Khai-hòng-sek ê ka-têng

e̍k A-bú tı̄ chhù-āu ū chèng kúi-chióng koé-chí, lêng-géng, bo̍k-koe, niá-poa̍t-á ...... ū-ê í-keng chin koân-toā. Tùi goá sè-hàn ê sı̂, chit-ê sió-sió ê koé-chí-hn̂g to lóng sı̄ hū-kı̄n ê gín-á, siōng-ài lâi chhit-thô ê só͘-chāi. Peh chhiū-á, hàiⁿ chhian-chhiu, bak thô͘, pān ke-hoé-á ...... Iû-kı̂ nā kàu joa̍h--lâng, koh khah lāu-jia̍t, in-ūi ū chhiū-ńg hioh-liâng, koh ū koé-chí thang bán. Thong-siông chiah-ê koé-chí iáu-boē se̍k, gín-á tō lóng í-keng tòng-boē-tiâu, khai-sí thau-bán. Toā-lâng khoàⁿ--tio̍h, lóng chhiò-chhiò--à mē kóng: “Lín chiah-ê iau-kúi gín-á, beh chia̍h mā tio̍h tán khah se̍k leh!Án-ni chau-that lâng-ê mı̍h.” Gín-á chiū ē hoah lâi hoah khı̀: Goá bô lah, goá bô lah, sı̄ xx lah, xx lah. Ū-sı̂ siaⁿ-im chı̍t-jı̄ chı̍t-jı̄ thoa kah tn̂g-tn̂g-tn̂g. Chiah-ê hán-hoah ê siaⁿ, chhit-thô ê chhiò-siaⁿ, oan-ke ê khàu-siaⁿ, hō͘ chit-ê koé-chí-hn̂g-á chhiong-moá oa̍h-khı̀. Goán-bó͘ sı̄ tı̄ to͘-chhı̄ toā-hàn--ê, tùi chit-khoán hiān-siōng chin boē koàn-sı̀, sı̂-siông bâi-oàn kóng: “Chèng hiah-choē koé-chí, ka-kı̄ lóng chia̍h boē-tio̍h.” Tùi goán-ê gín-á ê chhit-thô-phoāⁿ, chhùi-ta ka-tı̄ jı̍p-khı̀ chàu-kha thı̂n-tê, sı̄m-chı̀ chū-tōng khui peng-siuⁿ ê chêng-hêng, í-kı̍p kap goán-ê gín-á tı̄ múi-chı̍t-keng pâng-keng bùn-lâi bùn-khı̀, sı̄m-chı̀ tı̄ goán teh khùn ê pâng-keng sńg kah loān-chhau-chhau ê chêng-hêng, koh khah boē koàn-sı̀, hā-pan tńg-lâi, sı̂-siông mı̍h-kiāⁿ ná khioh ná liām. Tān-sı̄ goán a-bú sı̂-siông kóng: Mı̍h-kiāⁿ ū-lâng beh chia̍h, chóng-pí bô-lâng beh chia̍h khah hó; chhù--lı̀n ū-lâng ài lâi, chóng pí bô-lâng ài lâi khah hó. Siū chit-khoán ê éng-hióng, goán-ê gín-á iā lóng kè-sêng in a-má ê chok-hong, in-ê a-chek a-ko͘ a-ı̂ nā chah thn̂g-á-piáⁿ tńg-lâi, it-tēng bô-goā-kú tō chia̍h-liáu-liáu, in-ūi m̄-nā in ka-tı̄ chia̍h, hiah-choē gín-á-phoāⁿ mā lóng choè-hoé chia̍h. Liân goán-bó͘ mā chiām-chiām hō͘ goán ê gín-á “tông-hoà” khı̀ ah. (Hong-hiòng Tē 15 kı̂, 1992 nı̂ 3 goe̍h)