poàⁿ chin sêng bó. Éng-hok hiaⁿ khoàⁿ sun-á chhut-thâu, koh sı̄ cha-po͘--ê, in-ūi lāi-bı̄n lóng bô cha-po͘-sun, koh seⁿ-choè chin-súi. Só͘-í chı̍t bı̄n sui-jiân sı̄ siū-khı̀, chóng-sı̄ chı̍t bı̄n iā-sı̄ chin hoaⁿ-hí. Chiàu Lân-hiong ê ı̀-sù, kā i hō miâ kiò “Siú-gı̄”. Chia̍h lāu-bú ê sı̀ⁿ, só͘-í kiò i choè “Lí Siú-gı̄.” Án-choáⁿ ē hō án-ni ê miâ? Sı̄ Lân-hiong chin koat-sim, àn-sǹg i it-seng bô beh koh kè. In-ūi i ê sim í-keng chin kiaⁿ, koh iàm-hūn lâm-sèng ê bô tiong-sı̍t. Koh chı̍t bı̄n siūⁿ kóng chhò chı̍t pái, tek-khak m̄ koh chhò tē-jı̄ pái. Beh piáu-bêng i ê chı̀-khı̀, lâi sé-khı̀ i it-sı̂ chhò-gō͘ ê kiàn-siàu. Só͘-í hō kiáⁿ ê miâ choè Siú-gı̄.
Siú-gı̄ chhut-sı̀ ê tē-jı̄ nı̂, A-kong hut-jiân jiám-tio̍h hı̀-eng ê pēⁿ, m̄-káⁿ hō͘ lâng khui-to, thâu-boé thoa chı̍t nn̄g goe̍h-jı̍t soà koè-sin khı̀, chin phah-sńg, i sí hit nı̂ chiah 55 hoè. Lâng iáu chin-ióng, hut-jiân jiám-tio̍h chiū bô i. Ke-lāi tāi-ke chin iu-būn, hit sı̂ sè-hàn sió-moāi Lân-jı̂ iā kè liáu lah. Siāng khó-liân chiū Lân-hiong khan-kiáⁿ tı̄ lāi-bı̄n. Lāu-pē tı̄-teh bóng thun-lún koè-jı̍t, Lāu-pē kah bô tı̄-teh, sǹg sı̄ oá a-ché chia̍h, sı̍t-chāi chin pháiⁿ-sè. Tùi gín-ná chhut-sı̀ liáu-āu, koh ho̍k-tò i ê sı̀n-gióng, koh jia̍t-sim kèng-pài Siōng-tè. Siōng-tè iā lı̂n-bín--i, koh hō͘ i chiū-kı̄n sèng-chhan, tùi hit sı̂ í-āu, i chiū koh pang-chān Chú-jı̍t-o̍h, sèng-koa pan.
Koh chı̍t-bı̄n, tı̄ seng-oa̍h hong-bı̄n, i ū choè sán-pô, iā kā lâng choè-saⁿ, ū-sı̂ kàu hn̂g-nih pang-bâng ché-hu ê kang-tiâⁿ. Án-ni ba̍k chı̍t-nih, chiū keng-koè 5, 6 nı̂. Ūi-tio̍h i koè-thâu ê thoa-boâ, tı̀-kàu seng-khu soà bô kàu goā ióng. Koh i chı̍t bı̄n teh siūⁿ Siú-gı̄ í-keng 6 hoè lah. Kiám-thang hō͘ i choè soaⁿ-lāi gín-ná. Só͘-í sim ū ı̀-hiòng ài chhut-lâi to͘-chhı̄ khiā-khí. Ǹg-bāng tùi gín-ná ê kàu-io̍k ē khah hó.
Tú-gū ū chı̍t ê ki-hoē, i chiū chhut-lâi Tâi-lâm, tit-tio̍h chı̍t ūi bó͘-hoē soan-kàu-su ko͘-niû ê thé-thiap, chiū koh iōng i tı̄ lán kàu-hoē ê i-ı̄ⁿ lâi ho̍k-bū. Chit pái i chin-chiàⁿ sı̄ jı̄n-chin, un-khûn, sı̂-sı̂ kı̂-tó, kín-sı̄n i ê seng-oa̍h, chin-chiàⁿ sı̄ kiâⁿ tı̄ chhàm-hoé sèng-kiat ê seng-oa̍h. Só͘-í chē-chē hoān-chiá tùi i lâi tit-tio̍h chin toā ê lı̄-ek. Koh i siông-siông kóng tō-lí hō͘ lâng thiaⁿ, iā thoè lâng kı̂-tó. Só͘ choè ê kang put-chí êng-iāu Chú.
Siōng-tè iā hō͘ Siú-gı̄ chin koai, tng 8 hoè ê sı̂ chiū jı̍p kok-bı̂n ha̍k-hāu. Tı̄ kok-bı̂n ha̍k-hāu ta̍k-nı̂ to͘ thâu-miâ. Chit-hāng thang choè Lân-hiong chin toā ê an-ùi. Āu-lâi tı̄ chiàn-cheng tiong lán kàu-hoē ê i-ı̄ⁿ chı̍t sı̂ ū thêng-pān. (Siāng tı̄ chit sı̂, Tâi-oân tùi jı̍t-pún ê thóng-tı̄ oāⁿ choè Tiong-hoâ Bı̂n-kok ê thóng-tı̄). Hit-sı̂ i hut-jiân seⁿ-chhut chı̍t hāng tui-bō͘ chhin-lâng ê sim, hit nı̂ Siú-gı̄ tú 11 hoè, kok-bı̂n ha̍k-hāu 3 liân, i chiū chhoā i choè-hoé koè-khı̀ Hoa-liân. I ê ı̀-sù sı̄ lāu-pē (Éng-hok-hiaⁿ) í-keng koè-sin. Beh tò-khı̀ Soaⁿ-pà chhoē a-ché iā bô ı̀-sù. Kiám chin-chiàⁿ sè-kan Siú-gı̄ ē choè bô i-oá, bô chhin bô chhek ê ko͘-jı̂. I chin m̄-goān, chiū koh chı̍t pái chhoā i ê kiáⁿ kàu Hoa-liân, tı̄ hia lâi chhoē thâu-lō͘, koh tı̄ hia beh chiâm-sim lâi chhoē Siú-gı̄ ê a-kong, koh kiám-chhái ē chhoē-tio̍h i ê lāu-pē. In-ūi i m̄-chai Chheng-choâⁿ èng-tiàu khı̀ choè Jı̍t-kun ê thong-e̍k. I chí-ū kan-ta iáu sı̄ gōng-sı̀n Chheng-choâⁿ sı̄ Hoa-liân ê lâng. Só͘-í i chiū koat-sim chhoā kiáⁿ khı̀ hia chhoē thâu-lō͘.
14. Bô-ı̀-tiong Ê Kı̀ⁿ-bı̄n
Kàu Hoa-liân ê sı̂ chiū khı̀ kàu-hoē pài-hāu bo̍k-su. Tân Bo̍k-su kap Bo̍k-su-niû hui-siông ê chhin-chhiat, chı̍t-ē thiaⁿ-tio̍h i ê chhám-kéng, cha̍p-hun tông-chêng i ê kéng-gū, chek-sı̂ chio i kūi-lo̍h lâi kiû Chú thoè i khui-lō͘. Hit àm lâu i tı̄ kàu-hoē keh-mı̂. Keh-jı̍t Tân Bo̍k-su thè i khı̀ chhoē thâu-lō͘. Kai-chài, bān-sū Chú bô m̄ ūi-tio̍h kèng-pài I ê lâng lâi an-pâi.
Si-phian 25: 1－3 kóng, “Iâ-hô-hoa ah, goá ê sim-sı̂n gióng-bōng Lí, m̄-thang hō͘ goá kiàn-siàu. M̄-thang hō͘ goá ê tùi-te̍k in-ūi iâⁿ goá lâi khoa-kháu. Kı̀ⁿ-nā thèng-hāu Lí ê tek-khak bô kiàn-siàu.”
Chin-chiàⁿ sı̄ án-ni. “Iâ-so͘ Ki-tok chā-jı̍t kin-á-jı̍t tâng chı̍t-iūⁿ, tı̍t kàu tāi-tāi” (Hi-pek-lâi 13: 8).
Koh Si-phian 56: 8 kóng, “Goá ê liû-lo̍k, Lí lóng kı̀-siàu; kiû Lí chiong goá ê ba̍k-sái siu tı̄ Lí ê phê-lông; che kiám bô lóng kı̀ tı̄ Lí ê chheh mah?”
Hiaⁿ-tı̄ chí-moē, chin-chiàⁿ sı̄ án-ni. Iâ-hô-hoa Siōng-tè I m̄-bat pàng sı̀n I, khò I ê lâng choè bô pē ê kiáⁿ. I hoaⁿ-hí hō͘ lâng chhoē-tio̍h, I beh chhun I ê sèng-chhiú khan kı̀ⁿ-nā su-iàu I ín-chhoā ê lâng. Chá I chhoā Í-sek-lia̍t peh-sı̀ⁿ koè Âng-hái, hō͘ bô lō͘ chiâⁿ-choè ū lō͘; hō͘ bô thang chia̍h pı̀ⁿ-choè ū thang chia̍h. I iúⁿ-chhı̄ I ê peh-sı̀ⁿ, ēng chúi, ēng bah hō͘ in boán-chiok, keng-koè chē-chē chhı̀-liān, hō͘ in ha̍k-sı̍p sı̀n-sim, khiam-pi, sūn-ho̍k, kàu boé chiū chhoā in kàu Ka-lâm. Chhin-chhiūⁿ án-ni, Chú ê sèng-chhiú kap koan-sim, bô m̄ siông-siông tı̄ Lân-hiong ê téng-bı̄n. Choè kiaⁿ chiū-sı̄ lâng ēng kha-chiah ǹg Siōng-tè, tı̀-kàu Siōng-tè kóng, “Goá bat kiò lín, lín kı̀-jiân m̄ thiaⁿ-thàn goá, chiū lín kiû kiò goá, goá iā m̄ thiaⁿ.”
Chú ín-chhoā Tân Bo̍k-su thè i khı̀ Bí-lûn lâi thàm-mn̄g lán kàu-hoē siat ê pēⁿ-ı̄ⁿ khoàⁿ ū khiàm-oân á-bô? Chin tú-hó, chin su-iàu chı̍t ūi ū keng-giām, jı̂-chhiáⁿ jia̍t-sim ê chí-moē lâi tam-tng sán hū-jı̂n-kho ê hō͘-sū pan-tiúⁿ. Chek-sı̂ chhiàⁿ i khı̀ hia ho̍k-bū. Pēⁿ-ı̄ⁿ khoàⁿ i ê láu-liān, jia̍t-sim khiân-sêng, koh sı̄ tiong-liân ê chí-moē, chai i m̄ koh kè, thang ho̍k-bū khah kú tı̄ pēⁿ-ı̄ⁿ, chiū hui-siông ê tiōng-iōng i.
Sı̂-jı̍t teh kè chin kín, u̍t chı̍t-ē Siú-gı̄ í-keng pit-gia̍p Hoa-liân kok-bı̂n ha̍k-hāu, jı̂-chhiáⁿ í-keng chı̀n-jı̍p Hoa-liân Séng-lı̍p Chho͘-tiong, iā chin hó sêng-chek tha̍k kàu saⁿ liân lah.
Ū chı̍t-jı̍t Tân bo̍k-su ū chhoā chı̍t-ê hoān-chiá lâi pı̄ⁿ-ı̄ⁿ beh jı̍p-ı̄ⁿ. Chit-ê pı̄ⁿ-lâng sı̄ chin khó-lı̂n, kin-nı̂ la̍k-cha̍p-peh hè, sı̀ⁿ Tân, miâ A-sêng, chit-gia̍p sı̄ liâm phê-oê. I sı̄ ko͘-khó͘ bô thang i-oá ê lāu-toā-lâng. I tı̄ nı̂-goā chêng, tùi chı̍t-ê tùi Bí-kok lâi ê pò͘-tō-thoân lâi Hoa-liân pò͘-tō ê sı̂ lâi jı̍p sı̀n-gióng ê. Hit-sı̂ i kám-kak nı̂-lāu lah, chiah-nih pháiⁿ-miā, tı̄ sè-kan iáu ū sím-mı̍h thang ǹg-bāng. I siūⁿ-tio̍h i ê choē, koh it-seng keng-kè khó͘-chhám só͘ ǹg-bāng chı̄n-le̍k chai-poê ê kiáⁿ, kı̀-jiân siū-tiàu choè Jı̍t-pún-kun ê thong-e̍k, kàu-taⁿ thâu-bé oá cha̍p-chhit, cha̍p-peh nı̂ lah, thâu-á saⁿ, sı̀ nı̂ ū siau-sit, taⁿ cha̍p-goā nı̂ bô siau-sit lah. Só͘-í i tı̄ sè-kan sı̄ choa̍t-bāng, i ê sim chin kan-khó͘, chin ià-sè.
Hit sı̂ lâi thiaⁿ tō-lí sı̄ tùi ē-bı̄n chit saⁿ kù oē lâi jı̍p-sı̀n.
1. “In-ūi Siōng-tè chiong to̍k-siⁿ ê Kiáⁿ siúⁿ-sù sè-kan, hō͘ kı̀ⁿ-nā sı̀n I ê lâng boē tı̂m-lûn, oē tit-tio̍h éng-oa̍h; I thiàⁿ sè-kan kàu án-ni” (Iok-hān 3:16).
I thiaⁿ bo̍k-su tha̍k khí Siōng-tè ê oē, i kám-kek kàu lâu ba̍k-sái. I siūⁿ kóng goá sı̄ chiah m̄ chiâⁿ-mı̍h ê lâng, tı̄ Siōng-tè ê bı̄n-chêng moá-moá ê choē-ok, Siōng-tè thái ē thiàⁿ goá kàu án-ni.
2. I koh thiaⁿ kóng, “Lín kı̀ⁿ-nā tio̍h-boâ taⁿ tāng-tàⁿ ê, tio̍h chiū-kūn goá; goá beh hō͘ lín an-hioh” (Má-thài 11:28).
Ah! Che sı̄ i it-seng tı̄ khó͘-chhám tiong só͘ m̄-bat thiaⁿ-tio̍h ê siau-sit. Sè-kan tı̄ tó-ūi ū hit hō lâng oē thoè lâng taⁿ tāng-tàⁿ, jı̂-chhiáⁿ oē hō͘ lâng tit-tio̍h pêng-an an-hioh ah?
3. Tē saⁿ kù i thiaⁿ-tio̍h kóng, “Koh ka-kı̄ jı̄n tı̄ toē-chiūⁿ choè lâng-kheh, choè chhut-goā ê. In-ūi án-ni kóng ê, sı̄ piáu-bêng in teh chhoē chı̍t ê chó͘-ke. In nā siàu-liām só͘ tùi hia chhut-lâi ê toē, chiū ū thang tò-khı̀ ê ki-hoē. Chóng-sı̄ taⁿ in him-bō͘ koh-khah hó ê, chiū-sı̄ tı̄ thiⁿ-nih ê. Só͘-í Siōng-tè chheng-choè in ê Siōng-tè, bô lia̍h-choè kiàn-siàu; in-ūi í-keng thoè in pı̄-pān chı̍t ê siâⁿ” (Hi-pek-lâi 11: 13－16).
A-sêng-peh thiaⁿ-tio̍h chiah-ê Siōng-tè ê oē, sim toā kám-kek, i kám-kak i pêng-seng só͘ tui-kiû ê chiū-sı̄ chiah-ê. Taⁿ i m̄-sı̄ bô pē ê kiáⁿ lah, in-ūi Siōng-tè sı̄ i ê Thiⁿ-pē. Koh i tı̄ sè-kan m̄-sı̄ bô i-oá lah, in-ūi Chú beh thoè i taⁿ tāng-tàⁿ. Koh i m̄-sı̄ bô ke khó-kui ê lōng-jı̂. I chai i ê chó͘-ke sı̄ tı̄ thiⁿ-nih, i í-keng ū kui-siok lah. Só͘-í i ê jı̂n-seng hut-jiân tùi o͘-àm lâu ba̍k-sái ê soaⁿ-kok choán-jı̍p êng-kng Sek-an ê toā-lō͘. Só͘-í tùi hit sı̂ khí, i chiū bô làng lé-pài lâi siú lé-pài. Só͘-í tı̄ iok poàⁿ nı̂ chêng, chiū siū chiap-la̍p jı̍p sèng-hoē. Nā-sı̄ chin khó-sioh, chiah kú sin-thé put-chí khah lám, put-chí kāu la̍p-kha̍p. Só͘-í bo̍k-su chhoā i lâi lán kàu-hoē ê pēⁿ-ı̄ⁿ jı̍p-ı̄ⁿ.
Ah! Siōng-tè ê liap-lí chin-chiàⁿ sı̄ ò-biāu ah! Tng Lân-hiong koh lâi Hoa-liân ê sı̂, kap kiáⁿ chò-hoé kiâⁿ, siū bo̍k-su àn-nāi chò-hoé beh khı̀ Bí-lûn, beh khı̀ Ki-tok-kàu pı̄ⁿ-ı̄ⁿ chiū-chit,tng i koè Bí-lûn kiô ê tong-sı̂, kiàn-kéng seng-chêng, siūⁿ-kı̀ⁿ i iok 12 nı̂ chêng, hit sı̂ Siú-gı̄-á iáu tı̄ pak-tó͘ lāi nn̄g goe̍h goā jı̍t ê sı̂, thiàu Bí-lûn kiô bô sí. Kin-á-jı̍t chhoā kiáⁿ 11 hoè lâi koè chit-ê kiô, chin-chiàⁿ sı̄ kám-khài bû-liōng. Bē kı̀m-tit iân-lō͘ kiâⁿ iân-lō͘ lâu ba̍k-sái, chū-jiân bo̍k-su kiâⁿ tı̄ thâu-chêng m̄ chai-iáⁿ, kiáⁿ Siú-gı̄ kiâⁿ tı̄ Sin-piⁿ m̄-chai ı̀-sù.
Taⁿ kin-á-jı̍t lâi Hoa-liân ba̍k chı̍t-nih iū 6 nı̂ lah, tùi Siú-gı̄ kok-bı̂n ha̍k-hāu saⁿ nı̂ lâi kàu chho͘-tiong saⁿ nı̂ lah. Hit jı̍t khoàⁿ-tio̍h A-sêng-peh ê jı̍p-ı̄ⁿ chhiú-sio̍k, chai i sı̄ Tân A-sêng, sı̄ tiam phoê-ê--ê. Hit-ê bı̄n-hêng chiok sêng Chheng-choâⁿ ê bı̄n. Chı̍t sı̂ sim chin giâu-gı̂.
15. Sio-jı̄n
A-sêng-peh i m̄-sı̄ sím-mı̍h tāng-pı̄ⁿ, sı̄ ló-soe sim-chōng bô la̍t ê pı̄ⁿ, tùi jı̍p-ı̄ⁿ í-lâi tùi i-seng ēng tú-hó ê io̍h-hng kap chu-ióng-phín hō͘ i chia̍h i chiū ná ióng-kiāⁿ. Tng tı̄ i khah khoàⁿ-oa̍h ê sı̂ i chiū siông-siông kap Lân-hiong tâm-lūn kóng-oē. A-sêng-peh sim-lāi ū chin giâu-gı̂, Lân-hiong ê kiáⁿ Siú-gı̄ án-choáⁿ ē hiah sêng in kiáⁿ Chheng-choâⁿ ê bı̄n. Jı̂-chhiáⁿ chhiò ê khoán-sit, kap kóng-oē ê siaⁿ-im iā ū chin sio-tâng ê só͘-chāi.
Ū chı̍t-jı̍t A-sêng-peh kı̀m bē-tiâu chiū mn̄g Lí Hō͘-sū kóng, “Hō͘-sū sian-siⁿ, chin sit-lé, goá lâi pài-mn̄g lí chı̍t-chân sū, chhiáⁿ lí m̄-thang siū-khı̀, lí m̄-chai khéng kā goá kóng á-m̄?” Lân-hiong chai A-sêng-peh sı̄ sêng-sı̍t ê sı̀n-tô͘, koh sı̄ lāu-toā-lâng, koh i ka-kı̄ iā siūⁿ chin ài mn̄g i, só͘-í chiū ı̀n A-sêng-peh kóng, “Chhiáⁿ lí mn̄g bô iàu-kín, goá nā chai, goá hoaⁿ-hí kā lí kóng, koh kı̂-sı̍t goá iā ū oē ài pài-hāu lí, iā chhiáⁿ lí kā goá kóng.” A-sêng-peh kóng, “Hó, goá nā ē hiáu-tit, goá iā hoaⁿ-hí kā lí kóng.” Hit-sı̂ sı̄ mńg-po͘ tú khah-êng ê sı̂.
A-sêng-peh chiū khui-chhùi mn̄g kóng, “Chin sit-lé, hō͘-sū sian-siⁿ, chū kàu-taⁿ goá siông-siông khoàⁿ chı̍t ê gín-ná chhēng tiong-ha̍k ê chè-ho̍k lâi chhoē--lí, hit-ê sı̄ lí ê sím-mı̍h lâng.” “Hit-ê sı̄ goá ê kiáⁿ.” “Kin-nı̂ kúi-hoè lah, kúi nı̂ ê?” “17 hoè, chho͘ Tiong 3 nı̂.” “Goá thái m̄-bat khoàⁿ in A-pa lâi chhoē--lí.” Lân-hiong thiaⁿ A-sêng-peh mn̄g hit-kù, chı̍t-bı̄n chin kiàn-siàu, chı̍t-bı̄n chin siong-sim, thâu-khak chū án-ni chhih lo̍h-khı̀, bı̄n oa̍t tùi āu-bı̄n, kı̀m bē-tiâu ba̍k-sái soà liàn chhut--lâi, thêng chin kú lóng bô ı̀n. A-sêng-peh chiap-soà kóng, “Hō͘-sū sian-siⁿ, goá ē mn̄g lí án-ni, kı̂-sı̍t sı̄ in-ūi goá ê sim múi-pái nā khoàⁿ tio̍h lí ê gín-ná chiū ná chún khoàⁿ tio̍h goá ê kiáⁿ, bô-lūn bı̄n-hêng, chhiò ê khoán-sit, chhiò ê siaⁿ-im, kóng-oē ê siaⁿ-im chin hóng-hut sı̄ kap goá ê kiáⁿ siāng-khoán.” “A-peh lí ê kiáⁿ kiò choè sím-mı̍h miâ?” “Kiò choè Tân Chheng-choâⁿ.” “I taⁿ tùi tó ūi khı̀?”
“I iok 18 nı̂ chêng hō͘ Jı̍t-pún kun tiàu khı̀ choè thong-e̍k, chı̍t-khı̀ chū án-ni bô hoê-thâu, khí-thâu khı̀ Hoa-pak, āu-lâi choán-chiàn kàu Hoa-lâm, jiân-āu chai i ū kàu Hui-lı̍p-pin, khı̀ 4 nı̂ iáu ū siau-sit, jiân-āu kàu taⁿ cha̍p-goā nı̂ lóng bô siau-sit lah.” “I boē khı̀ choè thong-e̍k ê sı̂, i sı̄ teh choè sím-mı̍h.” “Sı̄ teh choè chè-io̍h kong-si ê soan-thoân kóng-kò ê chú-jı̄m.” “Nā-sı̄ án-ni A-peh lí ê miâ kiám m̄-sı̄ Tân Chı̀n-sêng. Kiám m̄-sı̄ bat khui Hoâ-bí phoê-ê tiàm.” “Sı̄ lah, goá ê hō͘-kháu miâ Tân Sêng, ū-sı̂ lâng kiò goá Chı̀n-sêng, khui Hoâ-bí phoê-ê tiàm sı̄ kó͘-chá tı̄ Tâi-lâm ê sı̂. Nā-sı̄ lí thái ē chai chiah-ê sū?”
Lân-hiong chū án-ni háu chhut--lâi soà kūi-lo̍h phak tı̄ A-sêng-peh ê pēⁿ chhn̂g chêng, tùi chhiú kā i khan-teh, ba̍k-sái tih-tâm A-sêng-peh ê chhiú, ná kóng ná-háu, ná chheh-khùi, kiò chı̍t-siaⁿ “A-pa,” chū án-ni háu koh-khah chhám-chheh. A-sêng-peh kín peh khí-lâi chē tiàm bı̂n-chhn̂g-kı̂ⁿ, kóng, “Hō͘-sū sian-siⁿ, lí tàu-tí sı̄ cháiⁿ-iūⁿ kiò goá án-ni?” Hit-sı̂ Lân-hiong chiah chiông-thâu kàu-boé tāi-lio̍k kóng chı̍t-piàn hō͘ A-sêng-peh thiaⁿ. A-sêng-peh iā khui-siaⁿ háu, tùi án-ni nn̄g ê ta-koaⁿ, sim-pū chiah sio-jı̄n.
Tùi án-ni A-sêng-peh chiah liáu-kái chit-ê Hō͘-sū Lân-hiong ê gín-ná hō kiò “Siú-gı̄” ê ı̀-sù, kap liáu-kái hit-ê gín-ná ê bı̄n-hêng, thé-thài, siaⁿ-im kı̂-só͘-í ē kap in kiáⁿ Chheng-choâⁿ siāng-khoán ê só͘-í-jiân. Tùi án-ni A-sêng-peh sim hui-siông hoaⁿ-hí, chiū chiām-chiām koh ióng-kiāⁿ. Bô joā-kú chiū thè-ı̄ⁿ. Chit-chân sū soà chiâⁿ-choè Hoa-liân kàu-hoē ê bí-tâm, chiū-sı̄ Lân-hiong ê “Siú-gı̄,” iú-hàu ê cheng-sı̂n. A-sêng-peh tùi hit-sı̂ khí chiū siūⁿ kóng i oa̍h-teh ū an-ùi, ū bo̍k-tek, chiū khoe-ho̍k kiān-khong. Phoê-ê tàⁿ-á taⁿ leh, pí chêng koh-khah piàⁿ-sè lâi choè kang. Siú-gı̄ kap A-kong sio-jı̄n liáu-āu iā chin hoaⁿ-hí, pí-chêng koh-khah oa̍h-tāng jı̄n-chin tha̍k-chheh, bô loā-kú chiū pit-gia̍p. Pit-gia̍p liáu chiū khı̀ tha̍k Su-hoān ha̍k-hāu. A-kong iā tàu thàn-chı̂ⁿ hō͘ i tha̍k. Siú-gı̄ kap A-kong choè-hoé tiàm, kàu khı̀ tha̍k Su-hoān ha̍k-hāu chiah khı̀ ha̍k-liâu.
Sı̄ jı̍p-tı̄ Tâi-pak Su-hoān, nā hioh-joa̍h tò--lâi chiū saⁿ-ê, ta-koaⁿ, sim-pū, kap sè-kiáⁿ Siú-gı̄--è saⁿ-ê chin khoài-lo̍k, tı̄ Chú chiâⁿ-choè chı̍t-ê hó ê Ki-tok-hoà ka-têng. Saⁿ-tāi-lâng choè-hoé tiàm, hit-ê iú-hàu ê sim-chêng, kám-siā Chú ê hoaⁿ-hí moá-moá, chhiong-moá tı̄ in tiong-kan. Nā-sı̄ hó-kéng bô kú, put-chhek ê chai-hō koh kàu in ê tiong-kan.
16. Kiû Lí Sià-bián Goá
Lâng chin-chiàⁿ nā m̄-sı̄ ū hn̄g-hn̄g ê khoà-lū chiū-sı̄ ū kı̄n-kı̄n ê hoân-ló. Chai-hō tiông-tia̍p chhin-chhiūⁿ hái-éng, āu-éng jiok chêng-éng, tiông-tiông tia̍p-tia̍p tı̍t-tı̍t koáⁿ--lâi. Kong sun, bó kiáⁿ, ta-koaⁿ sim-pū chiah hoaⁿ-hí saⁿ-jı̄n khoài-lo̍k lâi koè-jı̍t nā-tiāⁿ, chit-ê hok-khı̀ kè-sio̍k bô loā kú kàu tı̄ Siú-gı̄ tha̍k su-hoān ha̍k-hāu ê soah boé-nı̂, beh pit-gia̍p ê goe̍h-goā-jı̍t chêng lāu-kong A-sêng-peh hut-jiân ūi-tio̍h poa̍h-tó, tùi án-ni soà tı̀-kàu bē koh khí-chhn̂g, thoa chiâⁿ goe̍h-jı̍t soà pia̍t-sè. Pia̍t-sè hit nı̂ A-sêng-peh tú-tú sı̄ 71 hoè ê 6 goe̍h, Siú-gı̄ iā í-keng 20 hoè lah. Tng Chheng-liân, chin eng-chùn, sêng-chek chin hó, i só͘ ài--ê te̍k-pia̍t im-ga̍k-kho, kı̂-tiong seng-ga̍k, siaⁿ hui-siông súi. Nā koh kā i poê-iúⁿ khó-lêng ē choè seng-ga̍k ka. In-toaⁿ tāi-khài sı̄ tùi pē-bú ê ûi-thoân, in-ūi lāu-pē tùi im-ga̍k ū chhù-bı̄, lāu-bú sı̄ Soaⁿ-pà ê lâng, goā kong sı̄ sèⁿ Bo̍k, hia ê lâng chin gâu gı̂m-si, tùi a-má chiū-sı̄ gâu gı̂m-si.
Taⁿ Siú-gı̄ pit-gia̍p liáu-āu chiū koh chı̀n-jı̍p Su-hoān tāi-ha̍k. In-ūi sêng-chek hui-siông hó, só͘-í siū thê-miâ tùi ha̍k-hāu pó-sàng, bián-khó khı̀ seng-ha̍k. I ê lāu-bú hui-siông ê hoaⁿ-hí. Che iā-sı̄ Siōng-tè te̍k-pia̍t ê un-tián, hō͘ Lân-hiong tı̄ iu-būn tiong thang tit-tio̍h toā ê an-ùi. Phah-sńg a-kong bô thang khoàⁿ kàu Siú-gı̄ sêng-kong chiū pia̍t-sè.
Lân-hiong it-seng chin-chiàⁿ sı̄ khó͘-chhám, le̍k-chı̄n it-chhè ê hong-song, kàu chia lâi chı̍t bı̄n sı̄ thang hoaⁿ-hí, m̄-kú ūi-tio̍h kiáⁿ ê chiong-lâi i ê ló͘-le̍k sı̍t-chāi siông-siông sı̄ koè-thâu ê thoa-boâ, tı̀-kàu seng-khu chin lám. Tng ta-koaⁿ sí hit-sı̂ soà siông-siông ài sàu. Sui-jiân tı̄ pı̄ⁿ-ı̄ⁿ, iáu-kú ūi-tio̍h bô thang hioh-khùn iā-sı̄ khah-su. Kàu-boé sàu liáu soà ē kâⁿ hiuh, chiàu-khoàⁿ sı̄ pı̀ⁿ lô-siong, kàu Siú-gı̄ tāi-ha̍k soà boé nı̂ hit nı̂, Lân-hoeng ê sin-thé chám-jiân soe-jio̍k, só͘-í ū sı̂-kan tò lâi ka-kı̄ tiau-ióng. Pı̄ⁿ-ı̄ⁿ sı̄ chin hó-ı̀, thé-thiap, siông-siông ū i-seng á-sı̄ hō͘-sū lâi kā i khoàⁿ. In-ūi pı̄ⁿ-ı̄ⁿ bô keh-lı̄-sek, só͘-í hō͘ i tiàm-tı̄ pı̄ⁿ-ı̄ⁿ piⁿ-á ê chhù.
Kàu Siú-gı̄ tāi-ha̍k soah-boé-nı̂ 23 hoè ê 6 goe̍h Lân-hiong ê pēⁿ-sè pı̀ⁿ liáu chin bái, chiàu-khoàⁿ lı̄-liáu pia̍t-sè ê sı̂-kı̂ bô hn̄g lah. Nā-sı̄ i chin pek-chhiat kı̂-tó kiû Siōng-tè hō͘ i ē-tit khoàⁿ tio̍h i sò͘-thiàⁿ ê kiáⁿ Siú-gı̄ sêng-kong chiah lı̄-khui sè-kan. I-seng kap hō͘-sū-phoāⁿ tāi-ke iā chin kā i an-ùi, chiàu-kò͘, só͘-í pí-kàu-tek chin ū nāi.
Kàu 7 goe̍h tiong-sûn Siú-gı̄ í-keng pit-gia̍p tit-tio̍h ha̍k-sū ê bûn-pı̂n, iā tit-tio̍h lán kàu-hoē siat ê Tiong-ha̍k ê hó-ı̀, liōng-chá chiū chiau-phèng i beh thang kà lán ê Tiong-o̍h.
Tú-tú ta̍h jı̍p-mn̂g, chiong hêng-lí pàng lo̍h khı̀, kiâⁿ kàu pâng-keng ê pēⁿ-chhn̂g chêng beh kā lāu-bú chhéng-an ê sı̂, hut-jiân ū chı̍t ê chhiⁿ-hūn ê lâng-kheh chhoā chı̍t ê sió-chiá seⁿ-choè chin-súi toè āu-bı̄n jı̍p--lâi.
Chit-ê lâng-kheh tàu-tí sı̄ sím-mı̍h lâng? Chit-ê lâng-kheh sı̄ Hoâ-kiâu, chit pái beh tò lâi chó͘-kok sı̄-chhat, khah iàu-kín sı̄ beh tò lâi khoàⁿ sán-gia̍p phok-lám-hoē. I sı̄ tùi Hui-lı̍p-pin tò--lâi ê. I m̄-sı̄ tiâu-kang chhut-kok khı̀ choè seng-lí ê, i sı̄ tē-jı̄-hoê tāi-chiàn tùi Tâi-oân hō͘ Jı̍t-kun tiàu khı̀ choè thong-e̍k ê, Jı̍t-pún pāi-chiàn āu chū án-ni tiàm-tı̄ hia ê lâng. Chit ê lâng m̄-sı̄ pa̍t-lâng, chiū-sı̄ Tân Chheng-choâⁿ.
Tân Chheng-choâⁿ án-choáⁿ ē toè Siú- gı̄ jı̍p--lâi, siūⁿ lâi sı̄ chin kı̂-koài. Chóng-sı̄ che chiū-sı̄ “Jı̂n-seng hı̀-ke̍k sèng ê tiûⁿ-bı̄n”. Thiⁿ ē khoah bóng-bóng, éng to͘ ū chit-khoán kı̂-chek ê chhut-hiān.
Tng Jı̍t-pún pāi-chiàn ê sı̂, Chheng-choâⁿ tô-thoat Jı̍t-kun ê kàm-sı̄, tô-jı̍p toā chhiū-nâ, āu-lâi tı̍t-tı̍t cháu lo̍h lâm, cháu kàu chı̍t ê só͘-chāi kiò-choè Mi-na-nò-tó sı̄ Hui-lı̍p-pin kok tē 2 ê tó-sū, chı̍t ê tó tāi-iok ū lán Tâi-oân ê 3 poē toā. I ū khı̀ kàu La̍p-báu, khí-thâu tı̄ hia hō͘ lâng chhiàⁿ, in-ūi i sı̄ Tâi-oân-lâng. Kun-ho̍k thǹg hiat-ka̍k, kóng i sı̄ tùi Hok-kiàn khı̀ ê Hoâ-kiâu sı̄ chin khoài phiàn. Chin jı̄n-chin, taⁿ lâi kàu chia ē sí to͘ tio̍h phah-piàⁿ lah. I put-chí gâu choè seng-lí, i khoàⁿ Iâ-chí-iû, Iâ-chí-hún, chit-ê seng-lí ē choè tit, só͘-í i chiū tùi chit hong-bı̄n lâi chı̄n-la̍t, kó-jiân hō͘ i thàn tio̍h chı̂ⁿ. Bô goā-kú i tı̄ hia chiū koh kiàn-tı̀ ke-āu. Ū seⁿ chı̍t ê cha-bó͘ kiáⁿ kiò-choè “Lı̄-ná”. Liáu-āu lóng bô koh siⁿ kàu Lı̄-ná 18 hoè ê sı̂ i ê siⁿ-bó chiū koè-sin khı̀.
Kin-nı̂ 20 hoè lah, chit pái kap in lāu-pē choè-hoé koè lâi Tâi-oân, ǹg-bāng thang séng-chhin. Kin-nı̂ Chheng-choâⁿ iā 50 thóng lah, só͘-í iā bô siūⁿ beh koh chhoā. Koh chı̍t-bı̄n iā siūⁿ kóng tò lâi Tâi-oân khoàⁿ chit-pêng ê chhin-lâng taⁿ pı̀ⁿ cháiⁿ-iūⁿ, tùi chhut-goā kàu tò--lâi thâu-boé 23 nı̂. Tùi Ki-liông chiūⁿ-lio̍k, chek-sı̂ koáⁿ kàu Tâi-pak, khı̀ chhoē i ê tiūⁿ-lâng, chiah chai tiūⁿ-lâng sí lah, bó͘ koh toè lâng khı̀ lah. Chè-io̍h kong-si tó-pı̀ lah. Thó͘ chı̍t ē khùi, ah! Sè-sū ê to-piàn.
Koáⁿ-kín koáⁿ kàu Hoa-liân, khı̀ chhoē Hí-siong-hông chiú-ka, í-keng oāⁿ pa̍t-lâng khui, lāi-bı̄n bô poàⁿ-ê se̍k-sāi lâng, bô tàng mn̄g, bô lâng chai in lāu-pē ê siau-sit. Bô pān-hoat chiū khı̀ chhı̄ kong-só͘ (koān-hat chhı̄) tùi hō͘-chèng-khò tiâu-cha, chiah chai in lāu-pē tı̄ 3 nı̂ chêng, 71 hoè ê 6 goe̍h tiong pia̍t-sè. Koh tı̄ hō͘-kháu-siōng ū ka-cho̍k, sim-pū, sun-á. Sim-pū ê miâ Lí Lân-hiong, sun Siú-gı̄. Che sı̄ i só͘ siūⁿ bē kàu ê sū, iā kiaⁿ iā hoaⁿ-hí. In-ūi Lân-hiong chiū-sı̄ i só͘ kā lâng thún-ta̍h, āu-lâi kā i hiat-ka̍k ê lú-sèng. Koh ū kiáⁿ, chit-ê kiáⁿ sı̄ i ê chéng, i ê kut-jio̍k, hiat-thóng. Phāu chin toā ê giâu-gı̂ kap hò͘ⁿ-kı̂ ài chai chit-ê sū ê hi-sı̍t.
Tú tùi chhı̄-kong-só͘ chhut-lâi, tú-tio̍h chı̍t ê chheng-liân chhiú koāⁿ hêng-lí, hit-ê bı̄n hui-siông chhin-chhiūⁿ i ka-kı̄, só͘-í i chiū tùi āu-bı̄n tı̍t-tı̍t kā i toè. Sim-té àm-àm siūⁿ chit-ê kiám sı̄ tı̄ chhı̄-kong-só͘ hō͘-che̍k-siōng só͘ khoàⁿ kap lāu-pē Tân A-sêng siāng hō͘-lāi ê Lí Lân-hiong ê kiáⁿ. Só͘-í i chiū chhoā Lı̄-ná tiàm āu-bı̄n hn̄g-hn̄g kín kā i toè, nā-sı̄ Siú-gı̄ i lóng m̄-chai.
Kàu ūi jı̍p mn̂g, i iā toè Siú-gı̄ jı̍p-khı̀. Siú-gı̄ kap lāu-bú chhéng-an āu chhut-lâi thiaⁿ-nih, chiah khoàⁿ-tio̍h nn̄g ê chhiⁿ-hūn lâng-kheh, chiū mn̄g lâng-kheh lín tùi tó-ūi lâi, chhiáⁿ chē. Lâng-kheh ı̀n kóng, “Goá tùi Hui-lı̍p-pin lâi.” Pêng-sı̂ Siú-gı̄ bat thiaⁿ a-kong kóng, koh ba̍k-chiu kim-kim kā i siòng, sim-té iā chin kı̂-koài chit-ê lâng-kheh ê bı̄n-hêng, thé-thài, siaⁿ-im thái ē kap i hiah sio-siāng. Tùi án-ni bô khoà koh kóng-oē, kín jı̍p-khı̀ kā lāu-bú kóng, “Ma-mah goā-bı̄n ū chı̍t ê lâng-kheh, iā hit-ê lâng-kheh kóng sı̄ tùi Hui-lı̍p-pin lâi ê Hoâ-kiâu, i ê bı̄n-hêng, thé-thài, kóng-oē ê siaⁿ-im kap goá chin saⁿ-sêng.” Ma-mah kā i kóng, “Lí kā i chhéng-mn̄g i ê toā-miâ, i nā kóng sı̄ Tân Chheng-choâⁿ, lí chiah chhiáⁿ i lâi kap a-bú chhéng-an.” Siú-gı̄ chhut-khı̀ mn̄g lâng-kheh ê toā-miâ, kó-chin sı̄ Tân Chheng-choâⁿ. Siú-gı̄ chiū chhiáⁿ i jı̍p-khı̀ kóng, “Sian-siⁿ, khah sit-lé, goán ka-bó kóng beh kā lí chhéng-an.” Chheng-choâⁿ chiū jı̍p-khı̀. Chı̍t ē khoàⁿ kó-jiân sı̄ Lân-hiong. Lân-hiong sui-jiân sı̄ phoà-pı̄ⁿ, jı̂-chhiáⁿ chin siong-tiōng, m̄-kú tāi-ke iā sı̄ iáu ē jı̄n-tit. Tāi-ke tùi-khoàⁿ, bô oē háu chı̍t khùn, jiân-āu tùi Siú-gı̄ kap Lı̄-ná ê an-ùi chiah tāi-ke bô koh háu.
Lân-hiong chiah tùi thâu kàu boé siông-sè kóng chı̍t piàn hō͘ Chheng-choâⁿ thiaⁿ. Chheng-choâⁿ thiaⁿ liáu hui-siông ê kiàn-siàu, chū-chek, iā chin kám-kek, cha̍p-hun ê tông-chêng, koh chin siong-sim. Chiah chai Lân-hiong ê khó-chhú, siú-chiat, ū chı̀-khı̀, iā Siú-gı̄ kó-jiân sı̄ i ê hiat-thóng, kut-jio̍k ê chhin, chin hoaⁿ-hí i ū chhin-siⁿ ê kiáⁿ. Koh chai sı̄ chin chiâⁿ-mı̍h ê kiáⁿ, só͘-í hui-siông hoaⁿ-hí, kám-siā Lân-hiong ê chêng. Jiân-āu Chheng-choâⁿ iā chhim-chhim jı̄n-choē, soà kóng-khí i koè-khı̀ ê chêng-hêng, kâm ba̍k-sái khan Lân-hiong ê chhiú kóng, “Lân, kiû lí sià-bián goá.” Nn̄g lâng kóng liáu-āu, tāi-ke koh háu chı̍t khùn, chit pái liân Siú-gı̄ iā háu. Lı̄-ná khoàⁿ tāi-ke háu, i iā háu. Háu liáu tāi-ke chiah sio jı̄n.
Ūi-tio̍h koè-thâu ê heng-hùn, Lân-hiong hit mı̂ koh chhut chin-chē huih, keh-jı̍t koh khah soe-jio̍k, iā hoat koân-jia̍t. Tùi án-ni Chheng-choâⁿ tı̄ hia lâi chiâm-sim chiàu-kò͘ i. Siú-gı̄, Lı̄-ná iā chin un-khûn tàu kò͘ ma-mah. Nā-sı̄ í-keng siuⁿ bān lah. Keh-jı̍t pài 5 chá-khí 8 tiám, Lân-hiong tı̄ tiōng-hu, kiáⁿ, cha-bó͘-kiáⁿ chiàu-kò͘ ê ē-bı̄n, pêng-an lâi lı̄-khui sè-kan. Beh tn̄g-khùi ê sı̂ tùi i ê tiōng-hu Chheng-choâⁿ kau-tài nn̄g kù oē.
1. Choâⁿ ah, goá hoaⁿ-hí sià-bián lí, nā-sı̄ lí tio̍h hoán-hoé lâi chiap-siū Iâ-so͘, Iâ-so͘ sı̄ lí ê Kiù-chú. Chí-ū tio̍h sı̀n I, chiah ē tit-tio̍h sià-choē, thang tit-tio̍h Thiⁿ-pē ê un-tián.
2. Koh ǹg-bāng lí tio̍h thiàⁿ chit nn̄g ê kiáⁿ, chit-tùi kiáⁿ sı̄ lí ê kut-he̍k, sı̄ lí ê hiat-me̍h.
Chheng-choâⁿ ba̍k-sái hò͘ m̄ khui, kūi tı̄ pēⁿ-chhn̂g chêng, khan Lân-hiong ê chhiú lâi chim kóng, “Goá só͘ thiàⁿ ê Lân, chhiáⁿ lí an-sim, goá tek-khak bô koh ko͘-hū lí ê chêng-gı̄, cheng-chiat ūi goá lâi khan kiáⁿ, hōng-ióng hū-chhin ê chêng. Goá tek-khak toè lí ê kha-pō͘, it-seng sı̀n Chú Iâ-so͘, iā kap kiáⁿ chò-hoé pài Siōng-tè. Lí ê Siōng-tè chiū-sı̄ goá ê Siōng-tè, lí ê kiáⁿ chiū-sı̄ goá ê kiáⁿ. Chhiáⁿ lí an-sim.” Lân-hiong thiaⁿ chiah-ê oē liáu-āu sim chin siū an-ùi, ba̍k-chiu thí-khui oa̍t koè-lâi khoàⁿ Chheng-choâⁿ kóng, “Tiōng-hu, Choâⁿ! Lí chin-chiàⁿ sı̄ goá it-seng khó-ài ê siû-jı̂n, hō͘ goá tú-tio̍h chiah toā ê kan-khó͘. Chóng-sı̄ taⁿ goá ē tit koh kı̀ⁿ lí ê bı̄n, kiáⁿ iā sêng-kong lah. Taⁿ goá ê sim boán-chiok lah. Lí chhiáⁿ, goá beh lâi-khı̀ lah. Chú kap lín tı̄-teh.”
Kóng-soah bı̄n oa̍t koè-khı̀, chhin-chhiūⁿ nâ-âu khı̀ hō͘ thâm kéⁿ-teh ê khoán, ku̍h chı̍t siaⁿ chiū tn̄g-khùi. Hit sı̂ tú sı̄ pài 5 chá-khí 8 tiám 5 hun, it-seng hióng-siū 47 hoè, chit-ê chí-moāi chū án-ni lı̄-khui sè-kan. Chit-ê chí-moāi thang kóng it-seng jia̍t-sim ho̍k-sāi Chú, hó phín-hēng, ū chı̀-khı̀, ū chêng-gı̄, iú-hàu, gâu thé-thiap pang-chān lâng. Nā-sı̄ khó-sioh ūi-tio̍h chı̍t sı̂ ê sit-chhò, it-seng lâi siū-tio̍h hiah toā ê kan-khó͘, chin-chiàⁿ sı̄ it sit-chiok chhian-kó͘ hūn. Kiám m̄ sı̄ hō͘ lí, goá thang choè kàm-kài mah.
Lâm lú ı̄ⁿ-sèng ê kiû-ài sı̄ chhin-chhiūⁿ chû-se̍k ē hō͘-siong khip-ín, che sı̄ chō-hoà ê Sı̂n ê liap-lí, hō͘ i án-ni lâi tı̀-kàu hō͘ hu-hū ê koan-hē tit-tio̍h bí-moá ê kiàn-lı̍p. Nā-sı̄ Siōng-tè ê oē kóng, “Hun-in lâng-lâng tio̍h chun-tiōng, chhn̂g bô phah lâ-sâm; in-ūi su-thong kiâⁿ-ı̂m ê lâng, Siōng-tè beh sím-phoàⁿ i” (Hi-pek-lâi 13:4).
Chheng-choâⁿ ê só͘ choè, ēng lú-sèng sûn-chin ê thiàⁿ, khoàⁿ choè “Sèng-io̍k ê iû-hı̀”, sèng-io̍k ê thit-thô. Siōng-tè ná ē hoaⁿ-hí leh, só͘-í i it-seng tùi hu-hū kan ka-têng ê khoài-lo̍k, thang kóng chin put-hēng, cheng-sı̂n ê táⁿ-kek sı̍t-chāi chin toā. Tı̄ pa̍t hāng kiám-chhái ū sêng-kong, nā-sı̄ tı̄ jı̂n-seng tiong ê lú-phoāⁿ , it-seng ê tâng-phoāⁿ, saⁿ-kap toà ê khoài-lo̍k, i bêng-bêng sı̄ sit-pāi.
Lân-hiong chı̍t ē sí-lo̍h, Chheng-choâⁿ kap nn̄g ê kiáⁿ ūi-tio̍h chit-ê sū hui-siông ê pi-ai. Te̍k-pia̍t Chheng-choâⁿ ê sim, chhin-chhiūⁿ hō͘ to chha̍k thàu-koè ê siong-sim, múi-múi nā koh siūⁿ-tio̍h, to͘ siông-siông ka-kı̄ chek-pı̄ lâi lâu ba̍k-sái, hián-bêng i tùi Lân-hiong ê put-chū, kàu taⁿ to͘ iáu teh m̄-kam. (Oân)
